សូមចុច Subscribe Telegram oknha_news ដើម្បីទទួលបានព័ត៌មានគ្រប់​សកម្មភាព​ឧកញ៉ា​ អាជីវកម្ម ចែក​រំលែក ជោគជ័យ

តើមហាសេដ្ឋីប្រាក់លាន សៀ ឬទ្ធី កំពុងក្តោបក្តាប់មុខជំនួញប៉ុន្មានក្នុងដៃ?

​ពាណិជ្ជករខ្មែរដ៏ឆ្នើមអ្នកឧកញ៉ា សៀ ឫទ្ធី ជាស្ថាបនិក និងជា​ប្រធាន​ក្រុមប្រឹក្សាភិបាល​នៃ​ក្រុមហ៊ុន WorldBridge International Group និងជាអ្នកវិនិយោគ​ដ៏លេចធ្លោ​មួយ​រូប​ក្នុង​ចំណោម​មហាសេដ្ឋី​ល្បីៗ​ជាច្រើន​នៅ​កម្ពុជា ខណៈនៅប៉ុន្មាន​ឆ្នាំ​ចុង​ក្រោយ​នេះ មាន​មជ្ឈដ្ឋាន​ជាតិ​និង​អន្តរជាតិ​ជា​ច្រើន​បាន​សម្លឹង​និង​ចាប់​អាម្មរណ៍​យ៉ាង​ខ្លាំង​ទៅ​លើ​សកម្មភាព​ដំណើរការ​ពាណិជ្ជកម្ម ក៏​ដូចជា​ការ​វិនិយោគរបស់​លោក។

លោក សៀ ឬទ្ធី កើតក្នុងឆ្នាំ ១៩៧២ នៅរាជធានីភ្នំពេញ ក្នុងគ្រួសារខ្មែរ-ចិន លោកក៏មិនខុសពីកុមារផ្សេងទៀតដែលត្រូវបានរួចផុតពីរបបខ្មែរក្រហម។ លោកបានចាប់ផ្តើមក្រុមហ៊ុនតំបូងផ្នែកភ័ស្តុភារ គឺក្រុមហ៊ុន World Bridge ដែលការបណ្តាក់ទុនរួមគ្នាជាមួយក្រុមហ៊ុន CEVA និង Kerry Logistics។

ក្រុមហ៊ុន WorldBridge Group ត្រូវបានបង្កើតឡើងតាំងពីឆ្នាំ១៩៩២មកម្លេះ ដែលគ្រប់គ្រងដោយផ្ទាល់របស់លោក ប៉ុន្តែ ​មុន​នឹង​ទទួល​បាន​ភាព​ជោគជ័យ មាន​បុត្រសម្ព័ន្ធក្រុមហ៊ុន​រហូត​ដល់​ទៅ​ជាង​៣០​ក្រុមហ៊ុន លោក​ធ្លាប់​ជា​បុគ្គលិក​​បម្រើ​ការងារ​ផ្នែក​ដឹក​ជញ្ជូន​ទំនិញ ឲ្យកងកម្លាំង​អង្គការ​សហប្រជាជាតិ​ UNTAC ប្រចាំ​ប្រទេស​កម្ពុជា។

លោក សៀ ឬទ្ធី បានបង្កើតមូលនិធិដើមទុនដ៏សំខាន់ដំបូងគេរបស់ប្រទេស គឺ Ooctane ដែលមានទឹកប្រាក់សរុប ៥៥ លានដុល្លារអាមេរិក សម្រាប់ការវិនិយោគក្នុងការបង្កើតសហគ្រាស និងសហគ្រាសធុនតូច និងមធ្យម។ ការវិនិយោគផ្ទាល់របស់លោក សៀ ឬទ្ធី ក៏រួមបញ្ចូលទាំងការបណ្តាក់ទុននៅទូទាំងតំបន់នៅលើវិស័យផ្សេងៗគ្នា រួមទាំងការវិនិយោគនៅប្រទេសសឹង្ហបូរី មីយ៉ាន់ម៉ា វៀតណាម និងឡាវ។

ការងារសប្បុរសធម៌របស់លោក សៀ ឬទ្ធី នៅក្នុងប្រទេសកម្ពុជា រួមមាន៖ ឧបត្ថម្ភថវិកា និងគ្រឿងបរិភោគជូនដល់រាជរដ្ឋាភិបាលកម្ពុជា និងវិស័យឯកជន កាកបាទក្រហមកម្ពុជា និងគំរោងគំនិតផ្តួចផ្តើមអនាគតទន្លេមេគង្គ (MFI)។ សេដ្ឋីផ្នែកចលនទ្រព្យល្បីល្បាញក្នុងពិភពជំនួញនៅប្រទេសកម្ពុជារូបនេះត្រូវបានព្រះមហាក្រត្សចេញព្រះរាជក្រឹត្យផ្តល់គោរមងារជា អ្នកឧកញ៉ា នៅថ្ងៃ២៦ ធ្នូ ឆ្នាំ២០២០ គឺដំណាលគ្នាជាមួយមហាសេដ្ឋី ៥ នាក់ផ្សេងទៀត។

បន្ថែមលើភាពជោគជ័យផ្នែកពាណិជ្ជកម្មក្រុមហ៊ុន WorldBridge Group បានបន្តស្វែងរកការវិនិយោគដែលកសាងឧស្សាហកម្មជាតិ និងបង្កើនកំរិតជីវភាពរស់នៅរបស់ប្រជាជនសាមញ្ញ។ ជាមួយគ្នានេះដែល World Bridge ក៏បានប្រកាសអំពីមោទនភាពចំពោះការវិនិយោគរបស់ខ្លួនក្នុងការអភិវឌ្ឍលំនៅដ្ឋានដែលមានតំលៃសមរម្យលើកដំបូងសម្រាប់អភិវឌ្ឍន៍ក្រុមហ៊ុន សហគ្រាសធុនតូច និងមធ្យមនៅព្រះរាជាណាចក្រកម្ពុជា។

