កំណែ​ទម្រង់​ថ្មី​ដែល Amazon គ្រោង​នឹង​បំពាក់​នៅ​ផ្សារ​ទំនើប Whole Foods នោះ​គឺ បច្ចេកវិទ្យា​ចុងក្រោយ​ Just Walk Out ដែល​អនុញ្ញាត​ឲ្យ​អតិថិជន​អាច​គិត​បញ្ជី​លុយ​លើ​ឥវ៉ាន់​ដែល​ពួកគេ​បាន​ទិញ​ដោយ​ខ្លួនឯង ដែល​នេះ​មាន​ន័យ​ថា​ នឹង​មិន​ចាំ​បាច់​ត្រូវការ​អ្នក​ឈរ​ចាំ​គិត​លុយ​ឡើយ។

គម្រោង​នេះ​ Amazon នឹង​ដាក់​ឲ្យ​ប្រើប្រាស់​នៅ​ ២ សាខា​សម្រាប់ Whole Foods នៅ​ឆ្នាំ ២០២២ ដែល​សាខា​មួយ​នៅ ​Washington D.C. និង​មួយ​ទៀត​នៅ​តំបន់ Sherman Oaks រដ្ឋ California។

ថ្វី​ដ្បិត​តែ​​ជា​បច្ចេកវិទ្យា​ចុងក្រោយ​មែន តែ Amazon ក៏​ធ្លាប់​ដាក់​ប្រើប្រាស់​នៅ​ហាង​ផ្សេងៗ​របស់​ខ្លួន​ដូចជា​ ហាង​លក់​ទំនិញ Amazon Go ហាង​លក់​គ្រឿងទេស​ស្រស់ៗ Amazon Fresh ជាដើម សុទ្ធតែ​បាន​បំពាក់​ជាមួយ​បច្ចេកវិទ្យា Just Walk Out ទាំងអស់​។

ដោយឡែក​សម្រាប់​ការ​ប្រើប្រាស់​បច្ចេកវិទ្យា​នេះ​ផង​ដែរ អតិថិជន​គ្រាន់តែ​ធ្វើ​ការ​ស្កេន QR Code នៅ​ក្នុង​កម្មវិធី​ទូរស័ព្ទ​ដៃ​ Amazon ឬ Whole Foods ហើយ​បន្ទាប់​មក​ថត​រូប​ឥវ៉ាន់ ឬ​ផលិតផល​ដែល​ពួកគេ​ចង់បាន នោះ​វា​នឹង​បង្ហាញ​នៅ​វិក័យប័ត្រប្រាក់​បែប​ឌីជីថល​ជា​មិនខាន តែ​ដើម្បី​អាច​ប្រើប្រាស់​មុខងារ​នេះ​បាន អតិថិជន​ត្រូវ​តែ​មាន​គណនី Amazon។

យ៉ាងណា​ថ្វី​បើ​វា​ពិតជា​ជួយ​សម្រួល​ដល់​តម្រូវការ​អតិថិជន​ក្ដី តែ​ជាមួយ​គ្នា​នោះ​បច្ចេកវិទ្យា​មួយ​នេះ​ក៏​ទទួល​បាន​ការ​រិះគន់​ចាស់ដៃ​ពី​មតិ​ជាច្រើន​ដូចគ្នា ដោយ​ពួកគេ​បារម្ភ​ថា ការងារ​ជា​អ្នកចាំ​គិត​ប្រាក់​តាម​ផ្សារ​ទំនើប ឬ​កន្លែង​ផ្សេងៗ​អាច​នឹង​បាត់បង់ និង​ជំនួស​មក​វិញ​ដោយ​បច្ចេកវិទ្យា។

ហេតុ​ដូច្នេះ​ហើយ ទើប Amazon លើកឡើង​ថា ការ​ដាក់​មុខងារ​ទំនើប​នេះ​នៅ​សាខា ២ របស់ Whole Foods គឺ​ក្នុង​ន័យ​ជួយ​សម្រួល​ដល់​អតិថិជន ហើយ​បច្ចុប្បន្ន​ពួកគេ​ក៏​មិនទាន់​មាន​គម្រោង​នឹង​បន្ត​ដាក់​វា​នៅ​សាខា​ផ្សេងៗ​ឡើយ៕

ប្រភព: edition.cnn

The post Amazon គ្រោង​បើក​ផ្សារ​ទំនើប ២ កន្លែង លែង​ជួល​អ្នកគិត​លុយ​ធ្វើការ appeared first on .