Manny Pacquiao

ស្ដេចប្រដាល់ ម៉ានី ប៉ាគីអាវ មិនត្រឹមតែជាអត្តពលិកមានលុយច្រើន តែធ្លាប់កាន់តំណែងធំក្នុងឆាកនយោបាយទៀត

ឧកញ៉ាសំពៅ — Fri, 31 May 2024 07:00:00 +0000

បើនិយាយពីកីឡាប្រដាល់ គ្រប់គ្នាច្បាស់ជានឹកឃើញដល់ បុរសមាឌល្អិត តែកម្លាំងខ្លាំង គឺលោក ម៉ានី ប៉ាគីអាវ ដែលទទួលបានរហស្សនាមថាជាស្ដេចប្រដាល់ ប្រចាំតំបន់អាស៊ានជាមិនខាន។

មិនត្រឹមតែជាអត្តពលិកមួយរូប ដែលមានទ្រព្យសម្បត្តិច្រើនក្រាស់ក្រែលឡើយ អតីតអ្នកប្រដាល់រូបនេះ ក៏ធ្លាប់ប្រឡូកក្នុងឆាកនយោបាយ និងបានកាន់តំណែងធំក្នុងជួររដ្ឋាភិបាលនៃប្រទេសហ្វីលីពីនថែមទៀត។

យោងតាមការចុះផ្សាយពីសារព័ត៌មាន Sportskeeda បានបង្ហាញថា ស្ដេចប្រដាល់ហ្វីលីពីន បានកាន់តំណែងជាសមាជិកសភារយៈពេល ៦ឆ្នាំ ពោលកាលពីឆ្នាំ២០១៦ រហូតដល់ឆ្នាំ២០២២ បន្ទាប់ពីទទួលបានសម្លេងគាំទ្រដល់ទៅ ១៦លាន។

យ៉ាងណា បច្ចុប្បន្ននេះ លោក ប៉ាគីអាវ មិនបានឈរឈ្មោះក្នុងជួររដ្ឋាភិបាលទៀតឡើយ ដោយងាកមកផ្ដោតលើការធ្វើកម្មវិធីសប្បុរសធម៌ផ្សេងៗ និងការប្រកបអាជីវកម្មផ្ទាល់ខ្លួនមួយចំនួនវិញ។

គួររំលឹកដែរថា កាលពីថ្ងៃទី៣០ ខែឧសភា ស្ដេចប្រដាល់ហ្វីលីពីន បានធ្វើដំណើរមកដល់ប្រទេសកម្ពុជា ក្រោមការអញ្ជើញពីម្ចាស់ម៉ាកយីហោស្រាបៀរមួយ ដើម្បីចូលរួមក្លាយជាឯកអគ្គរដ្ឋទូតអន្តរជាតិ ស្របពេលលោក ប៉ាគីអាវ ក៏បានចូលសម្ដែងការគួរសមជាមួយនាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត ផងដែរ៕

The post ស្ដេចប្រដាល់ ម៉ានី ប៉ាគីអាវ មិនត្រឹមតែជាអត្តពលិកមានលុយច្រើន តែធ្លាប់កាន់តំណែងធំក្នុងឆាកនយោបាយទៀត appeared first on .

មកស្គាល់កំពូលកីឡាករប្រដាល់ មានទ្រព្យសម្បត្តិច្រើនដាច់គេលើលោក

monyokn — Mon, 27 May 2024 03:35:25 +0000

យោងទៅតាមគេហទំព័រ Celebrity Net Worth បានឲ្យដឹងថា កីឡាករប្រដាល់ដែលមានជាងគេទាំងប្រាំនៅលើពិភពលោក មានទ្រព្យសម្បត្តិសរុបជិត ១,៤ពាន់លានដុល្លារ ខណៈដែលទ្រព្យដ៏ច្រើនមហាសាលទាំងអស់នេះ គឺបានមកពីការប្រកួតនៅលើសង្វៀន ព្រមទាំងការវិនិយោគជាដើម។ ខាងក្រោមនេះ គឺសុទ្ធសឹងតែជាអ្នកប្រដាល់ទាំងប្រាំរូប ដែលមានទ្រព្យសម្បត្តិច្រើនដាច់គេ៖

