ចិនចាត់ទុកការរារាំងដំណើរទស្សនកិច្ចរបស់អនុប្រធាធិបតីតៃវ៉ាន់ ទៅអាមេរិកជា “អាទិភាព”

ឧកញ៉ាសំពៅ — Thu, 20 Jul 2023 04:55:00 +0000

កាលពីពេលថ្មីៗនេះ រដ្ឋាភិបាលចិនបានចាត់ទុកថា ការរារាំងដំណើរទស្សនកិច្ចរបស់អនុប្រធានាធិបតីតៃវ៉ាន់ William Lai ទៅកាន់សហរដ្ឋអាមេរិក នាខែក្រោយ គឺជាអាទិភាពសំខាន់មួយ ខណៈរដ្ឋាភិបាលក្រុងប៉េកាំង ក៏បានប្រឆាំងយ៉ាងខ្លាំងចំពោះដំណើរទស្សនកិច្ចមួយនេះផងដែរ។

FILE PHOTO: Taiwan’s Vice President William Lai makes a speech at the ruling Democratic Progressive Party annual congress in Taipei, Taiwan July 16, 2023. REUTERS/Ann Wang/File Photo

រំលឹកបន្តិចថា លោក Lai បានប្រកាសពីដំណើរទស្សនកិច្ចទៅកាន់សហរដ្ឋអាមេរិក អំឡុងការធ្វើដំណើរទៅកាន់ប្រទេសប៉ារ៉ាហ្គាយ ដើម្បីអបអរសាទរការចូលកាន់តំណែងប្រធានាធិបតីនៅទីនោះ នាថ្ងៃទី ១៥ ខែសីហា ដែលធ្វើឲ្យរដ្ឋាភិបាលចិនមានការខឹងសម្បារជាខ្លាំង និងថ្កោលទោសលោក Lai ថាជា ជនផ្ដាច់ខ្លួន។ នេះបើតាមការចុះផ្សាយពីសារព័ត៌មាន CNA។

ទន្ទឹមនឹងនោះ ឯករដ្ឋទូតចិនប្រចាំសហរដ្ឋអាមេរិក លោក Xie Feng បានប្រាប់នៅវេទិកា Aspen Security Forum ថា “តៃវ៉ាន់ គឺជាចំណែកមួយនៃប្រទេសចិន” ហើយមហាអំណាចអាស៊ីមួយនេះចង់បាន “ការរួបរួមដោយសន្តិភាព” ប៉ុន្តែជនផ្ដាច់ខ្លួនតៃវ៉ាន់ បែរជាព្យាយាមសុំជំនួយពីអាមេរិកទាំងទទឹងទិសទៅវិញ។

លោក Feng បាននិយាយថា៖ បច្ចុប្បន្នវាគឺជាអាទិភាពរបសយើង ក្នុងការបញ្ឈប់ដំនើរទស្សនកិច្ចរបស់ Lai Ching-te ទៅកាន់សហរដ្ឋអាមេរិក ដែលវាប្រៀបដូចជាការគម្រាមកំហែង មកកាន់ប្រទេសចិន។

គួរជម្រាបបន្ថែមថា លោក Lai គឺជាអនុប្រធានាធិបតី ហើយក៏ជាបេក្ខភាពប្រធានាធិបតីមានការគាំទ្រខ្ពស់បំផុតមួយរូបផងដែរ សម្រាប់ការបោះឆ្នោតដែលគ្រោងនឹងធ្វើនាឆ្នាំក្រោយ ខណៈកន្លងមកលោកធ្លាប់អះអាងថា មានសមត្ថភាពក្នុងការបង្កើតសន្តិភាពជាមួយចិន ប៉ុន្តែមិនទាន់បានអីផង លោកក៏ធ្វើឲ្យចិនខឹងសម្បារបាត់ទៅហើយ៕

The post ចិនចាត់ទុកការរារាំងដំណើរទស្សនកិច្ចរបស់អនុប្រធាធិបតីតៃវ៉ាន់ ទៅអាមេរិកជា “អាទិភាព” appeared first on .

