Thai Beverage

មហាសេដ្ឋីថៃ ប្រកាសចាកចេញពីវិស័យអចលនទ្រព្យ ងាកមកផ្ដោតលើវិស័យចំណីអាហារវិញ

ឧកញ៉ាសំពៅ — Thu, 18 Jul 2024 06:00:00 +0000

ម្ចាស់ក្រុមហ៊ុន Thai Beverage មហាសេដ្ឋី Charoen Sirivadhanabhakdi បានប្រកាសថា ក្រុមហ៊ុនរបស់លោក នឹងលក់នូវភាគហ៊ុនទាំងអស់ដែលមាននៅក្នុងក្រុមហ៊ុនអចលនទ្រព្យ Fraser Property នៅក្នុងសិង្ហបុរី ដោយងាកមកផ្ដោតតែលើអាជីវកម្មភេសជ្ជៈ និងចំណីអាហារតែមួយមុខគត់។

យោងតាមការចុះផ្សាយពីសារព័ត៌មាន Bloomberg បានបង្ហាញថា ក្រុមហ៊ុន ThaiBev នឹងធ្វើការផ្ទេរភាគហ៊ុន ២៨,៨% ឬសរុបជាទឹកប្រាក់ប្រហែល ១,៦ពាន់លានដុល្លារ ទៅកាន់ក្រុមហ៊ុនអចលនទ្រព្យ TCC Assets នៅក្នុងប្រទេសថៃ។

ទន្ទឹមនឹងនោះ ក្រុមហ៊ុន TCC Assets នឹងធ្វើការផ្ទេរចំណែកភាគហ៊ុនរបស់ខ្លួន ដែលមាននៅក្នុងក្រុមហ៊ុនភេសជ្ជៈ Fraser and Neave (F&N) នៅក្នុងប្រទេសសិង្ហបុរី ទៅឲ្យក្រុមហ៊ុនមហាសេដ្ឋីថៃរូបនេះវិញ ដើម្បីបញ្ចប់កិច្ចកុងត្រារវាងភាគីទាំងសងខាង។

បច្ចុប្បន្ន តំណាងក្រុមហ៊ុន ThaiBev បានបង្ហើបថា កិច្ចព្រមព្រៀងមួយនេះ គឺកំពុងរង់ចាំការអនុញ្ញាតពីម្ចាស់ភាគហ៊ុនដទៃ ក៏ប៉ុន្តែបើសិនជាវាអាចសម្រេចទៅបាន ក្រុមហ៊ុន ThaiBev នឹងក្លាយជាម្ចាស់ភាគហ៊ុនធំក្នុងក្រុមហ៊ុន F&N ដោយនឹងមានភាគហ៊ុនក្នុងដៃប្រហែល ៧០% កើនឡើងពីភាគហ៊ុនដែលមានបច្ចុប្បន្នត្រឹម ២៨% ប៉ុណ្ណោះ៕

The post មហាសេដ្ឋីថៃ ប្រកាសចាកចេញពីវិស័យអចលនទ្រព្យ ងាកមកផ្ដោតលើវិស័យចំណីអាហារវិញ appeared first on .

កូនប្រុសមហាសេដ្ឋីថៃ ឡើងកាន់តំណែងជាអនុប្រធានក្រុមហ៊ុនខ្នាតយក្ស ThaiBev

ឧកញ៉ាសំពៅ — Fri, 12 Jan 2024 05:28:00 +0000

ក្រុមហ៊ុនភេសជ្ជៈខ្នាតយក្ស Thai Beverage Plc ហៅកាត់ ThaiBev បានរៀបចំរចនាសម្ព័ន្ធក្រុមហ៊ុនឡើងវិញ ដោយក្នុងនោះកូនប្រុសស្ថាបនិក និងជាមហាសេដ្ឋី Charoen Sirivadhanabhakdi គឺលោក Thapana Sirivadhanabhakdi នឹងឡើងកាន់តំណែងជាអនុប្រធានក្រុមហ៊ុន មានអំណាចខ្លាំងបំផុតបន្ទាប់ពីឪពុក។ នេះបើតាមការចុះផ្សាយពីគេហទំព័រ Nationthailand។

ការកាន់តំណែងថ្មីនេះ នឹងអនុញ្ញាតិឲ្យ CEO វ័យ ២៧ឆ្នាំ មានសិទ្ធគ្រប់គ្រងលើក្រុមហ៊ុនទាំងមូល ស្របពេលមហាសេដ្ឋីថៃ លោក Charoen នៅតែជាប្រធានក្រុមប្រឹក្សាភិបាល និងជាអ្នកសម្រេចចិត្តចុងក្រោយនៅក្រុមហ៊ុនដដែល។

រំលឹកបន្តិចថា ក្រុមហ៊ុន ThaiBev ជាក្រុមហ៊ុនផលិតភេសជ្ជៈធំបំផុតនៅប្រទេសថៃ និងមានបណ្ដាញចែកចាយពាសពេញសកលលោក ដោយក្នុងនោះមានសាខាច្រើនជាង ២១៨ក្រុមហ៊ុន នៅច្រើនជាង ៩០ប្រទេសឯណោះ។

