JD

ក្រុមហ៊ុនខ្នាតយក្សចិន JD ត្រៀមចាយលុយ ៥ពាន់លានដុល្លារ ទិញភាគហ៊ុនរបស់ខ្លួនវិញ

ឧកញ៉ាសំពៅ — Wed, 28 Aug 2024 05:02:00 +0000

ក្រុមហ៊ុនពាណិជ្ជកម្មអេឡិចត្រូនិកចិន JD.com បានប្រកាសពីគម្រោងចាយលុយប្រហែល ៥ពាន់លានដុល្លារ ដើម្បីទិញយកភាគហ៊ុនរបស់ខ្លួនពីក្រុមវិនិយោគិនវិញ ដើម្បីស្ដារស្ថានការណ៍តម្លៃហ៊ុនរបស់ពួកគេ។

យោងតាមការចុះផ្សាយពីសារព័ត៌មាន Reuters បានបង្ហាញថា ផែនការរបស់ក្រុមហ៊ុនកំពូលចិនមួយនេះ គឺនឹងត្រូវអនុវត្តពីខែកញ្ញាតទៅ ខណៈកញ្ចប់ទឹកប្រាក់ដ៏ច្រើននេះ នឹងអាចឲ្យ JD ទិញភាគហ៊ុនមកវិញ ក្នុងរយៈពេល ៣៦ខែបន្ថែមទៀត។

សូមជម្រាបបន្ថែមថា ដោយសារស្ថានភាពផ្សារហ៊ុននៅចិន និងហុងកុង កំពុងបង្ហាញសញ្ញាណមិនសូវល្អ ដូច្នេះហើយក្រុមហ៊ុនកំពូលៗជាច្រើន ចាប់ផ្ដើមរៀបចំផែនការទិញភាគហ៊ុន ពីក្រុមវិនិយោគិនវិញ ដើម្បីផ្ដល់ទំនុកចិត្តដល់ពួកគេ តួយ៉ាងក្រុមហ៊ុន Alibaba បានត្រៀមកញ្ចប់លុយ ២៥ពាន់លានដុល្លារ សម្រាប់ធ្វើរឿងមួយនេះដូចគ្នា៕

The post ក្រុមហ៊ុនខ្នាតយក្សចិន JD ត្រៀមចាយលុយ ៥ពាន់លានដុល្លារ ទិញភាគហ៊ុនរបស់ខ្លួនវិញ appeared first on .

Walmart កើបលុយជាង ៣ពាន់លានដុល្លារ ក្រោយលក់ភាគហ៊ុនក្នុងក្រុមហ៊ុនចិន JD

ឧកញ៉ាសំពៅ — Thu, 22 Aug 2024 09:00:00 +0000

ក្រុមហ៊ុន Walmart Inc ទទួលបានទឹកប្រាក់ប្រហែល ៣,៦ពាន់លានដុល្លារ បន្ទាប់ពីលក់ភាគហ៊ុនយ៉ាងសម្បើមនៅក្នុងក្រុមហ៊ុនខ្នាតយក្សចិន JD.com Inc ដែលធ្វើឲ្យទំនាក់ទំនងដៃគូរកស៊ី ៨ឆ្នាំ រវាងក្រុមហ៊ុនទាំង២ ហាក់ជួបប្រទះភាពល្អក់កករ។

យោងតាមការចុះផ្សាយពីសារព័ត៌មាន Bloomberg បានបង្ហាញថា ក្រុមហ៊ុនលក់រាយខ្នាតយក្សអាមេរិក បានលក់ភាគហ៊ុនប្រមាណ ១៤៤,៥លានហ៊ុន ក្នុងតម្លៃជិត ២៥ដុល្លារក្នុងមួយហ៊ុន។

ការបញ្ចេញភាគហ៊ុនដ៏ច្រើនរបស់ក្រុមហ៊ុន Walmart បានជះឥទ្ធិពលយ៉ាងខ្លាំង ដល់ក្រុមហ៊ុន JD ពោលត្រឹមរយៈពេលមួយថ្ងៃប៉ុណ្ណោះ តម្លៃហ៊ុនរបស់ក្រុមហ៊ុនចិន បានថយចុះរហូតដល់ ១២% ឯណោះ។

សូមជម្រាបដែរថា ដើម្បីទប់ស្កាត់កុំឲ្យតម្លៃហ៊ុនបន្តថយចុះបែបនេះ ក្រុមហ៊ុន JD ក៏បានដកលុយជិត ៤០០លានដុល្លារ ដើម្បីទិញភាគហ៊ុនពីក្រុមវិនិយោគិនមកវិញផងដែរ៕

The post Walmart កើបលុយជាង ៣ពាន់លានដុល្លារ ក្រោយលក់ភាគហ៊ុនក្នុងក្រុមហ៊ុនចិន JD appeared first on .

