Tencent Holdings

សហស្ថាបនិកក្រុមហ៊ុនហ្គេមខ្នាតយក្ស Tencent ឡើងគ្រងតំណែងជាអ្នកមានដាច់គេនៅចិន

ឧកញ៉ាសាមញ្ញ — Tue, 17 Sep 2024 09:55:00 +0000

សហស្ថាបនិកក្រុមហ៊ុនហ្គេមលំដាប់កំពូល Tencent Holdings លោក Pony Ma បានត្រលប់មកគ្រងតំណែងជាអ្នកមានដាច់គេម្តងទៀត នៅក្នុងប្រទេសចិន ដោយវ៉ាដាច់មហាសេដ្ឋីទឹកសុទ្ធ លោក Zhong Shanshan ជាមួយនឹងទ្រព្យសម្បត្តិសរុបប្រមាណ ៤៤ពាន់លានដុល្លារ។ នេះបើតាមការចុះផ្សាយពីសារព័ត៌មាន The Star។

គួរឲ្យដឹងថា Zhong បានធ្លាក់មកចំណាត់ថ្នាក់លេខ៣ ស្របពេលលោក Zhang Yiming ដែលជាស្ថាបនិកក្រុមហ៊ុន ByteDance ឡើងមកកាន់ចំណាត់ថ្នាក់លេខ២ ក្នុងនាមជាអ្នកមានបំផុត នៅក្នុងប្រទេសចិន។

ទ្រព្យសម្បត្តិរបស់លោក Ma បានកើនឡើងយ៉ាងខ្លាំង នាពេលថ្មីៗនេះ បន្ទាប់ពីភាគហ៊ុនរបស់ក្រុមហ៊ុន Tencent ហក់ឡើងខ្ពស់លើសក្រុមហ៊ុនគូប្រជែងផ្សេងទៀត ចំពេលទីផ្សារហ្គេមនៅក្នុងប្រទេសចិនមានកំពុងមានសន្ទុះខ្លាំង។

ជម្រាបជូនផងដែរថា ទ្រព្យសម្បត្តិរបស់លោក Ma នៅតែធ្លាក់ចុះប្រហែល ៤០% ពីកម្រិតកំពូលរបស់ខ្លួនដែលបានកត់ត្រាទុក នៅក្នុងខែមករា ឆ្នាំ២០២១ ។នេះបើយោងតាមសន្ទស្សន៍ទ្រព្យសម្បត្តិចេញផ្សាយដោយសារព័ត៌មាន Bloomberg ៕

The post សហស្ថាបនិកក្រុមហ៊ុនហ្គេមខ្នាតយក្ស Tencent ឡើងគ្រងតំណែងជាអ្នកមានដាច់គេនៅចិន appeared first on .

ការបង្ក្រាបវិស័យបច្ចេកវិទ្យានៅចិន ធ្វើឲ្យក្រុមហ៊ុនខ្នាតយក្សខាតបង់ជាង ១ទ្រីលានដុល្លារ

ឧកញ៉ាសំពៅ — Wed, 12 Jul 2023 10:57:00 +0000

ការបង្ក្រាបវិស័យបច្ចេកវិទ្យារបស់រដ្ឋាភិបាលចិនកាលពីជាង ២ឆ្នាំមុន បានធ្វើឲ្យក្រុមហ៊ុនខ្នាតយក្សជាច្រើនដែលរកស៊ីលើវិស័យមួយនេះ ទទួលរងផលប៉ះពាល់ជាខ្លាំង ប្រមាណជាង ១ទ្រីលានដុល្លារឯណោះ។

យោងតាមការចុះផ្សាយពីសារព័ត៌មាន CNA បានបង្ហាញថា រយៈពេលជាង ២ឆ្នាំមកនេះ វិស័យបច្ចេកវិទ្យានៅចិន ទទួលរងការខាតបង់ប្រហែល ១,១ទ្រីលានដុល្លារ ខណៈក្រុមហ៊ុនដែលរងការខាតបង់ខ្លាំងបំផុតនោះគឺ Alibaba Group, Tencent, Meituan, Baidu Inc និង JD.com។