មហាសេដ្ឋី សៀ ឫទ្ធី ត្រូវបានចាត់ថា ជាធុរជន​ល្បី​ឈ្មោះ​បោះ​សំឡេង​ក្នុង​វិស័យ​អចលនទ្រព្យ និង​ភ័ស្តុភារ (logistics) ឧកញ៉ាញូស៍ សូមបង្ហាញបញ្ជីឈ្មោះក្រុមហ៊ុនដែលជាបុត្រសម័្ពន្ធនៅក្នុងដៃរបស់មហាសេដ្ឋីរូបនេះរួមមាន៖

-វិស័យដឹកជញ្ជូន

១.ក្រុមហ៊ុន វើលដ៍ប្រ៊ីដ អ៊ីនធើណាសិនណល ខេមបូឌា (WorldBridge International) គឺជាការវនិយោគទៅលើសេវាកម្មឈានមុខគេក្នុងវិស័យដឹកជញ្ជូនទាំងការនាំចេញ-ចូល នៅកម្ពុជា ដូចជា៖ ដឹកទំនិញតាមផ្លូវសមុទ្រ និងផ្លូវអាកាស ដឹកជញ្ជូនចែកចាយក្នុងស្រុក ដឹកជញ្ជូនឆ្លងព្រំដែន ដឹកជញ្ជូនតាមឡានធំៗ គ្រប់គ្រងសារពើភណ្ឌ សេវាកម្មរុះរើ និងសេវាកម្មបំពេញបែបបទគយនាំចេញ-នាំចូល។

២. ឃែ​រី វើ​លដ៍​ប្រ៊ី​ដ ជា​តំបន់​សេដ្ឋកិច្ច​ពិសេស​ថ្មី​មួយទៀត ត្រូវបាន​ដាក់​ឲ្យ​ដំណើរការ​ជា​ផ្លូវការ នៅ​ថ្ងៃទី​៩​ខែឧសភា​ ឆ្នាំ២០១៧​។  ក្រុមហ៊ុន Kerry Worldbridge Logistics ជា​អ្នក​ប្រតិបត្តិការ​តំបន់​សេដ្ឋកិច្ចពិសេស​ និង​ភ​ណ្ឌា​គយ​មាន​ដែន​កំណត់ ឃែ​រី វើ​លដ៍​ប្រ៊ី​ដ ដែលជា​ការចាប់​ដៃគូ​វិនិយោគ​រួមគ្នា​រវាង​ក្រុមហ៊ុន​ក្នុងស្រុក Worldbridge International (Cambodia) និង​ក្រុមហ៊ុន Kerry Logistics  ដែលមាន​មូលដ្ឋាន​នៅ​ហុងកុង​។​

ក្រុមហ៊ុន Kerry Worldbridge Logistics  បានចាប់ផ្ដើម​បើក​ការដ្ឋាន​សាងសង់​ហេដ្ឋារចនាសម្ព័ន្ធ ដើម្បី​បង្កើតជា​តំបន់​សេដ្ឋកិច្ច​ពិសេស និង​ភ​ណ្ឌា​គយ​មាន​ដែន​កំណត់ ឃែ​រី វើ​លដ៍​ប្រ៊ី​ដ តាំងពី​ពាក់កណ្ដាល​ឆ្នាំ​២០១៥ លើ​ផ្ទៃដី​សរុប ៦៣​ហិកតា ដែលមាន​ទីតាំង​ស្ថិតនៅក្នុង​សង្កាត់​ព្រែកកំពឹស ខណ្ឌដង្កោ ភ្នំពេញ តាម​បណ្ដោយ​ផ្លូវជាតិ​លេខ​២ ។ 

បើតាមការបញ្ជាក់អ្នកឧកញ៉ា សៀ ឫទ្ធី ប្រធាន​ក្រុមហ៊ុន Kerry Worldbridge Logistics  ​ក្នុង​ពិធី​សម្ពោធ​កាលពីឆ្នាំ២០១៧ បានឲ្យដឹងថា គម្រោង​នេះ​វិនិយោគ​ទឹកប្រាក់​សរុប​ប្រមាណ​ជាង ១០០​លាន​ដុល្លារ​។​

អ្នកឧកញ៉ា បន្ថែមថា ការសម្ពោធ​តំបន់​សេដ្ឋកិច្ច​ពិសេស និង​ភ​ណ្ឌា​គយ​មាន​ដែន​កំណត់​នេះ គឺជា​សក្ខីភាព​បញ្ជាក់ថា កម្ពុជា​កំពុងអភិវឌ្ឍន៍​វិស័យ​សេវាកម្ម​ផ្នែក​ភ័ស្ដុភារ ដឹកជញ្ជូន និង​ភណ្ឌាគារ​គយ​មាន​ដែន​កំណត់ ក្នុង​កម្រិតស្ដង់ដារ​អន្តរជាតិ ដូច​បណ្ដា​ប្រទេស​នានា​ក្នុង​តំបន់ និង​ពិភពលោក ដែល​អាច​ទ្រទ្រង់ និង​លើកស្ទួយ សុវត្ថិភាព ប្រសិទ្ធិភាព​ក្នុងការ​ដឹកជញ្ជូន ការ​ចល័ត ការផ្ទេរ និង​រក្សាទុក​ទំនិញ​របស់​អ្នកវិនិយោគ​។ 