ភរិយាប្រធានក្រុមហ៊ុន JD ជាប់ងារជាមហាសេដ្ឋីស្រីវ័យក្មេងបំផុតនៅចិន

ឧកញ៉ាសំពៅ — Wed, 14 Aug 2024 03:02:00 +0000

ក្រុមហ៊ុនស្រាវជ្រាវសេដ្ឋកិច្ច និងហិរញ្ញវត្ថុ Hurun បានចេញផ្សាយបញ្ជីឈ្មោះបុគ្គលជោគជ័យ ដែលជាអតីតនិស្សិតនៃសកលវិទ្យាល័យកំពូលៗនៅប្រទេសចិន ហើយក្នុងនោះអ្នកនាង Zhang Zetian បានបង្ហាញមុខនៅក្នុងបញ្ជីមួយនេះជាប់ៗគ្នា រយៈពេល ៣ឆ្នាំ ខណៈអ្នកនាងគឺជាភរិយារបស់ប្រធានក្រុមហ៊ុន JD មហាសេដ្ឋី Liu Qiangdong។

ប្រភពដដែលបានបង្ហាញថា អ្នកនាង Zhang គឺជាអតីតនិស្សិតពូកែម្នាក់នៅសកលវិទ្យាល័យកំពូល Tsinghua University ហើយបច្ចុប្បន្នអ្នកជំនួញស្រីម្នាក់នេះ មានទ្រព្យសម្បត្តិសរុប ៦០ពាន់លានយ៉ន់ ឬប្រមាណ ៨,៤ពាន់លានដុល្លារ និងត្រូវបានគេចាត់ទុកថា ជាមហាសេដ្ឋីស្រីវ័យក្មេងបំផុតនៅប្រទេសចិន ពោលបច្ចុប្បន្នអ្នកមានទើបមានអាយុ ៣១ឆ្នាំប៉ុណ្ណោះ។

ដោយសារមានរូបសម្រស់ស្រស់ស្អាត អ្នកនាង Zhang ធ្លាប់ត្រូវបានផលិតករភាពយន្តជាច្រើននាក់ ទាក់ទងសុំអ្នកនាងថតកុន អំឡុងពេលសិក្សានៅសកលវិទ្យាល័យ Tsinghua ប៉ុន្តែនាងបានបដិសេធ ដោយចង់ផ្ដោតលើការសិក្សាវិញ។

ក្រោយមក ស្រីស្អាតម្នាក់នេះក៏បានជាប់ចិត្តស្នេហាជាមួយ ប្រធានក្រុមហ៊ុន JD លោក Liu Qiangdong ហើយអ្នកទាំង ២ក៏បានរៀបការនៅក្នុងឆ្នាំ២០១៥ ហើយអតីតនិស្សិតនៅសកលវិទ្យាល័យ Tsinghua ម្នាក់នេះ ក៏បានកាន់តំណែងធំមួយនៅក្រុមហ៊ុន JD ផងដែរ។

ក្រៅពីការងារនៅក្រុមហ៊ុន មហាសេដ្ឋីស្រីម្នាក់នេះ ក៏ជាបុគ្គលមានឥទ្ធិពលបំផុតម្នាក់នៅក្នុងវិស័យហ្វេសសិន នៃប្រទេសចិន ពោលជានិច្ចកាលអ្នកនាងតែងតែបង្ហាញវត្តមាន នៅកម្មវិធីបង្ហាញម៉ូដធំៗ និងកម្មវិធីសម្ពោធភាពយន្តខ្នាតយក្សជាដើម៕

The post ភរិយាប្រធានក្រុមហ៊ុន JD ជាប់ងារជាមហាសេដ្ឋីស្រីវ័យក្មេងបំផុតនៅចិន appeared first on .

