Ray-Ban

ក្រុមហ៊ុនវែនតាខ្នាតយក្សមួយ ប្រកាសចាប់ដៃគូយូរអង្វែងជាមួយក្រុមហ៊ុន Meta

ឧកញ៉ាសំពៅ — Tue, 17 Sep 2024 09:01:00 +0000

ក្រុមហ៊ុនផលិតវែនតា EssilorLuxottica បានប្រកាសនាថ្ងៃទី១៧ ខែកញ្ញានេះថា ពួកគេនឹងបន្តភាពជាដៃគូសហការយូរអង្វែង ជាមួយក្រុមហ៊ុន Meta Platforms ក្នុងការអភិវឌ្ឍន៍បច្ចេកវិទ្យាបញ្ញាសិប្បនិមិត្តឲ្យកាន់តែពិសេសថែមទៀត។

យោងតាមការចុះផ្សាយពីគេហទំព័រ Reuters បានបង្ហាញថា ក្រុមហ៊ុនទាំង ២នេះ បានចុះកិច្ចព្រមព្រៀងជាដៃគូសហការ តាំងពីឆ្នាំ២០១៩ និងបានបង្កើតវែនតាឆ្លាតវៃ ២ជំនាន់រួចមកហើយ។

វែនតាឆ្លាតវៃជំនាន់ទីមួយរបស់ក្រុមហ៊ុនទាំង២ រងការប៉ះទង្គិច និងរិះគន់ជាខ្លាំង ក៏ប៉ុន្តែឆ្លងកាត់ការធ្វើកំណែអាប់ដែតថ្មី វែនតាជំនាន់ទី២ ដែលបានចេញលក់ចុងឆ្នាំ២០២៣ ទទួលបានការបញ្ជាទិញរាប់ពាន់ដើម និងទទួលបានការកោតសរសើរខ្លាំងផងដែរ។

គួររំលឹកដែរថា វែនតាឆ្លាតវៃដែលផលិតដោយក្រុមហ៊ុនទាំង២ នេះ អនុញ្ញាតឲ្យអតិថិជនអាចលើកទូរស័ព្ទ ស្ដាប់ចម្រៀង និងផ្ដិតយករូបភាពដោយផ្ទាល់ តាមការបញ្ជាលើដងវែនតាតែម្ដង៕

The post ក្រុមហ៊ុនវែនតាខ្នាតយក្សមួយ ប្រកាសចាប់ដៃគូយូរអង្វែងជាមួយក្រុមហ៊ុន Meta appeared first on .

ក្រុមហ៊ុនមហាសេដ្ឋី Mark Zuckerberg គ្រោងទិញភាគហ៊ុន ៥% ពីក្រុមហ៊ុនវែនតាខ្នាតយក្សមួយ

ឧកញ៉ាសំពៅ — Fri, 19 Jul 2024 07:02:00 +0000

ក្រុមហ៊ុន Meta Platforms របស់មហាសេដ្ឋី Mark Zuckerberg កំពុងស្ថិតនៅក្នុងការចរចា ទិញយកភាគហ៊ុនចំនួន ៥% ពីក្រុមហ៊ុន EssilorLuxottica ដែលជាអ្នកផលិតវែនតា Ray-Ban ដែលល្បីល្បាញទូទាំងសកលលោក។

យោងតាមការចុះផ្សាយពីគេហទំព័រ WSJ បានបង្ហាញថា បើទោះជាក្រុមហ៊ុន Meta មិនបានបង្ហើបពីទំហំចំណាយ សម្រាប់ការទិញយកភាគហ៊ុននេះក្ដី តែភាគហ៊ុន ៥% នោះ គឺអាចមានតម្លៃប្រហែល ៤,៧ពាន់លានដុល្លារ បើសង្កេតតាមតម្លៃក្រុមហ៊ុនវែនតាមួយនេះ។

