Vladimir Potanin

បិទបញ្ជីឆ្នាំ២០២៣ មហាសេដ្ឋីរុស្ស៊ីកើនទ្រព្យសម្បត្តិបានច្រើនសន្ធឹក

ឧកញ៉ាសំពៅ — Thu, 25 Jan 2024 07:28:00 +0000

ទ្រព្យសម្បត្តិរបស់ក្រុមមហាសេដ្ឋីរុស្ស៊ី នៅតែបន្តកើនឡើងក្រាស់ក្រែលកាលពីឆ្នាំ២០២៣ បើទោះជាពួកគេកំពុងរងទណ្ឌកម្មសេដ្ឋកិច្ចធ្ងន់ធ្ងរពីមហាអំណាចលោកខាងលិចក្ដី។

យោងតាមការចុះផ្សាយពីសារព័ត៌មាន Bloomberg បានបង្ហាញថា គិតពេញមួយឆ្នាំ២០២៣ ទ្រព្យសម្បត្តិរបស់មហាសេដ្ឋីរុស្ស៊ី មានការកើនឡើងជាង ៥០ពាន់លានដុល្លារ ដោយក្នុងនោះស្ថាបនិកក្រុមហ៊ុន Lukoil លោក Vagit Alekperov កើបលុយបានច្រើនជាងគេ។

ខាងក្រោមនេះគឺជាបញ្ជីឈ្មោះមហាសេដ្ឋីរុស្ស៊ី ៥រូប ដែលមានកំណើនទ្រព្យសម្បត្តិច្រើនបំផុតកាលពីឆ្នាំ២០២៣៖

១/ លោក Vagit Alekperov ស្ថាបនិកក្រុមហ៊ុនប្រេង Lukoil មានទ្រព្យសម្បត្តិសរុប ២៤,៧ពាន់លានដុល្លារ កើនឡើង ៩,៣ពាន់លានដុល្លារ

២/ លោក Andrei Melnichenko សហស្ថាបនិកក្រុមហ៊ុនធ្យូងថ្ម Eurochen and SUEK មានទ្រព្យសម្បត្តិសរុប ១៧,៤ពាន់លានដុល្លារ កើនឡើង ៥,៧ពាន់លានដុល្លារ

៣/ លោក Vladimir Lisin ស្ថាបនិកក្រុមហ៊ុនដែកថែប NLMK មានទ្រព្យសម្បត្តិសរុប ២៤ពាន់លានដុល្លារ កើនឡើង ៤ពាន់លានដុល្លារ

៤/ លោកLeonid Fedun អតីតប្រធានក្រុមហ៊ុន Lukoil មានទ្រព្យសម្បត្តិសរុប ៩,៨ពាន់លានដុល្លារ កើនឡើង ៣,៩ពាន់លានដុល្លារ

៥/ លោក Leonid Mikhelson នាយកប្រតិបត្តិក្រុមហ៊ុនឧស្ម័នធម្មជាតិ NOVATEK មានទ្រព្យសម្បត្តិសរុប ២៧,៥ពាន់លានដុល្លារ កើនឡើង ២,៨៣ពាន់លានដុល្លារ

កំណើនទ្រព្យសម្បត្តិដ៏ច្រើនបែបនេះ បានធ្វើឲ្យស្ដេចប្រេងនៅរុស្ស៊ី លោក Alekperov ឈរនៅលេខរៀងទី៣ ជាកំពូលអ្នកមានបំផុតនៅរុស្ស៊ី តាមពីក្រោយលោក Mikhelson ជាមហាសេដ្ឋីមានបំផុតទី២។

ចំណែកឯអ្នកមានបំផុតនៅរុស្ស៊ី គឺលោក Vladimir Potanin ម្ចាស់ក្រុមហ៊ុនផលិត និងជីករ៉ែនីកែលធំបំផុតលើលោក Nornickel ជាមួយនឹងកំណើនទ្រព្យសម្បត្តិប្រហែល ២,៥ពាន់លានដុល្លារកាលពីឆ្នាំ២០២៣ និងធ្វើឲ្យលោកមានទ្រព្យសម្បត្តិសរុបប្រហែល ៣១ពាន់លានដុល្លារ៕

The post បិទបញ្ជីឆ្នាំ២០២៣ មហាសេដ្ឋីរុស្ស៊ីកើនទ្រព្យសម្បត្តិបានច្រើនសន្ធឹក appeared first on .