បេក្ខភាពប្រធានាធិបតីតៃវ៉ាន់ម្នាក់អះអាងថា អាចរក្សាសន្តិភាពជាមួយចិន បើសិនជាប់ឆ្នោត

ឧកញ៉ាសំពៅ — Wed, 05 Jul 2023 03:41:01 +0000

នាថ្ងៃទី ០៥ ខែកក្កដានេះ លោក William Lai បេក្ខភាពប្រធានាធិបតីតៃវ៉ាន់ដែលកំពុងទទួលបានការគាំទ្រខ្លាំង បានប្រាប់ទៅកាន់សារព័ត៌មាន Wall Street Journal ថា លោកអាចរក្សាសន្តិភាពជាមួយប្រទេសចិនបាន បើសិនជាលោកជាប់ឆ្នោត។

បេក្ខភាព និងជាអនុប្រធានាធិបតីតៃវ៉ាន់ម្នាក់នេះ គឺកំពុងតំណាងឲ្យគណបក្សប្រជាធិបតេយ្យរីកចម្រើន (DPP) កំពុងទទួលបានសម្លេងគាំទ្រភាគច្រើន ផ្អែកតាមការស្ទង់មតិ មុនការបោះឆ្នោតនាខែមករាខាងមុខ ស្របពេលប្រធានាធិបតី Tsai Ing-wen មិនអាចឈរឈ្មោះម្តងទៀតបានទេ បន្ទាប់ពីកាន់តំណែងពីរអាណត្តិ។

នៅក្នុងអត្ថបទអត្ថាធិប្បាយមួយ លោក Lai បាននិយាយថា ទោះបីជាមានការប្រឈមផ្នែកយោធា និងសេដ្ឋកិច្ចពីប្រទេសចិន រួមទាំងការលុកលុយតាមអាកាសស្ទើរតែរាល់ថ្ងៃរបស់ចិននៅជិតកោះនេះក៏ដោយ ក៏អាទិភាពកំពូលរបស់លោកនៅតែមានលក្ខណៈជាក់ស្តែង និងស្ថិរភាព។

អនុប្រធានាធិបតីវ័យ ៦៣ឆ្នាំរូបនេះនិយាយថា៖ ខ្ញុំនឹងគាំទ្រចំពោះគោលនយោបាយឆ្លងសមុទ្រ ដែលវានឹងផ្ដល់អត្ថប្រយោជន៍សម្រាប់ប្រទេសទាំង ២ ទាំងសាធារណរដ្ឋចិន ដូចជាតៃវ៉ាន់ត្រូវបានគេស្គាល់ជាផ្លូវការ និងសហគមន៍អន្តរជាតិ។ ខ្ញុំនឹងស្វែងរកកិច្ចសហប្រតិបត្តិការកាន់តែច្រើនជាមួយដៃគូ និងសម្ព័ន្ធមិត្ត ជាពិសេសក្នុងការបណ្តុះបណ្តាល ការរៀបចំរចនាសម្ព័ន្ធកម្លាំង ការការពារស៊ីវិល និងការចែករំលែកព័ត៌មាន។

សូមជម្រាបដែរថា បើទោះជាលោក Lai អះអាងថាអាចរក្សាសន្តិភាពជាមួយចិនក៏ពិតមែន ប៉ុន្តែកាលពីឆ្នាំ ២០១៨ លោកធ្លាប់ធ្វើឲ្យចិនមានការខឹងសម្បារជាខ្លាំង អំឡុងពេលលោកកាន់តំណែងជានាយករដ្ឋមន្ត្រី ដែលគ្រានោះលោកបានបង្ហាញជំហរថា តៃវ៉ាន់គឺជាប្រទេសឯករាជ្យអធិបតេយ្យភាព ខណៈការលើកឡើងបែបនេះ គឺជាជ្រុងរសើបបំផុតសម្រាប់រដ្ឋាភិបាលទីក្រុងប៉េកាំង៕

The post បេក្ខភាពប្រធានាធិបតីតៃវ៉ាន់ម្នាក់អះអាងថា អាចរក្សាសន្តិភាពជាមួយចិន បើសិនជាប់ឆ្នោត appeared first on .