គួររំលឹកបន្តិចថា កន្លងមកក្រុមហ៊ុនទាំង ២នេះ ក៏ធ្លាប់ចាប់ដៃគូ បង្កើតនូវវែនតាឆ្លាតវៃ ដែលមានឈ្មោះថា Ray-Ban Meta ដែលបំពាក់នូវបច្ចេកវិទ្យា Meta AI នៅក្នុងឆ្នាំ២០២១ ហើយវាក៏ជាផលិតផលសំខាន់មួយ របស់ក្រុមហ៊ុនមហាសេដ្ឋីអាមេរិក Mark Zuckerberg ផងដែរ។

សូមជម្រាបដែរថា ក្រុមហ៊ុនបច្ចេកវិទ្យាធំៗជាច្រើន កំពុងព្យាយាមអភិវឌ្ឍបច្ចេកវិទ្យាទំនើប ដែលអាចផ្សារភ្ជាប់រវាងពិភពសិប្បនិមិត្ត និងការពិត តួយ៉ាងដូចជាក្រុមហ៊ុន Apple បានបង្កើតឧបករណ៍ Apple Vision ខណៈក្រុមហ៊ុន Meta វិញ កំពុងសំងំអាប់ដែតបច្ចេកវិទ្យា Virtual Reality របស់ខ្លួន ឲ្យកាន់តែទំនើប៕

The post ក្រុមហ៊ុនមហាសេដ្ឋី Mark Zuckerberg គ្រោងទិញភាគហ៊ុន ៥% ពីក្រុមហ៊ុនវែនតាខ្នាតយក្សមួយ appeared first on .

ម្ចាស់ក្រុមហ៊ុនវ៉ែនតា Ray-Ban ទទួលមរណភាពនៅអាយុ ៨៧ ឆ្នាំ មានប្រវត្តិតស៊ូមិនធម្មតា

ឧកញ៉ាសំពៅ — Tue, 28 Jun 2022 02:34:53 +0000

មហាសេដ្ឋី Leonard Del Vecchio បានទទួលមរណភាពនៅអាយុ ៨៧ ឆ្នាំ ក្រោយបានសម្រាកព្យាបាលជំងឺនៅមន្ទីរពេទ្យ San Raffaele នៅទីក្រុង Milan ប្រទេសអ៊ីតាលីកាលពីប៉ុន្មានសប្ដាហ៍មកនេះ។ នេះបើតាមរបាយការណ៍ផ្ដល់ឲ្យដោយអង្គភាពសារព័ត៌មាន AGI របស់អ៊ីតាលី។

ដោយឡែក យោងតាមឯកសារដែលចុះផ្សាយដោយ Forbes ក៏បានអះអាងទៀតថា ម្ចាស់ក្រុមហ៊ុន Ray-Ban ខាងលើ គឺជាមហាសេដ្ឋីមានបំផុតទី ២ ប្រចាំអ៊ីតាលី ជាមួយទំហំទ្រព្យសម្បត្តិប្រមាណ ២៧,៣ ពាន់លានដុល្លារ។

ក្រឡេកទៅមើលប្រវត្តិតស៊ូរបស់មហាសេដ្ឋីខាងលើវិញ គឺពិតជាគួរឲ្យកោតសរសើរមែនទែន ពោលបានកើតនៅថ្ងៃទី ២២ ឧសភា ១៩៣៥ ក្នុងត្រកូលក្រីក្រ ហើយកើតបានតែ ៥ខែ ឪពុកបានចែកឋានចោល ហើយលោកបានធំធាត់នៅមណ្ឌលកុមារកំព្រា។

បុរសម្នាក់នេះចាប់ផ្ដើមចេញរកការងារធ្វើតាំងពីអាយុ ១៤ ឆ្នាំ និងមានក្ដីស្រមៃចង់ក្លាយជាសិប្បករជំនាញម្នាក់ គ្រាន់នឹងចិញ្ចឹមក្រពះប៉ុណ្ណោះ ប៉ុន្តែលោកមិនមែនត្រឹមតែក្លាយជាសិប្បករម្នាក់ឡើយ ថែមទាំងជាអ្នកជំនួញដ៏មានអំណាចថែមទៀត។ នេះបើតាមការចុះផ្សាយពី MoneyControl។