ការបង្ក្រាបវិស័យបច្ចេកវិទ្យានៅចិន ធ្វើឲ្យក្រុមហ៊ុនខ្នាតយក្សខាតបង់ជាង ១ទ្រីលានដុល្លារ

ឧកញ៉ាសំពៅ — Wed, 12 Jul 2023 10:57:00 +0000

ការបង្ក្រាបវិស័យបច្ចេកវិទ្យារបស់រដ្ឋាភិបាលចិនកាលពីជាង ២ឆ្នាំមុន បានធ្វើឲ្យក្រុមហ៊ុនខ្នាតយក្សជាច្រើនដែលរកស៊ីលើវិស័យមួយនេះ ទទួលរងផលប៉ះពាល់ជាខ្លាំង ប្រមាណជាង ១ទ្រីលានដុល្លារឯណោះ។

យោងតាមការចុះផ្សាយពីសារព័ត៌មាន CNA បានបង្ហាញថា រយៈពេលជាង ២ឆ្នាំមកនេះ វិស័យបច្ចេកវិទ្យានៅចិន ទទួលរងការខាតបង់ប្រហែល ១,១ទ្រីលានដុល្លារ ខណៈក្រុមហ៊ុនដែលរងការខាតបង់ខ្លាំងបំផុតនោះគឺ Alibaba Group, Tencent, Meituan, Baidu Inc និង JD.com។

យ៉ាងណាមួយរយៈកាលចុងក្រោយនេះ រដ្ឋាភិបាលចិនបានចេញវិធានការថ្មី ដោយបន្ធូរបន្ថយលើការរឹតបន្តឹង និងងាកមកបង្កើនកិច្ចសហប្រតិបត្តិការជាមួយនឹងក្រុមហ៊ុនឯកជននានាឡើងវិញ ដើម្បីបង្កើនកំណើនសេដ្ឋកិច្ច ដែលបានខាតបង់អំឡុងពេលមានជំងឺរាតត្បាត។

SHENZHEN, CHINA – 2020/10/06: Chinese multinational technology conglomerate holding company Tencent logo seen at its global headquarters in Shenzhen. (Photo by Alex Tai/SOPA Images/LightRocket via Getty Images)

តួយ៉ាង កាលពីពេលថ្មីៗនេះ ទីភ្នាក់ងាររៀបចំគម្រោងរដ្ឋចិនបានបើកកិច្ចពិភាក្សា ជាមួយក្រុមហ៊ុនបច្ចេកវិទ្យាធំៗដូចជា Tencent Holdings និង Alibaba Group ជាដើម ហើយថែមទាំងបានសរសើរក្រុមហ៊ុនទាំងនោះ ដែលរួមចំណែកក្នុងការអភិវឌ្ឍន៍វិស័យបច្ចេកវិទ្យាចិននាពេលកន្លងមក៕

The post ការបង្ក្រាបវិស័យបច្ចេកវិទ្យានៅចិន ធ្វើឲ្យក្រុមហ៊ុនខ្នាតយក្សខាតបង់ជាង ១ទ្រីលានដុល្លារ appeared first on .

ក្រុមហ៊ុនខ្នាតយក្សនៅចិនមួយ ចាប់ផ្ដើមកាត់បន្ថយប្រាក់ខែបុគ្គលិកជាន់ខ្ពស់ពី ១០-២០%

ឧកញ៉ាសំពៅ — Tue, 22 Nov 2022 06:56:11 +0000

ដោយសាររងឥទ្ធិពលពីវិបត្តិអចលនទ្រព្យក្នុងស្រុកផង និងសេដ្ឋកិច្ចពិភពលោកដែលកំពុងយ៉ាប់យ៉ឺនផង បណ្ដាលឲ្យក្រុមហ៊ុន JD.com របស់ចិនធ្វើការសម្រេចចិត្តដ៏ពិបាកបំផុតមួយ ដើម្បីសំរាលបន្ទុកក្រុមហ៊ុន។

យោងតាមការចុះផ្សាយពី CNA បានឲ្យដឹងថា ក្រុមហ៊ុនធំបំផុតលំដាប់ទី ១៥ ប្រចាំប្រទេស បានប្រកាសថា នឹងកាត់បន្ថយប្រាក់ខែបុគ្គលិកជាន់ខ្ពស់ដូចជា ប្រធានផ្នែកជាដើម ពី ១០% ដល់ ២០% ចាប់ពីឆ្នាំក្រោយទៅ។

មូលហេតុដែលក្រុមហ៊ុនសម្រេចធ្វើបែបនេះ គឺដើម្បីយកថវិកាទាំងនោះទៅបើកជូនបុគ្គលិកថ្នាក់ក្រោមៗ ដែលមានប្រាក់ខែតិច ក៏ដូចជាផ្ដល់នូវកញ្ចប់ធានារ៉ាប់រងដល់បុគ្គលិកផងដែរ។

