លោកឧកញ៉ា លាង ពៅ អគ្គនាយកក្រុមហ៊ុន ខ្មែរ ប៊ែវើវីជីស និងជាអ្នកតំណាងឱ្យម្ចាស់រថយន្ត super car ទាំងអស់ មានប្រសាសន៍ថា ដោយសារតែមើលឃើញពីសន្ទុះនៃការគាំទ្រ និងស្រលាញ់ចូលចិត្តពីសំណាក់អ្នកចូលចិត្តរថយន្ត ជាពិសេស ចង់លើកកម្ពស់វិស័យរថយន្តទំនើបៗនៅកម្ពុជា ទើបលោកឧកញ៉ា និងម្ចាស់រថយន្តប្រភេទ Supercar និង Hypercar ទាំងអស់នៅកម្ពុជាព្យាយាមជួបជុំគ្នា និង រៀបចំកម្មវិធីដ៏ពិសេសនេះឡើង។

លោកឧកញ៉ា លាង ពៅ បញ្ជាក់បន្ថែមថា ការរៀបចំព្រឹត្តិការណ៍ជួបជុំរថយន្ត នេះឡើង គឺមិនមែនដើម្បីសំញ៉ែងធនធានអ្វីឡើយ ពោល គឺការរៀបចំ Rev Up Beyond Supercar នេះឡើង គឺដើម្បី៖

ទី១/ ចង់បំពេញក្ដីស្រមៃរបស់ប្រជាជនគ្រប់ស្រទាប់វ័យ ដែលស្រលាញ់ចូលចិត្តរថយន្តស្ព័រទំនើបៗ ឲ្យបានឃើញផ្ទាល់ ប៉ះផ្ទាល់ ផ្ដិតយករូបភាព​រថយន្តក្នុងក្ដីស្រមៃរបស់ពួកគេ។

ទី២/ ពង្រឹងបណ្ដាញទំនាក់ទំនងរវាងម្ចាស់រថយន្តទាំងនោះ ដើម្បីបង្កើតជា​សមាគមរថយន្ត Supercar និង Hypercar ដូចទៅនឹងបណ្ដាប្រទេសក្នុងតំបន់

ទី៣/ ជួយដល់ម្ចាស់អាជីវកម្ម ដែលកំពុងប្រកបធុរកិច្ច លើវិស័យរថយន្តទាំងអស់ អាចនាំយកផលិតផល ឬសេវាកម្មនានារបស់ខ្លួន បង្ហាញ និងចែកចាយទៅកាន់​ម្ចាស់ផ្ទាល់

៤/ កម្មវិធី RUBS គឺប្រៀបដូចជា បទពិសោធន៍នៃការកម្សាន្តបែបថ្មីសន្លាង ជាពិសេសបំពេញចំណាប់អារម្មណ៍​យុវជន បំផុសគំនិតថ្មីៗទាក់ទងនឹងរថយន្តទំនើបៗ ក៏ដូចជាជំរុញចិត្តយុវជនឲ្យព្យាយាមខិតខំ​រៀនសូត្រ និងធ្វើការរកចំណូល ដើម្បីតាមចាប់រថយន្តនៅក្នុងក្ដីស្រមៃរៀងៗខ្លួនផងដែរ។

កម្មវិធី Rev Up Beyond Supercar ប្រារព្ធធ្វើឡើងកាលពីថ្ងៃទី២៧ ខែមករា នៅអគារពាណិជ្ជកម្ម Chip Mong Tower ដោយមានការចូលរួមពីរថយន្ត Supercar និង Hypercar កំពូលៗ រាប់រយគ្រឿង និងទទួលបានការចាប់អារម្មណ៍កាន់តែខ្លាំងឡើងៗពីសំណាក់អ្នកចូលរួមគ្រប់វ័យ។

ជាការកត់សម្គាល់ អ្នកចូលរួមក្នុងកម្មវិធី ជាពិសេស យុវជនដែលស្រឡាញ់ចូលចិត្តរថយន្ត Supercar និង Hypercar បានទទូចសុំឲ្យមានការ​បង្កើតព្រឹត្តិការណ៍តាំងបង្ហាញរថយន្តទំនើបៗ បែបនេះឲ្យបានញឹកញាប់ និងច្រើនជាងមុន ដ្បិតនេះគឺជារសនិយមនៃបទពិសោធន៍ការកម្សាន្តបែបថ្មី និងមិនធ្លាប់មានការរៀបចំច្រើននៅកម្ពុជាឡើយ៕

The post លោកឧកញ៉ា លាង ពៅ៖ ព្រឹត្តិការណ៍ Rev Up Beyond Supercar ជាការផ្ដល់បទពិសោធន៍ និងការជួបជុំកម្សាន្តបែបថ្មី ជូនអ្នកស្រលាញ់ចូលចិត្តរថយន្ត appeared first on .