៣.ក្រុមហ៊ុន ឃែរី អ៊ិចប្រេស ខេមបូឌា (Kerry Express Cambodia) ដែល​ជា​ក្រុមហ៊ុន​ផ្តល់​សេវាកម្ម​ដឹកជញ្ជូន​ទំនិញ និងសេវាបញ្ញើ​ ត្រូវបានបង្កើតឡើងនៅឆ្នាំ ២០១៦ រវាង ឃែរី អ៊ិចប្រេស និង វើលប្រីដ គ្រុប គិតមកដល់ពេលបច្ចុប្បន្នបាននឹងកំពុងបម្រើសេវានៅតាមបណ្តាខេត្តទាំងអស់នៃប្រទេសកម្ពុជា។

ជារៀងរាល់ថ្ងៃ ឃែរី អ៊ិចប្រេស បានចែកចាយឯកសារសំខាន់ៗជាច្រើនទៀតទៅកាន់អតិថិជនសំខាន់ រួមាន៖ ក្រុមហ៊ុនពាណិជ្ជកម្មអេឡិចត្រូនិច ធនាគារ ក្រុមហ៊ុនបច្ចេកវិទ្យា ក្រុមហ៊ុនទូរគមនាគមន៍ វិទ្យាស្ថានហិរញ្ញវត្ថុ សាលារៀន និងបណ្តាញអ្នកលក់រាយក្នុងស្រុក។

ឃែរី អ៊ិចប្រេស ក៏ជាប្រតិបត្តិករបញ្ជូនសាច់ប្រាក់ធំបំផុតរបស់កម្ពុជាផងដែរ ហើយបើនិយាយពីក្រៅប្រទេសវិញ ឃែរី អ៊ិចប្រេស មានវត្តមាននៅហុងកុង តៃវ៉ាន់ វៀតណាម ថៃ និងម៉ាឡេស៊ីផងដែរ។

៤. ក្រុមហ៊ុន Indo Trans Logistics Cambodia ត្រូវបានផ្តល់ដំណោះស្រាយសម្រាប់សេវាកម្មដឹកជញ្ចូនចម្រុះ តាមអាកាសចរណ៍ ឃ្លាំងស្តុកទំនិញ ដឹកជញ្ជូន និងចែកចាយ ជាមួយនឹងខ្សែសង្វាក់ផ្គត់ផ្គង់ស្មោះត្រង់ខ្ពស់បំផុតមួយនៅប្រទេសកម្ពុជា។ នេះបើតាមការអះអាងនៅលើក្រុមហ៊ុន របស់មហាសេដ្ឋី សៀ ឬទ្ធី។

៥.ក្រុមហ៊ុន Empire Logistics Cambodia ជាភ្នាក់ងារដែលទទួលបានការអនុញ្ញាតតែមួយគត់ពីក្រុមហ៊ុនដឹកអ្នកដំណើរ United Airlines ក្នុងប្រទេសកម្ពុជា។ ដោយបានចាប់ផ្តើមប្រតិបត្តិការនៅឆ្នាំ ២០១៦ EMP ផ្តល់សេវាដឹកទំនិញតាមផ្លូវអាកាសដល់ក្រុមហ៊ុនបញ្ជូនបន្តក្នុងស្រុកនិងពិភពលោកជាច្រើន។

នៅឆ្នាំ ២០១៩ EMP បានដឹកជញ្ជូនទំនិញបរិមាណជាង ៩០០ តោនទៅកាន់គោលដៅនានានៅទូទាំងពិភពលោក ដូចជា សហរដ្ឋអាមេរិក អាហ្រ្វិកខាងត្បូង អ៊ីតាលី និងកាណាដា។

៦.ក្រុមហ៊ុន WorldBridge Aviation Services Co. Ltd (WAS) គឺជាភ្នាក់ងារដែលបានអនុញ្ញាតតែមួយគត់របស់ក្រុមហ៊ុនដឹកទំនិញវៀតណាមអ៊ែរឡាញ។ ចាប់ផ្តើមតាំងពីឆ្នាំ ២០១០ WAS បានផ្តល់សេវាកម្មដឹកទំនិញតាមផ្លូវអាកាសដល់ក្រុមហ៊ុនបញ្ជូនបន្តក្នុងស្រុកនិងពិភពលោកជាច្រើន។

នៅឆ្នាំ ២០១៩ ក្រុមហ៊ុន WAS បានដឹកជញ្ជូនទំនិញបរិមាណជាង ៩០០ តោនទៅកាន់គោលដៅទេសចរណ៍ទូទាំងពិភពលោក រួមទាំង អាស៊ី អឺរ៉ុប និងកាណាដា។

៧.ក្រុមហ៊ុន Thai Cargo គឺជាភ្នាក់ងារដែលមានការអនុញ្ញាតតែមួយគត់របស់ Thai Airways International Public Company Limited (THAI) ដែលបានបម្រើអតិថិជនក្នុងការដឹកជញ្ជូនទំនិញនៅក្នុងប្រទេសកម្ពុជាអស់រយៈពេលជិត ១៤ ឆ្នាំចាប់តាំងពីឆ្នាំ ២០០៦ ដោយដឹកជញ្ជូនផលិតកម្មទៅកាន់គោលដៅផ្សេងៗនៅជុំវិញពិភពលោក ជាពិសេស នៅតំបន់ភាគខាងកើតនៃអាស៊ី ដូចជា ចិនដីគោក ជប៉ុន កូរ៉េ និងតំបន់ជាច្រើនទៀត។