យ៉ាងណាមួយរយៈកាលចុងក្រោយនេះ រដ្ឋាភិបាលចិនបានចេញវិធានការថ្មី ដោយបន្ធូរបន្ថយលើការរឹតបន្តឹង និងងាកមកបង្កើនកិច្ចសហប្រតិបត្តិការជាមួយនឹងក្រុមហ៊ុនឯកជននានាឡើងវិញ ដើម្បីបង្កើនកំណើនសេដ្ឋកិច្ច ដែលបានខាតបង់អំឡុងពេលមានជំងឺរាតត្បាត។

SHENZHEN, CHINA – 2020/10/06: Chinese multinational technology conglomerate holding company Tencent logo seen at its global headquarters in Shenzhen. (Photo by Alex Tai/SOPA Images/LightRocket via Getty Images)

តួយ៉ាង កាលពីពេលថ្មីៗនេះ ទីភ្នាក់ងាររៀបចំគម្រោងរដ្ឋចិនបានបើកកិច្ចពិភាក្សា ជាមួយក្រុមហ៊ុនបច្ចេកវិទ្យាធំៗដូចជា Tencent Holdings និង Alibaba Group ជាដើម ហើយថែមទាំងបានសរសើរក្រុមហ៊ុនទាំងនោះ ដែលរួមចំណែកក្នុងការអភិវឌ្ឍន៍វិស័យបច្ចេកវិទ្យាចិននាពេលកន្លងមក៕

The post ការបង្ក្រាបវិស័យបច្ចេកវិទ្យានៅចិន ធ្វើឲ្យក្រុមហ៊ុនខ្នាតយក្សខាតបង់ជាង ១ទ្រីលានដុល្លារ appeared first on .

ពីសត្រូវក្លាយជាមិត្ត ក្រុមហ៊ុនយក្សចិន ២ ចុះកិច្ចព្រមព្រៀង ជាដៃគូសហការផលិតវីដេអូរួមគ្នា

ឧកញ៉ាសំពៅ — Fri, 07 Apr 2023 07:23:00 +0000

ក្រុមហ៊ុន Douyin ដែលគ្រប់គ្នាហៅថា TikTok ចិន និងក្រុមហ៊ុនយក្ស Tencent បានព្រមព្រៀងគ្នាចុះកិច្ចព្រមព្រៀង ភាពជាដៃគូសហការផ្សព្វផ្សាយវីដេអូខ្នាតខ្លី និងវែង ខណៈក្រុមហ៊ុនទាំង ២ ធ្លាប់មានទំនាក់ទំនងល្អក់កករជាមួយគ្នា ទាំងលើផ្នែកច្បាប់ និងសាធារណៈ។

យោងតាមការចុះផ្សាយពី CNA បានបង្ហាញថា ByteDance មានសិទ្ធគ្រប់គ្រាន់ក្នុងការប្រើប្រាស់ Tencent ក្នុងការផ្សព្វផ្សាយវីដេអូរបស់ខ្លួន ខណៈអ្នកបង្កើតមាតិកានៅ Douyin Group រាប់បញ្ចូលទាំង Douyin, Xigua Video និង Toutiao អាចបង្កើតវីដេអូខ្លីៗ យកទៅផ្សាយនៅលើបណ្ដាញសង្គម Tencent បាន។

គួររំលឹកដែរថា កន្លងមកក្រុមហ៊ុន Tencent ធ្លាប់មានការអាក់អន់ស្រពន់ចិត្ត ជាមួយអ្នកប្រើប្រាស់ Douyin ដែលផលិតវីដេអូខ្លីៗ បានប្រើប្រាស់សម្ភារៈ Copyrighted ដោយមិនមានការអនុញ្ញាតិត្រឹមត្រូវ។

សូមជម្រាបដែរថា ប៉ុន្មានឆ្នាំចុងក្រោយនេះ និយតករចិនបានស្ដីបន្ទោសក្រុមហ៊ុនបច្ចេកវិទ្យាចិនជាខ្លាំង ជុំវិញការបង្កើត “របាំងការពារ” រារាំងតំណភ្ជាប់ និងសេវាកម្មរបស់គូប្រជែងពីការចែករំលែកនៅលើវេទិការបស់ពួកគេ៕

The post ពីសត្រូវក្លាយជាមិត្ត ក្រុមហ៊ុនយក្សចិន ២ ចុះកិច្ចព្រមព្រៀង ជាដៃគូសហការផលិតវីដេអូរួមគ្នា appeared first on .

