ចិនថ្កោលទោសប្រធានាធិបតីឆេកថ្មី ដែលគាំទ្រអធិបតេយ្យភាពកោះតៃវ៉ាន់

ឧកញ៉ាសំពៅ — Tue, 31 Jan 2023 09:06:22 +0000

ក្រោយជាប់ឆ្នោតជាប្រធានាធិបតីឆេកថ្មី អតីតមេធំ NATO លោក Petr Pavel បានប្ដេជ្ញាពង្រឹងទំនាក់ទំនងជាមួយកោះតៃវ៉ាន់ និងគាំទ្រអធិបតេយ្យភាពរបស់តៃវ៉ាន់។ នេះបើតាមការចុះផ្សាយពី CNA។

ជុំវិញរឿងរ៉ាវនេះផងដែរ ភាគីខាងចិនបានចេញមុខថ្កោលទោសថ្នាក់ដឹកនាំថ្មីរបស់សាធារណរដ្ឋឆេក និងបានចោទប្រកាន់លោកថា មិនគោរពពាក្យសម្ដី។

យោងតាមសម្ដីអ្នកនាំពាក្យក្រសួងការបរទេសចិន Mao Ning បានប្រាប់សារព័ត៌មានថា រដ្ឋាភិបាលចិនបានបង្ហាញការមិនពេញចិត្តជាខ្លាំង និងជំទាស់ដាច់អហង្ការចំពោះការសន្ទនារវាងប្រធានាធិបតីឆេក និងតៃវ៉ាន់ ជុំវិញការឯកភាពលើអធិបតេយ្យភាពរបស់កោះតៃវ៉ាន់។

មិនតែប៉ុណ្ណោះ អ្នកនាំពាក្យរូបនេះថែមទាំងបានអះអាងថា ថ្នាក់ដឹកនាំឆេកគួរតែគោរពតាមការសម្រេចចិត្តរបស់ចិនដែលអះអាងថា កោះតៃវ៉ាន់ជាចំណែកមួយនៃទឹកដីរបស់ខ្លួន និងមិនគួរផ្លាស់ប្ដូរគោលជំហរ ពេលក្លាយជាថ្នាក់ដឹកនាំកំពូលបែបនេះឡើយ៕

The post ចិនថ្កោលទោសប្រធានាធិបតីឆេកថ្មី ដែលគាំទ្រអធិបតេយ្យភាពកោះតៃវ៉ាន់ appeared first on .

អតីតមេធំ NATO ផ្ដួលមហាសេដ្ឋី Babis ក្លាយជាប្រធានាធិបតីឆេក

ឧកញ៉ាសំពៅ — Mon, 30 Jan 2023 02:10:52 +0000

ការបោះឆ្នោតជ្រើសរើសប្រធានាធិបតីនៃសាធារណរដ្ឋឆេក បានបញ្ចប់ទៅកាលពីចុងសប្ដាហ៍មុន ហើយជាលទ្ធផលលោក Petr Pavel អតីតឧត្តមសេនីយ NATO បានទទួលជ័យជំនះលើមហាសេដ្ឋី Andrej Babis។

យោងតាមការចុះផ្សាយពី Eastcoastdaily បានបង្ហាញថា លោក Pavel ទទួលបានសម្លេងគាំទ្រ ៥៧,៨% ខណៈមហាសេដ្ឋីឆេកទទួលបានត្រឹម ៤២,២% ដូច្នេះក៏មានន័យថា អតីតមេធំ NATO ដែលមានវ័យ ៦១ ឆ្នាំ នឹងត្រូវចូលខ្លួនមកបន្តតំណែងថ្នាក់ដឹកនាំ Milos Zeman។

“អាណត្តិប្រធានាធិបតីរបស់ខ្ញុំ នឹងជោគជ័យពេលដែលពួកយើងសម្រេចបានលទ្ធផលរួមគ្នា។ ខ្ញុំមិនអាចមើលរំលងពីក្ដីបារម្ភនៃប្រជាជន ដែលកំពុងមានភាពភ័យខ្លាច អំពើអាណាធិបតេយ្យ និងភាពមិនច្បាស់លាស់។ ពួកយើងត្រូវតែកែប្រែវា គោរពច្បាប់ ហើយខ្ញុំសន្យាថាគ្រប់គ្នានឹងទទួលបានសិទ្ធិស្មើៗគ្នា”។ នេះបើតាមសម្ដីប្រធានាធិបតីឆេកថ្មីបាននិយាយ៕

The post អតីតមេធំ NATO ផ្ដួលមហាសេដ្ឋី Babis ក្លាយជាប្រធានាធិបតីឆេក appeared first on .