ប្រធានធនាគារពិភពលោក៖ ប្រទេសលោកខាងលិចត្រូវតែជួយអ៊ុយក្រែនស្ដារប្រទេសឡើងវិញ

ឧកញ៉ាសំពៅ — Wed, 12 Apr 2023 07:52:00 +0000

ធនាគារពិភពលោកបានត្រៀមខ្លួនរួចស្រេច ក្នុងការជួយដល់ប្រទេសអ៊ុយក្រែនកសាងសេដ្ឋកិច្ច និងហេដ្ឋារចនាសម្ព័ន្ធឡើងវិញ ប៉ុន្តែពួកគេក៏ត្រូវការជំនួយជាចាំបាច់ពីលោកខាងលិចបន្ថែម ដ្បិតទំហំការចំណាយគឺច្រើនលើសលុប។ នេះបើតាមសម្ដីប្រធានធនាគារពិភពលោក David Malpass បាននិយាយ។

ថ្លែងនៅកិច្ចប្រជុំនិទាឃរដូវរវាង World Bank និង IMF ថ្នាក់ដឹកនាំរូបនេះបន្ថែមថា កន្លងមកធនាគារពិភពលោកបានជួយដល់ឧស្សាហកម្មដែកថែបរបស់អឺរ៉ុប តាំងពីផ្ទុះសង្គ្រាមលោកលើកទី ២ ហើយក៏អាចនឹងដើរតួនាទីស្រដៀងគ្នាចំពោះបញ្ហានៅអ៊ុយក្រែនផងដែរ។

គួររំលឹកដែរថា កាលពីខែកញ្ញាឆ្នាំទៅ ធនាគារពិភពលោកបានព្យាករពីការចំណាយលើការស្ដារប្រទេសអ៊ុយក្រែនវិញដែលមានទំហំប្រមាណ ៣៤៩ពាន់លានដុល្លារ ប៉ុន្តែថ្មីៗនេះទិន្នន័យថ្មីបានបង្ហាញថា ពួកគេត្រូវការលុយយ៉ាងហោចណាស់ ៤១១ពាន់លានដុល្លារឯណោះ ដើម្បីបញ្ចប់គម្រោងមួយនេះ ដែលត្រូវការជំនួយជាចាំបាច់ពីប្រទេសលោកខាងលិច។

ទន្ទឹមនឹងនោះ សហរដ្ឋអាមេរិកក៏ធ្លាប់បង្ហើបដែរថា នឹងជួយផ្គត់ផ្គង់ដល់អ៊ុយក្រែនតាមលទ្ធភាពដែលអាចធ្វើទៅបាន ស្របពេល ដ្ឋលេខាធិការរតនាគារសហរដ្ឋអាមេរិក Janet Yellen និយាយថា អាមេរិក និងអឺរ៉ុប នឹងជួយគ្រប់បែបយ៉ាងដល់អ៊ុយក្រែនដល់ចុងឆ្នាំនេះ ហើយបើសិនជាសង្គ្រាមនៅតែបន្ត ពួកគេត្រូវស្វែងរកដៃគូបន្ថែមទៀត ដើម្បីជួយដល់អ៊ុយក្រែន។

សូមជម្រាបដែរថា កន្លងមកអាមេរិកគឺជាអ្នកជួយដល់អ៊ុយក្រែនធំបំផុត ទាំងផ្នែកសព្វាវុធ និងហិរញ្ញវត្ថុ បន្ទាប់ពីរុស្ស៊ីបើកការឈ្លានពានចូលអ៊ុយក្រែនកាលពីចុងខែកុម្ភៈឆ្នាំទៅ៕

The post ប្រធានធនាគារពិភពលោក៖ ប្រទេសលោកខាងលិចត្រូវតែជួយអ៊ុយក្រែនស្ដារប្រទេសឡើងវិញ appeared first on .

ប្រធានធនាគារពិភពលោក ប្រកាសចុះចេញពីតំណែងមុនអាណត្តិក្នុងឆ្នាំនេះ

ឧកញ៉ាសំពៅ — Thu, 16 Feb 2023 04:54:39 +0000

លោក David Malpass ប្រធានធនាគារពិភពលោកបានប្រកាសថា នឹងចុះចេញពីតំណែងមួយនេះមួយឆ្នាំមុនអាណត្តិរបស់លោកត្រូវបញ្ចប់។ នេះបើតាមការចុះផ្សាយពី CNN។