សូមជម្រាបដែរថា ព័ត៌មានខាងលើគឺបានបែកធ្លាយ និងមានការចែករំលែកជាច្រើនលើបណ្ដាញសារព័ត៌មានក្នុងស្រុក ហើយអ្នកតំណាង JD ក៏បានអះអាងដែរថា ព័ត៌មានខាងលើគឺជារឿងពិតប្រាកដ៕

The post ក្រុមហ៊ុនខ្នាតយក្សនៅចិនមួយ ចាប់ផ្ដើមកាត់បន្ថយប្រាក់ខែបុគ្គលិកជាន់ខ្ពស់ពី ១០-២០% appeared first on .

មហាសេដ្ឋី Richard Liu ប្រកាសចុះចេញពីមុខតំណែង CEO នៃក្រុមហ៊ុន JD

ឧកញ៉ាសំពៅ — Thu, 07 Apr 2022 07:54:55 +0000

កាលពីពេលថ្មីៗនេះ ស្ថាបនិកនៃក្រុមហ៊ុន JD.com Inc., គឺលោក Richard Liu បានប្រកាសចុះចេញពីមុខតំណែងជា CEO នៃក្រុមហ៊ុន និងបានប្រគល់តួនាទីមួយនេះទៅឲ្យលោក Xu Lei ដែលទើបនឹងឡើងកាន់តំណែងជាប្រធានក្រុមហ៊ុនថ្មីថ្មោង។

បើយោងតាមឯកសារដែលបានប្រកាសកាលពីថ្ងៃព្រហស្បតិ៍បានឲ្យដឹងថា លោក Liu នឹងចូលរួមជាសមាជិកក្រុមប្រឹក្សាភិបាលដែលមានសមាជិក ៦ រូប ដោយមហាសេដ្ឋីម្នាក់នេះនឹងនៅតែរក្សាសមាសភាពជាប្រធានធំដដែល។

មួយរយៈកាលចុងក្រោយនេះ គេសង្កេតឃើញថា ក្រុមមហាសេដ្ឋីចិនជាច្រើនបានផ្ទេរមុខតំណែងសំខាន់ៗនៃក្រុមហ៊ុនទៅឲ្យបុគ្គលផ្សេងៗជាអ្នកគ្រប់គ្រង បន្ទាប់ពីប្រធានាធិបតី Xi Jingping ចាប់ផ្ដើមរឹតបន្តឹងច្បាប់លើវិស័យពាណិជ្ជកម្មអេឡិចត្រូនិក។

ជាក់ស្ដែង Zhang Yiming ដែលជាស្ថាបនិក ByteDacne Ltd., ក៏បានប្រកាសចុះចេញពីមុខងារជាប្រធានក្រុមហ៊ុន បន្ទាប់ពីលាឈប់ពីតំណែង CEO នៃក្រុមហ៊ុន TikTok បានប៉ុន្មានខែ ហើយលោក Su Hua ដែលជាស្ថាបនិក Kuaishou Technology ក៏បានប្រគល់តំណែងគ្រប់គ្រងក្រុមហ៊ុនទៅឲ្យសហស្ថាបនិក Cheng Yixiao ជាអ្នកគ្រប់គ្រងជំនួសផងដែរ។

បញ្ជាក់ដែរថា JD គឺជាក្រុមហ៊ុនផ្ដល់សេវាកម្មពាណិជ្ជកម្មអេឡិចត្រូនិកខ្នាតយក្សមួយ ដែលទទួលបានផលប្រយោជន៍ធំពីការរឹតបន្តឹងច្បាប់លើវិស័យមួយនេះ ដោយបានអូសទាញ Brands ធំៗជាច្រើនងាកមកប្រើប្រាស់ផ្លេតហ្វម (Platform) របស់ពួកគេ ក្រោយ Alibaba រងគ្រោះក្រោមការចោទប្រកាន់ពីរដ្ឋាភិបាល ពីការរំលោភទំនុកចិត្តអតិថិជន។

បើទោះជាបានលាលែងពីតំណែងជា CEO មែន តែលោក Liu បានសន្យាថា នឹងនៅតែជួយមើលការខុសត្រូវនៅក្រុមហ៊ុន ជាពិសេសគឺនៅរង់ចាំតម្រង់ផ្លូវដល់យុវវ័យជំនាន់ក្រោយ ក៏ដូចជាចូលរួមយ៉ាងសកម្មសម្រាប់យុទ្ធនាការ “ក្រោមមេឃតែមួយ” របស់ប្រធានាធិបតី Xi Jinping ផងដែរ៕

ប្រភព: Businessoutreach

The post មហាសេដ្ឋី Richard Liu ប្រកាសចុះចេញពីមុខតំណែង CEO នៃក្រុមហ៊ុន JD appeared first on .

