ក្រោយបរាជ័យក្នុងការបោះឆ្នោតសកល លោក ប្រាយុទ្ធ ចាន់អូរចា អំពាវនាវឲ្យមានការរួបរួមគ្នា

ឧកញ៉ាសំពៅ — Wed, 17 May 2023 08:00:56 +0000

នាយករដ្ឋមន្ត្រីថៃ ប្រាយុទ្ធ ចាន់អូរចា បានអំពាវនាវឲ្យមានការសាមគ្គីភាព បន្ទាប់ពីគណបក្សគាំទ្រដោយយោធារបស់លោក ទទួលរងការបរាជ័យធ្ងន់ធ្ងរសម្រាប់ការបោះឆ្នោតសកលនាពេលកន្លង។

គណបក្សរួបរួមជាតិថៃ (United Thai Nation Party) ទទួលបានសម្លេងគាំទ្រតែ ៣៦ អាសនៈប៉ុណ្ណោះ នៅក្នុងសភាជាន់ទាបដែលមានសមាជិក ៥០០ ខណៈគណបក្សប្រឆាំង ឆ្ពោះទៅមុខ (Move Forward Party) និងគណបក្សភឿថៃ (Pheu Thai Party) ទទួលបានសម្លេងគាំទ្រ ១៥២អាសនៈ និង ១៤១អាសនៈ។

យ៉ាងណា កាលពីថ្ងៃអង្គារកន្លងទៅ លោក ប្រាយុទ្ធ ក៏បានអបអរសាទរជាមួយគណបក្សប្រឆាំងក្នុងការទទួលបានជ័យជំនះមួយនេះ ហើយលោកនឹងបន្តបំពេញតួនាទីរបស់លោករហូតដល់ការបង្កើតរដ្ឋាភិបាលថ្មី ស្របពេលអំពាវនាវឲ្យប្រជាជនធ្វើការរួមគ្នាដើម្បីអភិវឌ្ឍន៍ប្រទេសថែមទៀត។

“ខ្ញុំសុំអោយប្រជាពលរដ្ឋថៃទាំងអស់ ធ្វើការរួមគ្នាដើម្បីកសាងក្ដីស្រលាញ់ និងសាមគ្គីភាព ក៏ដូចជាធ្វើឲ្យប្រទេសរបស់យើងអាចមានស្ថិរភាព ដោយមិនមានបញ្ហាអ្វីទាំងអស់”។ នេះបើតាមសម្ដីរបស់លោកប្រាយុទ្ធបាននិយាយ។

សូមជម្រាបដែរថា បច្ចុប្បន្នគណបក្សប្រឆាំងកំពុងទទួលជ័យជំនះបណ្ដោះអាសន្ន ពោលត្រូវរង់ចាំរហូតដល់ខែកក្កដា ទើបអាចកំណត់បានថា អ្នកណានឹងក្លាយជានាយករដ្ឋមន្ត្រី ដ្បិតដើម្បីអាចក្លាយជានាយករដ្ឋមន្ត្រី និងកសាងរដ្ឋាភិបាលថ្មីមួយ បេក្ខភាពត្រូវការសម្លេងគាំទ្រយ៉ាងហោចណាស់ ៣៧៦អាសនៈ ដែលជាសម្លេងបូកបញ្ចូលគ្នាពីស្ថាប័នរដ្ឋសភា និងព្រឹទ្ធសភា។

សូមជម្រាបបន្ថែមថា គណបក្សឆ្ពោះទៅមុខកំពុងជជែកគ្នាជាមួយ ៤ គណបក្សផ្សេងទៀត ដើម្បីបូកអាសនៈ ក្នុងការបង្កើតរដ្ឋាភិបាលថ្មីមួយ ខណៈគណបក្សទាំង ៥ កំពុងស្ថិតនៅក្នុងការចរចាគ្នានៅឡើយ៕

The post ក្រោយបរាជ័យក្នុងការបោះឆ្នោតសកល លោក ប្រាយុទ្ធ ចាន់អូរចា អំពាវនាវឲ្យមានការរួបរួមគ្នា appeared first on .

លោក ប្រាយុទ្ធ ចាន់អូរចា អាចនឹងដកខ្លួនចេញពីឆាកនយោបាយថៃក្រោយចាញ់ឆ្នោត

ឧកញ៉ាកោះក្របី — Tue, 16 May 2023 04:34:53 +0000

អនុប្រធានគណបក្សរួបរួមជាតិថៃ (United Thai Nation Party) លោក Thanakorn Wangboonkongchana បាននិយាយថា លោកមិនគិតថា នាយករដ្ឋមន្ត្រី ប្រាយុទ្ធ ចាន់អូរចា នឹងបន្តដើរលើឆាកនយោបាយទៀតទេ បន្ទាប់ពីគណបក្សរបស់លោកមិនទទួលបានការគាំទ្រពីប្រជាពលរដ្ឋសម្រាប់ការបោះឆ្នោតសកលកាលពីថ្ងៃអាទិត្យ។

