Lifestyle ឧកញ៉ា

លោកស្រី ឆេង ស្រីរ័ត្ន ហៅ មាំមី Love Riya ទទួលគោរមងារ ជា “ឧកញ៉ា”

អ្នកឧកញ៉ាវត្តភ្នំ — Mon, 01 Jul 2024 14:32:43 +0000

លោកស្រី ឆេង ស្រីរ័ត្ន ដែលមហាជនភាគច្រើនស្គាល់ថា មាំមី Love Riya និងជាសហគ្រិនស្ត្រី ដ៏លេចធ្លោ ក្នុងវិស័យលក់ផលិតផលថែរក្សាសម្រស់តាមអនឡាញ ត្រូវបាន ព្រះករុណាព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា ត្រាស់បង្គាប់ផ្ដល់គោរមងារ ជា” ឧកញ៉ា”។ នេះបើយោងទៅផេក អ្នកស្រី ខ្ញុង ដែលបានបង្ហោះលើបណ្ដាញសង្គមប៉ុន្មាននាទីមុននេះ។

គួរបញ្ជាក់ដែរថា ក្រៅពីជាសហគ្រិនស្ត្រីឆ្នើម លើវិស័យអនឡាញ ដែលកំពុងរួមចំណែកផ្ដល់ការងារជាច្រើនកន្លែងជូនបុគ្គលិក អ្នកលក់អនឡាញស្ដុកស្ដម្ភរូបនេះ ក៏ត្រូវបានគេស្គាល់ថា ជាអ្នកជំនួញចូលចិត្តធ្វើបុណ្យ ចែកទាន ជួយអ្នកខ្វះខាតជីវភាព ចាស់ជរា និងចូលរួមសកម្មភាពសប្បុរសធម៌យ៉ាងសកម្មក្នុងសង្គមផងដែរ។

The post លោកស្រី ឆេង ស្រីរ័ត្ន ហៅ មាំមី Love Riya ទទួលគោរមងារ ជា “ឧកញ៉ា” appeared first on .

ឯកឧត្តម នេត្រ ភក្ត្រា កោតសរសើរដល់ក្រុមការងារឧកញ៉ាញូស៍ ដែលបានជ្រើសរើសមាតិកាសម្រាប់ការផ្សព្វផ្សាយបានត្រឹមត្រូវល្អ បែបវិជ្ជមាន និងគោរពក្រមសីលធម៌វិជ្ជាជីវៈបានល្អខ្ជាប់ខ្ជួន

ឧកញ៉ាកោះក្របី — Thu, 12 Oct 2023 09:31:29 +0000

ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានអនុញ្ញាតឱ្យលោក ខុត សីហា នាយកប្រតិបត្តិក្រុមហ៊ុន អូខេអិន មេឌា និងក្រុមការងារគេហទំព័រឧកញ៉ាញូស៍ អញ្ជើញចូលជួបសម្តែងការគួរសម និងពិភាក្សាការងារនៅទីស្តីការក្រសួងព័ត៌មាន ព្រឹកថ្ងៃទី១២ ខែតុលា ឆ្នាំ២០២៣នេះ។

ក្នុងជំនួបខាងលើនេះ លោក ខុត សីហា បានអបអរសាទរដល់ឯកឧត្តមរដ្ឋមន្ត្រី ដែលត្រូវបានជ្រើសតាំងជារដ្ឋមន្ត្រីក្រសួងព័ត៌មាន ក្នុងអាណត្តិថ្មី នៃរាជរដ្ឋាភិបាល ព្រមទាំងសម្តែងការគួរសម និងស្នើសុំអនុសាសន៍ណែនាំមួយចំនួនពីឯកឧត្តមរដ្ឋមន្ត្រី។ បន្ថែមពីនោះ ក្រុមការងារក៏បានជូនកាដូជាកន្ត្រកផ្លែឈើ និងគោរពជូនពរដល់ឯកឧត្តមរដ្ឋមន្ត្រី ក្នុងឱកាសពិធីបុណ្យភ្ជុំបិណ្ឌប្រពៃណីខ្មែរផងដែរ។

ក្នុងជំនួបនោះ ឯកឧត្តម នេត្រ ភក្ត្រា សូមកោតសរសើរដល់ក្រុមការងារឧកញ៉ាញូស៍ ដែលបានជ្រើសរើសមាតិកា (Contents) សម្រាប់ការផ្សព្វផ្សាយបានត្រឹមត្រូវល្អ បែបវិជ្ជមាន និងមានសារៈប្រយោជន៍ដល់សង្គម ហើយបានគោរពក្រមសីលធម៌វិជ្ជាជីវៈអ្នកសារព័ត៌មានបានល្អខ្ជាប់ខ្ជួន។ លើសពីនេះ ឯកឧត្តមរដ្ឋមន្ត្រី ក៏បានផ្តល់អនុសាសន៍ណែនាំដល់ក្រុមការងារឱ្យបន្តអនុវត្តលើ ៤ចំណុច រួមមាន៖ គោរពក្រមសីលធម៌វិជ្ជាជីវៈអ្នកសារព័ត៌មាន ការជ្រើសរើសមាតិកាផ្សាយ ល្បឿនចេញផ្សាយ និងព័ត៌មានប្រកបដោយគុណភាព ខណៈដែលឯកឧត្តម បានសង្កត់ធ្ងន់ដូច្នេះថា៖ «គុណភាពព័ត៌មានជាចំណុចសំខាន់នៃការស្លាប់រស់របស់ស្ថាប័នសារព័ត៌មាន»។

សូមជម្រាបថា ឧកញ៉ាញូស៍ ជាសារព័ត៌មានដែលផលិតមាតិកាផ្តោតចម្បងលើសេចក្តីរាយការណ៏ព័ត៌មានជុំវិញឧកញ៉ា អ្នកឧកញ៉ា មហាសេដ្ឋីពិភពលោក សេដ្ឋកិច្ច ពាណិជ្ជកម្ម សហគ្រិនភាព និងកិច្ចសម្ភាសជាធុរជនល្បីៗ ប្រកបដោយភាពទាន់សម័យបង្កើនផលវិជ្ជមាន និងកាត់បន្ថយផលអវិជ្ជមានណា ដែលប៉ះពាល់ដល់សង្គម។ បច្ចុប្បន្ន ឧកញ៉ាញូស៍ បាននឹងសហការផលិតមាតិកាព័ត៌មានអំពីផលិតផល សេវាកម្ម ដំណឹង ជូនក្រុមហ៊ុនធំៗ និងស្ថាប័ននានាជាច្រើនទម្រង់ ប្រកបដោយភាពស៊ីវិល័យ និងគុណភាពខ្ពស់៕

The post ឯកឧត្តម នេត្រ ភក្ត្រា កោតសរសើរដល់ក្រុមការងារឧកញ៉ាញូស៍ ដែលបានជ្រើសរើសមាតិកាសម្រាប់ការផ្សព្វផ្សាយបានត្រឹមត្រូវល្អ បែបវិជ្ជមាន និងគោរពក្រមសីលធម៌វិជ្ជាជីវៈបានល្អខ្ជាប់ខ្ជួន appeared first on .

