Yang Huiyan

ជាង ២ឆ្នាំចុងក្រោយ អតីតមហាសេដ្ឋីស្រីមានបំផុតនៅចិន របូតលុយជិត ២៩ពាន់លានដុល្លារ

ឧកញ៉ាសំពៅ — Thu, 10 Aug 2023 08:59:00 +0000

លោកស្រី Yang Huiyan ធ្លាប់មានងារជាមហាសេដ្ឋីស្រីមានបំផុតប្រចាំប្រទេសចិន ប៉ុន្តែគិតតាំងពីខែមិថុនា ឆ្នាំ ២០២១ មកទល់ពេលនេះ មហាសេដ្ឋីរូបនេះរបូតទ្រព្យសម្បត្តិប្រមាណ ២៨,៦ពាន់លានដុល្លារ និងបាត់បង់តំណែងជាមហាសេដ្ឋីស្រីមានបំផុតប្រចាំប្រទេសថែមទៀត។

យោងតាមការចុះផ្សាយពីសារព័ត៌មាន Businessinsider បានបង្ហាញថា គិតចាប់ពីខែមិថុនា ឆ្នាំ ២០២១ មកទល់ខែតុលា ឆ្នាំ ២០២៣នេះ ទ្រព្យសម្បត្តិមហាសេដ្ឋីស្រីរូបនេះ របូតអស់ប្រមាណ ៨៤% ខណៈបច្ចុប្បន្នទ្រព្យសម្បត្តិរបស់លោកស្រីនៅសល់ប្រមាណ ៥,៥ពាន់លានដុល្លារ។

បន្ថែមពីនោះ ម្ចាស់ភាគហ៊ុនធំនៃក្រុមហ៊ុន Country Garden Holdings រូបនេះ ក៏ទទួលរងការខាតបង់មិនស្ទើរផងដែរ ពោលកាលពីថ្ងៃអង្គារកន្លងទៅ ក្រុមហ៊ុនទទួលរងការពិន័យប្រមាណ ៤៩០លានដុល្លារ ដោយសារខកខានបង់ការប្រាក់។

មិនខុសពីក្រុមហ៊ុនអចលនទ្រព្យនានា Country Garden Holdings ក៏មានបំណុលជុំទិសផងដែរ ស្របពេលការលក់ប្រចាំឆមាសទីមួយរបស់ក្រុមហ៊ុន ក៏បង្ហាញសញ្ញាមិនល្អទៀត ពោលទទួលបាន ១២៨,៧៦ពាន់លានយ៉ន់ ឬប្រមាណ ១៧,៨ពាន់លានដុល្លារ ធ្លាក់ចុះ ៣០% បើធៀបនឹងខែមុន។

សូមជម្រាបដែរថា បើទោះជារបូតលុយអស់ច្រើនសន្ធឹកក្ដី ប៉ុន្តែកាលពីចុងខែកក្កដា លោកស្រី Yang បានប្រកាសបរិច្ចាគចំណែកភាគហ៊ុនផ្ទាល់ខ្លួន នៅក្រុមហ៊ុន Country Garden ប្រមាណ ៥៥% ឬប្រមាណ ៨២៦លានដុល្លារ ទៅកាន់មូលនិធិដែលបង្កើតដោយប្អូនស្រីបង្កើតរបស់ខ្លួន៕

The post ជាង ២ឆ្នាំចុងក្រោយ អតីតមហាសេដ្ឋីស្រីមានបំផុតនៅចិន របូតលុយជិត ២៩ពាន់លានដុល្លារ appeared first on .

