Mark Cuban

មហាសេដ្ឋីមួយរូប ថាបើខ្លួនអាចវិលទៅអាយុ ១៦ឆ្នាំសារជាថ្មី នឹងទៅធ្វើរឿងមួយនេះ

monyokn — Thu, 24 Oct 2024 10:29:00 +0000

នៅក្នុងបទសម្ភាសន៍មួយជាមួយសារព័ត៌មាន CNBC លោក Mark Cuban ដែលត្រូវបានគេស្គាល់ថាជាមហាសេដ្ឋី បានលើកឡើងថា ប្រសិនបើលោកវិលទៅរកវ័យ ១៦ឆ្នាំម្តងទៀត លោកនឹងរកលុយឲ្យបានកាន់តែច្រើន ដោយដើរតាមគន្លងជំហានទាំងប៉ុន្មាននេះ។

ជាដំបូងបំផុត លោកនឹងរៀនពីរបៀបសរសេរ Prompts ក្នុងភាសាបញ្ញាសិប្បនិម្មិត (AI) ស្រដៀងដូចទៅនឹង ChatGPT របស់ក្រុមហ៊ុន OpenAI ឬ Gemini របស់ក្រុមហ៊ុន Google ។ បន្ទាប់មកទៀតនោះ លោកនឹងបង្រៀនមិត្តភ័ក្ត្រនៅឯសាលា ឲ្យចេះពីរបៀបប្រើប្រាស់ Prompts ដែលខ្លួនបានបង្កើត ហើយក៏នឹងទៅបង្រៀនអាជីវកម្មខ្នាតតូច ទៅខ្នាតមធ្យមណា ដែលមិនទាន់ស្គាល់ថាអ្វីទៅជា AI នោះ ឲ្យអាចប្រើប្រាស់បាន ទោះបីខ្លួននៅអាយុ ១៦ឆ្នាំក៏ដោយ។

មហាសេដ្ឋីរូបនេះ បានបន្តថា ជាវិស្វករ AI prompt engineering ឬក៏ជាអ្នកអាចបង្កើត Chatbots ដែលមានសមត្ថភាពឆ្លើយសំណួរមកកាន់មនុស្សដោយភាពសុក្រឹត្យត្រឹមត្រូវបាន អាចថាជាឱកាសមួយយ៉ាងល្អក្នុងសម័យនេះ។ បើតាមវេទិការការងារ ZipRecruiter បញ្ជាក់ថា ប្រាក់បៀវត្សសម្រាប់អ្នកបង្រៀនពាក់ព័ន្ធក្នុងវិស័យ AI ខ្ទង់ ៣០ ០០០ដុល្លារក្នុងមួយឆ្នាំ ហើយការងារជាវិស្វករ AI prompt engineers ពេញម៉ោងក៏អាចរកបានដល់ ១២៩ ៥០០ដុល្លារផងដែរ។

មិនតែប៉ុណ្ណោះ លោក Cuban ថា ដើម្បីអាចក្លាយជា AI prompt engineers មិនបាច់ទៅរៀនដល់សកលវិទ្យាល័យទេ គ្រាន់តែអនុវត្តជាក់ស្តែង ឬរៀនយកវិញ្ញាបនបត្រ ដោយរៀនពីរបៀបភាសា AI ធំៗទាំងនោះដំណើរការ ហើយថ្នាក់វិញ្ញាបនបត្រតាមអនឡាញវគ្គខ្លីមួយចំនួនក៏មានបង្រៀន តួយ៉ាង Vanderbilt University ឬ IBM ដែលចាយពេលតែមួយខែ ក៏អាចចេះមូលដ្ឋានគ្រឹះនៃការប្រើប្រាស់ទៅហើយ។