ថ្ងៃខួបកំណើតភរិយា ឧកញ៉ា ខេមរៈ សិរីមន្ត ទិញរថយន្តប្រណីតប្រភេទអធិរាជ off-road ជាកាដូពិសេស

អ្នកឧកញ៉ាវត្តភ្នំ — Wed, 22 Jun 2022 06:28:18 +0000

ក្នុងថ្ងៃខួបកំណើតរបស់ឧត្ដមភរិយា លោកឧកញ៉ា ខេមរៈ សិរីមន្ត បានធ្វើរឿងគួរឱ្យភ្ញាក់ផ្អើល ធ្វើឱ្យអ្នកទទួលកាដូ ញញឹមបិទមាត់សឹងមិនជិត។ នោះគឺកាដូរថយន្តម៉ាក Jeep Sahara ដែលជាប្រភេទកំពូលរថយន្ត off-road ដ៏ល្បីល្បាញ និងពេញនិយមលើសកលលោក។

ក្នុងសារបង្ហោះជូនពរយ៉ាងខ្លី អមដោយសោររថយន្ត Jeep ដែលជាម៉ូឌែលរថយន្តដ៏ពេញនិយមលំដាប់អភិជន លោកឧកញ៉ា ខេមរៈ សិរីមន្ត អគ្គនាយកក្រុមហ៊ុនអចលនទ្រព្យ ខេមរៈសិរីមន្ត រៀលអុីស្តេត ឌីវេឡបភើរ មានប្រសាសន៍ថា៖ “នេះជាកាដូថ្ងៃកំណើតអូន ជូនពរអូន មានសុភមង្គលពេញមួយជីវិត”។

ទោះបីឧកញ៉ា ខេមរៈ សិរីមន្ត មិនបានបង្ហើបពីតម្លៃរថយន្តប្រភេទ off-road ម៉ាក Jeep នេះក្ដី ប៉ុន្តែបើផ្អែកតាមតម្លៃរថយន្តម៉ាក Jeep Sahara នេះ តម្លៃអាចចូលដល់ខ្ទង់ជិត ១០ម៉ឺនដុល្លារ ឯណោះ។

ជុំវិញចំណង់ចំណូលចិត្ត ជាមួយរថយន្តនេះដែរ បើតាមការធ្លាប់ផ្ដល់បទសម្ភាស៍ពិសេសជាមួយក្រុមការងារ Oknha News ក្នុងកម្មវិធី “សេដ្ឋី និងជំនួញ” កាលពីពេលថ្មីៗកន្លងទៅ ឧកញ៉ា ខេមរៈ សិរីមន្ត បង្ហើបថា រូបលោកមិនមែនជាអ្នកចូលចិត្តដូរស៊េរីរថយន្តញឹកញាប់ណាស់ណាទេ ប៉ុន្តែដោយសារតែ ការងារមុខជំនួញ និងអាជីពសិល្បៈ មានតម្រូវការចាំបាច់ដែរនោះ ទើបលោក និងក្រុមគ្រួសារ ចាំបាច់ត្រូវប្រើប្រាស់រថយន្តប្រហែល 4-5គ្រឿង សម្រាប់បំពេញតម្រូវការប្រចាំថ្ងៃ។

The post ថ្ងៃខួបកំណើតភរិយា ឧកញ៉ា ខេមរៈ សិរីមន្ត ទិញរថយន្តប្រណីតប្រភេទអធិរាជ off-road ជាកាដូពិសេស appeared first on .

អ្នកឧកញ៉ា ឧកញ៉ាៗ ណាខ្លះបង្ហាញភាសាបេះដូងចំថ្ងៃទិវានៃក្ដីស្រលាញ់?

អ្នកឧកញ៉ាវត្តភ្នំ — Tue, 15 Feb 2022 05:01:14 +0000

មនុស្សជាច្រើន ជាពិសេសអ្នកដែលមានដៃគូស្នេហា ម្ចាស់បេះដូងជាទីស្រលាញ់ ទ្រាំនឹងមិនបង្ហាញក្ដីស្រលាញ់ មិនបានទេ ត្បិតម្សិលមិញ ត្រូវនឹងថ្ងៃទី១៤ កុម្ភៈ ទិវានៃក្ដីស្រលាញ់ជាសកល។ ក្នុងចំណោម អ្នកបង្ហាញភាសាបេះដូងទាំងអស់នោះ ក៏មាន អ្នកឧកញ៉ា និងឧកញ៉ាៗ មួយចំនួន ដែលបានឆ្លៀតពេលវេលាដ៏មមាញឹកពីការងាររបស់ខ្លួន សាងភាពផ្អែមល្ហែមជូនមនុស្សជាទីស្រលាញ់ ចំថ្ងៃ ១៤កុម្ភៈ នេះដែរ។

ខាងក្រោមនេះ ជាពាក្យពេជន៍ដ៏ផ្អែមល្ហែម របស់អ្នកឧកញ៉ា និងឧកញ៉ាៗ ដែលបាន និយាយទៅកាន់ឧត្តមភរិយារបស់ពួកគាត់ ជាសាធារណៈ៖

១. អ្នកឧកញ៉ា គិត ម៉េង៖ ថ្ងៃនេះ យើងតែងតែរួមគ្នាប្រារព្ធនូវក្តីស្រឡាញ់ ជីវិត និងសុភមង្គល ហើយក៏ឱ្យពរជ័យដល់ភរិយារបស់ខ្ញុំដែរ។

២. អ្នកឧកញ៉ា ឡេង ណាវ៉ាត្រា៖ រីករាយថ្ងៃបុណ្យនៃសេចក្តីស្រលាញ់ម្ចាស់បេះដូងថ្លើមថ្លៃបងតែមួយគត់។ អរគុណគ្រប់យ៉ាងដែលតែងនៅក្បែរបងមើលថែបងគ្រប់ពេលវេលាអរគុណអូនដែលចូលក្នុងជីវិតបងបងស្រលាញ់អូនខ្លាំងណាស់ណាម្ចាស់ជីវិតបងអើយ

៣. ឧកញ៉ា អ៊ឹង ឃាង៖ ទោះបីជារវល់ការងារយ៉ាងណាក៏ដោយ ក៏បងមិនភ្លេចយកផ្កាកុលាបជូនអូនសម្លាញ់ ក្នុងថ្ងៃទិវានៃក្ដីស្រលាញ់ដែរ I love you

៤. ឧកញ៉ា ប៊ុន រតនាសេម៖ Happy Valentine’s Day ឆ្នាំក្រោយថែមសមាជិកម្នាក់ទៀតហើយសំណព្វចិត្ត

៥. ឧកញ៉ា អ៊ឹង គីមហុង៖ រីករាយថ្ងៃនៃក្តីស្រឡាញ់

៦. ឧកញ៉ា សឿ សុវណ្ណ៖ 5យ៉ាង ដែលធ្វេីអោយយេីងសោកស្តាយនៅពេលចាស់ទៅ

1. ពុំបានថែរក្សាសុខភាពពេលនៅក្មេង

2. ពុំខិតខំរកប្រាក់ពេលនៅក្មេង

3. ពុំបានចូលរួមធ្វេីសប្បុរសធម៌ និងជួយសង្គម

4. ពុំបានប្រេីចំណេះដឹង និងបទពិសោធន៍បង្ហាត់ដល់អ្នកជំនាន់ក្រោយ

5. ពុំបានថែរក្សាយកចិត្តទុកដាក់ចំពោះមនុស្សដែលខ្លួនស្រឡាញ់

Happy Valentine’s Day 2022

The post អ្នកឧកញ៉ា ឧកញ៉ាៗ ណាខ្លះបង្ហាញភាសាបេះដូងចំថ្ងៃទិវានៃក្ដីស្រលាញ់? appeared first on .

