យ៉ាងណាទម្រាំមកដល់ចំណុចនេះ មានរឿងជាច្រើនណាស់ដែលលោកបានជួបប្រទះ។ កើតនៅរាជធានី Tashkent ប្រទេស Uzbekistan លោក  Jacob Arabo ជាកូនពៅក្នុងចំណោមកូនប្រុសស្រីប្រាំនាក់ ដោយកាលនៅក្មេង គាត់បានជួយជួសជុលនាឡិកាដៃរបស់បងស្រីជារឿយៗ។

នៅអាយុ ១៣ឆ្នាំឳពុករបស់លោកបានឲ្យកាដូនាឡិកាមួយគ្រឿង ដោយគាត់ស្រឡាញ់នាឡិកានោះណាស់ ហើយមានចំណង់ចំណូលចិត្តចាប់តាំងពីពេលនោះមក។ មួយឆ្នាំក្រោយមក ពោលនៅអាយុ ១៤ឆ្នាំ លោកនិងក្រុមគ្រួសារបានចំណាកស្រុក ក្នុងនាមជាជនអន្តោប្រវេសន៍ ចូលទៅតាំងទីលំនៅនៅទីក្រុងញូវយ៉ក ហើយបានចូលរៀននៅវិទ្យាល័យ Forest Hills នោះតែម្តង។

ដោយសារតែជីវភាពខ្វះខាតក្នុងគ្រួសារ Arabo បានសម្រេចចិត្តឈប់រៀននៅអាយុ ១៦ឆ្នាំទាំងមិនទាន់បានបញ្ចប់ថ្នាក់វិទ្យាល័យនៅឡើយ។ ក្រោយមក លោកបានចុះឈ្មោះចូលរៀននៅក្នុងវគ្គបណ្តុះបណ្តាលលើជំនាញផលិតគ្រឿងអលង្ការរយៈពេល ៦ខែ ហើយក៏ចាប់យកការងារក្នុងក្រុមហ៊ុនផលិតគ្រឿងអលង្ការមួយនៅទីក្រុងញូវយ៉ក ដោយលោកធ្វើការឲ្យគេនៅពេលយប់ រួចឆ្លៀតច្នៃគ្រឿងអលង្ការរកស៊ីដោយខ្លួនឯង នៅឯគ្រែដេកក្នុងផ្ទះតែម្តង។

ពេលនោះ គាត់រកលុយបានច្រើនណាស់ ដែលជាហេតុជំរុញទឹកចិត្តឲ្យគាត់ទៅបើកអាជីវកម្មផ្ទាល់ខ្លួន។ នៅឆ្នាំ១៩៨៦ កាលនោះលោកមានអាយុ ២១ឆ្នាំ Arabo បានបង្កើតក្រុមហ៊ុនគ្រឿងអលង្ការមួយកន្លែងឈ្មោះ Diamond Quasar ក្រោមម៉ាកយីហោ Jacob & Co. ។ លោកមានទស្សនៈថា៖ “ខ្ញុំត្រូវតែបង្កើតក្តីស្រមៃ បង្កើតអ្វីដែលមិនធ្លាប់មានពីមុនមក គេគិតថាវាមិនអាចទៅរួច តែខ្ញុំនឹងធ្វើឲ្យរឿងនោះក្លាយជាការពិត”។

ក្រោមការរចនា និងផលិតពីក្រុមហ៊ុនរបស់បុរសវ័យ ៥៩ឆ្នាំរូបនេះ នាឡិកាដៃប្រណីតថ្លៃៗជាច្រើនបានលេចវត្តមានលើកដៃមហាសេដ្ឋី តារាល្បីៗ និងខ្សែរាជវង្សជាច្រើន តួយ៉ាង Jay-Z, 50 Cent, Beyoncé, Big Sean, Rick Ross តារាបាល់ទាត់ David Beckham, Cristano Ronaldo, Lionel Messi ក៏ឃើញនិយមពាក់ញឹកញាប់នាឡិកាដៃរបស់ Jacob & Co. ខណៈម្ចាស់ខ្សែក្រវ៉ាត់លំដាប់ពិភពលោក Floyd Mayweather ក៏ជាម្ចាស់នាឡិកាដៃតម្លៃដល់ទៅជាង ១៨លានដុល្លារ ហើយក៏ឧស្សាហ៍ឃើញគ្រួសារមហាសេដ្ឋីប្រចាំទ្វីបអាស៊ី Mukesh Ambani ទិញពាក់ជាគ្រឿងអលង្ការលម្អខ្លួនផងដែរ។