Tencent ប្រកាសបណ្ដេញបុគ្គលិករាប់រយនាក់ ដោយសារពាក់ព័ន្ធករណីពុករលួយ

ឧកញ៉ាសំពៅ — Mon, 16 Jan 2023 07:51:00 +0000

ក្រុមហ៊ុនបច្ចេកវិទ្យាខ្នាតយក្សប្រចាំប្រទេសចិន Tencent បានប្រកាសកាលពីថ្ងៃច័ន្ទថា ពួកគេបានបណ្ដេញបុគ្គលិកច្រើនជាង ១០០ នាក់ បន្ទាប់ពីរកឃើញថាមានជាប់ពាក់ព័ន្ធនឹងករណីពុករលួយ និងស៊ីសំណូកសូកប៉ាន់។

យោងតាមការចុះផ្សាយពី CNA បានបង្ហាញថា តាំងពីរដ្ឋាភិបាលចុះបង្ក្រាបវិស័យបច្ចេកវិទ្យាក្នុងស្រុក គេរកឃើញថាមានករណីពុករលួយជាច្រើននៅក្នុងវិស័យមួយនេះ ហើយវាក៏បណ្ដាលឲ្យក្រុមហ៊ុនរកស៊ីលើវិស័យបច្ចេកវិទ្យាជាច្រើន បង្ហាញក្ដីព្រួយបារម្ភផងដែរ។

តួយ៉ាង Tencent ធ្លាប់ប្រកាសម្ដងដែរកាលពីខែវិច្ឆិកាថា ប្រាក់ចំណូលប្រចាំត្រីមាសរបស់ពួកគេបានបន្តដាំក្បាលចុះ ២ ត្រីមាសជាប់ៗគ្នា ហើយក៏បានបន្តរកឃើញបុគ្គលិកជាប់ពាក់ព័ន្ធនឹងករណីឆបោកច្រើនជាង ១០០ នាក់ ដែលនេះក៏ល្មើសនឹងច្បាប់ប្រឆាំងអំពើពុករលួយរបស់ក្រុមហ៊ុនផងដែរ។

សូមជម្រាបដែរថា Tencent ទទួលរងការខាតបង់ជាច្រើនពីការបង្ក្រាបរបស់រដ្ឋាភិបាល ហើយក្នុងនោះក្រុមហ៊ុនបច្ចេកវិទ្យាខ្នាតតូចជាច្រើនបានតវ៉ា នឹងរដ្ឋាភិបាល ដោយអះអាងថា ផលិតផលរបស់ពួកគេមិនបង្កផលប៉ះពាល់ដល់រដ្ឋាភិបាលឡើយ៕

The post Tencent ប្រកាសបណ្ដេញបុគ្គលិករាប់រយនាក់ ដោយសារពាក់ព័ន្ធករណីពុករលួយ appeared first on .

មេធំ Tencent កោះហៅបុគ្គលិកមកដុះក្អែលចេញ ស្របពេលក្រុមហ៊ុនចាប់ផ្ដើមមានបញ្ហា

ឧកញ៉ាសំពៅ — Fri, 23 Dec 2022 08:56:00 +0000

កាលពីពេលថ្មីៗនេះ មេធំក្រុមហ៊ុន Tencent Holdings មហាសេដ្ឋី Pony Ma បានប្រកាសហៅបុគ្គលិកជាន់ខ្ពស់ជាច្រើននាក់មកដុះក្អែលចេញម្ដង ក្រោយក្រុមហ៊ុនកំពុងប្រឈមនឹងបញ្ហាជាច្រើន។