៨.ក្រុមហ៊ុន WorldBridge Secure Logistics (WSL) ដែលជាក្រុមហ៊ុនរួមបណ្តាក់ទុនជាមួយក្រុមហ៊ុន Brinks Global Services ខណៈនៅថ្ងៃទី០៩ ខែកក្កដានេះនៅសណ្ឋាគារសូហ្វីតែល ក្រុមហ៊ុនបានប្រកាសជាផ្លូវការអំពីការប្តូរឈ្មោះថ្មីរបស់ក្រុមហ៊ុនឡើងវិញ​ ដែលមានឈ្មោះ ពណ៌និងឡូហ្គោ របស់ក្រុមហ៊ុន ប្រ៊ីង ដើម្បីផ្តល់សេវាកម្មដឹកជញ្ជូន សាច់ប្រាក់ លោហៈមានតម្លៃ ដូចជា ពេជ្រ និងគ្រឿងអលង្ការ ព្រមទាំងទំនិញមានតម្លៃផ្សេងៗទៀត។ WSL មានរថពាសដែកជាច្រើនដែលត្រូវបានរចនាឡើងជាពិសេសសម្រាប់ទំនិញដែលមានតម្លៃហើយយើងត្រូវបានធានារ៉ាប់រង ១០០% ។

ប្រ៊ីងស៍ ជាក្រុមហ៊ុនដែលមានមូលដ្ឋាននៅសហរដ្ឋអាមេរិកត្រូវបានបង្កើតឡើងតាំងពីឆ្នាំ ១៨៥៩ (អាយុ ១៦០ ឆ្នាំ) និងជាក្រុមហ៊ុនដឹកជញ្ចូនដែលមានសុវត្ថិភាពខ្ពស់ជាងគេបំផុតនៅលើពិភពលោក។ ឥឡូវនេះ Brinks អាចតាមដានគ្រប់ចលនានៃយានយន្តរបស់យើង ២៤/៧ ដោយនាំមកនូវប្រសិទ្ធភាពបំផុតដល់ប្រតិបត្តិការ CIT ក្នុងការដឹកជញ្ជូនទូទាំងប្រទេស ដូចជា ភ្នំពេញ សៀមរាប ក្រុងព្រះសីហនុ បាត់ដំបង កំពង់ចាម កំពត កំពង់ធំបន្ទាយមានជ័យ ស្វាយរៀង និង តាកែវ។

-ក្រុមហ៊ុនអភិវឌ្ឍនអចលនទ្រព្យ

១.អគារភ្លោះខ្ពស់ The Bridge បានបើកប្រតិបត្តិការអាជីវកម្មកាលពី ឆ្នាំ២០១៩ បន្ទាប់ពីបើកទ្វារភ្លាមទទួលបានការទាក់ទាញយ៉ាងខ្លាំងពីសំណាក់ ក្រុមហ៊ុន អាជីវកម្មដែលមានឈ្មោះល្បីៗមកពីក្រៅប្រទេសជាច្រើនរួមមាន៖ ប្រទេស​សឹង្ហបុរី កូរ៉េ ចិន អាមេរិក ដែល​ក្រុមហ៊ុន​ទាំងអស់​នោះ​កំពុង​បម្រើ​សេវា​កម្ម​​យ៉ាង​មមាញឹក ដូចជា​សណ្ឋាគារ ខុនដូរ ការិយាល័យធ្វើការ សេវាកម្មសុខភាព មន្ទីរពេទ្យ ក្លឹបហាត់ប្រាណ ភោជនីយដ្ឋាន និង កាហ្វេល្បីៗ ក្លឹប ស្កាយបារ ។ល។

អគារភ្លោះThe Bridge ស្ថិត​​នៅក្នុង​​តំបន់​​ពិសេស តាម​បណ្តោយ​​វិថី​​រដ្ឋសភា និង​ជិត​​ស្ថាន​ទូត​​អូស្រ្តាលី និង ជាប់​នឹងទី​ក្រុង​រណប​កោះពេជ្រ ក្នុង​សង្កាត់​​ទន្លេ​​បាសាក់ ខណ្ឌ​ចម្ការមន រាជ​ធានី​ភ្នំពេញ។ បើ​គិត​ពី​​អគារ​​បច្ចុប្បន្ន ​ដែល​​សាងសង់​​ខ្ពស់​​ជាង​គេ​​បង្អស់​​នៅ​​កម្ពុជា គឺ​អគារ​ភ្លោះ The Bridge ដែល​​មាន​​កម្ពស់ ៤៥​ជាន់។ 

អគារ​ភ្លោះ The Bridge នេះ ជា​ការ​​សហការ​​វិនិយោគ​​រួម​គ្នា​​រវាង​​ក្រុមហ៊ុន Worldbridge Land របស់​​អ្នក​​ឧកញ៉ា សៀ ឫទ្ធី និង​ក្រុម​ហ៊ុន​​អភិវឌ្ឍន៍​​អចលន​ទ្រព្យ​​មក​​ពី​ប្រទេស​​សិង្ហ​បុរី ដែល​មាន​​ឈ្មោះ​ថា Oxley Holdings ដោយ​បាន​​បោះទុន​​វិនិយោគ​​ក្នុង​​ទឹក​​ប្រាក់​​ប្រមាណ ៣០០​លាន​​ដុល្លារ​​អាមេរិក។

២.បន្ទាប់ពីមានភាពជោគជ័យនៃគម្រោង The Bridge ហើយបានក្លាយជាអគារតំណាងឲ្យនិមិត្តសញ្ញានៃការអភិវឌ្ឍន៍ទីក្រុងភ្នំពេញ ទន្ទឹមនឹងនេះផងដែរគម្រោង The Peak ដែលជាគម្រោងថ្មីមួយទៀតក៏បាន បង្ហាញវត្តមានរបស់ខ្លួននៅក្នុងទីក្រុងផងដែរ។

