Kanye West

ម៉ាកយីហោ Yeezy របស់អតីតមហាសេដ្ឋី Kanye West ជាប់បំណុលពន្ធ ៦០០ ០០០ ដុល្លារ

ឧកញ៉ាសំពៅ — Thu, 08 Dec 2022 09:59:00 +0000

តារារ៉េប Kanye West ធ្លាប់ទទួលបានងារជាមហាសេដ្ឋី ប៉ុន្តែបន្ទាប់ពីផ្ដាច់កុងត្រាជាមួយក្រុមហ៊ុន Adidas តំណែងជាអ្នកមានបំផុតមួយរូបនៅអាមេរិករបស់គេ ក៏បានរបូតទៅតាមនោះដូចគ្នា។

រឿងនៅមិនទាន់ចប់ទេ ពោលតាំងពីបាត់បង់ងារជាមហាសេដ្ឋី Kanye មានរឿងអាស្រូវឥតលោះពេល ហើយថ្មីៗនេះមានរបាយការណ៍អះអាងថា ម៉ាកយីហោ Yeezy របស់លោកកំពុងជាប់បំណុលពន្ធយ៉ាងតិច ៦០០ ០០០ ដុល្លារ។ នេះបើតាមការចុះផ្សាយពី Yahoo។

ដោយឡែក NBC News ក៏បានរាយការណ៍ទៀតថា បំណុលពន្ធរបស់ Yeezy គឺមានតាំងពីពាក់កណ្ដាលឆ្នាំ ២០២១ ពោលកាលពីខែកក្កដា ២០២១ នៅមិនទាន់បង់ពន្ធប្រមាណ ១៤ ០០០ ដុល្លារ ហើយខែកុម្ភៈ ២០២២ ជិត ២៨០ ០០០ ដុល្លារ និងខែកញ្ញាប្រហែល ៣២១ ៥៩០ ដុល្លារទៀត។

សូមជម្រាបថា មួយរយៈកាលចុងក្រោយនេះ Kanye ហាក់មានបញ្ហាផ្នែកហិរញ្ញវត្ថុជាខ្លាំង ដោយលោកបានផ្ដល់បទសម្ភាសន៍ជាមួយ Tim Pool កាលពីសប្ដាហ៍មុនថា កុងធនាគារទាំង ៤ របស់លោកត្រូវបានបង្កក ខណៈលុយនៅក្នុងនោះមានប្រមាណ៧៥ លានដុល្លារ ហើយលោកនៅជំពាក់បំណុលពន្ធ ៥០ លានដុល្លារទៀត៕

The post ម៉ាកយីហោ Yeezy របស់អតីតមហាសេដ្ឋី Kanye West ជាប់បំណុលពន្ធ ៦០០ ០០០ ដុល្លារ appeared first on .

តារារ៉េបល្បីឈ្មោះ Kanye West ប្រកាសឈរឈ្មោះជាបេក្ខភាពប្រធានាធិបតីអាមេរិក

ឧកញ៉ាសំពៅ — Mon, 21 Nov 2022 09:52:50 +0000

ការជ្រើសរើសប្រធានាធិបតីអាមេរិកសម្រាប់អាណត្តិថ្មី នឹងធ្វើឡើងនៅឆ្នាំ ២០២៤ ហើយថ្មីៗនេះអ្នកនយោបាយក៏ចាប់ផ្ដើមទម្លាយពីផែនការឈរឈ្មោះជាបណ្ដើរៗហើយដែរ ដូចជាអតីតប្រធានាធិបតី ដូណាល់ ត្រាំជាដើម។

យ៉ាងណា មិនមែនមានតែអ្នកនយោបាយឡើយ សូម្បីតែតារារ៉េប Kanye West ក៏បានប្រកាសដែរថា សម្រាប់តំណែងកំពូលនៃសហរដ្ឋអាមេរិកនាឆ្នាំ ២០២៤ លោកក៏នឹងចូលឈរឈ្មោះជាបេក្ខភាពប្រធានាធិបតីមួយរូបផងដែរ។ នេះបើតាមការចុះផ្សាយពី Nypost។

ប្រភពដដែលបន្ថែមថា បច្ចុប្បន្នតារារ៉េបរូបនេះ និងអ្នកអត្ថាធិប្បាយ Milo Yiannopoulos កំពុងរៀបចំធ្វើការឃោសនារកសន្លឹកឆ្នោត សម្រាប់អតីតមហាសេដ្ឋីអាមេរិកខាងលើ។

គួររំលឹកដែរថា Kanye West បានរបូតតំណែងជាមហាសេដ្ឋី បន្ទាប់ពីក្រុមហ៊ុន Adidas ប្រកាសផ្ដាច់កុងត្រាខ្នាតយក្ស បណ្ដាលឲ្យតារារ៉េបរូបនេះខាតបង់ប្រាក់ជាង ១ ពាន់លានដុល្លារ ពោលធ្លាប់មានលុយប្រហែល ១,៥ ពាន់លានដុល្លារ តែបច្ចុប្បន្ននៅសល់តែ ៤០០ លានដុល្លារប៉ុណ្ណោះ។ នេះបើតាមការអះអាងពី Forbes៕

The post តារារ៉េបល្បីឈ្មោះ Kanye West ប្រកាសឈរឈ្មោះជាបេក្ខភាពប្រធានាធិបតីអាមេរិក appeared first on .