បុគ្គលិកម្នាក់ដែលបានចូលរួមកិច្ចប្រជុំមានរយៈពេលជាង ១០ នាទី បានទម្លាយថា សហស្ថាបនិកក្រុមហ៊ុនមានការខឹងសម្បារជាខ្លាំង ជាមួយបុគ្គលិកជាន់ខ្ពស់ជាច្រើនរូប ដែលមិនគោរពតួនាទី និងលួចកិបកេងផលប្រយោជន៍ ស្របពេលផ្នែកខ្លះនៃ Tencent កំពុងប្រឈមនឹងការបិទទ្វារ។ នេះបើតាមការចុះផ្សាយពី The Business Times។

ប្រភពដដែលថែមទាំងបានដកស្រង់សម្ដីដែលមហាសេដ្ឋី Pony Ma និយាយថា៖ “អ្នកឯងមិនទាំងដឹងច្បាស់ថា អាជីវកម្មមួយនេះអាចដើរបានដល់ពេលណាផង ប៉ុន្តែបែរជាមានពេលទៅទាត់បាល់នៅចុងសប្ដាហ៍យ៉ាងរំភើយ”។

សូមជម្រាបដែរថា ក្រុមហ៊ុន Tencent កំពុងមានបញ្ហាផ្ទៃក្នុង ខណៈចំណូលរបស់ក្រុមហ៊ុនក៏កំពុងថយចុះឥតស្រាកស្រាន្តមួយរយៈកាលចុងក្រោយ បន្ទាប់ពីមានការបង្ក្រាបការធ្វើពាណិជ្ជកម្មអនឡាញ ពីសំណាក់រដ្ឋាភិបាល ស្របពេលសេដ្ឋកិច្ចសកលក៏រាងយ៉ាប់យ៉ឹន គួបផ្សំនឹងការផ្ទុះកូវីដ ១៩ នៅចិនជាថ្មីទៀត។

កត្តានេះបានជម្រុញឲ្យ Tencent បង្ខំចិត្តបញ្ឈប់បុគ្គលិករាប់ពាន់នាក់ក្នុងឆ្នាំនេះ ដែលធ្វើឲ្យកម្លាំងពលកម្មរបស់ក្រុមហ៊ុនធ្លាក់ចុះមិនធ្លាប់មានក្នុងរយៈពេលជិត ១ ទសវត្សចុងក្រោយ៕

The post មេធំ Tencent កោះហៅបុគ្គលិកមកដុះក្អែលចេញ ស្របពេលក្រុមហ៊ុនចាប់ផ្ដើមមានបញ្ហា appeared first on .

មហាសេដ្ឋីចិន របូតលុយរាប់ពាន់លានដុល្លារ ក្រោយរដ្ឋាភិបាលរឹតបន្តឹងគោលនយោបាយ

ឧកញ៉ាសំពៅ — Tue, 25 Oct 2022 05:18:00 +0000

ប្រធានាធិបតីចិន Xi Jinping នៅតែបន្តរឹតបន្តឹងគោលនយោបាយថ្មី ដែលបានធ្វើឲ្យមហាសេដ្ឋីស្រុកចិនជាច្រើនរូប របូតលុយអស់រាប់ពាន់លានដុល្លារ។ នេះបើតាមការចុះផ្សាយពី Bloomberg។

ប្រភពដដែលបានបន្ថែមថា មេធំក្រុមហ៊ុន Tencent Holdings លោក Pony Ma និងមហាសេដ្ឋីមានបំផុតនៅចិន Zhong Shanshan បានរបូតលុយអស់ម្នាក់ ប្រហែល ២ ពាន់លានដុល្លារ បន្ទាប់ពីតម្លៃហ៊ុនរបស់ពួកគេធ្លាក់ចុះ ក្រោយការរឹតបន្តឹងគោលនយោបាយរដ្ឋាភិបាល។

