Bugatti Chiron 110 Ans ផលិតតែ ២០ គ្រឿងគត់លើលោក តម្លៃវិញញាក់សាច់

ឧកញ៉ាសំពៅ — Mon, 22 Aug 2022 07:46:53 +0000

បើនិយាយពីរថយន្តស្ព័រស៊ីវិល័យ ក្រុមហ៊ុន Bugatti ច្បាស់ជាឈានមុខគេជាមិនខាន ជាមួយនឹងរូបរាងដ៏មានអំណាច និងកម្លាំងម៉ាស៊ីនខ្លាំងគ្មានគូប្រៀប ប៉ុន្តែរថយន្តកាន់តែស្អាត ម៉ាស៊ីនកាន់តែខ្លាំង Bugatti ក៏ល្បីមិនណយដែររឿងតម្លៃថ្លៃកប់ពពក។

តួយ៉ាង ដូចជារថយន្តប្រភេទ Limited Edition Bugatti Chiron 110 Ans ដែលផលិតមកតែ ២០ គ្រឿងគត់ក្នុងឱកាសអបអរគម្រប់ខួបទី ១១០ ឆ្នាំរបស់ក្រុមហ៊ុន Bugatti កាលពីឆ្នាំ ២០១៩ គឺមានតម្លៃរហូតដល់ប្រមាណ ៤,២ លានដុល្លារអាមេរិក។ នេះបើតាមប្រភពសារព័ត៌មានអន្តរជាតិធំៗបានចុះផ្សាយ។

ក្រឡេកទៅមើលពីលក្ខណៈពិសេសរបស់រថយន្តតម្លៃរាប់លានដុល្លារមួយនេះវិញគឺ បំពាក់មកនូវម៉ាស៊ីន Quad-Turbocharged W-16 ទំហំ ៨.០លីត្រ និងអាចផលិតកម្លាំងបានដល់ ១ ៥០០hp។ វាអាចរត់ដល់ល្បឿន ២៦១ MPH ឬប្រមាណ ៤២០ គម/ម៉ោង ចំណាយពេលត្រឹម ២,៤វិនាទីប៉ុណ្ណោះ ក្នុងការជាន់ល្បឿនពី ០-១០០ គម/ម៉ោង។

រចនាបថរបស់វាវិញ ទាំងក្រៅនិងក្នុងគឺរំលេចនូវការឌីហ្សាញជារាងទង់ជាតិប្រទេសបារាំង ដែលជាទីកំណើតនៃក្រុមហ៊ុនកំពូលមួយនេះ ខណៈតួរថយន្តគឺបានស្រោបដោយសសៃកាបូនយ៉ាងល្អិតល្អន់ ស្របពេលចង្កូតនៃរថយន្តគឺធ្វើឡើងដោយកាបូនសុទ្ធ ស្រោបដោយស្បែកពណ៌ខៀវ៕

The post Bugatti Chiron 110 Ans ផលិតតែ ២០ គ្រឿងគត់លើលោក តម្លៃវិញញាក់សាច់ appeared first on .