៤ខែដំបូង មហាសេដ្ឋីរុស្ស៊ី សំងំកើបលុយចូលហោប៉ៅបាន ១៣ពាន់លានដុល្លារ

ឧកញ៉ាសំពៅ — Tue, 04 Apr 2023 06:28:00 +0000

ទ្រព្យសម្បត្តិសរុបរបស់ក្រុមមហាសេដ្ឋីរុស្ស៊ី មានការកើនឡើងប្រមាណ ១៣,០៣ពាន់លានដុល្លារ តាំងពីបើកទំព័រឆ្នាំ ២០២៣ ខណៈទ្រព្យសម្បត្តិរបស់ Vagit Alekperov កើនច្រើនជាងគេបានជាង ៣ពាន់លានដុល្លារ។

យោងតាមការចុះផ្សាយពី Bloomberg Billionaires Index បានបង្ហាញថា គិតត្រឹមថ្ងៃទី ០៣ មេសានេះ ទ្រព្យសម្បត្តិសរុបរបស់មហាសេដ្ឋីរុស្ស៊ី ២២នាក់ បានកើនដល់ ២៧៦,៧ពាន់លានដុល្លារ។

ម្ចាស់ក្រុមហ៊ុន Nornikel លោក Vladimir Potanin នៅតែគ្រងតំណែងជាអ្នកមានដាច់គេប្រចាំប្រទេស ដោយមានទ្រព្យសម្បត្តិប្រហែល ២៩ពាន់លានដុល្លារ កើនបាន ៤៤៨លានដុល្លារ។

ដោយឡែក តំណែងលេខ ២ បានទៅលើ Leonid Mikhelson សហស្ថាបនិកក្រុមហ៊ុនផលិតឧស្ម័នធំបំផុតទី ២ នៅរុស្ស៊ី Novatek ជាមួយទ្រព្យសម្បត្តិប្រហែល ២៦,៣ពាន់លានដុល្លារ និងម្ចាស់ភាគហ៊ុនធំបំផុតនៃក្រុមហ៊ុនដែកថែប NLMK លោក Vladimir Lisin ជាមហាសេដ្ឋីមានបំផុតទី ៣ ប្រចាំប្រទេស ដោយមានទ្រព្យសម្បត្តិសរុប ២១ពាន់លានដុល្លារ៕

The post ៤ខែដំបូង មហាសេដ្ឋីរុស្ស៊ី សំងំកើបលុយចូលហោប៉ៅបាន ១៣ពាន់លានដុល្លារ appeared first on .

បិទទំព័រឆ្នាំ ២០២២ មហាសេដ្ឋីរុស្ស៊ីរបូតលុយជាង ៩០ ពាន់លានដុល្លារ

ឧកញ៉ាសំពៅ — Tue, 03 Jan 2023 05:27:26 +0000

ទ្រព្យសម្បត្តិសរុបរបស់មហាសេដ្ឋីរុស្ស៊ី បានបាត់បង់អស់ប្រមាណ ៩៣,៧៥៣ ពាន់លានដុល្លារ កាលពីឆ្នាំទៅ។ នេះបើតាមការចុះផ្សាយពី Bloomberg Billionaires Index។

BBI បានធ្វើការស្រាវជ្រាវ ដោយផ្អែកលើហាងឆេងតម្លៃហ៊ុន និងប្រាក់ចំណូលរបស់ក្រុមមហាសេដ្ឋីរុស្ស៊ីទាំង ២៣ រូប ហើយគិតត្រឹមថ្ងៃទី ០២ មករា ២០២៣ ទ្រព្យសម្បត្តិសរុបរបស់ពួកគេមាន ២៦៩ ពាន់លានដុល្លារ តិចជាងខែធ្នូឆ្នាំទៅជិត ២៧ ពាន់លានដុល្លារ។

ក្នុងនោះ លោក Alexei Mordashov របូតលុយច្រើនជាងគេ ១០,១ ពាន់លានដុល្លារ ខណៈលោក Vladimir Lisin ខាតបង់ប្រហែល ៨ ពាន់លានដុល្លារ។

ដោយឡែក Vladimir Potanin វិញនៅតែអាចរក្សាបានងារជាអ្នកមានបំផុតនៅរុស្ស៊ីដដែល បើទោះជាលោកបាត់បង់ទឹកប្រាក់ប្រហែល ២,២៨ ពាន់លានដុល្លារកាលពីឆ្នាំទៅ ស្របពេល Mikhail Prokhorov របូតលុយតិចជាងគេ ៧៥០ លានដុល្លារ និងបន្តឈរនៅលេខរៀងទី ០៧ នៃបញ្ជីមហាសេដ្ឋីរុស្ស៊ី៕

The post បិទទំព័រឆ្នាំ ២០២២ មហាសេដ្ឋីរុស្ស៊ីរបូតលុយជាង ៩០ ពាន់លានដុល្លារ appeared first on .