ព្រឹត្តិការណ៍ជំនួបម្ចាស់រថយន្តបែបSupercar និង Hyper Car “Rev Up Beyond Supercar Cambodia” នេះ ត្រៀមនឹងរៀបចំឡើងនាថ្ងៃទី២៧ ខែមករា ឆ្នាំ២០២៤ នៅបរិវេនអគារពាណិជ្ជកម្ម ជីប ម៉ុង ថៅវើ។ ក្នុងសន្និសីទការសែត កាលពីថ្ងៃទី១៥ ខែមករា ម្សិលមិញ នៅThe Winds Rooftop Bar & Lounge ជាន់ទី៤៤ នៃអគារ ជីប ម៉ុង ថៅវើ លោកឧកញ៉ា លាង ពៅ អគ្គនាយកក្រុមហ៊ុន ខ្មែរ ប៊ែវើវីជីស និងជាអ្នកតំណាងឱ្យម្ចាស់រថយន្ត super car ទាំងអស់ មានប្រសាសន៍ថា៖ គោលបំណងសំខាន់នៃការរៀបចំព្រឹត្តិការណ៍នេះ គឺដើម្បីបំពេញបំណងអ្នកស្រលាញ់ប្រភេទរថយន្ត Supercar ទាំងអស់។ បន្ថែមពីនោះ ក៏ដើម្បីបង្កើតអនុស្សាវរីយ៍ដ៏អស្ចារ្យ និងរឹតចំណងមិត្តភាពរវាងម្ចាស់រថយន្តនីមួយៗ រួមទាំងបង្កើតភាពស្និតស្នាល និងសាមញ្ញ រវាងម្ចាស់រថយន្ត Super car និងបងប្អូនដែលនិយមគាំទ្រ និងស្រលាញ់ចូលចិត្តរថយន្តក្នុងក្ដីស្រមៃរបស់ខ្លួន។

ឧកញ៉ា លាង ពៅ បានបន្ថែមថា ព្រឹត្តិការណ៍ “Rev Up Beyond Supercar Cambodia” លើកនេះ ធានាថានឹងមិនធ្វើឱ្យម្ចាស់រថយន្ត ក៏ដូចជា បងប្អូនសាធារណជនខកបំណងឡើយ ព្រោះព្រឹត្តិការណ៍លើកនេះ នឹងមានចំនួន រថយន្ត super car និង hyper car ចូលរួមរហូតដល់ជាង ១០០គ្រឿង។ ហើយកាន់តែពិសេសជាងនេះទៀតនោះ បងប្អូនអាចូលរួមទស្សនាដោយសេរី រួមទាំងអាចចុះឈ្មោះទទួលបានគូប៉ុងបញ្ចុះតម្លៃពិសេសៗទៅលើការពិសារអាហារ និងភេសជ្ជៈគ្រប់ប្រភេទ ពីសណ្ឋាគារ Faifield By Mirroit Phnom Penh នៅខាងក្នុងអគារ ជីប ម៉ុង ថៅវើ ថែមទៀតផង។

សម្រាប់ម្ចាស់រថយន្តSupercar និង Hyper Car ទាំងអស់ ដែលមានបំណងចូលរួម ក្នុងព្រឹត្តិការណ៍ដ៏អស្ចារ្យ និងកក្រើកនេះ ក៏អាចចុះឈ្មោះតាមរយៈលីង ឬ QR Code នេះចាប់ពីឥឡូវបានផងដែរ! លីងដើម្បីចុះឈ្មោះកម្មវិធី Rev Up Beyond Supercar Cambodia

កុំភ្លេច ចូលរួមទស្សនាកម្សាន្តដោយសេរី ក្នុងព្រឹត្តិការណ៍ “Rev Up Beyond Supercar Cambodia” ដ៏ធំប្រចាំឆ្នាំ២០២៤ នារសៀលថ្ងៃទី២៧ ខែមករា ខាងមុខនេះ នៅទីតាំងបរិវេនអគារពាណិជ្ជកម្ម ជីប ម៉ុង ថៅវើ ឱ្យបានច្រើនកុះករ!

The post ចង់បំពេញក្ដីស្រមៃអ្នកនិយមស្រលាញ់ចូលចិត្តរថយន្ត Supercar ទូទាំងប្រទេស ឧកញ៉ា លាង ពៅ ផ្ដួចផ្ដើមរៀបចំព្រឹត្តិការណ៍ដ៏ធំ នាថ្ងៃទី២៧ ខែមករា នេះ appeared first on .