ដោយមានអតិថិជនគោលដៅសុទ្ធសឹងតែជាមហាសេដ្ឋី អាជីវកម្មរបស់លោក Jacob Arabo បានលូតលាស់យ៉ាងជោគជ័យនៅរយៈពេលតិចជាងបួនទស្សវត្សមកនេះ ដោយបច្ចុប្បន្នកំពុងមានហាងដល់ទៅ ៩៤សាខាទូទាំងពិភពលោក និងទើបតែបានប្រកាសពីការសាងសង់អាគារ Burj Binghatti Jacob & Co. Residences កាលពីខែមិថុនា ឆ្នាំ២០២៣ ដោយសហការជាមួយអ្នកអភិវឌ្ឍន៍អចលនទ្រព្យ Emirati Binghatti ដែលជាអាគារកម្ពស់ ១០០ជាន់ ខ្ពស់កប់ពពកនៅចំកណ្តាលទីក្រុងឌូបៃ។

ជម្រាបជូនផងដែរថា យោងតាមការចុះផ្សាយពីសារព័ត៌មាន Celebrity Networth បានបង្ហាញឲ្យដឹងថា ទ្រព្យសម្បត្តិសរុបរបស់លោក Jacob Arabo មានចំនួនសរុបប្រមាណ ៥០លានដុល្លារអាមេរិក៕

The post វិវត្តន៍​ខ្លួនពីជនអន្តោប្រវេសន៍ លោក Jacob Arabo ក្លាយជាម្ចាស់ក្រុមហ៊ុននាឡិដាដៃលំដាប់កំពូល Jacob & Co appeared first on .

Jacob & Co​ ត្រូវបានបង្កើតឡើងដំបូងក្នុងឆ្នាំ១៩៨៦ ដោយអ្នករចនាពេជ្រ Jacob Arabo បច្ចុប្បន្នក្រុមហ៊ុននេះ មានទីស្នាក់ការកណ្តាលនៅសង្កាត់ Manhattan ទីក្រុងញូវយ៉ក ក៏ដូជាមានបណ្តាសាខាចែកចាយផ្សេងទៀត នៅក្នុងប្រទេសជាច្រើន។

រម្លឹកផងដែរថា បន្ទាប់ពីបានបញ្ចប់ការសិក្សាដំបូងពីសាលារចនាគ្រឿងអលង្ការ ក្នុងឆ្នាំ១៩៨១ នៅទីក្រុងញូវយ៉ក លោក Jacob Arabo បានបើកស្តង់តូចមួយ នៅក្នុងសង្កាត់ Diamond នៃទីក្រុងញូវយ៉ក ដែលជាកន្លែងលោកបានចាប់ផ្តើមធ្វើគ្រឿងអលង្ការ លក់ និងរចនាជូនជាពិសេសសម្រាប់តែអតិថិជនឯកជន ប៉ុណ្ណោះ។

លុះដល់ឆ្នាំ១៩៨១ លោក Arabo ក៏បានបើកក្រុមហ៊ុនផ្ទាល់ខ្លួនមួយ មានឈ្មោះថា “Diamond Quasar” ហើយបានចាប់ផ្តើមរចនា នៅក្រោមម៉ាកយីហោផ្ទាល់ខ្លួន ដែលមានឈ្មោះថា “Jacob & Co.”។