The Peak គឺជាគម្រោងអភិវឌ្ឍន៍អគារចម្រុះ៥៥ជាន់ ដែលរួមមានអគារមួយសម្រាប់សណ្ឋាគារ និងការិយាល័យ និងអគារពីរទៀតសម្រាប់អគារស្នាក់នៅ ផ្សារទំនើប និងចំណតរថយន្តជាច្រើនជាន់ ដែលត្រូវបានអភិវឌ្ឍដោយ ក្រុមហ៊ុន អកស៍ឡី ជេម (ខេមបូឌា) ខូ អិលធិឌី ជាក្រុមហ៊ុនបុត្រសម្ព័ន្ធរបស់ក្រុមហ៊ុន Oxley Holdings Limited។

គម្រោង​វិនិយោគ​នេះ​មាន​តម្លៃ ៥៨០ លាន​ដុល្លារ​ក្នុង​នោះ​រួម​បញ្ចូល​សំណង់​អគារ ៥៥ ​ជាន់​ចំនួន ៣​ នេះ​វា​នឹង​បន្ថែម​ខុនដូ​ទំនើបៗ​ចំនួន ១០១៥ ​យូនីត​ទៀត​ទៅលើ​ចំនួន​ខុនដូ​ដែល​មាន​ស្រាប់​​ហើយ​នៅ​ទីក្រុង​ភ្នំពេញ​ដែល​កំពុង​មាន​ការ​រីក​លូតលាស់​នេះ​។

៣.គម្រោង The Palms គឺជាលំនៅដ្ឋានបែបលំហែរកាយដំបូងនៅក្នុងរាជធានីភ្នំពេញ ត្រូវបាន​អភិវឌ្ឍដោយ ​ក្រុមហ៊ុន​ Oxley-Worldbridge (Cambodia) Co., Ltd ដែល​ជាការវិនិយោគ​រួមគ្នា រវាងក្រុមហ៊ុន Worldbridge Land (Cambodia) Co., Ltd ជាក្រុមហ៊ុនអចលនទ្រព្យ​មានមូលដ្ឋាន​នៅប្រទេសកម្ពុជា និង​ក្រុមហ៊ុន Oxley Holdings Limited ជាក្រុមហ៊ុន​អភិវឌ្ឍន៍អចលនទ្រព្យ​មានមូលដ្ឋាននៅ​ប្រទេសសិង្ហបុរី។

The Palms មាន​ទីតាំងស្ថិត​នៅលើផ្លូវជាតិលេខ១​ ក្នុងខណ្ឌច្បារអំពៅ​ នៅជាប់ជាមួយ​ដងទន្លេមេគង្គ។ សម្រាប់​គម្រោងទាំងមូល​មានសាងសង់ វីឡា និង វីឡាប្រណីត​ជាង ២០០ ខ្នង ដែលព័ទ្ធ​ជុំវិញទៅដោយ​ដើមត្នោត ​ទេសភាពខៀវ​ស្រងាត់ និងទឹក​ដែលមានពន្លឺចែងចាំង ជាមួយ​ការរៀបចំ​ដ៏ល្អឥតខ្ចោះ​សម្រាប់ ​ការរស់នៅ ​ដែលវាហាក់ដូចជាពិភព​លំនៅដ្ឋានមួយដែល​នៅដាច់ឆ្ងាយ​ពីភាព​អ៊ូអរនៃទីក្រុង។

៤.ក្រុមហ៊ុន វើលដ៏ប៊្រីដ ហូម ជាបុត្រសម្ព័ន្ធថ្មី មួយទៀតរបស់ វើលប៊្រីដ គ្រុប ដែលបានបង្កើតឡើងក្នុងឆ្នាំ ២០១៧ ជាក្រុមហ៊ុនអភិវឌ្ឍន៏វិស័យអចលនវត្ថុឈានមុខគេ។ ក្រុមហ៊ុនរបស់មហាសេដ្ឋី សៀ ឬទ្ធី គឺនាំមកជូននូវលំនៅឋានមានតម្លៃ សមរម្យប្រកបដោយគុណភាពល្អ មានសុវត្តិភាព ដល់អ្នកដែលមានចំនូលទាប និងមធ្យមអោយមានលំនៅឋានជារបស់ខ្លួន។

វើលដ៏ប៊្រីដ ហូម ​បាន​អភិវឌ្ឍន៍​លើ​គម្រោង​ធំៗ​ក្នុង​រាជធានី​ភ្នំពេញ រួម​មាន៖ The Peak, The Bridge, The Palm Resort, Sky 31 Condo ដែលមានការិយាល័យលក់ស្ថិតលំនៅឋាន​ទីក្រុង​រណប​សិរីមង្គល៖ ផ្លូវ​ជាតិលេខ 21 ភូមិ​កោះគរ សង្កាត់រកាខ្ពស់ ក្រុងតាខ្មៅ ខេត្ត​កណ្តាល។

៥.ក្រុមហ៊ុន WorldBridge Land ត្រូវបានបង្កើតឡើងនៅក្នុងឆ្នាំ២០១១ ហើយក៏បានធ្វើ​កិច្ចសហការ​ជាមួយ​ក្រសួង​រៀបចំ​ដែនដី នគរូបនីយកម្ម និង​សំណង់ ដើម្បី​សាងសង់​លំនៅឋាន​សម្រាប់​អ្នកមាន​ចំណូល​ទាប និង​ចំណូល​ធ្យ​ម (Affordable House)។ នេះបើតាមការបញ្ជាក់របស់អ្នកឧកញ៉ា សៀ ឫទ្ធី អគ្គនាយក​ក្រុមហ៊ុន កន្លងទៅ​។​

អ្នកឧកញ៉ាបន្ថែមថា WorldBridge Land ​បាន​បោះទុន​វិនិយោគ ៦០​លាន​ដុល្លារ ទៅ​៧០​លាន​ដុល្លារ​លើ​គម្រោង Affordable House ចំនួន​បី​។