មកស្គាល់លម្អិតតម្លៃកំពូលរថយន្តប្រណិតលំដាប់អភិជនក្នុងក្ដីស្រមៃ លោកជំទាវឧកញ៉ា នឹម វណ្ណៈ

អ្នកឧកញ៉ាវត្តភ្នំ — Tue, 08 Feb 2022 08:24:14 +0000

លោកជំទាវឧកញ៉ា នឹម វណ្ណៈ ថ្មីៗនេះ បានបង្ហើបពីរថយន្តក្នុងក្ដីស្រមៃចំនួន ២ប្រភេទ ដែលសុទ្ធសឹងជារថយន្តលំដាប់អភិជន និងស៊េរីចុងក្រោយ ឆ្នាំ២០២២។ នោះគឺ រថយន្ត Mercedes Maybach S Class ឆ្នាំ២០២២ និងរថយន្ត Lamborghini ឆ្នាំ២០២២។ កំពូលរថយន្តផលិតនៅទ្វីបអឺរ៉ុប ទាំង២ស៊េរីនេះ ភាគច្រើនគេតែងតែឃើញវត្តមានកំពូលថ្នាក់ដឹកនាំ ប្រធានាធិបតីលំដាប់ពិភពលោក និងអ្នកមានធនធាននិយមប្រើប្រាស់ប្រចាំថ្ងៃ។ ដោយឡែក សម្រាប់ទីផ្សារប្រទេសកម្ពុជាយើង គេនៅមិនទាន់ឃើញមានអ្នក កុម្ម៉ង់ទិញជិះនៅឡើយទេ។

លោកជំទាវ ឧកញ៉ា នឹម វណ្ណៈ បានបង្ហោះសារមួយឃ្លា យ៉ាងដូច្នេះថា៖“តើគួរសំរេចចិត្តយ៉ាងណា ម្ខាងតាមបេះដូង ម្ខាងតាមខួរក្បាល ??? Mercedes Maybach S class 2022 VS lamborghini 2022 ” ។

ខាងក្រោមនេះ គឺជាតម្លៃ និងលក្ខណៈសម្បត្តិរបស់កំពូលរថយន្តស៊េរីឆ្នាំ ២០២២ ទាំង២ ស៊េរីនោះ ដែលក្រុមការងារ Oknha News ស្រាវជ្រាវ និងទើបទទួលបាន ពីបណ្ដាហាងលក់រថយន្តទំនើបនៅក្នុងរាជធានីភ្នំពេញ។

សម្រាប់រថយន្តប្រភេទ Mercedes-Maybach S-Class ២០២២ ផលិតចេញមក មាន ២ ម៉ូដែល គឺប្រភេទ

Mercedes-Maybach S580 4Matic និង Mercedes-Maybach S680 4Matic។ Mercedes-Maybach S580 4Matic ឆ្នាំ២០២២ តម្លៃលក់នៅបរទេស មានចាប់ពី ១៨៥ ០០០ ដុល្លារឡើងទៅ តែចំពោះតម្លៃក្នុងស្រុកខ្មែរវិញ អាចនឹងថ្លៃលើស ៥០ម៉ឺនដុល្លារ ក្រោយពេលគិតពន្ធនាំចូល។ ដោយឡែក សម្រាប់ម៉ូដែល Mercedes-Maybach S680 4Matic មានតម្លៃចាប់ពី ២១៥ ០០០ ដុល្លារឡើងទៅ ឯតម្លៃក្នុងទីផ្សារក្នុងស្រុកអាចថ្លៃដល់ជាង ៦០ម៉ឺនដុល្លារ។

S580 បំពាក់មកជាមួយម៉ាស៊ីន Twin-Turbocharged 4.0-Liter V-8 496-hp បន្ថែមជាមួយនិងប្រព័ន្ធ Hybrid 48 វ៉ុល ស្របពេល S680 បំពាក់ជាមួយម៉ាស៊ីន Twin-Turbocharged 6.0-Liter V-12 621-hp ហើយរថយន្តទំនើបទាំង ២ ម៉ូដែលគឺសុទ្ធតែដំណើរការដោយប្រព័ន្ធបើកបរគ្រប់កង់ All-Wheel Drive។

រថយន្តប្រភេទ S Class ទាំង ២ ម៉ូដែល មានការរចនាផ្នែកខាងក្នុងយ៉ាងប្រណីត ស្របពេលមានភាពទូលាយផ្ដល់ផាសុកភាពដល់អ្នកដំណើរ និងអ្នកបើកបរ ហើយកាន់តែអស្ចារ្យ គឺមានប្រព័ន្ធផ្ដល់ដំណឹងពេលមានការប៉ះទង្គិចផងដែរ។

ដោយឡែកសម្រាប់ការស៊ីសាំងលើការប្រើប្រាស់ គឺនៅមិនទាន់ត្រូវបានទម្លាយឱ្យដឹងនៅឡើយ តែសម្រាប់ល្បឿននៃរថយន្តទាំងនេះ គឺអាចរត់ពី ០ ដល់ ៦០mph ក្នុងរយៈពេល ៤ វិនាទី និង ១០០mph ក្នុងរយៈពេល ១០,១ វិនាទី ខណៈល្បឿនលឿនបំផុតគឺ ១៣០mph ។

ចំពោះរថយន្តទំនើបស្ព័រម៉ាក Lamborghini Huracan ឆ្នាំ២០២២ ដែលស្ថិតក្នុងចំណោមរថយន្តក្នុងក្ដីស្រមៃ របស់លោកជំទាវ ឧកញ៉ា នឹម វណ្ណៈ ដែរនោះ ផលិតចេញមក មាន៤ ម៉ូដែល។ ដូចជា Lamborghini Huracan ម៉ូដែល Evo, Evo Spyder, Fluo Capsule និង STO ខណៈ Evo គឺជាម៉ូដពេញនិយមជាងគេ និងមានតម្លៃធូរថ្លៃជាង ៣ ប្រភេទផ្សេងទៀត។

ចំពោះតម្លៃរបស់រថយន្តដែលមានរូបតំណាងគោជល់ខាងលើ គឺប្រភេទ Evo មានតម្លៃចាប់ពី ២១៣ ១០៤ ដុល្លារ Evo Spyder មានតម្លៃចាប់ពី ២៣៣ ៩៦១ ខណៈ Fluo Capsule មានតម្លៃចាប់ពី ២៨៧ ៤៩៨ ដុល្លារ ស្របពេល STO មានតម្លៃចាប់ពី ៣៣១ ៥៣៣ ដុល្លារ។ ដោយឡែក សម្រាប់តម្លៃរថយន្ត Lamborghini Huracan ស៊េរីឆ្នាំ ២០២២ ពេលមកដល់កម្ពុជា តម្លៃអាចនឹងលោតដល់ ជាង ៧០ម៉ឺនដុល្លារ ។

រថយន្តទំនើបមួយនេះ មានបំពាក់ជាមួយម៉ាស៊ីន 5.2 Liter V-10 ដែលមានកម្លាំង 602សេះ ដំណើរការដោយប្រព័ន្ធកង់ក្រោយ និង 631សេះ សម្រាប់រថយន្តដំណើរការដោយកង់ទាំង ៤ និងប្រភេទ STO។ យោងទៅតាមការសាកល្បងបើកបរទៅលើប្រភេទរថយន្ត Evo ដំណើរការដោយកង់ទាំង ៤ វាអាចរត់ពី ០ ដល់ ៦០ mph ក្នុងរយៈពេល ២,៥ វិនាទី និងឡើងដល់ ១៣៥mph ក្នុងរយៈពេល ១០,៤ វិនាទី។