អតីតមហាសេដ្ឋីស្រីមានបំផុតនៅអាស៊ី បរិច្ចាគទឹកប្រាក់ច្រើនជាង ៨០០លានដុល្លារ

ឧកញ៉ាសំពៅ — Thu, 03 Aug 2023 07:35:32 +0000

បច្ចុប្បន្ន ក្រុមមហាសេដ្ឋីចិនជាច្រើនរូបហាក់បង្កើនការប្រុងប្រយ័ត្នជាខ្លាំង ចំពោះការវិនិយោគលុយ ក៏ដូចជាប្រើប្រាស់លុយរបស់ពួកគេ អំឡុងពេលសេដ្ឋកិច្ចរបស់មហាអំណាចអាស៊ី ជួបប្រទះវិបត្តិអលនទ្រព្យ។

យ៉ាងណា អតីតមហាសេដ្ឋីស្រី មានបំផុតនៅអាស៊ី Yang Huiyan បែរជាធ្វើផ្ទុយស្រឡះ ពីក្រុមមហាសេដ្ឋីដទៃ ពោលគឺថ្មីៗនេះ លោកស្រីបានបរិច្ចាគចំណែកភាគហ៊ុនផ្ទាល់ខ្លួន ប្រហែល ៥៥% ដែលមានតម្លៃស្មើនឹង ៨២៦លានដុល្លារ ទៅកាន់មូលនិធិសប្បុរសធម៌មួយកន្លែង បង្កើតឡើងដោយប្អូនស្រីបង្កើតរបស់លោកស្រី។ នេះបើតាមការចុះផ្សាយពីសារព័ត៌មាន MSN។

ដោយឡែក បើតាមរបាយការណ៍ផ្ទាល់ពីក្រុមហ៊ុនបានបង្ហាញថា លោកស្រី Huiyan បានបរិច្ចាគចំណែកភាគហ៊ុនប្រមាណ ៦៧៥លានហ៊ុន នៃក្រុមហ៊ុន Country Garden Services ទៅកាន់មូលនិធិ Guoqiang Foundation Hong Kong សម្រាប់គោលបំណងសប្បុរសធម៌។

សូមជម្រាបដែរថា លោកស្រី Yang គឺជាអតីតមហាសេដ្ឋីស្រីមានបំផុតនៅអាស៊ី ប៉ុន្តែទ្រព្យសម្បត្តិរបស់លោកស្រី បានធ្លាក់ចុះយ៉ាងខ្លាំង រយៈពេល ២ឆ្នាំចុងក្រោយ ពោលធ្លាក់ចុះប្រមាណ ៨០% ពីទំហំទ្រព្យសម្បត្តិ ៣៤ពាន់លានដុល្លារ ខណៈបច្ចុប្បន្នទ្រព្យសម្បត្តិរបស់លោកស្រីមានប្រហែល ៧ពាន់លានដុល្លារ៕

The post អតីតមហាសេដ្ឋីស្រីមានបំផុតនៅអាស៊ី បរិច្ចាគទឹកប្រាក់ច្រើនជាង ៨០០លានដុល្លារ appeared first on .

ស្ត្រីមេម៉ាយឥណ្ឌា ផ្ដួលស្ដេចត្រាញ់អចលនទ្រព្យចិន ក្លាយជាមហាសេដ្ឋីស្រីមានបំផុតនៅអាស៊ី

ឧកញ៉ាសំពៅ — Wed, 08 Mar 2023 07:55:00 +0000

ដោយសារតែបច្ចុប្បន្ន វិស័យអចលនទ្រព្យនៅប្រទេសចិនកំពុងជួបប្រទះវិបត្តិហិរញ្ញវត្ថុជាខ្លាំង បណ្ដាលឲ្យក្រុមវិនិយោគិន និងអ្នកអភិវឌ្ឍជាច្រើនរូបទទួលការខាតបង់ស្ទើរគ្រប់គ្នា ហើយ Yang Huiyan ក៏បានរបូតតំណែងមហាសេដ្ឋីស្រីមានបំផុតនៅអាស៊ី ក៏ព្រោះតែហេតុផលនេះដូចគ្នា។

ជាមួយគ្នានោះ ស្ត្រីឥណ្ឌាមួយរូបដែលមានឈ្មោះថា Savitri Jindal បានក្លាយជាអ្នកស្នងតំណែងបន្តរបស់ស្ត្រីជនជាតិចិន ដោយបានក្លាយជាមហាសេដ្ឋីស្រីមានបំផុតនៅអាស៊ីជាមួយទ្រព្យសម្បត្តិប្រមាណ ១៧,៤ពាន់លានដុល្លារ។ នេះបើតាមការចុះផ្សាយពី Forbes។