ដោយសារតែមានជំនាញ និងភាពច្នៃប្រឌិតប្លែកៗ ក្រុមហ៊ុន Diamond Quasar ចាប់ផ្តើមទទួលបានប្រជាប្រិយភាពកាន់តែខ្លាំង ក្នុងចំណោមអតិថិជនដែលមានទ្រព្យសម្បត្តិច្រើន។ ក្នុងទសវត្សឆ្នាំ១៩៩០ ក្រុមហ៊ុននេះ បានក្លាយជាចជាអ្នកលក់គ្រឿងអលង្ការដំបូងគេបង្អស់ដែលបង្កើតគ្រឿងអលង្ការធ្វើឡើងពីការដាំពេជ្រធំៗសម្រាប់បុរស ជាពិសេសសម្រាប់តារាៗ ក្នុងវិស័យចម្រៀង Hip-Hop ដែលក្នុងនោះរួមមាន Sean Combs, Biz, Jay-Z, Drake, 50 Cent និង Big Sean ជាដើម។ ក្រៅតែពីតារាចម្រៀង អតិថិជនរបស់ Jacob Arabo ក៏បានសាយភាពទៅដល់អ្នក​សិល្ប: ​អត្តពលិកល្បីៗ និងបុគ្គលមានឥទ្ធិពលជាច្រើនទៀត ផងដែរ។

ជាមួយនឹងភាពជោគជ័យរបស់ Jacob & Co នៅក្នុងអាជីវកម្មគ្រឿងអលង្ការ លោក Arabo ក៏បានចាប់ផ្តើមងាកទៅរកការផលិតនាឡិកាដៃប្រណីត បន្ថែមទៀត។ ក្នុងឆ្នាំ២០០២ លោកបានបង្កើតនាឡិកាដៃដ៏ពិសេសបំផុតមួយដែលធ្វើឡើងពីត្បូងពណ៌ខៀវ និងត្រូវបានដាក់ឈ្មោះថា Five Time Zone ជាមួយនឹងភាពច្នៃប្រឌិតដ៏ពិសេស ដោយអាចមើលម៉ោង នៅក្នុងតំបន់ Time Zone ៥ ផ្សេងគ្នាលើនាឡិកាដៃតែមួយ។

តាមរយ:ការផលិតនាឡិកាដៃដ៏ប្រណីតប្លែកខុសគេនេះ បានធ្វើឲ្យ Jacob & Co បន្តផ្តោតកាន់តែខ្លាំង ទៅលើការផលិតនាឡិកាដៃរូបរាងពិសេសផ្សេងៗទៀត រហូតមានការទទួលស្គាល់កាន់តែខ្លាំង ជាពិសេសពីសំណាក់អតិថិជនដែលសុទ្ធតែជាអភិជន។ មិនតែប៉ុណ្ណោះ Jacob & Co ក៏បានសហការគ្នាជាមួយក្រុមហ៊ុនលំដាប់កំពូលៗរបស់ពិភពលោកជាច្រើនយ៉ាងផងដែរ សម្រាប់ការផលិតនាឡិកាដៃបែប Limited Edition ដូចជាក្រុមហ៊ុនរថយន្ត Bugatti និងកំពូលតារាបាល់ទាត់ Lionel Messi ផងដែរ។

ជម្រាបជូនផងដែរថា នៅក្នុងឆ្នាំ២០២២ ប្រាក់ចំណូលរបស់ Jacob & Co ត្រួវបានគេរាយការណ៍ថា បានកើនឡើង ១៣២% ដល់ចំនួនសរុបប្រមាណ ១៨៨លានដុល្លារ។ ប្រាក់ចំណូលរបស់ Jacob & Co ត្រូវបានគេប៉ាន់ស្មានថា មានប្រហែល ៨០% ទទួលបានពីការលក់នាឡិកា និង ២០% ពីគ្រឿងអលង្ការ។ ម៉ាកយីហោនេះ គ្រោងនឹងបន្តពង្រីកទៅកាន់ទីផ្សារសំខាន់ៗមួយទៀត ដូចជា អារ៉ាប៊ីសាអូឌីត ហុងកុង ថៃ និងគុយវ៉ែត ជាដើម៕

The post Jacob & Co ក្រុមហ៊ុនផលិតនាឡិកាដៃល្បីល្បាញបំផុតរបស់ពិភពលោក មានអតិថិជនសុទ្ធតែជាអភិជន appeared first on .