គួរឱ្យដឹងថា លោក Teow ឬត្រូវបានគេស្គាល់ថា Teddy ត្រូវបានតម្រួតថៃចាប់ឃាត់ខ្លួនបាន នៅថ្ងៃទី ២២ ខែកក្កដា កន្លងទៅ នៅក្នុងទីក្រុង Dan Nok ដែលស្ថិតនៅព្រំដែនជាប់ស្រុក Sadao ខេត្ត Songkhla ប្រទេសថៃ ពីបទលាងលុយកខ្វក់ ជុំវិញការបើកអាជីវកម្មល្បែងស៊ីសង តាមអ៊ីនធឺណិត ដែលស្ថិតនៅភាគខាងត្បូងប្រទេសថៃ ។

យ៉ាងណាមិញ មុនឈានទៅការចាប់ខ្លួនបែបនេះ លោក Teow បានលេចឡើងនៅលើទំព័រមុខសារព័ត៌មានច្រើនលើករួចមកហើយ ជុំវិញករណីឆបោករបស់លោក ចាប់តាំងពីឆ្នាំ ២០០៨ មក ។

លោក Teow ត្រូវបានគេដឹងថាជាមេ​ខ្លោង​ ក្នុងករណីឆបោកតាមរយ:ការលក់ហ្វ្រេនឆាយហាងកាហ្វេ Island Red Cafe ចាប់តាំងពីឆ្នាំ ២០០៨ ដល់ ២០១០។ ហើយនៅក្រោយពេលរឿងនេះត្រូវបានបែកធ្លាយ លោក Teow និងកូនប្រុសរបស់លោក ត្រូវបានរដ្ឋាភិបាលម៉ាឡេស៊ី ​ដាក់ទោស​ឱ្យជាប់ពន្ធធនាគាររយ:ពេលមួយថ្ងៃ និងបានពិន័យជាទឹកប្រាក់ប្រមាណជាង ៣៦ ០០០ ដុល្លារ ។

មិនតែប៉ុណ្ណោះ រហូតដល់ឆ្នាំ ២០១៨ លោក Teow ត្រូវបានចាប់ឃាត់ខ្លួនសារថ្មីម្តងទៀត ដោយត្រូវបានរដ្ឋាភិបាលពិន័យជាទឹកប្រាក់ជាង ៦៨០ ០០០ ដុល្លារ ពីបទពាក់ព័ន្ធជាមួយនឹងក្រុមហ៊ុន MBI International Sdn Bhd របស់លោក ដែលបង្កើតឡើងក្នុងឆ្នាំ ២០០៩ ។

ជាក់ស្តែងក្រុមហ៊ុន MBI ត្រូវបានគេដឹងថាជាក្រុមហ៊ុនឆបោកមួយតាមរយ:ប្រព័ន្ធអ៊ីនធឺណិត ក្នុងទម្រង់ជាអាជីវកម្មរាងពីរ៉ាមីត ស្របពេលសារព័ត៌មាន SCMP របស់ចិន ក៏ធ្លាប់បានចុះផ្សាយថា ក្រុមហ៊ុនមួយនេះ ក៏ជាទីកន្លែង ដែលប្រជាជនចិនដាក់លុយចូលរាប់រយលានដុល្លារ តាមរយ:ការវិនិយោគផ្សេងៗផងដែរ ។

នៅឆ្នាំ ២០១៩ ភាពល្បីល្បាញរបស់លោក Teow មិនទាន់ស្ងប់ស្ងាត់នោះឡើយ ខណៈគ្រានោះជនជាតិចិនរាប់រយនាក់ ដែលរស់នៅក្នុងប្រទេសម៉ាឡេស៊ី បានធ្វើបាតុកម្មនៅមុខស្ថានទូតចិន ក្នុងទីក្រុងកូឡាឡាំពួរ ដើម្បីសុំជំនួយពីរដ្ឋាភិបាលចិន ក្នុងការទាមទារយកលុយរបស់ពួកគេវិញ បន្ទាប់ពីបានចាក់ចូលទៅក្នុងការវិនិយោគ នៅក្រុមហ៊ុន MBI International ។

លុះដល់ឆ្នាំ ២០២១ ប៉ូលីសចិន បានចេញសន្និសីទសារព័ត៌មានមួយ ដើម្បីជូនដំណឹងថា ពួកគេកំពុងតាមចាប់ខ្លួន លោក Teow និងកូនប្រុសរបស់គាត់ពីរនាក់ទៀត ដែលបានរត់គេចខ្លួន ក្រោយពីមានការបង្គ្រាបករណីឆបោកដ៏ធំមួយ នៅទីក្រុងម៉ាកាវ ។

ហើយរហូតដល់ឆ្នាំ ២០២២ នេះ ទើបមានដំណឹងថា ប៉ូលីសរបស់ប្រទេសថៃ ចាប់ឃាត់ខ្លួនលោក Teow បាន នឹងកំពុងត្រៀមបញ្ជូនគាត់ទៅកាន់ប្រទេសចិន តាមការស្នើសុំ ដើម្បីធ្វើនិតិវិធីតាមច្បាប់បន្តទៀត ៕

The post មហាសេដ្ឋីម៉ាឡេស៊ីត្រូវនិរទេសទៅចិន ធ្លាប់ស្អុយឈ្មោះរាប់ឆ្នាំនៅប្រទេសកំណើត appeared first on .