លោកស្រី Savitri គឺមានដើមកំណើតនៅ Tinsukia, Assam ហើយបានរៀបការជាមួយស្ថាបនិកក្រុមហ៊ុន Jindal លោក Om Prakash Jindal នៅទសវត្សឆ្នាំ ១៩៧០ ហើយបន្ទាប់ពីស្វាមីបានចែកឋាននៅក្នុងឧបទ្ទវហេតុធ្លាក់ឧទ្ធម្ភាគចក្រកាលពីឆ្នាំ ២០០៥ លោកស្រីត្រូវបានតែងតាំងជាប្រធានក្រុមហ៊ុន Jindal។

ក្រុមហ៊ុន Jindal គឺជាក្រុមហ៊ុនឈានមុខគេមួយលើវិស័យផលិតស៊ីម៉ងត៍ ថាមពល និងគ្រឿងសាងសង់ហេដ្ឋារចនាសម្ព័ន្ធដូចជា ដែកថែបជាដើម។

សូមជម្រាបដែរថា លោកស្រី Jindal គឺជាបុគ្គលទី ០៦ នៃបញ្ជីអ្នកមានបំផុតប្រចាំប្រទេសឥណ្ឌា និងជាស្ត្រីមានបំផុតប្រចាំឥណ្ឌា និងនៅអាស៊ីជាមួយទំហំទ្រព្យសម្បត្តិប្រមាណ ១៧,៤ពាន់លានដុល្លារ៕

The post ស្ត្រីមេម៉ាយឥណ្ឌា ផ្ដួលស្ដេចត្រាញ់អចលនទ្រព្យចិន ក្លាយជាមហាសេដ្ឋីស្រីមានបំផុតនៅអាស៊ី appeared first on .

មហាសេដ្ឋីអចលនទ្រព្យចិន លក់ភាគហ៊ុនបានលុយជាង ៦០០ លានដុល្លារ

ឧកញ៉ាសំពៅ — Mon, 12 Dec 2022 08:55:00 +0000

វិបត្តិអចលនទ្រព្យនៅប្រទេសចិន កំពុងមានការធ្លាក់ចុះជាខ្លាំង និងបានធ្វើឲ្យមហាសេដ្ឋីចិនជាច្រើនរូបរបូតលុយរាប់ពាន់លានដុល្លារ រហូតបុគ្គលខ្លះរបូតតំណែងមហាសេដ្ឋីក៏មាន។

ទន្ទឹមនឹងនោះ Yang Huiyan អតីតមហាសេដ្ឋីស្រីមានបំផុតនៅអាស៊ី ក៏ទទួលរងឥទ្ធិពលជាខ្លាំងផងដែរ ហើយថ្មីៗនេះលោកស្រីបានប្រកាសលក់ភាគហ៊ុនប្រមាណ ២៣៧ លានហ៊ុននៃក្រុមហ៊ុនអភិវឌ្ឍន៍ Country Garden Services Holdings Co នៅតម្លៃ ២១,៣៣ ដុល្លារហុងកុង ឬតម្លៃ ២,៧៤ ដុល្លារ/ហ៊ុន។

ការលក់ភាគហ៊ុនជាង ២០០ លាននោះ គឺធ្វើឲ្យមហាសេដ្ឋីចិនទទួលទឹកប្រាក់ប្រហែល ៦៥០ លានដុល្លារ បើទោះជាតម្លៃរបស់វាបានធ្លាក់ចុះជិត ១១% បើធៀបនឹងពេលផ្សារហ៊ុនបិទចុងក្រោយបង្អស់។

សូមជម្រាបដែរថា អ្នកស្រី Yang គឺជាសហប្រធានក្រុមហ៊ុន Country Garden ជាក្រុមហ៊ុនអភិវឌ្ឍន៍អលចនទ្រព្យធំបំផុតមួយនៅចិន ដែលមានឪពុកនាងជាស្ថាបនិក ហើយបើតាមរបាយការណ៍ចុះផ្សាយដោយ Bloomberg បានបង្ហាញថា ស្ត្រីវ័យ ៤១ ឆ្នាំរូបនេះមានទ្រព្យសម្បត្តិប្រមាណ ១២,១ ពាន់លានដុល្លារ៕

The post មហាសេដ្ឋីអចលនទ្រព្យចិន លក់ភាគហ៊ុនបានលុយជាង ៦០០ លានដុល្លារ appeared first on .