១. អ្នកប្រដាល់សញ្ជាតិអាមេរិក Floyd Mayweather ជាអ្នកប្រដាល់ដែលមានបំផុតនៅលើលោក ពោលកីឡាកររូបនេះមានទ្រព្យសម្បត្តិដល់ទៅចំនួន ៤០០លានដុល្លារ។ រយៈពេល ២១ឆ្នាំនៃការប្រកបអាជីពប្រដាល់ (ឆ្នាំ១៩៩៦ ដល់ឆ្នាំ២០១៧) Floyd បានឈ្នះជើងឯកពិភពលោកសំខាន់ៗចំនួន ១៥ដង រាប់ចាប់ពីប្រភេទទម្ងន់ស្រាល ដល់កម្រិតមធ្យម។

២. អ្នកប្រដាល់សញ្ជាតិអាមេរិកដូចគ្នា George Foreman មានទ្រព្យសម្បត្តិប្រមាណ ៣០០លានដុល្លារ។ George ជាអ្នកប្រដាល់ជើងឯកទម្ងន់ធ្ងន់ពិភពលោកពីរសម័យកាល ម្ចាស់មេដាយមាសអូឡាំពិក និងក៏ជាសហគ្រិនមួយរូបផងដែរ។ យ៉ាងណា ប្រាក់ចំណូលពីការប្រកួតបានមកតិចតួចប៉ុណ្ណោះ បើធៀបទៅនឹងយីហោលក់គ្រឿងអេឡិចត្រូនិក George Foreman Grill របស់គាត់ ដែលអាចលក់បានដល់ទៅជាង ១០០លានគ្រឿងទូទាំងពិភពលោក។

៣. អ្នកប្រដាល់ទម្ងន់មធ្យមរបស់ម៉ិកស៊ិក Saul Alvarez ក៏មានទ្រព្យសម្បត្តិខ្ទង់ ២៥០លានដុល្លារ។ កីឡាកររូបនេះធ្លាប់ឈ្នះជើងឯក WBC, WBA ព្រមទាំងឈ្នះខ្សែក្រវ៉ាត់ទម្ងន់មធ្យម The Ring ។ Saul ជាម្ចាស់ស្ថានីយ៍ប្រេងឥន្ធនៈ Canelo Energy នៅម៉ិកស៊ិក និងក៏ជាអ្នកវិនិយោគទៅលើហាងតូចៗ (Mart) សម្លៀកបំពាក់ និងកម្មវិធីហាត់ប្រាណផងដែរ។

៤. អ្នកប្រដាល់ហ្វីលីពីន Manny Pacquiao គឺជាអត្តពលិកអាស៊ីមានទ្រព្យសម្បត្តិសរុប ២២០លានដុល្លារ។ អ្នកប្រដាល់រូបនេះ ធ្លាប់ឈ្នះជើងឯកពិភពលោកចំនួនប្រាំបីលើក និងបានឈ្នះជើងឯក Linear ក្នុងប្រភេទទម្ងន់ចំនួនប្រាំផ្សេងៗគ្នា។ លើសពីនោះ Pacquiao ក៏ជាអ្នកនយោបាយ ដោយបានធ្វើជាសមាជិកព្រឹទ្ធសភាហ្វីលីពីនអស់រយៈពេលជាច្រើនឆ្នាំមកហើយ។

៥. អ្នកប្រដាល់សញ្ជាតិអាមេរិកដើមកំណើតម៉ិកស៊ិក Oscar De La Hoya មានទ្រព្យសម្បត្តិសរុបចំនួន ២០០លានដុល្លារ។ Oscar ធ្លាប់ឈ្នះបានជើងឯកពិភពលោកចំនួន ១១ដងក្នុង ៦ប្រភេទទម្ងន់ផ្សេងៗគ្នា។ ចាប់តាំងពីចូលនិវត្តន៍ អតីតកីឡាកររូបនេះ បានប្តូរអាជីពយ៉ាងជោគជ័យទៅជា Promoter ប្រដាល់តាមរយៈក្រុមហ៊ុន Golden Boy Promotions របស់ខ្លួន៕

The post មកស្គាល់កំពូលកីឡាករប្រដាល់ មានទ្រព្យសម្បត្តិច្រើនដាច់គេលើលោក appeared first on .