លោក Malpass នឹងចុះចេញពីមុខតំណែងនៅថ្ងៃទី ៣០ មិថុនាដែលជាចុងបញ្ចប់នៃឆ្នាំសារពើពន្ធរបស់ធនាគារពិភពលោក បន្ទាប់ពីកាន់តំណែងជាប្រធានធនាគារពិភពលោកអស់រយៈពេលច្រើនជាង ៤ឆ្នាំ។

លោក Malpass បាននិយាយនៅក្នុងសេចក្តីថ្លែងការណ៍មួយថា៖ “វាគឺជាកិត្តិយស និងឯកសិទ្ធិដ៏ធំសម្បើម ក្នុងការបម្រើការជាប្រធាននៃស្ថាប័នអភិវឌ្ឍន៍ឈានមុខគេរបស់ពិភពលោក”។

សូមជម្រាបដែរថា ធនាគារពិភពលោក គឺជាបណ្ដុំនៃប្រទេស ១៨៧ ដែលផ្ដល់ប្រាក់កម្ចីដល់ប្រទេសកំពុងអភិវឌ្ឍ ដើម្បីកាត់បន្ថយភាពក្រីក្រ ហើយក្នុងនាមសហរដ្ឋអាមេរិកជាម្ចាស់ភាគហ៊ុនធំបំផុត ពួកគេមានសិទ្ធក្នុងការជ្រើសតាំងបុគ្គលណាម្នាក់ជាប្រធាននៃស្ថាប័នមួយនេះ។

តួយ៉ាង កាលពីឆ្នាំ ២០១៩ អតីតប្រធានាធិបតី ដូណាល់ ត្រាំ បានតែងតាំង David Malpass ជាប្រធានធនាគារពិភពលោក រយៈពេល ៥ ឆ្នាំ ប៉ុន្តែក្នុងអាណត្តិរបស់លោកមានបញ្ហាផ្ទួនៗ។

ក្នុងអំឡុងពេលកាន់តំណែងរបស់ Malpass អង្គការបានឆ្លើយតបទៅនឹងវិបត្តិជាច្រើន រួមទាំងជំងឺរាតត្បាតសកល និងសង្រ្គាមរបស់រុស្ស៊ីនៅអ៊ុយក្រែន ហើយធនាគារពិភពលោកបាននិយាយថា Malpass បានអនុវត្តការកើនឡើងនូវកំណត់ត្រាហិរញ្ញវត្ថុក្នុងការឆ្លើយតបទៅនឹងវិបត្តិទាំងពីរ។

បន្ថែមពីនោះ លោកក៏បានផ្តោតលើគោលនយោបាយដើម្បីបង្កើនកំណើនសេដ្ឋកិច្ច កាត់បន្ថយបន្ទុកបំណុលរបស់រដ្ឋាភិបាល និងជួយកាត់បន្ថយភាពក្រីក្រ ប៉ុន្តែអាណត្តិរបស់គាត់មានភាពចម្រូងចម្រាស។

កាលពីខែកញ្ញាកន្លងទៅ Malpass ទទួលបានការរិះគន់យ៉ាងខ្លាំងពីសកម្មជនអាកាសធាតុ បន្ទាប់ពីលោកបដិសេធមិនព្រមបញ្ជាក់ពីមតិផ្ទាល់ខ្លួន ជុំវិញអំណះអំណាងអ្នកវិទ្យាសាស្ត្រថា ការដុតប្រេងហ្វូស៊ីល គឺជះឥទ្ធិពលគ្រោះថ្នាក់ដល់ពិភពលោក។

ហើយបន្ទាប់ពីទទួលបានការរិះគន់យ៉ាងសំបើម អ្នកប្រឆាំងជាច្រើនបានចេញមុខធ្វើបាតុកម្មទាមទារឲ្យប្រធានធនាគារពិភពលោក លាលែងពីតំណែងរបស់ខ្លួន។

ជុំវិញការលាលែងតំណែងនេះផងដែរ មិនមានហេតុផលបញ្ជាក់ច្បាស់លាស់ឡើយ ប៉ុន្តែលោក Malpass បានបញ្ជាក់ថា លោកសម្រេចជ្រើសយកការប្រកួតប្រជែងថ្មី ហើយពេលវេលានេះគឺសក្ដិសមបំផុតសម្រាប់ការផ្លាស់ប្តូរភាពជាអ្នកដឹកនាំដោយរលូននៅ Bank Group៕

The post ប្រធានធនាគារពិភពលោក ប្រកាសចុះចេញពីតំណែងមុនអាណត្តិក្នុងឆ្នាំនេះ appeared first on .