ក្រៅពីមានអាជីវកម្មមួយចំនួនក្នុងដៃ និងជាសហគ្រិនឆ្នើមមួយរូប ហើយលោកជំទាវ តែងអញ្ជើញទៅណាមកណា ដោយប្រើប្រាស់រថយន្តម៉ាក Rolls-Royce និងរថយន្តម៉ាក Mercedes G500 របស់ខ្លួន។ ដោយឡែក បើនិយាយពីការងារចុះជួយសង្គមវិញ លោកជំទាវឧកញ៉ា នឹម វណ្ណៈ ត្រូវបានមហាជនស្គាល់ច្បាស់ថា ជាសប្បុរសជនចិត្តធម៌ដ៏សកម្ម ដែលតែងតែចេញមុខ ចូលរួមជាមួយរដ្ឋាភិបាលក្នុងសកម្មភាពសប្បុរសធម៌ និងបរិច្ចាគធនធានផ្ទាល់ខ្លួនជួយសង្គម និងប្រជាពលរដ្ឋខ្វះខាត កុមារកំព្រា ចាស់ជរា ទុរគត ជាញឹកញាប់មិនដែលខាន។

បន្ថែមពីនេះ លោកជំទាវ ក៏មានតួនាទីជាប្រធានអង្គការសប្បុរសធម៌កម្ពុជកុលបុត្រ ទទួលបន្ទុកមើលថែ និងចិញ្ចឹមបីបាត់កុមារកំព្រា ទុរគត រាប់សិបនាក់ ដែលមានទីតាំងនៅខេត្តសៀមរាបផងដែរ៕

The post មកស្គាល់លម្អិតតម្លៃកំពូលរថយន្តប្រណិតលំដាប់អភិជនក្នុងក្ដីស្រមៃ លោកជំទាវឧកញ៉ា នឹម វណ្ណៈ appeared first on .

អ្នកឧកញ៉ា គិត ម៉េង៖ បើអ្នកក្រោកពីគេង មុននាឡិការោទ៍ អ្នកអាចយកឈ្នះការប្រឈមដែលអាចកើតឡើងជារៀងរាល់ថ្ងៃ

អ្នកឧកញ៉ាវត្តភ្នំ — Wed, 19 Jan 2022 06:30:03 +0000

“ពេលវេលាមានកំណត់ បញ្ឈប់មិនបាន ពន្យារមិនបាន សន្សំក៏មិនបាន” នេះគឺជាខ្លឹមសារដ៏មានសារៈសំខាន់មួយ ដែលដកស្រង់ចេញពីសៀវភៅ ចិត្តវិទ្យាក្នុងការគ្រប់គ្រងពេលវេលា ក្នុងទំព័រទី ៧។ មើលឃើញ និងឆ្លងកាត់បទពិសោធផ្ទាល់ខ្លួននៃការប្រើប្រាស់ពេលវេលាប្រកបដោយប្រសិទ្ធភាព និងប្រសិទ្ធផលនេះ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា លោកក៏បានចូលរួមចែករំលែកនូវទស្សនៈទានដ៏សំខាន់មួយដែរ ទាក់ទងនឹងចិត្តវិទ្យានៃការគ្រប់គ្រង និងប្រើប្រាស់ពេលវេលាប្រចាំថ្ងៃឱ្យមានតម្លៃបំផុត។

អ្នកឧកញ៉ា ហុង ពីវ និងអ្នកឧកញ៉ា គិត ម៉េង

រូបភាពក្រុមហ៊ុន Cellcard នាព្រឹកព្រលឹម ប្រភព៖ FB អ្នកឧកញ៉ា គិត ម៉េង

ស្ថាបនិក សភាពាណិជ្ជកម្មកម្ពុជា អ្នកឧកញ៉ា គិត ម៉េង មានប្រសាសន៍ ដោយមានខ្លឹមសារទាំងស្រុងថា ទស្សនៈមួយបានលើកឡើងថា៖ “ការចូលគេងលឿន និងភ្ញាក់ពីព្រលឹមធ្វើឱ្យមនុស្សមានសុខភាពល្អ ទ្រព្យសម្បត្តិ និងប្រាជ្ញាឈ្លាសវៃ”។

យើងទាំងអស់គ្នាមានពេល២៤ម៉ោងដូចគ្នា ហើយពេលវេលា២៤ម៉ោងរបស់យើងជារៀងរាល់ថ្ងៃអាចមានភាពខុសគ្នា ប្រសិនបើយើងព្យាយាមបង្កើនប្រសិទ្ធភាពក្នុងការប្រើប្រាស់វា។ ខ្ញុំចងចាំក្នុងការអនុវត្តទម្លាប់របស់ខ្ញុំជារៀងរាល់ថ្ងៃ ព្រោះខ្ញុំចង់ចាប់ផ្តើមសកម្មភាពប្រចាំរបស់ខ្ញុំ ឱ្យបានព្រឹកព្រលឹមតាមដែលអាចធ្វើទៅបាន នៅពេលដែលអ្វីៗគ្រប់យ៉ាងមានសភាពស្ងប់ស្ងាត់។ ភាពស្ងប់ស្ងាត់ពេលព្រឹក និងខ្យល់អាកាសបរិសុទ្ធអាចនាំមកនូវអារម្មណ៍ល្អ និងភាពវិជ្ជមានដល់ចិត្ត និងរាងកាយរបស់អ្នក។

អ្នកឧកញ៉ា គិត ម៉េង

“ខ្ញុំចូលចិត្តចាប់ផ្តើមសកម្មភាពប្រចាំថ្ងៃរបស់ខ្ញុំជាមួយនឹងការពត់ខ្លួន ធ្វើលំហាត់ប្រាណស្រាលៗ និងបង្កើនថាមពលជាមួយនឹងអាហារពេលព្រឹក ជាមួយគ្រួសារដែលធ្វើឱ្យយើងមានសុខភាពល្អ និងថាមពលគ្រប់គ្រាន់ពេញមួយថ្ងៃ។ បន្ទាប់ពីនោះ ខ្ញុំនឹងនៅតែមានពេលពិនិត្យមើលកាលវិភាគប្រចាំថ្ងៃរបស់ខ្ញុំ ហើយឆ្លើយតបទៅសារសំខាន់ៗមួយចំនួន មុនពេលខ្ញុំទៅធ្វើការ។ នៅម៉ោង៩ព្រឹក ខ្ញុំនឹងបញ្ចប់កិច្ចការសំខាន់ៗជាច្រើន ហើយនៅតែមានពេលពេញមួយថ្ងៃ ដើម្បីធ្វើកិច្ចការជាច្រើនបន្ថែមទៀត”។ អ្នកឧកញ៉ា ពន្យល់លម្អិតយ៉ាងដូច្នេះ។

