Royal Dutch Shell

ក្រុមហ៊ុនប្រេង Shell រាយការណ៍ពីប្រាក់ចំណេញប្រចាំត្រីមាសទី ៣ បានជិត ១០ ពាន់លានដុល្លារ

ឧកញ៉ាសំពៅ — Thu, 27 Oct 2022 08:58:00 +0000

កាលពីថ្ងៃទី ២៧ តុលាកន្លងទៅ ក្រុមហ៊ុនប្រេង Shell បានរាយការណ៍ពីប្រាក់ចំណេញប្រចាំត្រីមាសទី ៣ នៃឆ្នាំ ២០២២ នេះ ដោយទទួលបានប្រមាណ ៩,៥ ពាន់លានដុល្លារ តិចជាងឆ្នាំទៅ ដោយសារការចម្រាញ់ប្រេង និងការជួញដូរមានសភាពយឺតយ៉ាវ។

យោងតាមការចុះផ្សាយពី CNA បានបន្ថែមទៀតថា លំហូរសាច់ប្រាក់ប្រចាំត្រីមាសឆ្នាំនេះវិញ Shell មានប្រមាណ ១២,៥ ពាន់លានដុល្លារ តិចជាងឆ្នាំទៅដែលធ្លាប់មាន ១៨,៦ ពាន់លានដុល្លារ ដ្បិតពួកគេបានកាត់បន្ថយការចំណាយជាង ៤ ពាន់លានដុល្លារ លើកម្លាំងពលកម្ម។

ដោយសារកម្លាំងពលកម្មតិចជាងឆ្នាំមុន ដូច្នេះប្រាក់ចំណេញក៏ទទួលបានទាបជាងឆ្នាំមុនដូចគ្នា ពោល គឺតិចជាងឆ្នាំទៅប្រហែល ២,៥ ពាន់លានដុល្លារ ដែលកាលពីឆ្នាំទៅ Shell រកចំណេញលុយ ១១,៥ ពាន់លានដុល្លារនៅត្រីមាសទី ៣ ជាចំនួនច្រើនបំផុតមួយដែលក្រុមហ៊ុនធ្លាប់រកបាន។

សូមជម្រាបដែរថា ក្រោយការបង្ហោះពីរបាយការណ៍ប្រាក់ចំណេញប្រចាំត្រីមាសហើយ Shell ក៏បានបង្ហើបពីផែនការនាថ្ងៃអនាគតបន្តិចផងដែរ ដោយពួកគេមានបំណងបង្កើនភាគលាភឲ្យបាន ១៥% ឬគិតជាទឹកប្រាក់ប្រហែល ៤ ពាន់លានដុល្លារ នៅត្រីមាសចុងក្រោយនេះ៕

The post ក្រុមហ៊ុនប្រេង Shell រាយការណ៍ពីប្រាក់ចំណេញប្រចាំត្រីមាសទី ៣ បានជិត ១០ ពាន់លានដុល្លារ appeared first on .

ក្រុមហ៊ុនឥន្ធនៈធំៗទូទាំងពិភពលោក សំងំកើបលុយរាប់ពាន់លានដុល្លារនៅត្រីមាសទី ២

ឧកញ៉ាសំពៅ — Tue, 09 Aug 2022 08:52:12 +0000

ដូចដែលប្រិយមិត្តធ្លាប់បានដឹងរួចមកហើយថា សង្គ្រាមរវាងរុស្ស៊ី និងអ៊ុយក្រែនបានធ្វើឲ្យពិភពលោកប្រឈមនឹងវិបត្តិសេដ្ឋកិច្ចធ្ងន់ធ្ងរ តួយ៉ាងការកើនឡើងនៃតម្លៃទំនិញយ៉ាងតក់ក្រហល់ បណ្ដាលឲ្យប្រទេសមួយចំនួនធ្លាក់ចូលរណ្ដៅសេដ្ឋកិច្ចតែមួយប៉ប្រិចភ្នែក។

ក្នុងចំណោមទំនិញដែលឡើងថ្លៃទាំងអស់ ប្រេងឥន្ធនៈមានការកើនឡើងខ្ពស់បំផុត ស្របពេលតម្រូវការក៏មានច្រើនផង បានធ្វើឲ្យក្រុមហ៊ុនធំៗដែលជួញដូរលើវិស័យមួយនេះ សំងំកើបលុយបានច្រើនសន្ធឹកពីឱកាសដ៏កម្របែបនេះ។