៦. គម្រោងអភិវឌ្ឍន៍ អគារពាណិជ្ជកម្ម និងលំនៅឋាន “ភូមិកីឡដ្ឋាន វើលដ៍ប្រ៊ីដ” WorldBridge Sport Village នឹង​ផុស​ឡើង​នៅ​ភាគ​ខាងជើងរាជធានីភ្នំពេញ ក្នុងពេលឆាប់ៗខាងមុខនេះ។

គម្រោង“ភូមិកីឡដ្ឋាន វើលដ៍ប្រ៊ីដ” លាតសន្ធឹងលើផ្ទៃដីជាង ៦ហិចតា ជាប់នឹងពហុកីឡដ្ឋានជាតិ មរតកតេជោ។ ក្នុង​គម្រោង​មានការ​អភិវឌ្ឍ​ខុនដូ១២ អាគារស្មើនឹង ១៣១៩បន្ទប់ អាគារខុនដូ ប្រភេទស្ទូឌីយ៉ូ ១អគារស្មើនឹង ១៦៣បន្ទប់ ដែលមានកម្ពស់១៣ជាន់ ផ្ទះល្វែង ផ្ទះអាជីវកម្ម វីឡាភ្លោះ ផ្សារទំនើប សារមន្ទីរកីឡា​ជាដើម។

ធុរកិច្ចជន និងជាអ្នកវិនិយោគដ៏ល្បីល្បាញក្នុងវិស័យអចលនទ្រព្យនៅកម្ពុជា អ្នកឧកញ៉ា សៀ ឫទ្ធី បានបោះទុនវិនិយោគ ប្រមាណជាង២០០លានដុល្លារ ក្នុងការសាងសង់គម្រោងដ៏ធំប្លែកគេមួយនេះ។ ស្ថិតនៅ​ជាប់​នឹង​ពហុ​កី​ទ្ប​ដ្ឋា​ន​ជាតិ​មរតក​តេ​ជោ ក្នុង​តំបន់​អភិវឌ្ឍន៍​ទីក្រុង​រណប​របស់​អ្នកឧកញ៉ា លី យ៉ុ​ង ផាត់ ភាគ​ខាងជើង​រាជធានី​ភ្នំពេញ​។

គម្រោង “ភូមិកីឡដ្ឋាន វើលដ៍ប្រ៊ីដ” អភិវឌ្ឍ​ឡើងដោយ​ក្រុមហ៊ុន ដាប់ប៊ែលយូប៊ីស្ព័ត វីលេច ឯ.ក (WB Sport Village) ដែលជាបុត្រសម្ព័ន្ឋក្រុមហ៊ុន វើលដ៏ប្រ៊ីដគ្រុប (WorldBridge Group) ដែលជាអ្នកអភិវឌ្ឍ និង ជាក្រុមហ៊ុន​សាងសង់​លំនៅដ្ឋាន ដែលមានកេរ្តិ៍ឈ្មោះបោះសម្លេងល្បីល្បាញ ក្នុងវិស័យអចលនទ្រព្យជាង៣០ឆ្នាំមកហើយ៕

៧.ក្រុមហ៊ុន Oxley WorldBridge Cambodia ជាក្រុមហ៊ុនគ្រប់គ្រងអចលនទ្រព្យដែលមានមូលដ្ឋានក្នុងតំបន់ ដែលបណ្តាក់រួមគ្នាដោយក្រុមហ៊ុន Oxley Holdings Limited និងក្រុមហ៊ុន WorldBridge Land (Cambodia) Co. , Ltd.

Oxley WorldBridge មានក្រុមអ្នកជំនាញរឹងមាំដែលមានមូលដ្ឋាននៅក្នុងប្រទេសកម្ពុជា ដើម្បីត្រួតពិនិត្យគម្រោងអភិវឌ្ឍន៍អចលនទ្រព្យរបស់ខ្លួន។ ក្រុមនេះធ្វើការយ៉ាងជិតស្និទ្ធជាមួយសហការីរបស់ពួកគេមកពីក្រុមហ៊ុន Oxley Holdings Limited និងក្រុមហ៊ុន WorldBridge Land (ខេមបូឌា) ដើម្បីធានាបាននូវការផ្តល់នូវលទ្ធផលល្អបំផុតដល់វិនិយោគិននិងអតិថិជនរបស់ពួកគេ។

-វិស័យសេវាកម្មហិរញ្ញវត្ថុ

១.ធនាគារឯកទេស ប្រ៊ីដ ភីអិលស៊ី (Bridge Specialized Bank) ជាក្រុមហ៊ុនស្ថិតក្រោមការគ្រប់គ្រង់របស់ WorldBridge Group ដែលត្រូវបានគេស្គាល់ថាជាធនាគារឯកទេស Oxley-WorldBridge ដែលបានដំណើរការចាប់តាំងពីចុងឆ្នាំ ២០១៤មកម្លេះ។ ក្នុងឆ្នាំ២០១៩ Bridge Specialized Bank ទទួលបានប្រាក់ចំណេញសុទ្ធចំនួន ៥៦៩.៩១៥ ដុល្លារអាមេរិក (USD569,915) ជាមួយនឹងទ្រព្យសម្បត្តិសរុប ១៥.៨៥២.៧៣០ ដុល្លារ (USD15,852,730) និងកម្ចីចំនួន ១២.៧៨៨.៤៧៥ ដុល្លារអាមេរិក USD12,788,475 ។

សេវាកម្មចម្បងរបស់ Bridge Specialized Bank គឺប្រាក់កម្ចីទិញផ្ទះ កម្ចីអាជីវកម្ម កម្ចីរថយន្ត និងប្រាក់កម្ចីផ្ទាល់ខ្លួន ដែលផ្តល់នូវគុណភាពការច្នៃប្រឌិតភាពបត់បែននិងដំណោះស្រាយហិរញ្ញវត្ថុដែលមានតំលៃសមរម្យដល់សហគមន៍ក៏ដូចជាការរីកចម្រើនផ្នែកសេដ្ឋកិច្ចនៅកម្ពុជា។