អតីតស្ដេចប្រដាល់ Pacquiao ទម្លាយថា បើជាប់ឆ្នោតជាប្រធានាធិបតី បញ្ហាគ្រឿងញៀនក្នុងប្រទេសនឹងដោះស្រាយដោយ “សន្តិវិធី”

ឧកញ៉ាសំពៅ — Wed, 16 Feb 2022 07:44:19 +0000

ប្រទេសហ្វីលីពីនជាប្រទេសមួយដែលល្បីខ្លាំងខាងបញ្ហាគ្រឿងញៀនក្នុងប្រទេស រហូតដល់ប្រធានាធិបតី Rogdrigo Duterte បានប្រកាសជាផ្លូវការថា នឹងប្ដេជ្ញាលុបបំបាត់បញ្ហាមួយនេះ បើទោះជាត្រូវបង្កជាសង្គ្រាមស៊ីវិលក្ដី។

យ៉ាងណា គ្រប់បញ្ហាដែលដោះស្រាយដោយអំពើហិង្សាមិនអាចជាដំណោះស្រាយដ៏ល្អឡើយ ស្របពេលអតីតអ្នកប្រដាល់ Manny Pacquiao ដែលបានឈរឈ្មោះជាបេក្ខភាពប្រធានាធិបតីអាណត្តិក្រោយបានប្ដេជ្ញាថា លោកនឹងដោះស្រាយវិបត្តិសង្គមមួយនេះដោយ “សន្តិវិធី” និងមិនប្រើប្រាស់អាវុធជាដំណោះស្រាយឡើយ។

ដំណោះស្រាយដែលអតីតស្ដេចប្រដាល់មួយនេះអះអាងគឺ លោកនឹងស្នើសុំចូលរួមជាថ្មីជាមួយនឹងតុលាការឧក្រិដ្ឋកម្មអន្តរជាតិ ហៅកាត់ ICC ដែលប្រធានាធិបតី Rodrigo បានប្រកាសផ្ដាច់ខ្លួនកាលពីឆ្នាំ ២០១៨។

យ៉ាងណា ក្រឡេកទៅមើលមធ្យោបាយដែលលោក Rodrigo បានធ្វើកន្លងមក ដោយស្ទើរតែប្រែប្រទេសហ្វីលីពីនទៅជាសង្គ្រាមស៊ីវិលជាមួយពួកជួញដូរគ្រឿងញៀន គឺពិតជាបានផលមែន ពោលចាប់តាំងពីអនុវត្តមក ក្រុមអ្នកជួញដូររាប់ពាន់នាក់ត្រូវបានបោសសំអាត ស្របពេលអង្គការសិទ្ធិមនុស្សធ្លាប់ថ្កោលទោសលោកដែរ តែក្រុមប៉ូលិសអះអាងថា អ្នកដែលបានស្លាប់គឺសុទ្ធតែប្រឆាំងនឹងការចាប់ខ្លួនរបស់ប៉ូលិស និងវាយប្រហារមកលើពួកគេមុន។

អាស្រ័យហេតុនេះហើយ ទើប Duterte មិនអាចចូលរួមជាមួយ ICC បន្តទៀតបាន ក្រោយបង្កព្យុះភ្លៀងក្នុងប្រទេស និងរារាំងការស៊ើបអង្កេតពីអង្គការអន្តរជាតិជាមួយនឹងបទឧក្រិដ្ឋរបស់លោកទាក់ទងនឹងសិទ្ធិមនុស្ស ទើបតម្រូវឲ្យហ្វីលីពីនផ្ដាច់ខ្លួនចេញពី ICC នៅឆ្នាំ ២០១៨។

ដោយឡែក បច្ចុប្បន្នក្រុមអ្នកសារព័ត៌មានបានឲ្យដឹងថា ការិយាល័យប្រធានាធិបតីមិនអាចស្នើសុំព័ត៌មានទាក់ទងនឹងការអះអាងរបស់បេក្ខភាពប្រធានាធិបតី Manny Pacquiao បានឡើយ៕

ប្រភព: Kelo

The post អតីតស្ដេចប្រដាល់ Pacquiao ទម្លាយថា បើជាប់ឆ្នោតជាប្រធានាធិបតី បញ្ហាគ្រឿងញៀនក្នុងប្រទេសនឹងដោះស្រាយដោយ “សន្តិវិធី” appeared first on .