ខាងក្រោមនេះគឺជារបាយការណ៍ត្រួសៗរៀបរាប់ពីប្រាក់ចំណូលប្រចាំត្រីមាសទី ២ នៃឆ្នាំ ២០២២ របស់ក្រុមហ៊ុនប្រេងធំៗទូទាំងពិភពលោកផ្ដល់ឲ្យដោយសារព័ត៌មាន Capital៖

1/ ក្រុមហ៊ុន Exxon Mobil ទទួលបានប្រាក់ចំណេញច្រើនជាង ៥០ ពាន់លានដុល្លារនៅត្រីមាសទី ២ នៃឆ្នាំ ២០២២។

2/ ក្រុមហ៊ុន Chevron ដែលប្រកបអាជីវកម្មនៅកម្ពុជាក្រោមស្លាកយីហោ CALTEX ទទួលបានប្រាក់ចំណេញប្រមាណ ១១,៦ ពាន់លានដុល្លារ ច្រើនជាងឆ្នាំទៅជិត ៤ ដង ពោលកាលពីឆ្នាំ ២០២១ ក្រុមហ៊ុនខាងលើទទួលបានប្រាក់ចំណេញត្រឹម ៣,១ ពាន់លានដុល្លារ ក្នុងរយៈពេលដូចគ្នា។

3/ ក្រុមហ៊ុន Royal Dutch Shell PLC សម្រាប់ត្រីមាសទី ២ នេះវិញ Shell ទទួលបានប្រាក់ចំណេញប្រមាណ ១១,៥ ពាន់លានដុល្លារ ច្រើនជាងឆ្នាំទៅទ្វេដង និងកើនឡើងពី ៩,១ ពាន់លានដុល្លារនៅត្រីមាសទី ១ នៃឆ្នាំ ២០២២។

4/ ក្រុមហ៊ុន TotalEnergies វិញ គឺរកប្រាក់ចំណេញសម្រាប់ត្រីមាសទី ២ នៃឆ្នាំ ២០២២ បានប្រមាណជិត ១០ ពាន់លានដុល្លារ តិចជាងក្រុមហ៊ុនគូប្រជែងដទៃបន្តិច។

ដោយឡែក សម្រាប់ក្រុមហ៊ុនប្រេងជួរមុខប្រទេសថៃ PTT វិញក៏បានទម្លាយពីរបាយការណ៍ចំណូលប្រចាំត្រីមាសរបស់ពួកគេផងដែរ ប៉ុន្តែមានត្រឹមត្រីមាសទី ១ នៃឆ្នាំ ២០២២ ប៉ុណ្ណោះ ពោលរកបានប្រាក់ចំណេញប្រមាណ ៣ ៨៤៥ លានបាត ឬជាង ១០៨ លានដុល្លារអាមេរិក៕

The post ក្រុមហ៊ុនឥន្ធនៈធំៗទូទាំងពិភពលោក សំងំកើបលុយរាប់ពាន់លានដុល្លារនៅត្រីមាសទី ២ appeared first on .

ក្រុមហ៊ុនប្រេងឥន្ធនៈ Shell ប្រកាសចង់ប្ដូរទីស្នាក់ការកណ្ដាលពីប្រទេសហូឡង់ទៅចក្រភពអង់គ្លេស

ឧកញ៉ាសំពៅ — Wed, 17 Nov 2021 05:12:40 +0000

ក្រុមហ៊ុនប្រេងឥន្ធនៈ Royal Dutch Shell បានប្រកាសស្នើធប្ដូរទីស្នាក់ការកណ្ដាលពីប្រទេសហូឡង់ទៅកាន់ចក្រភពអង់គ្លេស និងបានរៀបចំរចនាសម្ព័ន្ធក្រុមហ៊ុនកាលពីថ្ងៃច័ន្ទ។

ការផ្លាស់ប្ដូរទីស្នាក់ការកណ្ដាលនេះ គឺក្នុងគោលបំណងប្រឡូកទីផ្សារថ្មី ដែលកំពុងដើរចេញពីការពឹងផ្អែកវិស័យប្រេងឥន្ធនៈ ហើយជាមួយគ្នានោះពួកគេក៏បានអះអាងបន្ថែមថា គោលបំណងសំខាន់មួយទៀត គឺចង់សាកល្បងចូលវិស័យផលិតថាមពលស្អាតជាងមុន។