សូមជម្រាបដែរថា ឆ្នាំនេះហាក់ដូចជាឆ្នាំអាក្រក់បំផុតរបស់មហាសេដ្ឋីចិន ពោលដោយសារការរឹតបន្តឹងវិធានការកូវីដ ១៩ ធ្វើឲ្យសេដ្ឋកិច្ច និងទំហំទ្រព្យសម្បត្តិមហាសេដ្ឋីក្នុងស្រុកខាតបង់ស្ទើរគ្រប់គ្នា។

ទ្រព្យសម្បត្តិមហាសេដ្ឋីចិន ៧៦ នាក់ក្នុងចំណោមមហាសេដ្ឋីមានបំផុតលើលោក ៥០០ នាក់ គឺមានប្រមាណ ៧៨៣ ពាន់លានដុល្លារ តិចជាងឆ្នាំទៅដែលចិនមានមហាសេដ្ឋី ៧៩ នាក់មានទ្រព្យសម្បត្តិសរុប ១,១ ទ្រីលានដុល្លារ៕

The post មហាសេដ្ឋីចិន របូតលុយរាប់ពាន់លានដុល្លារ ក្រោយរដ្ឋាភិបាលរឹតបន្តឹងគោលនយោបាយ appeared first on .

ក្រុមហ៊ុនចិនខ្នាតយក្សជាច្រើនកំពុងបារម្ភ ក្រោយវិនិយោគិនចាស់វស្សាប្រកាសលក់ហ៊ុន

ឧកញ៉ាសំពៅ — Mon, 12 Sep 2022 07:13:09 +0000

ក្រុមហ៊ុនចិនដូចជា Tencent និង Alibaba ជាដើម គឺជាក្រុមហ៊ុនបច្ចេកវិទ្យាខ្នាតយក្សលំដាប់ពិភពលោក និងធ្លាប់បានទាក់ទាញវិនិយោគិនអន្តរជាតិកំពូលជាច្រើនមកបណ្ដាក់ទុនរាប់ឆ្នាំផងដែរ។

យ៉ាងណា ថ្មីៗនេះដោយសារតែពិភពលោកកំពុងប្រឈមនឹងវិបត្តិសេដ្ឋកិច្ចផង ក្រុមវិនិយោគិនដែលធ្លាប់រកស៊ីជាមួយក្រុមហ៊ុនលំដាប់កំពូលៗនៅចិន ចាប់ផ្ដើមប្រកាសលក់ភាគហ៊ុនរបស់ពួកគេបណ្ដើរៗ ក្រោមហេតុផលត្រៀមទប់ទល់បញ្ហានៅក្រុមហ៊ុនផ្ទាល់ខ្លួន។ នេះបើតាមការចុះផ្សាយពី Forbes។

តួយ៉ាង ក្រុមហ៊ុន Naspers ដែលមានមូលដ្ឋាននៅអាហ្វ្រិកខាងត្បូង គឺជាវិនិយោគិនតំបូងដែលបានបណ្ដាក់ទុនជាមួយ Tencent កាលពីជាង ២០ ឆ្នាំមុន ប៉ុន្តែកាលពីសប្ដាហ៍មុនពួកគេបានលក់ភាគហ៊ុននៅក្រុមហ៊ុនចិនប្រមាណ ១,១ លានហ៊ុន។

ក្រៅពី Naspers ក៏នៅមានក្រុមហ៊ុនខ្នាតយក្សផ្សេងៗដូចជា SoftBank បានកាត់បន្ថយចំណែកភាគហ៊ុនរបស់ខ្លួនជាមួយក្រុមហ៊ុន Alibaba ស្របពេល Berkshire Hathaway បានកាត់បន្ថយហ៊ុនរបស់ពួកគេនៅក្រុមហ៊ុនផលិតរថយន្តអគ្គិសនី BYD៕

The post ក្រុមហ៊ុនចិនខ្នាតយក្សជាច្រើនកំពុងបារម្ភ ក្រោយវិនិយោគិនចាស់វស្សាប្រកាសលក់ហ៊ុន appeared first on .

