សេដ្ឋីចិនដែលប្រលងចូលមហាវិទ្យាល័យលើកទី២៧ មិនទទួលលទ្ធផលជោគជ័យឡើយ

ឧកញ៉ាសំពៅ — Mon, 26 Jun 2023 08:52:00 +0000

កាលពីដើមខែមិថុនានេះ សេដ្ឋីចិនដែលមានវ័យក្បែរ ៦០ឆ្នាំ បានចូលរួមប្រលងលើកទី ២៧ ដើម្បីអាចចូលរៀននៅមហាវិទ្យាល័យ ប៉ុន្តែលទ្ធផលដែលបានចេញមកគឺបង្ហាញថា លោកបានធ្លាក់ពីការប្រលងនោះហើយ។

យោងតាមការចុះផ្សាយពី CNA បានបង្ហាញថា សេដ្ឋីចិន Liang Shi ចាប់ផ្ដើមអស់សង្ឃឹម បន្ទាប់ពីបរាជ័យក្នុងការចូលរៀននៅមហាវិទ្យាល័យជាលើកទី ២៧ បើទោះជាលោកខំរៀនដាច់បាយដាច់ទឹក អស់រយៈពេល ១២ម៉ោងក្នុងមួយថ្ងៃ មុនពេលការប្រលងក្ដី។

ដោយឡែក ចំពោះលទ្ធផលនៃការប្រលងដែលបានចេញកាលពីថ្ងៃសុក្រនោះ គឺបង្ហាញថា លោក Liang ខ្វះតែ ៣៤ពិន្ទុប៉ុណ្ណោះ ទើបអាចចូលរៀននៅមហាវិទ្យាល័យបាន ហើយសារព័ត៌មានក្នុងប្រទេសចិនជាច្រើនបានចុះផ្សាយថា សេដ្ឋីចិនរូបនេះបង្ហាញការខកចិត្តជាខ្លាំង។

អាចនិយាយបានថា ការបរាជ័យសារនេះធ្វើឲ្យលោក Liang ពិបាកទទួលយក ពោលបរាជ័យរាប់ទសវត្សមកហើយ លោកតែងតែសន្យាថានឹងចូលរួមប្រលងឆ្នាំក្រោយទៀត ប៉ុន្តែលើកនេះលោកបាក់ទឹកចិត្ត និងចាប់ផ្ដើមសួរខ្លួនឯងថា ការខំប្រឹងរបស់គាត់កន្លងមក វាដូចជាមិនមានន័យអ្វីសោះ។

យ៉ាងណា លោកក៏នៅតែជំនះថា ឆ្នាំក្រោយលោកនឹងចូលប្រលងម្ដងទៀត ដោយសន្យាថានឹងព្យាយាមឲ្យខ្លាំងជាងឆ្នាំនេះ ព្រោះក្ដីស្រមៃរបស់លោក ក្រៅពីមានទ្រព្យសម្បត្តិច្រើនលើសលុប គឺប្រាថ្នាចូលរៀននៅសាកលវិទ្យាល័យ៕

The post សេដ្ឋីចិនដែលប្រលងចូលមហាវិទ្យាល័យលើកទី២៧ មិនទទួលលទ្ធផលជោគជ័យឡើយ appeared first on .

សេដ្ឋីចិនវ័យក្បែរ ៦០ ឆ្នាំ ដាក់ពាក្យចូលប្រឡងលើកទី ២៧ ដើម្បីបំពេញក្តីស្រមៃធំ

ឧកញ៉ាសាមញ្ញ — Wed, 07 Jun 2023 09:55:01 +0000

ក្នុងចំណោមសិស្សវិទ្យាល័យរាប់លាននាក់ ដែលបានចូលរួមក្នុងការប្រឡងដ៏តឹងរ៉ឹងបំផុតរបស់ប្រទេសចិន ដើម្បីត្រៀមចូលមហាវិទ្យាល័យ នៅថ្ងៃពុធនេះ គេសង្កេតឃើញថា សេដ្ឋីម្នាក់ ដែលមានវ័យជិត ៦០ ឆ្នាំ ក៏បានចូលរួមនៅក្នុងការប្រឡងនេះផងដែរ ។

លោក Liang Shi ដែលបច្ចុប្បន្នមានវ័យ ៥៦ ឆ្នាំ និងជាសេដ្ឋីម្នាក់ ដែលមានភាពជោគជ័យខ្លាំង នៅក្នុងវិស័យគ្រឿងសំណង់ នៅតែមានចិត្តមានះ បន្តដាក់ពាក្យចូលរួមក្នុងការប្រឡងដ៏តឹងរ៉ឹងបំផុត ដើម្បីបំពេញក្តីស្រមៃ ចូលរៀននៅក្នុងមហាវិទ្យាល័យកំពូលរបស់ប្រទេសចិន បើទោះបីជាធ្លាប់បរាជ័យជាច្រើនដងរួចមកហើយក៏ដោយ ។

យ៉ាងណាមិញ ដើម្បីចូលរួមក្នុងការប្រកួតប្រជែងជាមួយសិស្សវិទ្យាល័យរាប់លាននាក់ផ្សេងទៀត ដែលកំពុងប្រឡងនៅឆ្នាំនេះ លោក Liang បាននិយាយថា គាត់រស់នៅប្រៀបបានទៅនឹងជីវិតរបស់ព្រះសង្ឈអ៊ីចឹង អស់រយ:ពេលប៉ុនា្មនខែកន្លងមកនេះ ដោយត្រូវក្រោកពីព្រលឹម ដើម្បីរៀនរយ:ពេល ១២ ម៉ោង ក្នុងមួយថ្ងៃ ។

មិនតែប៉ុណ្ណោះ លោក Liang បាននិយាយប្រាប់ទៅកាន់សារព័ត៌មាន AFP សម្រាប់ការប្រឡងលើកទី ២៧ របស់ខ្លួនថា ៖ ” ខ្ញុំមិនដែលមានអារម្មណ៍ស្រណុកចិត្តនោះឡើយ ដែលខ្ញុំមិនអាចប្រឡងជាប់ ហើយចូលទៅរៀននៅក្នុងមហាវិទ្យាល័យ។ ខ្ញុំពិតជាចង់ទៅរៀនទៅសកលវិទ្យាល័យខ្លាំងណាស់ ដើម្បីក្លាយជាបញ្ញាវន្តមួយរូប ” ។

ជម្រាបជូនផងដែរថា ក្នុងរយ:ពេល ៤ ទសវត្សរ៍កន្លងមកនេះ លោក Liang បានបរាជ័យពីការប្រឡង ២៦ លើករួចមកហើយ បន្ទាប់ពីលោកបានចូលប្រឡងលើកដំបូងបំផុត កាលពីឆ្នាំ ១៩៨៣ នៅពេលដែលលោកមានវ័យត្រឹម ១៦ ឆ្នាំប៉ុណ្ណោះ ៕

The post សេដ្ឋីចិនវ័យក្បែរ ៦០ ឆ្នាំ ដាក់ពាក្យចូលប្រឡងលើកទី ២៧ ដើម្បីបំពេញក្តីស្រមៃធំ appeared first on .