មហាសេដ្ឋី Harold Hamm ចែកភាគហ៊ុនតម្លៃជាង ២ ពាន់លានដុល្លារទៅកាន់កូន ៥ នាក់ ដោយឥតបង់ពន្ធសូម្បីមួយកាក់

ឧកញ៉ាសំពៅ — Thu, 17 Feb 2022 08:21:58 +0000

លោក Harold Hamm ដែលជាមហាសេដ្ឋីជនជាតិអាមេរិក និងជានាយកប្រតិបត្តិនៃក្រុមហ៊ុន Continental Resources Inc., ដែលជាក្រុមហ៊ុនខួងរ៉ែធំបំផុតមួយ បាននឹងកំពុងផ្ដល់ជូនឲ្យកូនៗទាំង ៥ របស់លោកនូវចំណែកភាគហ៊ុនដែលមានតម្លៃដល់ទៅ ២,៣ ពាន់លានដុល្លារ ដោយមិនបង់ពន្ធ។

យោងទៅតាមការចុះផ្សាយពី Bloomberg បានឲ្យដឹងថា បុរសវ័យ ៧៦ ឆ្នាំ បានឆ្លៀតឱកាសយ៉ាងល្អឥតខ្ចោះ ដោយចេះកេងយកផលប្រយោជន៍ពីច្បាប់របស់អាមេរិក សម្រាប់ការលើកលែងពន្ធនៃការផ្ដល់ជូនឲ្យសាច់ញាតិ ដែលជាទ្រព្យសម្បត្តិរាប់ជាកាដូរផ្សេងៗ។

តែបើមើលឲ្យជាក់ស្ដែងទៅ ច្បាប់មួយនេះបានផ្ដល់ផលប្រយោជន៍ខ្លាំងដល់ក្រុមមហាសេដ្ឋីសម្រាប់ការផ្ទេរមរតករបស់ពួកគេទៅកាន់កូនចៅជំនាន់ក្រោយដោយមិនចំណាយថវិកាលើពន្ធដារសូម្បីមួយកាក់។

ដើម្បីអាចផ្ទេរមរតកទៅកាន់កូនៗបាន មហាសេដ្ឋីរូបនេះបានបង្កើតគណនីជឿទុកចិត្តរបស់ពួកគេនីមួយតាមរយៈការខ្ចីប្រាក់ ហើយបើតាមឯកសារបញ្ជាក់ នៅថ្ងៃទី ០១ កក្កដា ២០២០ លោកបានខ្ចីប្រាក់ប្រមាណ ៧៦១ លានដុល្លារនៅក្នុងគណនីនីមួយៗរបស់កូនៗ ជាមួយអត្រាការប្រាក់ទាបបំផុត ដែលមើលទៅសមល្មមអាចដោះបំណុលនេះបានក្នុងរយៈពេលប៉ុន្មានឆ្នាំខាងមុខ។

ស្របពេលជាមួយគ្នានោះ រាប់ពីខែកក្កដា ២០២០ ដល់កុម្ភៈ ២០២២ តម្លៃភាគហ៊ុននៃក្រុមហ៊ុន Continental បានឡើងរហូតជិត ២៥០% ដែលធ្វើឲ្យទ្រព្យសម្បត្តិរបស់កូនៗរបស់លោកកើនដល់ជាង ២ ពាន់លានដុល្លារក្នុងម្នាក់។

យ៉ាងណា ពួកគេនៅតែជៀសមិនផុតពីការបង់ពន្ធសម្រាប់ទ្រព្យសម្បត្តិរបស់ពួកគេរៀងខ្លួន ប្រសិនបើពួកគេលក់ចំណែកភាគហ៊ុនទាំងនោះ ដ្បិតវាជាពន្ធលើប្រាក់ចំណេញនៃក្រុមហ៊ុន Continental ខណៈពួកគេមិនអាចធ្វើវាបានឡើយ លុះត្រាតែលោក Harold ទទួលអនិច្ចកម្ម៕

ប្រភព: Nairametrics

The post មហាសេដ្ឋី Harold Hamm ចែកភាគហ៊ុនតម្លៃជាង ២ ពាន់លានដុល្លារទៅកាន់កូន ៥ នាក់ ដោយឥតបង់ពន្ធសូម្បីមួយកាក់ appeared first on .