ក្រុមហ៊ុនធំបំផុតនៅចិន ជួបការខាតបង់មិនធ្លាប់មានប្រចាំត្រីមាសទី ២

ឧកញ៉ាសំពៅ — Wed, 17 Aug 2022 13:50:00 +0000

ក្រុមហ៊ុន Tencent Holdings បានរាយការណ៍កាលពីថ្ងៃទី ១៧ សីហាកន្លងទៅថា ពួកគេបានជួបប្រទះការខាតបង់ប្រចាំត្រីមាសមិនធ្លាប់មានតាំងពីមានការរាតត្បាតជំងឺកូវីដ ១៩ មក។ នេះបើតាមការចុះផ្សាយពី CNA។

ជាការពិត តាំងពីក្រុមហ៊ុនលេចវត្តមានជាសាធារណៈពីឆ្នាំ ២០០៤ ដល់ ២០២០ ប្រាក់ចំណូលប្រចាំត្រីមាសរបស់ពួកគេ គឺតែងតែមានការកើនឡើងមិនថាតិច ឬច្រើនឡើយ ប៉ុន្តែសម្រាប់របាយការណ៍ប្រាក់ចំណូលត្រីមាសទី ២ នៃឆ្នាំ ២០២២ នេះវិញ គឺមានការធ្លាក់ចុះ។

យោងតាមការបញ្ជាក់ពីក្រុមហ៊ុនបានឲ្យដឹងថា របាយការណ៍ប្រចាំត្រីមាសទី ២ នៃឆ្នាំ ២០២២ នេះ គឺបានធ្លាក់ចុះ ៣% បើធៀបនឹងឆ្នាំទៅ ពោលចំណូលដែលធ្លាប់រកបានប្រមាណ ១៣៨,២៥៩ ពាន់លានយ័ន បែរជាមកសល់ត្រឹម ១៣៤ ពាន់លានយ័ន ឬប្រមាណ ១៩,៧៨ ពាន់លានដុល្លារ។

បន្ថែមពីនោះ ក្រុមហ៊ុនធំបំផុតនៅចិនមួយនេះបានប្រកាសថា មានគម្រោងលក់ភាគហ៊ុននៅក្រុមហ៊ុន Meituan ទាំងអស់ បើសិនជាស្ថានភាពទីផ្សារហ៊ុននៅមានស្ថិរភាព ហើយបើសិនជា Tencent លក់ភាគហ៊ុននៅ Meituan ចេញទាំងអស់ ពួកគេនឹងទទួលបានទឹកប្រាក់ប្រមាណ ២៤ ពាន់លានដុល្លារ ពីការបណ្ដាក់ទុនរយៈពេល ៨ ឆ្នាំ៕

The post ក្រុមហ៊ុនធំបំផុតនៅចិន ជួបការខាតបង់មិនធ្លាប់មានប្រចាំត្រីមាសទី ២ appeared first on .

ក្រុមហ៊ុនធំបំផុតនៅចិន គ្រោងលក់ភាគហ៊ុននៅ Meituan ទាំងអស់ ក្រោយវិនិយោគ ៨ ឆ្នាំ

ឧកញ៉ាសំពៅ — Tue, 16 Aug 2022 07:50:00 +0000

ក្រុមហ៊ុនធំបំផុតប្រចាំប្រទេសចិន Tencent Holdings មានបំណងចង់លក់ភាគហ៊ុនរបស់ពួកគេនៅក្រុមហ៊ុនដឹកជញ្ជូនអាហារ Meituan ទាំងអស់ ដើម្បីផ្ដល់ទំនុកចិត្តដល់និយតករក្នុងស្រុក ក៏ដូចជាប្រមែប្រមូលប្រាក់ចំណេញពីការបណ្ដាក់ទុនអស់រយៈពេល ៨ ឆ្នាំផងដែរ។

យោងតាមការចុះផ្សាយពី Reuters បានឲ្យដឹងថា Tencent បានក្ដោបក្ដាប់ភាគហ៊ុនប្រមាណ ១៧% សរុបនៃក្រុមហ៊ុន Meituan ដែលគិតជាទឹកប្រាក់ប្រមាណ ២៤,៣ ពាន់លានដុល្លារ ហើយសម្រាប់ប៉ុន្មានខែក្រោយនេះ ក្រុមហ៊ុនហាក់កំពុងរិះរកវិធីក្នុងការលក់ភាគហ៊ុនមួយចំណែកធំ។