បើនិយាយពីប្រវត្តិ Cuban វិញលោកចេះរកស៊ីតាំងតែពីវ័យក្មេង ដោយកាលអាយុ ១២ឆ្នាំធ្លាប់ដើរលក់ថង់ដាក់សំរាមតាមផ្ទះដើម្បីសន្សំប្រាក់ទិញស្បែកជើងកីឡាមួយគូ ហើយក៏ធ្លាប់រកស៊ីដាក់លក់របស់មានតម្លៃដើម្បីបានប្រាក់ចូលរៀននៅសាកលវិទ្យាល័យផងដែរ។ មិនតែប៉ុណ្ណោះ ក្រោយផ្អាករៀននៅមហាវិទ្យាល័យមួយរយៈ លោកបានលូកដៃពេញទំហឹងជាសហគ្រិន ដោយកន្លងមកធ្លាប់លក់បានក្រុមហ៊ុន MicroSolutions បានប្រាក់ចំនួន ៦លានដុល្លារកាលពីឆ្នាំ១៩៩០ ហើយក្រោយមកទៀតនៅឆ្នាំ១៩៩៩ បានលក់ក្រុមហ៊ុនទីពីរមានឈ្មោះ Broadcast.com របស់ខ្លួនបានប្រាក់ចំនួន ៥,៧ពាន់លានដុល្លារ។

សូមជម្រាបជូនថា បើផ្អែកតាមការស្ទាបស្ទង់ពីទស្សនាវដ្តី Forbes នាពេលបច្ចុប្បន្ននេះលោក Mark Cuban មានទ្រព្យធនសរុបចំនួន ៥,៧ពាន់លានដុល្លារ ហើយក៏ជាម្ចាស់ភាគហ៊ុនម្នាក់ក្នុង NBA’s Dallas Mavericks ហើយជាស្ថាបនិកនៃ Cost Plus Drugs ផងដែរ៕

The post មហាសេដ្ឋីមួយរូប ថាបើខ្លួនអាចវិលទៅអាយុ ១៦ឆ្នាំសារជាថ្មី នឹងទៅធ្វើរឿងមួយនេះ appeared first on .

ស្រុកខ្មែរអាហារមួយពេលចាយច្រើនបំផុត ៥ ដុល្លារ តែសេដ្ឋីស្រុកគេ អាហារមួយពេលអស់ខ្ទង់ម៉ឺនដុល្លារក៏មាន

ឧកញ៉ាសំពៅ — Tue, 13 Jul 2021 06:58:14 +0000

ចំណីអាហារពិតណាស់ប្រាកដជាមានសារៈសំខាន់ ហើយជាពិសេសសម្រាប់បុគ្គលល្បីៗតែម្ដង ដែលពួកគេមានការយកចិត្តទុកដាក់ខ្លាំងបំផុតសម្រាប់ការហូបចុកនេះ។

តទៅនេះ គឺជាបញ្ជីឈ្មោះបុគ្គលល្បីៗ ៥ រូបដែលចាយលុយពេញដៃសម្រាប់ការចំណាយលើថ្លៃម្ហូបអាហារ៖

1/ Justin Bieber

កាលពីឆ្នាំ ២០១៤ E! News បានរាយការណ៍ថា គ្រាន់តែទៅមើលកុន Bieber ចាយលុយ ២៤១ ដុល្លារសម្រាប់អាហារសម្រន់ ហើយក្នុងឆ្នាំដដែលនោះ គេចាយអស់ ២៤០ ដុល្លារបន្ថែមទៀតគ្រាន់តែញាំអាហារសម្រន់បែបម៉ិកស៊ីកូ។ តែអ្វីដែលគួរឲ្យភ្ញាក់ផ្អើលបំផុតនោះគឺ មានម្ដង Justin Bieber ចាយលុយ ១ ម៉ឺនដុល្លារ សម្រាប់ការខ្ចប់អាហារបែបចិន។

2/ Mike Tyson

អតីតកីឡាប្រដាល់រូបនេះត្រូវបានគេរាយការណ៍មកថា ក្នុងមួយឆ្នាំ លោកចាយអស់មិនក្រោម ២០ ម៉ឺនដុល្លារឡើយសម្រាប់ថ្លៃហូបចុក តែមិនមែនសម្រាប់ខ្លួនឯងឡើយ តែដើម្បីសម្រាប់សត្វចិញ្ចឹមគឺ ខ្លា Bengal ៣ ក្បាល។ យ៉ាងណាមិញ E! News រាយការណ៍មកថា Mike Tyson ឈប់ចិញ្ចឹមខ្លាទាំងនោះទៀតហើយ ព្រោះតែការចំណាយលើពួកវាអស់ច្រើនពេក និងដោយសារមាឌរបស់ពួកវាកាន់តែធំឡើងៗ។