អ្នកឧកញ៉ា បានបន្ថែមថា៖ “ប្រសិនបើអ្នកក្រោកពីគេង មុនកំណត់នាឡិការោទ៍របស់អ្នក អ្នកអាចយកឈ្នះការប្រឈមដែលអាចកើតឡើងជារៀងរាល់ថ្ងៃ។ ជម្រើសសំខាន់ពីរដំបូងនៃការចាប់ផ្តើមថ្ងៃរបស់អ្នកគឺ បន្តគេងជាមួយសុបិនរបស់អ្នកដោយផ្អាកម៉ោងរោទ៍របស់អ្នក ឬភ្ញាក់ពីព្រលឹមតាមដែលអ្នកអាចធ្វើទៅបានហើយធ្វើឱ្យសុបិននោះក្លាយជាការពិត។ របៀបដែលអ្នកប្រើប្រាស់ពេលវេលា២៤ម៉ោងរបស់អ្នកឥឡូវនេះអាចកំណត់ថា តើអ្នកទៅដល់គោលដៅរបស់អ្នកបានលឿនប៉ុនណា និងឆ្លុះបញ្ចាំងពីអនាគតរបស់អ្នកផងដែរ។

អ្នកឧកញ៉ា គិត ម៉េង ក៏បានផ្ដាំទៀតថា៖ “សូមក្រោកពីព្រលឹម ពង្រឹងគំនិត ប្រមូលផ្តុំការយកចិត្តទុកដាក់ ហើយត្រៀមខ្លួនសម្រាប់ថ្ងៃថ្មីជាប្រចាំ” ៕

The post អ្នកឧកញ៉ា គិត ម៉េង៖ បើអ្នកក្រោកពីគេង មុននាឡិការោទ៍ អ្នកអាចយកឈ្នះការប្រឈមដែលអាចកើតឡើងជារៀងរាល់ថ្ងៃ appeared first on .

ឃើញស្លៀកពាក់ស្អាតបាត ជិះឡានទំនើប តាមពិតឧកញ៉ា សំ សុខនឿន ចុះប្រឡូកការងារអចលនទ្រព្យដូចកសិករសឹងរាល់ថ្ងៃ

អ្នកឧកញ៉ាវត្តភ្នំ — Thu, 13 Jan 2022 03:45:21 +0000

ធ្លាប់តែបង្ហាញខ្លួនជាសាធារណៈ ក្នុងនាមជាអ្នកចែករំលែកចំណេះដឹង ជំនាញ បទពិសោធដល់មហាជន តាមបណ្ដាញសារព័ត៌មាន និងឡើងប៉ុស្តុ៍ទូរទស្សន៍ ប៉ុន្តែថ្ងៃនេះ ប្រធានសមាគមអចលនទ្រព្យសកល ឧកញ៉ា សំ សុខនឿន ងាកមកចែករំលែកបទពិសោធនដ៏កម្រ ស្ដែងពីតថភាពពិតក្នុងនាមជាអ្នកប្រឡូកក្នុងវិស័យអចលនទ្រព្យ ក្នុងរយៈពេលជាង ១០ឆ្នាំ កន្លងមកនេះ។

ឧកញ៉ា សំ សុខនឿន បង្ហើបថា៖ “ខ្ញុំបាទ ឈ្មោះ សំ សុខនឿន ត្រូវបានគេស្គាល់ថា Sam។ បងប្អូនតែងតែឃើញខ្ញុំស្លៀកពាក់ស្អាតបាតសមរម្យ តាមរយៈសារព័ត៌មាន និងប៉ុស្តិ៍ទូរទស្សន៍ តែបងប្អូនដឹងទេថា ខ្ញុំតែងតែដើរចុះទឹកស្រែ ដើរតាមផ្លូវបន្លារ ជិះម៉ូតូតាមផ្លូវដីហុយ ផ្លូវភ្លឺស្រែ ក្រោមភ្លៀង និងកំដៅថ្ងៃជាង ១០ឆ្នាំមកហើយ ពីមុនធ្វើបែបនេះស្ទើរតែរាល់ថ្ងៃ ដោយសារតួនាទីជាអ្នកវិនិយោគអចលនវត្ថុដោយខ្លួនឯង។”

តាមរយៈសំណេររៀបរាប់ពីដំណើរជីវិតតស៊ូ ចាប់ផ្ដើមពីជំហ៊ានដំបូង ទម្រាំជោគជ័យឈរជើងបានរឹងមាំក្នុងនាមជាអ្នកអភិវឌ្ឍន៍វិស័យអចលនទ្រព្យនៅកម្ពុជា ដូចនាពេលបច្ចុប្បន្ននេះ គេអាចវាយតម្លៃបានថា ឧកញ៉ា សំ សុខនឿន ជាមនុស្សម្នាក់ដែលមានការលះបង់ខ្ពស់ និងមានគោលដៅមុតស្រួច ក្នុងអាជីពមួយនេះ ត្បិតការប្រឡូកខ្លួន ឬបជ្រាបខ្លួនក្នុងវិស័យអចលនទ្រព្យ មិនមែនជាការងារងាយស្រួល ឬជាការងារដែលអង្គុយ ក្នុងម៉ាស៊ីនត្រជាក់ ពាក់ខោអាវស្អាតៗតែប៉ុនណេះទេ ។

បើងាកមកចាប់អារម្មណ៍ពីប្រវត្តិសិក្សារបស់ ប្រធានសមាគមអចលនទ្រព្យសកល ឧកញ៉ា សំ សុខនឿន វិញ ឃើញថា លោកមានប្រវត្តិជាកូនកសិករនៅស្រុកក្រូចឆ្មារ ខេត្តត្បូងឃ្មុំ (អតីតខេត្តកំពង់ចាម) ក៏ពិតមែន ប៉ុន្តែលោកបានបន្តការសិក្សា រហូតដល់បរទេសឯណោះ។

1. បឋមសិក្សា៖ នៅសាលាបឋមសិក្សាខ្សាច់ប្រឆេះកណ្តាល ឃុំក្រូចឆ្មារ ស្រុកក្រូចឆ្មារ ខេត្តត្បូងឃ្មុំ (អតីតខេត្តកំពង់ចាម)។

2. អនុវិទ្យាល័យ៖ សិក្សានៅសាលាវិទ្យាល័យក្រូចឆ្មារ ក្នុងស្រុកក្រូចឆ្មារ ខេត្តត្បូងឃ្មុំ (អតីតខេត្តកំពង់ចាម)។

3. វិទ្យាល័យ៖ សិក្សានៅវិទ្យាល័យព្រះសីហនុ ទីរួមខេត្តកំពង់ចាម។

4. បរិញ្ញាបត្រ៖ សាកលវិទ្យាល័យ Norton ផ្នែកគ្រប់គ្រប់ពាណិជ្ជកម្ម ជំនាញគ្រប់គ្រប់។

5. អនុបណ្ឌិត៖ សាកលវិទ្យាល័យ NUS ផ្នែកគ្រប់គ្រងពាណិជ្ជកម្ម ជំនាញគ្រប់គ្រង។

6. បណ្ឌិត ៖ បេក្ខជនបណ្ឌិតនៅសាកលវិទ្យាល័យ University Of Salford ចក្រភពអង់គ្លេស។

សម្រាប់បទពិសោធន៍ការងារវិញ ឧកញ៉ា សំ សុខនឿន ធ្លាប់បានប្រឡូកច្រើនក្នុងវិស័យអប់រំ ក្នុងតួនាទីជាអ្នកប្រែផ្ទាល់មាត់ និងបកប្រែកឯកសារ មុនចាប់យកអាជីពជាភ្នាក់ងារផ្ដល់សេវាកម្មអចលនទ្រព្យ រហូតក្លាយជាអ្នកវិនិយោគក្នុងវិស័យនេះ។ លោកបានបញ្ជាក់ថា លោកធ្លាប់ធ្វើការងារដូចជា៖