Forbes៖ Kanye West របូតតំណែងជាមហាសេដ្ឋី ក្រោយផុតកុងត្រាជាមួយ Adidas

ឧកញ៉ាសំពៅ — Wed, 26 Oct 2022 07:45:01 +0000

កាលពីពេលថ្មីៗនេះ សារព័ត៌មាន Forbes បានទម្លាយថា តារាចម្រៀងរ៉េប Kanye West លែងក្លាយជាមហាសេដ្ឋីប្រាក់ពាន់លានដុល្លារទៀតហើយ បន្ទាប់ពីរូបគេ និងក្រុមហ៊ុនខ្នាតយក្ស Adidas បានបញ្ចប់កុងត្រារវាងគ្នា។

ប្រភពដដែលបានបន្ថែមថា ងារដែលអតីតស្វាមី Kim Kardashian ធ្លាប់ទទួលបាន គឺដោយសារតម្លៃកុងត្រារវាងលោក និង Adidas ធ្លាប់មានរហូតដល់ ១,៥ ពាន់លានដុល្លារ ប៉ុន្តែនៅពេលកុងត្រាមួយនេះបានបញ្ចប់ រូបលោកក៏លែងក្លាយជាមហាសេដ្ឋីទៀតដែរ។

Forbes ថែមទាំងអះអាងទៀតថា បច្ចុប្បន្ន ទ្រព្យសម្បត្តិរបស់ Kanye West គឺមានប្រមាណ ៤០០ លានដុល្លារ ដែលបានមកពីតម្លៃអចលនទ្រព្យ ជាម្ចាស់ភាគហ៊ុន ៥% នៃក្រុមហ៊ុន Skims និងលុយដែលបានមកពីវិស័យចម្រៀង។

យ៉ាងណា តារារ៉េបរូបនេះធ្លាប់ប្រកែកជាមួយ Forbes ថា រាយការណ៍ពីទិន្នន័យទ្រព្យសម្បត្តិរបស់ខ្លួនខុស ពោលទ្រព្យសម្បត្តិរបស់លោកគឺ មានប្រហែល ៧ ពាន់លានដុល្លារ ហើយកុងត្រាជាមួយ Adidas គឺប្រហែល ៤ ពាន់លានដុល្លារ ខុសទាំងស្រុងពីរបាយការណ៍ផ្ដល់ឲ្យដោយ Forbes ដែលអះអាងថា មានត្រឹម ២ ពាន់លានដុល្លារ៕

The post Forbes៖ Kanye West របូតតំណែងជាមហាសេដ្ឋី ក្រោយផុតកុងត្រាជាមួយ Adidas appeared first on .

មហាសេដ្ឋី Kanye West ប្រកាសបើកសាលារៀនឯកជន តម្លៃ ១៣ ០០០ ដុល្លារ/ឆ្នាំ

ឧកញ៉ាសំពៅ — Wed, 21 Sep 2022 07:49:11 +0000

តារាចម្រៀងរ៉េប Kanye West គឺជាសិល្បករមួយរូបដែលមានទ្រព្យសម្បត្តិរាប់ពាន់លានដុល្លារ ពីវិស័យជំនួញធំៗដូចជា ចាប់ដៃគូជាមួយក្រុមហ៊ុន Adidas និង Gap ជាដើម។

ថ្មីៗនេះ លោកបានបង្ហើបឲ្យដឹងថា លោកបានបើកសាលារៀនឯកជនមួយកន្លែង ក្នុងគោលបំណងបណ្ដុះបណ្ដាលយុវជនជំនាន់ក្រោយឲ្យក្លាយជា អ្នកដឹកនាំល្អ អ្នកច្នៃប្រឌិតខ្ពស់ជាដើម។ នេះបើតាមការចុះផ្សាយពី Therichest។

ដោយឡែក យោងតាមការសម្ភាសន៍ជាមួយ Bloomberg បានឲ្យដឹងថា ការបោះជំហានចូលក្នុងវិស័យអប់រំនេះ គឺផ្ដើមចេញពីខ្លួនលោកម្នាក់ឯងសុទ្ធសាធ ដ្បិតកន្លងមកមហាសេដ្ឋីអាមេរិកម្នាក់នេះធ្លាប់តែធ្វើការរួមគ្នាជាមួយក្រុមហ៊ុនធំៗ។