យកគំរូតាម CEO ក្រុមហ៊ុន JD មហាសេដ្ឋីចិននាំគ្នាបរិច្ចាគថវិការយពាន់លានដុល្លារជួយដល់សង្គម

ឧកញ៉ាសំពៅ — Thu, 03 Feb 2022 08:11:56 +0000

កាលពីថ្ងៃពុធនេះ ស្ថាបនិកក្រុមហ៊ុនយក្ស JD.com និងជា CEO លោក Richard Liu បានប្រកាសនឹងបរិច្ចាគភាគហ៊ុននៃក្រុមហ៊ុនប្រមាណ ៦២,៤ លានហ៊ុនទៅកាន់កម្មវិធីសប្បុរសធម៌ ខណៈសកម្មភាពបែបនេះគឺត្រូវបានមហាសេដ្ឋីឯទៀតកំពុងយកគំរូតាម។

ការប្រកាសបរិច្ចាគទឹកប្រាក់នេះ ធ្វើឡើងក្រោយរដ្ឋាភិបាលចិនបានរឹតបន្តឹងទៅលើវិស័យបច្ចេកវិទ្យា រាប់បញ្ចូលទាំងក្រុមហ៊ុន JD.Com និងគូប្រជែង Alibaba Group Holding ផងដែរ ដែលជាផ្នែកមួយនៃវិធានការ “ក្រោមមេឃតែមួយ” របស់ប្រធានាធិបតី Xi Jinping ក្នុងការលុបបំបាត់វិសមភាពនៅក្នុងប្រទេសមហាអំណាចសេដ្ឋកិច្ចធំបំផុតទី ២។

ក្រៅពីលោក Liu នៅមានមហាសេដ្ឋីជាច្រើនទៀតកំពុងនាំគ្នាបរិច្ចាគលុយជូនរដ្ឋាភិបាលដែលមានដូចជា ស្ថាបនិកក្រុមហ៊ុន ByteDance លោក Zhang yiming បានបរិច្ចាគប្រាក់ ៥០០ លានយ៉ន់ ឬ ៧៨,៦១ លានដុល្លារទៅកាន់ទីក្រុង Longyan សម្រាប់ប្រព័ន្ធអប់រំ។

បើយោងតាមរបាយការណ៍កាលពីខែមិថុនាឆ្នាំទៅ ក្រុមហ៊ុនដឹកជញ្ជូនចំណីអាហារខ្នាតយក្ស Meituan ក៏បានបរិច្ចាគចំណែកភាគហ៊ុនដែលមានតម្លៃជាង ២ ពាន់លានដុល្លារសម្រាប់រដ្ឋាភិបាលផងដែរ។

បញ្ជាក់ដែរថា តម្លៃភាគហ៊ុនរបស់ JD នាពេលបច្ចុប្បន្នគឺ ៧៣,២១ ដុល្លារ ហើយបើសិនជាក្រុមហ៊ុនបរិច្ចាគជាង ៦២ លានហ៊ុន គឺវាមានតម្លៃជាង ៤,៥ ពាន់លានដុល្លារអាមេរិក៕

ប្រភព: kfgo

The post យកគំរូតាម CEO ក្រុមហ៊ុន JD មហាសេដ្ឋីចិននាំគ្នាបរិច្ចាគថវិការយពាន់លានដុល្លារជួយដល់សង្គម appeared first on .