២.ជាមួយ​បទពិសោធ​​អាជីវកម្ម​បញ្ចាំ​ជាង ៤០​ឆ្នាំ នៅ​ប្រទេស​សិង្ហបុរី ឃែស យូ អាប់​​ បាន​ពង្រីក​អាជីវកម្ម​របស់​ខ្លួន​នៅ​ក្នុង​ប្រទេស​កម្ពុជា​ដោយ​មាន​ការ​ចូល​រួម​ពី​អ្នក​វិនិយោគខ្មែរ និងសិង្ហបុរី។​

ក្រុមហ៊ុន ឃែស យូ អាប់ គឺជា ក្រុមហ៊ុនបញ្ចាំ ស្របច្បាប់ ទី៤ ដែល​បាន​ចុះ​បញ្ជី​​ជាមួយ​ក្រសួងពាណិជ្ជកម្ម​ក្រោម​ស្លាក​សញ្ញា​ឈ្មោះ ​ឃែស យូ អាប់ (Cash-U-Up Co.,Ltd) និង​បាន​ទទួល​អាជ្ញា​ប័ណ្ណ​អាជីវកម្ម​ទទួល​បញ្ចាំ ​និងទិញ លក់ ទ្រព្យ​បញ្ចាំ​និង អាជីវកម្ម​ទទួល​ប្រា​តិភោគ​ដោយ​អនុប្បទាន លេខ 010សហវ.ឧហ ចុះថ្ងៃទី ៣១ ខែ មីនា ឆ្នាំ ២០១០ ពីក្រសួង​សេដ្ឋកិច្ច និង ហិរញ្ញវត្ថុ។

Cash-U-Up ផ្តល់សេវាបញ្ចាំ រថយន្ត ម៉ូតូ គ្រឿង អលង្ការ សម្ភារៈ អេឡិចត្រូនិច ដែល​មាន​អត្រា​ការ​ប្រាក់​ស្រប​តាម​គោលការណ៍​ដែលច្បាប់​បាន​កំណត់​ជាពិសេស​ការថែរក្សា សុវត្ថិភាព ទ្រព្យ បញ្ចាំ សម្រាប់​អតិថិជន។

៣.ក្រុមហ៊ុន​វិនិយោគ OOCTANE ត្រូវ​បាន​បង្កើត​ឡើង ជាមួយ​មូលនិធិ ៥​លាន​ដុល្លារ ក្នុង​ការ​ជួយ​ដល់ អាជីវកម្ម​បង្កើត​ថ្មី ក៏​ដូច​ជា សហគ្រាស​ខ្នាត​តូច និង​មធ្យម​នៅ​កម្ពុជា តាម​រយៈ​ការ​បណ្ដាក់ទុន​។ ក្រុមហ៊ុនវិនិយោគនេះ ​ស្ថិត​នៅ​ក្រោម​ក្រុមហ៊ុន WoldBridge Group របស់អ្នមកឧកញ៉ា សៀ ឬទ្ធី។

មូលនិធិ OOCTANE CAMBODIA ជា​មូលនិធិ​ទ្រ​ទ្រ​ង​អាជីវកម្ម​ដល់ Starup និង SME ទាំង​ក្នុងស្រុក និង អន្តរជាតិ នៅ​ក្នុង​ប្រទេស​កម្ពុជា បាន​បោះ​ជំហាន​ដំបូង​ដោយ​មាន​ទឹកប្រាក់​សរុប​៥​លាន​ដុល្លារ ហើយ​មូលនិធិ​នេះ ក៏​កំពុង​ចរចារ​ជាមួយ​វិនិយោគិន​សក្ដានុពល​ផ្សេង​ៗ​ទៀត ដើម្បី​ពង្រីក​មូលនិធិ​ឲ្យ​មាន​ប្រាក់​កើនឡើង​ពី​៥​លាន​ទៅ​១០​លាន​ដុល្លារ​អា​មេ​រិ​ក និង​បន្ថែម​ទឹកប្រាក់​ឲ្យ​បាន​២៥​លាន​ទៅ​៣០​លាន​ដុល្លារ​អា​មេ​រិ​ក​។   

មូលនិធិ OOCTANE CAMBODIA នឹង​ផ្តល់​ជូន​ចំពោះ​អ្នក​ចាប់ផ្តើម​អាជីវកម្ម ដែល​មានគំនិត​ច្នៃប្រឌិត​សម្រាប់​បុគ្គល​មួយ​រូប​ក្នុង​ដំណាក់កាល​ដំបូង អាច​នឹង​មាន​ចាប់ពី ៥​ពាន់​ដុល្លារ​ដល់ ១​ម៉ឺន​ដុល្លារ​អា​មេ​រិ​ក ឬ​យ៉ាង​ហោច​ណាស់​ក៏​មាន​ដើមទុន​តិច​បំផុត ២,៥ ម៉ឺន ដុល្លារ​។ រីឯ​អាជីវកម្ម​ដែល​មាន​ផលិតផល​ប្រើប្រាស់​ក្នុង​ទីផ្សារ​រួច​ហើយ នឹង​អាច​ទទួល​បាន​មូលនិធិ​ចំនួន ២,៥ ម៉ឺន​ដុល្លារ​អា​មេ​រិ​ក​ក្នុង​មួយ​ក្រុមហ៊ុន​។  