ទន្ទឹមនឹងនោះ Rolling Stone ក៏បានរាយការណ៍បន្ថែមដែរថា សាលារៀនឯកជនមួយនោះមានឈ្មោះថា Donda Academy ដែលដាក់ឈ្មោះតាមម្ដាយរបស់ Kanye ដែលបានចែកឋានទៅ ហើយសម្រាប់អាណាព្យាបាលដែលចង់ឲ្យកូនៗមករៀននៅទីនេះ តម្រូវឲ្យចុះកិច្ចសន្យាជាក់លាក់មួយ។

សម្រាប់តម្លៃសិក្សាវិញ Therichest បានរាយការណ៍មកថា ត្រូវចំណាយប្រហែល ១៣ ០០០ ដុល្លារ/ឆ្នាំ ខណៈចក្ខុវិស័យរបស់តារារ៉េបរូបនេះចង់បង្កើតសាខា Donda Academy ជាច្រើនកន្លែងទូទាំងប្រទេសក្នុងរយៈពេល ៥ ឆ្នាំ៕

The post មហាសេដ្ឋី Kanye West ប្រកាសបើកសាលារៀនឯកជន តម្លៃ ១៣ ០០០ ដុល្លារ/ឆ្នាំ appeared first on .

មហាសេដ្ឋី Kanye West មានផ្ទះទ្រនំខ្ពស់មិនចង់នៅ បែរប្រកាសចង់ក្លាយជាជនអនាថាទៅវិញ

ឧកញ៉ាសំពៅ — Tue, 21 Dec 2021 09:09:35 +0000

ដូចប្រិយមិត្តធ្លាប់បានដឹងរួចមកហើយថា Elon Musk ធ្លាប់បានប្រកាសថា នឹងលក់រាល់អចលនទ្រព្យរបស់លោកទាំងអស់គ្មានសល់ ពោលគឺមិនទុកសូម្បីតែផ្ទះមួយខ្នង ដោយសុខចិត្តទៅរស់នៅផ្ទះជួលវិញ។

ដោយឡែកតារាចម្រៀងរ៉េបដ៏ល្បី Kanye West ក៏បានប្រកាសដែរថា លោកមានគម្រោងចង់ប្រែក្លាយផ្ទះដែលមាននៅក្នុងកម្មសិទ្ធិរបស់លោកទាំងអស់ទៅជាវិហារ ឬក៏មណ្ឌលកុមារកំព្រានៅឆ្នាំក្រោយនេះ។

នៅក្នុងបទសម្ភាសន៍ជាមួយទស្សនាវដ្ដីអាល្លឺម៉ង់ 032c បុរសខាងលើអះអាងថា លោកនឹងប្រែភូមិគ្រឹះរបស់លោកទាំងអស់ទៅជាព្រះវិហារ ហើយជាលទ្ធផលលោកនឹងក្លាយជាជនអនាថា (Homeless)។

“ខ្ញុំនឹងក្លាយជាជនអនាថា (Homeless) នៅឆ្នាំក្រោយ។ ខ្ញុំនឹងប្រែក្លាយផ្ទះរបស់ខ្ញុំទាំងអស់ទៅជាព្រះវិហារ ហើយយើងនឹងធ្វើឲ្យមណ្ឌលកុមារកំព្រាមួយនេះក្លាយជាផ្ទះរបស់មនុស្សគ្រប់គ្នា ដែលនរណាៗក៏អាចស្វាគមន៍បាន”។

Kanye West ក៏ធ្លាប់បង្ហើបនៅក្នុងបទសម្ភាសន៍ជាមួយ Drink Champs អំពីចក្ខុវិស័យនៃការក្លាយជាជនអនាថារបស់លោក ដោយលោកចង់ក្លាយជាបុគ្គលម្នាក់ដែលមិនមានផ្ទះជាកម្មសិទ្ធិ តែចង់ទៅទីណា ក៏មានកន្លែងសម្រាប់លោកស្នាក់នៅ។

បញ្ជាក់ដែរថា បច្ចុប្បន្ន Kanye West មានទ្រព្យសម្បត្តិសរុបប្រមាណ ១,៨ ពាន់លានដុល្លារអាមេរិក ហើយសម្រាប់គោលបំណងនៃការក្លាយជាជនអនាថារបស់លោក គឺមិនដឹងថាអាចក្លាយជាការពិតបានដែរឬយ៉ាងណា តែបើក្រឡេកមើលទៅកាន់ Elon Musk គឺលោកពិតជាគោរពតាមពាក្យសន្យាដោយលក់អស់ផ្ទះសម្បែង ហើយបច្ចុប្បន្នគឺស្នាក់នៅផ្ទះជួល៕

ប្រភព: allhiphop