សូមជម្រាបដែរថា ប្រភពជាច្រើនសុទ្ធតែអះអាងថា Tencent មានបំណងលក់ភាគហ៊ុននៅ Meituan ចេញទាំងអស់នៅឆ្នាំនេះ បើសិនជាស្ថានភាពទីផ្សារមិនមានការប្រែប្រួល។

The post ក្រុមហ៊ុនធំបំផុតនៅចិន គ្រោងលក់ភាគហ៊ុននៅ Meituan ទាំងអស់ ក្រោយវិនិយោគ ៨ ឆ្នាំ appeared first on .

ក្រុមហ៊ុនយក្សចិន Tencent ដាក់ឈ្មោះក្រុមហ៊ុន ១៣ ចូលបញ្ជីខ្មៅ និងបណ្ដេញបុគ្គលិកជិត ៧០ នាក់ ពាក់ព័ន្ធអំពើពុករលួយ

ឧកញ៉ាសំពៅ — Tue, 25 Jan 2022 09:30:32 +0000

កាលពីពេលកន្លងទៅ ក្រុមហ៊ុនលំដាប់យក្ស Tencent Holdings ដែលជាក្រុមហ៊ុនផលិត Video Games និងបណ្ដាញសង្គមធំបំផុតនៅចិន បានបណ្ដេញបុគ្គលិករបស់ខ្លួនក្បែរ ៧០ នាក់ ដោយសារជាប់ពាក់ព័ន្ធនឹងការស៊ីសំណូកសូកប៉ាន់ និងបានដាក់ក្រុមហ៊ុន ១៣ ផ្សេងទៀតនៅក្នុងបញ្ជីខ្មៅ ហាមមិនឲ្យសហការគ្នានាពេលអនាគត។

លើសពីនោះ Tencent បានបញ្ជាក់នៅលើបណ្ដាញសង្គមផ្លូវការរបស់ពួកគេទៀតថា មានរបាយការណ៍បញ្ជាក់ថា មានមនុស្សច្រើនជាង ១០ នាក់ដែលនៅពីក្រោយសកម្មភាពអំពើពុករលួយរបស់បុគ្គលទាំងនោះ។

បញ្ជាក់ដែរថា ចាប់តាំងពីពេលដែលរដ្ឋាភិបាលចិនបានបង្កើនការបង្រ្កាបអំពើពុករលួយក្នុងរយៈពេលប៉ុន្មានឆ្នាំចុងក្រោយនេះ ក្រុមហ៊ុនបច្ចេកវិទ្យាខាងលើក៏បានបង្កើនការស៊ើបអង្កេតរបស់ពួកគេទៅលើភាពមិនប្រក្រតីទ្វេដង ខណៈដែលការវាយតម្លៃ និងទម្រង់របស់ពួកគេបានកើនឡើងបន្ទាប់ពីការរីកចម្រើនផ្នែកបច្ចេកវិទ្យារបស់ប្រទេស។

រំលឹកបន្ថែមថា Tencent បានបង្កើតក្រុមស៊ើបអង្កេត និងប្រឆាំងអំពើពុករលួយប្រចាំក្រុមហ៊ុនរបស់ពួកគេនៅក្នុងឆ្នាំ ២០១៩ ហើយចាប់តាំងពីពេលនោះមក ករណីពុករលួយផ្សេងៗត្រូវបានរាយការណ៍ជាបន្តបន្ទាប់៕

ប្រភព: Kelo

The post ក្រុមហ៊ុនយក្សចិន Tencent ដាក់ឈ្មោះក្រុមហ៊ុន ១៣ ចូលបញ្ជីខ្មៅ និងបណ្ដេញបុគ្គលិកជិត ៧០ នាក់ ពាក់ព័ន្ធអំពើពុករលួយ appeared first on .