អ្នកជំនួញមានបំផុតនៅរុស្ស៊ី ស្នើប្រធានាធិបតី Putin កុំដាក់សំពាធពាណិជ្ជកម្មក្រុមហ៊ុនលោកខាងលិចនៅរុស្ស៊ី

ឧកញ៉ាសំពៅ — Sat, 12 Mar 2022 09:45:15 +0000

ដូចគ្រប់គ្នាបានដឹងរួចមកហើយថា ស្ទើរគ្រប់ប្រទេសជុំវិញពិភពលោក ពិសេសតំបន់អឺរ៉ុប និងលោកខាងលិចកំពុងសម្រុកដាក់ទណ្ឌកម្មសេដ្ឋកិច្ចទៅកាន់ប្រទេសរុស្ស៊ី និងមហាសេដ្ឋីរុស្ស៊ីជាច្រើននាក់ តួយ៉ាងដូចជាការរឹបអូសទ្រព្យសម្បត្តិជាដើម។

ហើយកាលពីថ្ងៃទី ១០ មីនាកន្លងទៅ រដ្ឋាភិបាលរុស្ស៊ីធ្លាប់បានព្រមានដល់ក្រុមហ៊ុនលោកខាងលិចដែលបង្អាក់ដំណើរការអាជីវកម្មនៅក្នុងប្រទេសថា នឹងរឹបអូសទ្រព្យសម្បត្តិក្រុមហ៊ុនរបស់ពួកគេ ជាការឆ្លើយតបទៅនឹងអ្វីដែលប្រទេសលោកខាងលិចបានធ្វើដាក់ប្រជាជនរុស្ស៊ី។

យ៉ាងណា ទង្វើមួយនេះគឺមិនត្រូវបានយល់ស្របពីអ្នកជំនួញមានបំផុតនៅរុស្ស៊ីគឺ Vladimir Potanin ឡើយ ដោយលោកយល់ឃើញថា ការរឹបអូសទ្រព្យសម្បត្តិរបស់ក្រុមហ៊ុនលោកខាងលិច នឹងធ្វើឲ្យសេដ្ឋកិច្ចរុស្ស៊ីធ្លាក់ចូលក្នុងរណ្ដៅកាន់តែជ្រៅ ពោលអាចនឹងវិលថយក្រោយទៅកាលពីជាង ១០០ ឆ្នាំមុនឯណោះ។

ប្រធានក្រុមហ៊ុន Norilsk Nickel ខាងលើបាននិយាយថា រុស្ស៊ីនឹងប្រឈមនឹងការវិលថយក្រោយនៃសេដ្ឋកិច្ចទៅកាន់ឆ្នាំ ១៩១៧ បើសិនជាហ៊ានរឹបអូសទ្រព្យសម្បត្តិរបស់ក្រុមហ៊ុនលោកខាងលិច ហើយលោកទទូចឲ្យរដ្ឋាភិបាលរុស្ស៊ីព្យាយាមរកដំណោះស្រាយថ្មី ក្រៅពីការរឹបអូសទ្រព្យសម្បត្តិមួយនេះ។

“ជាដំបូង វាអាចនឹងធ្វើឲ្យពួកយើងវិលទៅកាន់ឆ្នាំ ១៩១៧ វិញ ហើយផលវិបាកនៃការសម្រេចចិត្តបែបនោះ នឹងធ្វើឲ្យពិភពលោកកាន់តែអស់ជំនឿចិត្តមកកាន់រុស្ស៊ី ជាពិសេសគឺវិនិយោគិន”។ នេះបើតាមសារបង្ហោះនៅលើគណនី Telegram របស់ Norilsk Nickel។

“បន្ថែមពីនោះ ខ្ញុំយល់ថា ការសម្រេចចិត្តផ្អាកអាជីវកម្មរបស់ក្រុមហ៊ុនទាំងនោះនៅប្រទេសរុស្ស៊ីគឺជារឿងដែលសមស្របមួយ ហើយប្រហែលជាពួកគេក៏ទទួលបានសំពាធខ្លាំងពីមជ្ឈដ្ឋានសាធារណៈផងដែរ។ ដូច្នេះពួកគេនឹងវិលមកវិញឆាប់ៗ ហើយសម្រាប់ខ្ញុំផ្ទាល់ គួរតែទុកឱកាសសម្រាប់ពួកគេ”។

បញ្ជាក់ដែរថា មហាសេដ្ឋីមានបំផុតនៅរុស្ស៊ីម្នាក់នេះក៏ទទួលរងទណ្ឌកម្មសេដ្ឋកិច្ចពីតំបន់អឺរ៉ុប និងលោកខាងលិចខ្លាំងគួរសមដែរ ពោល Bloomberg បានអះអាងថា លោកបានបាត់បង់ទ្រព្យសម្បត្តិប្រមាណ ១/៤ ហើយបច្ចុប្បន្ននៅសល់ទ្រព្យសម្បត្តិ ២២,៥ ពាន់លានដុល្លារ ខណៈតម្លៃហ៊ុននៃក្រុមហ៊ុនធ្លាក់ចុះដល់ទៅ ៩០%នៅលើទីផ្សារហ៊ុន London៕

ប្រភព: CNN

The post អ្នកជំនួញមានបំផុតនៅរុស្ស៊ី ស្នើប្រធានាធិបតី Putin កុំដាក់សំពាធពាណិជ្ជកម្មក្រុមហ៊ុនលោកខាងលិចនៅរុស្ស៊ី appeared first on .