3/ Mark Cuban

លោកគឺជាមហាសេដ្ឋីតែមួយរូបគត់នៅក្នុងបញ្ជីឈ្មោះមួយនេះ ដោយមានម្ដង កាលពីឆ្នាំ ២០១១ លោកបានធ្វើពិធីជប់លៀងមួយ ហើយ Fox Sports រាយការណ៍ថា គ្រាន់តែថ្លៃចំណាយលើម្ហូបអាហារនាល្ងាចនោះ មហាសេដ្ឋីរូបនេះ ចាយអស់ ១១ ម៉ឺនដុល្លារ ខណៈ ៩ ម៉ឺនដុល្លារ គឺសម្រាប់តម្លៃស្រាសំប៉ាញមួយដបដែលមានឈ្មោះថា Ace of Spades Champagne ហើយគាត់ថែមទាំងបានឲ្យប្រាក់ធីប ២ ម៉ឺនដុល្លារសម្រាប់បុគ្គលិកទីនោះផងដែរ។

4/ Beyonce

តារាចម្រៀង Beyonce គឺជាបុគ្គលម្នាក់មិនញញើតក្នុងការចំណាយប្រាក់ឡើយ ពោលបើឃើញស្រឡាញ់ពេញចិត្តគឺទិញយកតែម្ដង ជាក់ស្ដែងអ្នកនាងក៏ជាអ្នកស្រឡាញ់សុខភាពខ្លាំងផងដែរដោយមានដល់ទៅចុងភៅផ្ទាល់ខ្លួនដើម្បីតាមដានរបបអាហាររបស់អ្នកនាងឲ្យមានតុល្យភាព។

ដោយឡែក គេដឹងថា ក្នុងមួយខែៗ គ្រាន់តែចាយទៅលើចុងភៅម្នាក់នោះ Beyonce ដកលុយពីកាបូបប្រមាណ ៧ ៥០០ ដុល្លារ ហើយនៅមានអ្នកចាំតាមដានរបបអាហារដែលទទួលបានខ្ពស់បំផុត ៤ ០០០ ដុល្លារទៀតផង។

5/ Shaquille O’Neal

Shaquille O’Neal ឬត្រូវគេហៅថា Shaq គឺជាបុគ្គលម្នាក់ដែលមានការចាយវាយធំសម្បើម ដោយមានម្ដងនោះ គ្រាន់តែទៅទិញឥវ៉ាន់នៅ Walmart លោកចាយអស់ ៧ ម៉ឺនដុល្លាររហូតធ្វើឲ្យក្រុមសន្តិសុខផ្ទាល់ខ្លួនមានការភាន់ច្រឡំស្មានតែគេលួចកាតធនាគាររបស់លោកថែមទៀត។

សម្រាប់ការហូបចុកវិញ Shaq ក៏ដៃទូលាយដូចគ្នាដោយក្នុងមួយខែ លោកចាយអស់ ១២ ៧៧៥ ដុល្លារសម្រាប់ចំណីអាហារ។ ហើយបើមើលទៅលើការចំណាយផ្សេងៗទៀត គឺអាចឲ្យប្រិយមិត្តចំហមាត់បាន ដោយអតីតកីឡាករបាល់បោះ ចាយអស់ជាង ៧០ ម៉ឺនដុល្លារក្នុងមួយខែ ដោយ ជាង ១០ ម៉ឺនដុល្លារសម្រាប់ដំណើរកម្សាន្ត ៤៦ ៥០០ ដុល្លារសម្រាប់ថ្លៃមើលថែកូន ២៣ ៩៥០ ដុល្លារសម្រាប់សំលៀកបំពាក់ ៦០ ៤១៧ សម្រាប់ការទិញកាដូ ២៤ ៣០០ ដុល្លារសម្រាប់ថ្លៃប្រេងឥន្ធនៈ និងជាង ៤០ ម៉ឺនដុល្លារសម្រាប់ការទូទាត់ប្រាក់កម្ចីទិញផ្ទះ ៣ កន្លែង៕

ប្រភព: Cheatsheet

The post ស្រុកខ្មែរអាហារមួយពេលចាយច្រើនបំផុត ៥ ដុល្លារ តែសេដ្ឋីស្រុកគេ អាហារមួយពេលអស់ខ្ទង់ម៉ឺនដុល្លារក៏មាន appeared first on .