1. ជាអ្នកបកប្រែផ្ទាល់មាត់ និងអ្នកបកប្រែឯកសារ

2. គ្រូបង្រៀនភាសារអង់គ្លេស

3. ជាភ្នាក់ងារលក់ខុនដូ

4. ប្រធានក្រុមភ្នាក់ងារលក់ខុនដូ

5. នាយកផ្នែកលក់ខុនដូ

6. ម្ចាស់អាជីវកម្មក្រុមហ៊ុនភ្នាក់ងារ Kw Sam Sn

7. អ្នកវិនិយោគអចលនទ្រព្យ

8. អ្នកវិនិយោគក្នងក្រុមហ៊ុនអភិវឌ្ឍន៍បុរិ

9. ប្រធានសមាគមGRA។

ឧកញ៉ា សំ សុខនឿន បច្ចុប្បន្ន លោកគឺជាអ្នកជំនាញផ្នែកអចលនវត្ថុនៅកម្ពុជា និងជាអគ្គនាយកក្រុមហ៊ុន Kw Sam Sn Realty Co., Ltd រួមទាំងជាប្រធានសមាគមអចលនទ្រព្យសកល។ បច្ចុប្បន្ន លោកកំពុងដឹកនាំ ក្រុមហ៊ុនជាបុត្រសម្ព័ន្ធ និងតំណាងក្រុមហ៊ុនរបស់លោកនៅតាមបណ្ដារាជធានី ខេត្ត-ក្រុង ប្រកបដោយវឌ្ឍនភាព លើការផ្ដល់គ្រប់សេវាកម្មអភិវឌ្ឍអចលនវត្ថុក្នុងទីផ្សារកម្ពុជា៕

The post ឃើញស្លៀកពាក់ស្អាតបាត ជិះឡានទំនើប តាមពិតឧកញ៉ា សំ សុខនឿន ចុះប្រឡូកការងារអចលនទ្រព្យដូចកសិករសឹងរាល់ថ្ងៃ appeared first on .

ទំនេរពីការងារ អ្នកឧកញ៉ា ឡេង ណាវ៉ាត្រា ចូលចិត្តធ្វើរឿងទាំងអស់នេះខ្លាំងណាស់ តែកម្រមានអ្នកដឹង

អ្នកឧកញ៉ាវត្តភ្នំ — Thu, 11 Nov 2021 05:56:22 +0000

តាមរយៈការចែករំលែកលើបណ្ដាញសង្គម អ្នកឧកញ៉ា ឡេង ណាវ៉ាត្រា ជំនាញខាងស្ទូងស្រូវ និងចេះប្រសព្វខាងកាន់នង្គ័លទឹមក្របី ភ្ជួរស្រែ និងចុះស្ទូង សមសួនជាកសិករពិតមែន។ រូបភាពប៉ុន្មានសន្លឹក ដែលអ្នកឧកញ៉ា បានបង្ហោះធ្វើឱ្យអ្នកគាំទ្រ និងអ្នកលេងបណ្ដាញសង្គមហ្វេសប៊ុក នឹកភ្នកដល់អតីតកាល ដែលធ្លាប់បានហែលឆ្លងកាត់គ្រប់រសជាតិ នៃការតស៊ូក្នុងជីវភាពជាអ្នកស្រែចម្ការ។

ប៉ុន្តែ ចំណង់ចំណូលចិត្តពិតប្រាកដ របស់មហាសេដ្ឋីវ័យក្មេង កើតចេញពីត្រកូលកូនកសិករដ៏សាមញ្ញ រូបនេះ ប្រហែលមិនទាន់មានមហាជន អ្នកតាមដានលោកច្រើន ធ្លាប់បានដឹងនោះទេ។

ថ្ងៃនេះ Oknha News សូមបង្ហើបពីឯកជនភាពរបស់ អ្នកឧកញ៉ា ឡេង ណាវ៉ាត្រា មួយ ដែលកម្រនឹងមានមហាជនទូទៅបានដឹងពីគាត់ណាស់។

“ក្នុងចំណោម ចំណង់ចំណូលចិត្តបែបជីវភាពអ្នកស្រុកស្រែជនបទដ៏សាមញ្ញ អ្នកឧកញ៉ា ឡេង ណាវ៉ាត្រា ចូលចិត្តចំណាយពេលរកត្រី បំផុត”។ នេះបើតាមការឱ្យដឹង ពីអ្នកស្និតស្នាលនឹង អ្នកឧកញ៉ា ។

ប្រភពដដែល ទម្លាយទៀតថា សល់ពេលវេលាឡើងចុះតាមខេត្ត និងបំពេញភារកិច្ចលើមុខជំនួញផ្សេងៗ ការចំណាយពេលនៅសល់ ឬថ្ងៃចុងសប្តាហ៍ ធ្វើដំណើរកម្សាន្តទៅទីជនបទដាច់ស្រយាលឆ្ងាយៗ រកត្រី គឺអ្នកឧកញ៉ា ឡេង ណាវ៉ាត្រា ចូលចិត្តបំផុត។

“មានម្ដងនោះ អ្នកឧកញ៉ា ឡេង ណាវ៉ាត្រា បានសម្រេចចិត្ត ដាក់គោលដៅធ្វើដំណើរដោយថ្មើរជើង ពីភ្នំពេញ សំដៅឆ្ពោះទៅកាន់ខេត្តសៀមរាប អស់រយៈពេលជាងមួយសប្តាហ៍ទើបដល់ និងបានធ្វើរឿងដ៏សាមញ្ញ ដែលគាត់ចូលចិត្ត ដូចជាយប់កន្លែងណា សម្រាកកន្លែងនោះ ហើយកន្លែងណាទំនងមានប្រឡាយ មានអូរ ត្រពាំងទឹក ក៏ចុះបាចត្រី ដុតហូប តាំងយប់អ៊ីចឹងទៅ”។ នេះបើតាមប្រភពប្រាប់ឱ្យដឹង។

រឿងមួយទៀត ដែលអ្នកធ្លាប់ស្គាល់ អ្នកឧកញ៉ា ឡេង ណាវ៉ាត្រា តែងតែស្ញើចសរសើរលើរូបគាត់ដែរនោះ ពួកគាត់លើកឡើងថា អ្នកឧកញ៉ា ឡេង ណាវ៉ាត្រា គឺជាមនុស្សដែលមានការគិតបានរហ័ស និងមានសមត្ថភាព IQ ខួរក្បាលគាត់ខ្ពស់មែនទែន។ ពេលខ្លះ គាត់អាចធ្វើការងារបានច្រើនមុខ ក្នុងពេលតែមួយបានយ៉ាងមានប្រសិទ្ធភាពថែមទៀតផង។ កត្តាអំណោយផល និងសមត្ថភាពពិសេសពីធម្មជាតិ ទាំងនេះហើយ បានជា អ្នកជំនួញវ័យក្មេងនៅកម្ពុជារូបនេះ ទទួលបានជោគជ័យយ៉ាងឆាប់រហ័ស លើគ្រប់មុខរបររបស់គាត់មកទល់សព្វថ្ងៃ។