មុននឹងក្លាយជាអ្នកជំនួញដ៏មានឥទ្ធិពល Leonardo ធ្លាប់ធ្វើការងារទទួលបានកម្រៃទាបបំផុត ពោលប្រមាណ ១៥ អឺរ៉ូសេនប៉ុណ្ណោះ សម្រាប់រយៈពេលជាង ១០ ថ្ងៃ។ មិនតែប៉ុណ្ណោះលោកធ្លាប់មានឧបទ្ទវហេតុនៅកន្លែងធ្វើការ ដោយមានកំហុសបច្ចេកទេសបណ្ដាលឲ្យបាត់បង់ម្រាមចង្អុលដៃផងដែរ។

រហូតនៅឆ្នាំ ១៩៦១ លោក Leonardo បានផ្លាស់ទីទៅកាន់ទីក្រុង Agordo ដែលជាសំបុកនៃក្រុមហ៊ុនផលិតវ៉ែនតាអ៊ីតាលី ហើយបានបោះទីតាំងក្រុមហ៊ុន Luxottica ក្នុងនាមជាក្រុមហ៊ុនដៃគូអាជីវកម្មមានដែនកំណត់។

៦ឆ្នាំក្រោយការបើកក្រុមហ៊ុន លោកចាប់ផ្ដើមលក់វ៉ែនតាក្រោមម៉ាកយីហោ Luxottica និងនៅឆ្នាំ ១៩៧១ លោកចាប់ផ្ដើមចុះកុងត្រាជាមួយក្រុមហ៊ុនធំៗ។ នៅឆ្នាំ ១៩៧៤ លោកបានទិញយកក្រុមហ៊ុន Scarrone ដែលជាក្រុមហ៊ុនចែកចាយមួយ ហើយនៅឆ្នាំ ១៩៨១ បានបើកសាខាអន្តរជាតិនៅប្រទេសអាល្លឺម៉ង់ និងបានចុះកុងត្រាជាមួយ Giorgio Armani នៅឆ្នាំ ១៩៨៨។

រំលងបាន ១១ ឆ្នាំ ពោលនៅឆ្នាំ ១៩៩៩ Luxottica បានចុះកុងត្រាទិញយកក្រុមហ៊ុន Ray-Ban ដែលជាក្រុមហ៊ុនវ៉ែនតាស៊ីវិល័យបង្កើតនៅឆ្នាំ ១៩៣៦ ក្នុងតម្លៃដល់ទៅ ៦៤០ លានដុល្លារ ហើយមកទល់បច្ចុប្បន្ន Luxottica គឺជាក្រុមហ៊ុនធំបំផុតលើពិភពលោកនៃវិស័យឧស្សាហកម្មវ៉ែនតា។

សូមជម្រាបដែរថា ដំណឹងមរណភាពរបស់លោកបានប្រកាសជាផ្លូវការដោយក្រុមហ៊ុន EssilorLuxottica កាលពីពេលថ្មីៗនេះ៕

The post ម្ចាស់ក្រុមហ៊ុនវ៉ែនតា Ray-Ban ទទួលមរណភាពនៅអាយុ ៨៧ ឆ្នាំ មានប្រវត្តិតស៊ូមិនធម្មតា appeared first on .

Ray-Ban

ក្រុមហ៊ុនវែនតាខ្នាតយក្សមួយ ប្រកាសចាប់ដៃគូយូរអង្វែងជាមួយក្រុមហ៊ុន Meta

ក្រុមហ៊ុនមហាសេដ្ឋី Mark Zuckerberg គ្រោងទិញភាគហ៊ុន ៥% ពីក្រុមហ៊ុនវែនតាខ្នាតយក្សមួយ

ម្ចាស់​ក្រុមហ៊ុន​វ៉ែនតា Ray-Ban ទទួល​មរណភាព​នៅ​អាយុ ៨៧ ឆ្នាំ មាន​ប្រវត្តិ​តស៊ូ​មិន​ធម្មតា

ម្ចាស់ក្រុមហ៊ុនវ៉ែនតា Ray-Ban ទទួលមរណភាពនៅអាយុ ៨៧ ឆ្នាំ មានប្រវត្តិតស៊ូមិនធម្មតា