ចាញ់ប្រកួតចុងក្រោយ Pacquiao បង្ហើបថា ការចូលនិវត្តន៍ពីប្រដាល់នៅមិនឆ្ងាយឡើយ

ឧកញ៉ាសំពៅ — Fri, 27 Aug 2021 04:38:47 +0000

ការប្រកួតរវាងអ្នកប្រដាល់ Manny Pacquiao និង Yordenis Ugas បានបញ្ចប់ជាស្ថាពរ ខណៈ Ugas ជាអ្នកទទួលជ័យជម្នះដោយបានពិន្ទុខ្ពស់ជាងអ្នកប្រដាល់ហ្វីលីពីន។

អ្នកប្រដាល់ Pacquiao ក៏បានសារភាពក្រោយចប់ការប្រកួតដែរថា គ្រាន់តែចាប់ផ្ដើមចូលទឹកទី ២ ភ្លាម លោកមានអារម្មណ៍ថា រមួលក្រពើបាត់ទៅហើយ និងបានបង្ហើបថា ការចូលនិវត្តន៍ពីសង្វៀនគឺមិនយូរឡើយ។

យ៉ាងណារឿងដែលអ្នកគាំទ្រកំពុងបារម្ភពេលនេះគឺ ពួកគេដឹងថា Pacquiao មានរបួសត្រង់ភ្នែករហូតដល់ពាក់វ៉ែនតាខ្មៅពេលផ្ដល់កិច្ចសម្ភាសន៍ទៀត តែពួកគេមិនដឹងទេថា របួសនោះមានកម្រិតធ្ងន់កម្រិតណា រហូតដល់ឃើញវីដេអូប្រពន្ធរបស់បុរសវ័យ ៤២ ឆ្នាំបង្ហោះនៅលើ Instagram របស់អ្នកនាង។

ក្នុងវីដេអូមួយនោះ អ្នកស្រីកំពុងបញ្ចុកអាហារដល់ប្ដី ដែលមានសភាពទ្រុឌទ្រោមខ្លាំង ដោយបើកភ្នែកសឹងមិនរួច ដូច្នេះអ្នកគាំទ្រប្រហែលជានឹងទទួលបានដំណឹងពីការព្យួរហ្កង់ពីសង្វៀនរបស់អ្នកប្រដាល់ហ្វីលីពីននាពេលឆាប់ៗខាងមុខនេះជាមិនខាន។

ក្រោយពីចប់ការប្រកួតដំបូង បន្ទាប់ពីសម្រាកពីសង្វៀនអស់រយៈពេលជាង ២ ឆ្នាំ Pacquiao បានប្រាប់អ្នកសារព័ត៌មានថា៖ “នៅថ្ងៃអនាគត អ្នកប្រហែលនឹងមិនឃើញ Manny Pacquiao ឡើងវាយលើសង្វៀនម្ដងទៀតឡើយ”។

“ខ្ញុំមិនប្រាកដចិត្តឡើយ តែគ្រាន់តែដឹងថា រយៈពេលប៉ុន្មានទសវត្សនេះ ខ្ញុំពិតជាសប្បាយជាមួយនឹងអ្វីដែលខ្ញុំសម្រេចបាននៅក្នុងវិស័យប្រដាល់នេះណាស់។ ខ្ញុំបានបង្កើតកំណត់ត្រា និងបានជួយឲ្យវិស័យប្រដាល់ឡើងមកដល់កម្រិតកំពូល តែអ្វីដែលកាន់តែពិសេស គឺបានលើកមុខមាត់ប្រទេសខ្ញុំ និងប្រជាជនហ្វីលីពីនតែម្ដង”៕

ប្រភព: Metro

The post ចាញ់ប្រកួតចុងក្រោយ Pacquiao បង្ហើបថា ការចូលនិវត្តន៍ពីប្រដាល់នៅមិនឆ្ងាយឡើយ appeared first on .

Manny Pacquiao

ស្ដេចប្រដាល់ ម៉ានី ប៉ាគីអាវ មិនត្រឹមតែជាអត្តពលិកមានលុយច្រើន តែធ្លាប់កាន់តំណែងធំក្នុងឆាកនយោបាយទៀត

មកស្គាល់កំពូលកីឡាករប្រដាល់ មានទ្រព្យសម្បត្តិច្រើនដាច់គេលើលោក

ចាញ់ប្រកួតចុងក្រោយ Pacquiao បង្ហើប​ថា​ ការ​ចូលនិវត្តន៍​ពី​ប្រដាល់​នៅ​មិន​ឆ្ងាយ​ឡើយ

ចាញ់ប្រកួតចុងក្រោយ Pacquiao បង្ហើបថា ការចូលនិវត្តន៍ពីប្រដាល់នៅមិនឆ្ងាយឡើយ