ស្ដេចត្រាញ់ប្រេងឆៅសញ្ជាតិអាមេរិក ប្រកាសបរិច្ចាគថវិកា ៥០ លានដុល្លារ ជួយសាងសង់មន្ទីរស្រាវជ្រាវថាមពលថ្មី

ឧកញ៉ាសំពៅ — Sat, 18 Dec 2021 01:48:27 +0000

មហាសេដ្ឋីប្រេងឆៅ លោក Harold Hamm បានប្រកាសនឹងបរិច្ចាគថវិកា ៥០ លានដុល្លារអាមេរិកសម្រាប់ការសាងសង់មន្ទីរស្រាវជ្រាវរកថាមពលថ្មីនៅសកលវិទ្យាល័យ Oklahoma State University ដែលគេរំពឹងថា នឹងក្លាយជាកូនសោសំខាន់ក្នុងការបង្កើតថាមពលឥន្ធនៈស្អាតជាងពេលបច្ចុប្បន្ន។

ការបរិច្ចាគនេះនឹងធ្វើឡើងតាមរយៈ Harold Hamm Foundation និង Continental Resources Inc. ដែលស្ថាប័នយក្សទាំង ២ នេះគឺគ្រប់គ្រងដោយមហាសេដ្ឋី Harold Hamm ហើយស្ថាប័ននីមួយៗនឹងបរិច្ចាគលុយប្រមាណ ២៥ លានដុល្លារទៅកាន់សកលវិទ្យាល័យខាងលើសម្រាប់គម្រោង Hamm Institure For American Energy នេះបើតាមការឲ្យដឹងពីការប្រកាសកាលពីថ្ងៃពុធកន្លងទៅ។

ដោយឡែក លោក Kayse Shrum ដែលជាអភិបាលរដ្ឋ Oklahoma បាននិយាយនៅក្នុងសេចក្ដីថ្លែងការណ៍ថា ការបរិច្ចាគមួយនេះនឹងនាំមកនូវអនាគតដ៏ភ្លឺស្វាងទៅកាន់ថ្នាក់ដឹកនាំទូទាំងពិភពលោក ជាមួយនឹងដំណោះស្រាយបញ្ហាដែលកំពុងមាននាពេលបច្ចុប្បន្នសម្រាប់សង្គម។

បញ្ជាក់ដែរថា លោក Hamm ដែលមានវ័យ ៧៦ ឆ្នាំគឺជាអ្នកតស៊ូមតិយ៉ាងខ្លាំងសម្រាប់ការផលិតប្រេង និងឧស្ម័ន បើទោះជាការខួងយកប្រេងមានការគាបសង្កត់ខ្លាំងប៉ុណ្ណាពីរដ្ឋាភិបាល ក្រោមហេតុផលប៉ះពាល់ដល់កត្តាបម្រែបម្រួលអាកាសធាតុ។

លោក Harold Hamm បច្ចុប្បន្នមានទ្រព្យសម្បត្តិប្រមាណ ១៣ ពាន់លានដុល្លារអាមេរិក និងជាអ្នកជំនួញដ៏ជោគជ័យម្នាក់នៅក្នុងវិស័យប្រេងឆៅនៅអាមេរិក៕

ប្រភព: jwnenergy

The post ស្ដេចត្រាញ់ប្រេងឆៅសញ្ជាតិអាមេរិក ប្រកាសបរិច្ចាគថវិកា ៥០ លានដុល្លារ ជួយសាងសង់មន្ទីរស្រាវជ្រាវថាមពលថ្មី appeared first on .