ក្រៅពីចំណង់ចំណូលចិត្តរកត្រី តាមបែបបុរាណហើយនោះ នៅមានសកម្មភាពមួយទៀត ដែលអ្នកឧកញ៉ា មានស្រុកកំណើតមកខេត្តព្រៃវែងរូបនេះ ចូលចិត្តដែរនោះ គឺ “ជិះម៉ូតូទៅលេងតាមខេត្ត”។

ងាកមកតាមដានជំនាញចាស់ក្នុងជីវភាពជាកសិករ មុនចាកចេញពីស្រុកកំណើតវិញ អ្នកឧកញ៉ា ឡេង ណាវ៉ាត្រា នៅតែចាំដៃថ្នឹក និងធ្វើបានយ៉ាងស្ទាត់ជំនាញ ធ្វើឱ្យមហាជនកោតសរសើរមិនដាច់ពីមាត់។

សហគ្រិនវ័យក្មេង និងកំពុងបន្តបោះជំហ៊ានយ៉ាងលឿន ក្នុងវិស័យធុរកិច្ចនៅកម្ពុជារូបនេះ ថ្មីៗនេះ បានបង្ហាញសមត្ថភាពភ្ជួររាស់ និងដកស្ទូង យ៉ាងប៉ិនប្រសព្វ ទោះខកខានប្រឡាក់ខ្លួនក្នុងជីវភាពជាកសិករនេះអស់រយៈពេលជាយូរឆ្នាំមកហើយក្ដី។

អ្នកឧកញ៉ា រម្លឹកថា៖ “អនុស្សាវរីយ៍នៅពេលព្រះសង្ឃទូងស្គរ ងើបពីព្រឹកដឹកក្របីទៅភ្ជួរស្រែ បងប្អូនដែលឆ្លងកាត់ ប្រាកដជាចងចាំនៅអតីតកាលនេះ”។

ចុះប្រិយមិត្តវិញ មានទម្លាប់ និងចំណង់ចំណូលចិត្តខាងអ្វីដែរ?

The post ទំនេរពីការងារ អ្នកឧកញ៉ា ឡេង ណាវ៉ាត្រា ចូលចិត្តធ្វើរឿងទាំងអស់នេះខ្លាំងណាស់ តែកម្រមានអ្នកដឹង appeared first on .

ជិត២០ឆ្នាំ ឧកញ៉ា អុឹង គីមហុង ដកចិត្តមិនរួចពីហាងកាត់សក់មួយកន្លែង ព្រោះកូនជាងធ្លាប់ធ្វើរឿងនេះដាក់

អ្នកឧកញ៉ាវត្តភ្នំ — Tue, 19 Oct 2021 04:01:02 +0000

ថ្ងៃនេះ Oknha News សូមបើកកកាយពីទម្លាប់ប្រចាំថ្ងៃដ៏កម្រមួយរបស់ ឧកញ៉ា អុឹង គីមហុង ប្រធានក្រុមប្រឹក្សាភិបាលជាន់ខ្ពស់ក្រុមហ៊ុន ធីអិលអិល រៀល អ៊ីស្ទេត ឯ.ក ពី Lifestyle នៃការកាត់សក់ នៅកន្លែងកាត់សក់មួយកន្លែង ដែលធ្វើឱ្យលោក ក្លាយជាម៉ូយប្រចាំហាងនោះអស់រយៈពេលជិត ២០ឆ្នាំ កន្លងមកហើយ។

ឧកញ៉ា អុឹង គីមហុង រហ័សនាម ឧកញ៉ា គួរឱ្យស្រលាញ់ បានរៀបរាប់ថា៖ “កាត់សក់នៅទីនេះជិត២០ឆ្នាំហើយ គាត់កាត់សក់ឲ្យខ្ញុំតាំងតែខ្ញុំនៅក្រ តំលៃ១នាក់ ៥ពាន់រៀល”។

តាមការជជីកសួរបន្ថែម ប្រធានក្រុមហ៊ុន TLL Real Estate Co., LTD ឧកញ៉ា អុឹង គីមហុង រំលឹកពីអនុស្សាវរីយ៍ប្រាប់ Oknha News ពីប្រវត្តិដំបូង ដែលនាំឱ្យលោក មិនដាច់ចិត្តផ្លាស់ប្ដូរកន្លែងកាត់សក់ទៅហាងណា ក្រៅពីហាងកាត់សក់ដ៏សាមញ្ញ កាលីបម៉ូត/Kalib Mode យ៉ាងដូច្នេះថា៖ “កាលពីជិត ២០ឆ្នាំមុន ខ្ញុំធ្លាប់មកកាត់សក់នៅកន្លែងនេះជាលើកដំបូង ពេលនោះ មេជាង និងជាងៗជើងចាស់ប្រចាំហាង គាត់មានម៉ូយគាត់ អ៊ីចឹងពួកគាត់ក៏រុញកូនជាងដែលទើបចូលធ្វើការថ្ងៃដំបូង មកសាកកន្ត្រៃកាត់សក់ កៅឆាយខ្ញុំតែម្ដង…”។

តែពេលនោះ លោកក៏មិនទាន់ដឹងដែរថា ខ្លួនគឺជាអតិថិជនដំបូង ដែលសាកកន្ត្រៃដំបូងដោយកូនជាងរបស់ហាង។ រហូតដល់ស្គាល់រាប់អាន និងក្លាយជាម៉ូយរបស់ជាងសាកកន្ត្រៃរបស់ខ្លួនបានប្រហែល ៤-៥ឆ្នាំ ទើបថ្ងៃមួួយ ជាងបង្ហើបប្រាប់ថា លោកគឺជាម៉ូយដំបូង ដែលគាត់(ជាង) សាកកន្ត្រៃជាលើកដំបូង ក្នុងនាមជាបុគ្គលិកជាងកាត់សក់ទើបចូលធ្វើការថ្មីថ្មោង។

អនុស្សាវរីយ៍ដ៏គួរឱ្យអស់សំណើចមួយនេះហើយ ដែលទាក់ទាញទឹកចិត្ត ឧកញ៉ា អុឹង គីមហុង ក្លាយជាម៉ូយកាត់សក់ជាមួយកូនជាងកាត់សក់រូបនោះ តាំងពីជិត ២០ឆ្នាំមុន រហូតដល់សព្វថ្ងៃ។ ឧកញ៉ា អុឹង គីមហុង បានបន្ថែមថា ប៉ុន្តែបច្ចុប្បន្ន ជាងដែលធ្លាប់សាកកន្ត្រៃកាត់សក់កៅឆាយជូនលោក តាំងពីជិត២ទសវត្ស៍មុននោះ បានក្លាយមេជាងកាត់ដ៏ចំណានមួយរូបប្រចាំហាងកាត់សក់ កាលីបម៉ូត ដែលមានទីតាំងនៅម្ដុំខាងក្រោយសាលាបាក់ទូក។

ហើយចំពោះតម្លៃក៏មិនមានការប្រែប្រួលខ្លាំងដែរ ជិត២០ឆ្នាំមុន តម្លៃកាត់សក់ក្នុងម្នាក់ត្រឹមតែ ៥ពាន់រៀល រហូតដល់ឥឡូវក៏នៅតែកាត់ក្នុងតម្លៃសមរម្យដដែល។ ម្យ៉ាងវិញទៀត ជាងកាត់សក់ជូនលោកនោះ គាត់មានទឹកដៃ កាត់សក់សមជាមួយទម្រង់មុខរបស់ខ្ញុំដែរ ទើបជាប់ម៉ូយមករហូតទៅ។ ឧកញ៉ា អុឹង គីមហុង បន្ថែម៕

The post ជិត២០ឆ្នាំ ឧកញ៉ា អុឹង គីមហុង ដកចិត្តមិនរួចពីហាងកាត់សក់មួយកន្លែង ព្រោះកូនជាងធ្លាប់ធ្វើរឿងនេះដាក់ appeared first on .