ដោយឡែក រដ្ឋាភិបាលនៃប្រទេសហូឡង់វិញ បានសម្ដែងការខកចិត្តជាខ្លាំងជាមួយការសម្រេចចិត្តមួយនេះ។ បើតាមលោក Stef Blok រដ្ឋមន្ត្រីក្រសួងសេដ្ឋកិច្ច និងអាកាសធាតុរបស់ប្រទេសហូឡង់បាននិយាយ៖ “រដ្ឋាភិបាលពិតជាមានការខកចិត្តជាខ្លាំង ដែល Shell ចង់ផ្លាស់ប្ដូរទីស្នាក់ការកណ្ដាលទៅកាន់ចក្រភពអង់គ្លេស”។

“បច្ចុប្បន្នពួកយើងកំពុងពិភាក្សាជាមួយថ្នាក់ដឹកនាំកំពូលៗនៃក្រុមហ៊ុន Shell អំពីផលប៉ះពាល់នៃបម្លាស់ទី ដែលអាចជះឥទ្ធិពលអាក្រក់ដល់ការវិនិយោគ និងនិរន្តរភាពជាដើម”។

បញ្ជាក់ដែរថា Shell គឺជាក្រុមហ៊ុនមួយដែលមានទីតាំងនៅហូឡង់អស់រយៈកាលជាង ១ សតវត្សមកហើយ។ ក្នុងករណីពួកគេអាចប្ដូរទីស្នាក់ការកណ្ដាលបានសម្រេចមែន នោះក៏អាចនឹងមានការផ្លាស់ប្ដូរឈ្មោះពី Royal Dutch Shell មកសល់ត្រឹម Shell ដូចគ្នា។

ដោយឡែក ការសម្រេចចិត្តផ្លាស់ប្ដូរទីតាំងបែបនេះ គឺអាចបណ្ដាលមកពីក្រុមហ៊ុនប្រេងមួយនេះចាញ់ក្ដីទំនាស់ដីធ្លីជាមួយសកម្មជនអាកាសធាតុនៅហូឡង់កាលពីដើមឆ្នាំ ហើយតុលាការក្រុងឡាអេបានបញ្ជាឱ្យក្រុមហ៊ុនកាត់បន្ថយការបញ្ចេញកាបូនចំនួន ៤៥% ត្រឹមឆ្នាំ ២០៣០ បើធៀបនឹងកម្រិតឆ្នាំ ២០១៩ ដែលការសម្រេចចិត្តមួយនេះធ្វើឲ្យ ក្រុមសកម្មជនចាត់ទុកថាជាជ័យជំនះមួយ។

យ៉ាងណា ការសម្រេចចិត្តជាផ្លូវការគឺនឹងធ្វើឡើងនៅថ្ងៃទី ១០ ធ្នូខាងមុខ ក្រោមការបោះឆ្នោតពីម្ចាស់ភាគហ៊ុនធំៗប្រចាំក្រុមហ៊ុន។ តែកន្លងមកមិនមែនមានតែ Shell ឡើយដែលចង់ប្ដូរទីស្នាក់ការកណ្ដាលទៅចក្រភពអង់គ្លេស ពោលមានក្រុមហ៊ុនយក្សផ្សេងៗដូចជា Unilever, Dove, Lipton និង Ben & Jerry ជាដើមសុទ្ធតែបញ្ចប់ការសហការនៅប្រទេសហូឡង់ ងាកមកសង់ទីស្នាក់ការកណ្ដាលនៅទីក្រុងឡុងវិញ៕

ប្រភព: Energeticcity

The post ក្រុមហ៊ុនប្រេងឥន្ធនៈ Shell ប្រកាសចង់ប្ដូរទីស្នាក់ការកណ្ដាលពីប្រទេសហូឡង់ទៅចក្រភពអង់គ្លេស appeared first on .

Royal Dutch Shell

ក្រុមហ៊ុនប្រេង Shell រាយការណ៍ពីប្រាក់ចំណេញប្រចាំត្រីមាសទី ៣ បានជិត ១០ ពាន់លានដុល្លារ

ក្រុមហ៊ុនឥន្ធនៈធំៗទូទាំងពិភពលោក សំងំកើបលុយរាប់ពាន់លានដុល្លារនៅត្រីមាសទី ២

ក្រុមហ៊ុន​ប្រេងឥន្ធនៈ​ Shell ប្រកាស​ចង់​ប្ដូរ​ទីស្នាក់ការ​កណ្ដាល​ពី​ប្រទេស​ហូឡង់​ទៅ​ចក្រភព​អង់គ្លេស

ក្រុមហ៊ុនប្រេងឥន្ធនៈ Shell ប្រកាសចង់ប្ដូរទីស្នាក់ការកណ្ដាលពីប្រទេសហូឡង់ទៅចក្រភពអង់គ្លេស