បន្ថែមពីនោះ ការផ្លាស់ប្ដូរក្បាលម៉ាស៊ីនថ្មីៗនេះ ធ្វើឡើងបន្ទាប់ពីក្រុមហ៊ុន ThaiBev ប្រកាសពីមហិច្ឆតា ពង្រីកអាជីវកម្មរបស់ខ្លួនឲ្យបានពាសពេញនៅបណ្ដាប្រទេសក្នុងតំបន់អាស៊ីអាគ្នេយ៍ ជាមួយគោលដៅក្លាយជាអ្នកផ្គត់ផ្គង់ភេសជ្ជៈធំបំផុត នៅតំបន់អាស៊ានថែមទៀត៕

The post កូនប្រុសមហាសេដ្ឋីថៃ ឡើងកាន់តំណែងជាអនុប្រធានក្រុមហ៊ុនខ្នាតយក្ស ThaiBev appeared first on .

ក្រុមហ៊ុនមហាសេដ្ឋីថៃម្នាក់ បង្ហើបគម្រោងវិនិយោគរាប់រយលានដុល្លារ សង់រោងចក្រនៅកម្ពុជា

ឧកញ៉ាសាមញ្ញ — Thu, 05 Oct 2023 11:55:00 +0000

ក្រុមហ៊ុនអាហារ និងភេសជ្ជ:ខ្នាតយក្ស Thai Beverage (ThaiBev) របស់ប្រទេសថៃ គ្រោងនឹងចំណាយទឹកប្រាក់ប្រមាណ ៧ពាន់លានបាត (១៨៩លានដុល្លារ) ដើម្បីពង្រីកអាជីវកម្មរបស់ខ្លួន ទាំងនៅក្នុងស្រុក និងនៅក្រៅប្រទេស សម្រាប់ឆ្នាំសារពើពន្ធបច្ចុប្បន្ន។ នេះបើតាមការចុះផ្សាយពីកាសែត Bangkok Post។

លោក Thapana Sirivadhanabhakdi នាយកប្រតិបត្តិក្រុមហ៊ុន បាននិយាយថា ក្នុងនោះទឹកប្រាក់ចំនួន ៤ពាន់លានបាត នឹងត្រូវបែងចែកសម្រាប់ការសាងសង់រោងចក្រផលិតភេសជ្ជៈថ្មីមួយ នៅក្នុងប្រទេសកម្ពុជា ខណ:ទឹកប្រាក់ ៣ពាន់លានបាត ផ្សេងទៀត និងត្រូវយកទៅសាងសង់កន្លែងដឹកជញ្ជូន រោងចក្រជីវឧស្ម័ន និងគំនិតផ្តួចផ្តើមជាយុទ្ធសាស្ត្រផ្សេងៗទៀត ។

លោក Thapana សង្កត់ធ្ងន់ទៀតថា ជាមួយនឹងការងើបឡើងវិញនៃវិស័យទេសចរណ៍ និងឧស្សាហកម្មម្ហូបអាហារ និងភេសជ្ជៈ ក្រុមហ៊ុន ThaiBev បាននិងកំពុងចាត់វិធានការ ដើម្បីពង្រឹងម៉ាកយីហោ និងទីតាំងទីផ្សារ នៅគ្រប់ផ្នែកទាំងអស់នៃអាជីវកម្មរបស់ក្រុមហ៊ុន ដើម្បីបង្កើនការប្រកួតប្រជែង។

លោក Michael Chye Hin Fah ប្រធានផ្នែកផលិតផលស្រាបៀររបស់ក្រុមហ៊ុន ThaiBev បាននិយាយផងដែរថា ក្រុមហ៊ុនរបស់ខ្លួន កំពុងសាងសង់រោងចក្រផលិតស្រាបៀរដំបូង នៅក្នុងប្រទេសកម្ពុជា ដែលគ្រោងនឹងបញ្ចប់ក្នុងរយៈពេលពីរឆ្នាំខាងមុខ។

លោក Michael បានមានប្រសាសន៍ថា ៖ “នេះជាលើកទីមួយហើយ ដែលក្រុមហ៊ុន ThaiBev នឹងសាងសង់រោងចក្រផលិតស្រាបៀរដំបូងរបស់ខ្លួន នៅក្នុងប្រទេសកម្ពុជា ដោយសារតែបានមើលឃើញពីកំណើនទីផ្សារយ៉ាងឆាប់រហ័សរបស់ប្រទេស និងសក្តានុពល ដែលមិនទាន់អាចទាញយកមកប្រើប្រាស់បាន” ៕

The post ក្រុមហ៊ុនមហាសេដ្ឋីថៃម្នាក់ បង្ហើបគម្រោងវិនិយោគរាប់រយលានដុល្លារ សង់រោងចក្រនៅកម្ពុជា appeared first on .