លោក Thanakorn បាននិយាយប្រាប់បណ្ដាញសារព័ត៌មានក្នុងស្រុក ថា៖ «គាត់ (ប្រាយុទ្ធ) មិនបាននិយាយវាទេ ប៉ុន្តែខ្ញុំគិតថា គាត់ប្រហែលជាបញ្ចប់វាត្រឹមហ្នឹងហើយ»។

សូមជម្រាបជូនបន្តិចថា ការបោះឆ្នោតសកល កាលពីថ្ងៃទី ១៥ ខែឧសភា បង្ហាញថា គណបក្សឆ្ពោះទៅមុខ (Move Forward Party) និងគណបក្សភឿថៃ (Pheu Thai) ដឹកនាំដោយកូនស្រីពៅរបស់លោក ថាក់ស៊ីន ស៊ីណាវ៉ាត្រា (Thaksin Sinawatra) ដែលត្រូវបានក្រុមយោធាមានទំនោរទៅរករបបរាជានិយមធ្វើរដ្ឋប្រហារទម្លាក់ចេញពីអំណាចកាលពីឆ្នាំ២០០៦ ទទួលបានការគាំទ្រខ្លាំង ពោលគឺមាន ១៥២អាសនៈ និង ១៤១អាសនៈ ខណៈគណបក្សលោក ប្រាយុទ្ធ គណបក្សរួបរួមជាតិថៃ ទទួលបានសំឡេងត្រឹមតែ ៣៦ អាសនៈប៉ុណ្ណោះ។

យ៉ាងណា សម្រាប់តំណែងនាយករដ្ឋមន្ត្រីថៃថ្មីនេះ នៅមិនទាន់អាចកំណត់អ្នកឈ្នះបាននៅឡើយ ពោលត្រូវរង់ចាំរហូតដល់ខែកក្កដា ទើបអាចសម្រេចបាន ខណៈបច្ចុប្បន្ន គណបក្សប្រឆាំង ដែលកំពុងនាំមុខបណ្ដោះអាសន្ន កំពុងស្វះស្វែងសហការជាមួយគណបក្សដទៃ ដើម្បីបង្គ្រប់អាសនៈ ក្នុងការបង្កើតរដ្ឋាភិបាលថ្មីមួយ។

បើទោះបីជាលទ្ធផលបឋមបង្ហាញថា គណបក្សប្រឆាំងចំនួនពីរកំពុងនាំមុខគណបក្សកាន់អំណាចក្តី ក៏គណបក្សទាំងពីរនេះអាចពិបាកនឹងទទួលបានសំឡេងឆ្នោតច្រើនលើសលប់ ជាពិសេសសំឡេងគាំទ្រពីសមាជិកព្រឹទ្ធសភា ដើម្បីបង្កើតរដ្ឋាភិបាល និងតែងតាំងនាយករដ្ឋមន្ត្រីថ្មីដោយខ្លួនឯង។

បើយោងតាមរដ្ឋធម្មនុញ្ញថៃ ដែលតាក់តែងដោយក្រុមយោធាថៃឆ្នាំ២០១៧ ក្រោយពីធ្វើរដ្ឋប្រហារទម្លាក់រដ្ឋាភិបាលជាប់ឆ្នោត តម្រូវឱ្យសមាជិកព្រឹទ្ធសភាសរុប ២៥០នាក់ តែងតាំងដោយក្រុមយោធាថៃដោយមិនចាំបាច់ឆ្លងកាត់ការបោះឆ្នោត មានអំណាចក្នុងការជ្រើសរើសនាយករដ្ឋមន្ត្រីថ្មី ជាមួយនឹងគណបក្សទទួលបានសំឡេងឆ្នោតគាំទ្រពីពលរដ្ឋ។ ដើម្បីអាចក្លាយជានាយករដ្ឋមន្ត្រីថៃបាន បេក្ខជនត្រូវតែទទួលបានសំឡេងគាំទ្រយ៉ាងហោចណាស់ ៣៧៦ សំឡេង ដែលជាសំឡេងបូកបញ្ចូលគ្នាពីស្ថាប័នរដ្ឋសភា និងព្រឹទ្ធសភា៕

The post លោក ប្រាយុទ្ធ ចាន់អូរចា អាចនឹងដកខ្លួនចេញពីឆាកនយោបាយថៃក្រោយចាញ់ឆ្នោត appeared first on .

Prayut Chan-O-Cha

ក្រោយបរាជ័យក្នុងការបោះឆ្នោតសកល លោក ប្រាយុទ្ធ ចាន់អូរចា អំពាវនាវឲ្យមានការរួបរួមគ្នា

លោក ប្រាយុទ្ធ ចាន់អូរចា អាចនឹងដកខ្លួនចេញពីឆាកនយោបាយថៃក្រោយចាញ់ឆ្នោត