-វិស័យម្ហូបអាហារ និងភេសជ្ជៈ

ក្រុមហ៊ុន Auskhmer Import Export Co.,Ldt ដែលបង្កើតឡើងតាំងពីឆ្នាំ២០០១មក ដោយលោក Simon Roe ជាមួយក្រុមហ៊ុន WorldBridge Group បាននាំចូល និង ចែកចាយម្ហូប និង ភេសជ្ជៈគ្រប់ប្រភេទ ដែលមានគុណភាពខ្ពស់ ដូចជា៖ សាច់គោអូស្ដ្រាលី និង អាមេរិក សាច់ចៀមអូស្ត្រាលី អយស្ទ័របារាំង ថ្លើមក្ងាន ពងត្រីកាវីយ៉ា ផលិតផលគ្រឿងផ្សំដុតនំ ឈីស ស្រាបៀរពីប្រទសបែលហ្សីក រួមមានស្រាក្រហម និង ស្រាវីស្គីជាច្រើនមុខ។

ជាមួយគ្នានេះ ក្រុមហ៊ុនក៏ទទួលបានសិទ្ធិផ្តាច់មុខនាំចូលស្រាវីស្គីម៉ាក Macallan ដែលជាស្រាលំដាប់ថ្នាក់អន្តរជាតិលក់ដាច់ជាងគេទី២នៅលើពិភពលោក។

ក្រុមហ៊ុន Auskhmer បានចែកចាយបន្តទៅកាន់អាជីវកម្មធំៗដែលមានដូចជា Hypermarkets, Supermarket, Mini Marts, liquor stores សណ្ឋាគារ រមណីយដ្ឋាន កាស៊ីណូ ភោជនីយដ្ឋាន និងក្លឹបកម្សាន្តជាដើម។ ក្រុមហ៊ុនអ៊សខ្មែរ មានបុគ្គលិកកំពុងបម្រើការជាង ១០០ នាក់ ដែលមានការិយាល័យ ៣កន្លែង និងមានឃ្លាំងស្តុកទំនិញធំៗចំនួន ២ កន្លែង រួមទាំងសេវាកម្មដឹកជញ្ជូនទូទាំងប្រទេសកម្ពុជា។

-ប្រព័ន្ធផ្សព្វផ្សាយ និងឌីជីថល

១.WorldBridge Media

២. NRG radio FM 89 គឺជាស្ថានីយ៍វិទ្យុតន្រ្តីទី ១ និងស្ថានីយ៍វិទ្យុតន្ត្រីលេខមួយរបស់ប្រទេសកម្ពុជាចាប់តាំងពីបានចាប់ផ្តើមដំណើរការនៅថ្ងៃទី ០១ ខែតុលាឆ្នាំ ២០១២ ។ ដោយមានបណ្តាញបញ្ជូនរបស់ខ្លួននៅក្នុងទីក្រុងភ្នំពេញ ក្រុងព្រះសីហនុ ខេត្តបាត់ដំបង ខេត្តកំពង់ធំ និងខេត្តសៀមរាប បច្ចុប្បន្នគ្របដណ្តប់លើប្រជាជនខ្មែរចំនួន ៨០ ភាគរយ។

៣.ក្រុមហ៊ុន Worldbridge Outsourcing Solutions Co.,Ltd

-ឧស្សាហកម្ម

ក្រុមហ៊ុន Worldbridge Industrial Developments ដែលជាក្រុមហ៊ុននៅពីក្រោយហេដ្ឋារចនាសម្ព័ន្ធឧស្សាហកម្ម ៤.០ តម្លៃជិត ៣០លានដុល្លារ លើផ្ទៃដីប្រមាណជាង ៦ហិកតា នៅក្រុងតាខ្មៅ ខេតកណ្តាល ហើយនៅជាប់គម្រោងលំនៅឋានតម្លៃសមរម្យទីក្រុងរណបសិរីមង្គល ជិតគម្រោងអាកាស យាន្តដ្ឋានអន្តរជាតិភ្នំពេញថ្មី និងនៅក្បែរផ្លូវក្រវ៉ាត់ក្រុងទី៣ មួយនេះគឺត្រូវបានចាត់ទុកថាជា គម្រោងបណ្ដុំសហគ្រាស ធុនតូច និងមធ្យម ដែលជាដំណោះស្រាយយុទ្ធសាស្រ្ត ប្រកបដោយនវានុវត្តន៍ សម្រាប់ការអភិវឌ្ឍន៍វិស័យ ឧស្សាហកម្ម និងសហគ្រាសធុនតូចនិងមធ្យមនៅក្នុងប្រទេសកម្ពុជា។

បណ្តុំសហគ្រាសធុនតូចនិងមធ្យមនេះ នឹងនាំមកនូវអនាគតមួយថ្មីសម្រាប់ សហគ្រាស ធុនតូចនិងមធ្យម សហគ្រិន និងការវិនិយោគលើវិស័យបច្ចេកវិទ្យាព័ត៌មាននិងទំនាក់ទំនង ក៏ដូចជាការវិនិយោគ លើ វិស័យផលិតកម្មនៅក្នុងប្រទេសកម្ពុជា ដោយនាំវិស័យទាំងអស់នេះ ឲ្យចូលរួមក្នុងខ្សែរសង្វាក់ផលិតកម្មបាន ពេញលេញ។

-ការថែទាំងសុខភាព

មជ្ឈមណ្ឌលវេជ្ជសាស្ត្រសិង្ហបុរី (SGMC) កម្ពុជា ផ្តល់នូវសេវាស្តង់ដារផ្នែកវេជ្ជសាស្រ្តរបស់ប្រទេសសឹង្ហបូរីដល់ប្រជាជនកម្ពុជា។

The post លម្អិតមុខជំនួញធំៗ របស់មហាសេដ្ឋីប្រាក់លាន សៀ ឬទ្ធី appeared first on .