ព្រឹត្តិការណ៍ Singles’Day ធ្វើឲ្យក្រុមហ៊ុនយក្ស ២ នៅចិន កើបបានលុយខ្ទង់ពាន់លានដុល្លារ ពីការលក់ទំនិញលើវេបសាយខ្លួន

ឧកញ៉ាសាមញ្ញ — Fri, 12 Nov 2021 10:49:51 +0000

ព្រឹត្តិការណ៍ Singles’Day ឬ 11.11 នៅក្នុងប្រទេសចិន បានបង្កើតកំណត់ត្រាលក់បានច្រើនជាង ១៣៣ ពាន់លានដុល្លារ សម្រាប់ក្រុមយក្ស Alibaba និង JD ។

ជាក់ស្តែងចំនួននៃការលក់របស់ក្រុមហ៊ុនទីផ្សារអនឡាញយក្សរបស់ចិន Alibaba Group សម្រាប់ពិធីបុណ្យទិញអីវ៉ាន់ប្រចាំឆ្នាំរបស់ខ្លួន ឬត្រូវគេស្គាល់ថា Singles’Day បានឈានដល់ ៥៤០.០៣ ពាន់លានយន់ (៨៤,៤៥ លានដុល្លារ) ពោលគឺជាកើន ១៤ % បើធៀបទៅនឹងឆ្នាំមុន ដែលក្រុមហ៊ុនរកបានត្រឹមតែ ៧៤ ពាន់លានដុល្លារប៉ុណ្ណោះ ពីការលក់ក្នុងព្រឹត្តិការណ៍ Singles’ Day ក្នុងរយៈពេល ១១ ថ្ងៃ។

ស្របពេលជាមួយគ្នានោះ ខាងក្រុមហ៊ុនទីផ្សារអនឡាញចិន JD.com បានសម្រេចការលក់របស់ខ្លួនបានដល់ចំនួន ៣១១,៤ ពាន់លានយន់ (៤៨,៦ ពាន់លានដុល្លារ) នៅគ្រប់ platforms របស់ខ្លួន ក្នុងអំឡុងព្រឹត្តិការណ៍នេះ ដែលជាចំនួនបំបែកលក់បំបែកកំណត់ត្រាកាលពីឆ្នាំមុនផងដែរ ។ ដោយកាលពីឆ្នាំមុន ចំណូលរបស់ JD មានចំនួនត្រឹម ២៧១,៥ ពាន់លានយន់ប៉ុណ្ណោះ ។

យ៉ាងណា នៅមុនពេលចាប់ផ្តើមនៃរយ:ពេលនៃការលក់នេះ ក្រុមអ្នកវិភាគបានរំពឹងថា ការលក់របស់ក្រុមហ៊ុន Alibaba នឹងមានការកើនឡើងបន្តិចបន្តួចប៉ុណ្ណោះ នៃតម្លៃសរុបចំពោះការលក់នៅក្នុងឆ្នាំនេះ ដោយសារតែបានមើលឃើញពីភាពយឺតយ៉ាវនៃការលក់រាយ កង្វះខាតការផ្គត់ផ្គង់ ការដាច់ចរន្តអគ្គិសនី និងការបិទប្រទេស ដោយសារបណ្តាលមមកពីការផ្ទុះឡើងនៃជំងឺកូវីដ ១៩ ជាដើម ។

រំលឹកផងដែរថា Alibaba គឺជាអ្នកដែលបានបង្កើតព្រឹត្តិការណ៍ Singles’ Day នេះឡើង ដោយចាត់ទុកថាជាពិធីបុណ្យដើរទិញឥវ៉ាន់ប្រចាំឆ្នាំរបស់ប្រទេសចិន ចាប់តាំងពីឆ្នាំ ២០០៩ មក ហើយឥឡូវនេះវាបានប្រែក្លាយទៅជាពិធីបុណ្យលក់ទំនិញអនឡាញដ៏ធំបំផុតរបស់ពិភពលោក ដែលវាគឺមានទំហំធំជាងព្រឹត្តិការណ៍ទិញទំនិញ Cyber Monday នៅសហរដ្ឋអាមេរិកទៅទៀត ។

ហើយចាប់តាំងពីពេលនោះមក ព្រឹត្តិការណ៍ ដែល Alibaba បានបន្តធ្វើដល់ទៅរយៈពេល ១១ ថ្ងៃកាលពីឆ្នាំទៅនេះ បានក្លាយជាបន្ទាត់វាស់កម្រិតកំណើននៃការទិញទំនិញ របស់ប្រទេសមហាអំណាចសេដ្ឋកិច្ចទី ២ លើលោកមួយនេះ ៕

ប្រភព: Middleeast

The post ព្រឹត្តិការណ៍ Singles’Day ធ្វើឲ្យក្រុមហ៊ុនយក្ស ២ នៅចិន កើបបានលុយខ្ទង់ពាន់លានដុល្លារ ពីការលក់ទំនិញលើវេបសាយខ្លួន appeared first on .

JD