ឃើញ Lexus LX 600 ឆ្នាំ2022 បង្ហាញខ្លួនផ្អើលពិភពលោកកុំទាន់កញ្ជ្រោល ដឹងតម្លៃបឋមពេលមកដល់ខ្មែរសិន!

អ្នកឧកញ៉ាវត្តភ្នំ — Sun, 17 Oct 2021 04:27:49 +0000

ការបង្ហាញខ្លួនរបស់រថយន្តម៉ាក Lexus LX 600 ស៊េរីឆ្នាំ2022 កាលពីថ្ងៃទី១៣ ខែតុលា ឆ្នាំ២០២១នេះ បានធ្វើឱ្យមហាជនអ្នកស្រលាញ់ចូលចិត្តរថយន្តប្រណិតនៅជុំវិញពិភពលោក តាមដានមិនដាច់ ពីលក្ខណៈពិសេសរបស់រថយន្ត SUV ខ្នាតធំម៉ូឌែលចុងក្រោយ ដែលដូររូបរាង និងបំពាក់ម៉ាស៊ីនថ្មីតូចជាងមុនមួយនេះ។ យ៉ាងណាមិញ តម្លៃរបស់រថយន្តទំនើបចុងក្រោយផុតលេខ របស់ក្រុមហ៊ុន Lexus ពេលមកដល់ទីផ្សារស្រុកខ្មែរ អាចនឹងកាន់តែធ្វើឱ្យមជ្ឈដ្ឋានអ្នកតាមដាន ភ្ញាក់ផ្អើលក៏ថាបាន។

តាមការឱ្យដឹងពីសំណាក់អ្នកគ្រប់គ្រងទូទៅប្រចាំក្រុមហ៊ុនលក់រថយន្តទំនើប ធំជាងគេនៅប្រទេសកម្ពុជា បានបង្ហើបប្រាប់ Oknha News ពីតម្លៃបឋមរបស់រថយន្តម៉ាក Lexus LX 600 ស៊េរីឆ្នាំ២០២២ នេះថា តម្លៃរថយន្តនេះ ពេលមកដល់ខ្មែរ គិតថ្លៃបង់ពន្ធនាំចូលរួច អាចថ្លៃដល់ជិត ៣០ម៉ឺនដុល្លារ និងជាង ៣០ម៉ឺនដុល្លារ ទៅតាមម៉ូឌែល។

អ្នកគ្រប់គ្រងក្រុមហ៊ុនទិញលក់រថយន្តទំនើប ដែលមានទីតាំងនៅជាប់ សណ្ឋាគារភ្នំពេញ ក្នុងរាជធានីភ្នំពេញរូបនេះ បញ្ជាក់យ៉ាងដូច្នេះថា៖ “ចំពោះតម្លៃជាក់លាក់យើងក៏មិនទាន់ហ៊ានអះអាងឱ្យច្បាស់ដូចគ្នា ដោយសារតែតម្លៃចេញពីរោងចក្រក៏មិនទាន់ប្រកាសផ្លូវការ ហើយថ្លៃពន្ធនាំចូលក៏មិនអាចគណនាចេញដែរ តែផ្អែកតាមបទពិសោធន៍ ដែលក្រុមហ៊ុនធ្លាប់នាំរថយន្តទំនើបជុំវិញពិភពលោកមកលក់ ខ្ញុំអាចប៉ាន់ស្មានបឋមក្រៅផ្លូវការថា ពេលមកដល់ទីផ្សារកម្ពុជា សម្រាប់ម៉ូឌែល Lexus LX 600 ស៊េរី Off-road អាចថ្លៃ ២៨ម៉ឺនដុល្លារ ហើយសម្រាប់ម៉ូឌែល Executive អាចនឹងថ្លៃលើស ៣០ម៉ឺនដុល្លារ”។

ក្រុមហ៊ុន Lexus ទើបតែបានប្រកាសជាផ្លូវការនូវប្រភេទរថយន្តសេរីថ្មីនៃត្រកូល Lx ដូចគ្នា គឺ Lexus Lx 600 ដែលមានរូបរាងខុសគ្នាច្រើនពី Lexus Lx ៥៧០ ពោលគឺមានទំងន់ស្រាលជាង រាងតូចជាង ខ្លីជាង តែខ្លឹមជាងមុន។ រថយន្តប្រភេទ Lexus គឺទទួលបានការកោតសរសើរ ដោយសារធ្លាប់បំពាក់ជាមួយម៉ាស៊ីនកម្លាំងខ្លាំង V-8 តែសម្រាប់ Lexus Lx 600 នេះវិញ នឹងមិនបំពាក់ម៉ាស៊ីន V-8 ទៀតឡើយ និងជំនួសមកវិញដោយម៉ាស៊ីនសាំង V6 3.5L Twin-Turbo ផលិតបានកម្លាំង 409hp ដែលនេះក៏ជារថយន្តត្រកូល Lx ដែលបំពាក់ម៉ាស៊ីនកម្លាំង V-6 មុនគេបង្អស់ផងដែរ។

សម្រាប់ម៉ូដែល Lexus Lx 600 នេះផងដែរ ក៏នឹងមានដាក់លក់ដល់ទៅ ៤ ម៉ូដមានដូចជា ប្រភេទធម្មតា The Premium, Luxury និងប្រភេទ F Sport ខណៈប្រភេទធម្មតាគឺមានកៅអី ២ ជួរ ឬ ៥ កៅអី រីឯ ៣ ម៉ូដទៀតគឺមាន ៣ ជួរ ឬ ៧ កៅអី។ រថយន្ត Lexus Lx 600 នឹងប្រកាសដាក់លក់លើទីផ្សារសហរដ្ឋអាមេរិកនៅឆ្នាំក្រោយ ហើយបើតាមការសន្និដ្ឋានពី CARandDRIVER បាននិយាយថា ប្រភេទធម្មតាអាចស្ថិតនៅខ្ទង់ ៩ ម៉ឺនដុល្លារ ស្របពេល ៣ ប្រភេទទៀតអាចថ្លៃលើសនេះ។

យ៉ាងណាមិញ តម្លៃខាងលើ Oknha News គ្រាន់តែជជីកសួរតម្លៃក្រៅផ្លូវការពីអ្នកជំនាញនាំចូលរថយន្តទំនើបៗមួយកន្លែងប៉ុណ្ណោះ ចំពោះតម្លៃជាក់លាក់នៅមិនទាន់មានបង្ហាញនៅឡើយទេ ដោយសារការប្រកាសជាផ្លូវការទើបនឹងធ្វើឡើង ហើយសម្រាប់ទីផ្សារស្រុកខ្មែរវិញក៏មិនទាន់មាននាំចូលរថយន្តប្រភេទនេះនៅឡើយ៕

The post ឃើញ Lexus LX 600 ឆ្នាំ2022 បង្ហាញខ្លួនផ្អើលពិភពលោកកុំទាន់កញ្ជ្រោល ដឹងតម្លៃបឋមពេលមកដល់ខ្មែរសិន! appeared first on .