ប្រាក់ចំណូលក្រុមហ៊ុនអភិវឌ្ឍន៍ធំបំផុតនៅចិន ធ្លាក់ចុះស្ទើរទាំងស្រុងនៅឆមាសទី ១

ឧកញ៉ាសំពៅ — Wed, 31 Aug 2022 12:47:00 +0000

កាលពីថ្ងៃអង្គារ៍កន្លងទៅ ក្រុមហ៊ុន Country Garden Holdings បានទម្លាយថា ប្រាក់ចំណូលរបស់ក្រុមហ៊ុនបានធ្លាក់ចុះ ៩៦% នៅឆមាសទី១ ឆ្នាំ ២០២២ ដែលជាតួលេខអាក្រក់បំផុតតាំងពីក្រុមហ៊ុនចុះបញ្ជីពាណិជ្ជកម្មនៅហុងកុងឆ្នាំ ២០០៧។

ក្រុមហ៊ុនអភិវឌ្ឍន៍ធំបំផុតនៅចិនខាងលើបានរាយការណ៍ថា ប្រាក់ចំណូលរបស់ពួកគេបានធ្លាក់ចុះមក ៦១២ លានយ័ន ឬជិត ៩០ លានដុល្លារក្នុងរយៈពេល ៦ ខែតំបូងនៃឆ្នាំ ២០២២។ នេះបើតាមការចុះផ្សាយពី Bloomberg។

ខុសពីដៃគូប្រជែងឯទៀត អតិថិជនគោលដៅរបស់ Country Garden គឺជាគ្រួសារមានជីវភាពកម្រិតមធ្យម ដែលភាគច្រើនជាអ្នកចំណាកស្រុកមកធ្វើការនៅទីក្រុង ដូច្នេះអំឡុងពេលសេដ្ឋកិច្ចសកលកំពុងធ្លាក់ចុះ ស្របពេលវិស័យអចលនទ្រព្យនៅចិនកំពុងរកាំរកូសផង ធ្វើឲ្យក្រុមហ៊ុនខូចខាតជាខ្លាំង។

មិនតែប៉ុណ្ណោះ តម្លៃហ៊ុនរបស់ Country Garden គឺបានធ្លាក់ចុះ ៣,៩% កាលពីរសៀលថ្ងៃអង្គារ៍នៅលើផ្សារហ៊ុនហុងកុង ខណៈបើគិតនៅឆ្នាំនេះ គឺបានធ្លាក់ចុះរហូតដល់ ៦៤% បើធៀបនឹងឆ្នាំទៅ។

សូមជម្រាបដែរថា ក្រុមហ៊ុនមិនមែនជាអ្នកខាតបង់តែម្នាក់ឡើយ ពោលសូម្បីតែ Yang Huiyan ម្ចាស់ភាគហ៊ុនធំបំផុតរបស់ក្រុមហ៊ុនក៏ទទួលរងឥទ្ធិពលអាក្រក់នេះផងដែរ ពោលលោកស្រីបានរបូតលុយអស់រាប់ពាន់លានដុល្លារ និងថែមទាំងរបូតតំណែងជាស្ត្រីមានបំផុតនៅអាស៊ី ដោយសារវិបត្តិអចលនទ្រព្យនៅចិននេះទៀតផង៕

The post ប្រាក់ចំណូលក្រុមហ៊ុនអភិវឌ្ឍន៍ធំបំផុតនៅចិន ធ្លាក់ចុះស្ទើរទាំងស្រុងនៅឆមាសទី ១ appeared first on .

ស្ត្រីមានបំផុតនៅអាស៊ី របូតទ្រព្យសម្បត្តិអស់ប្រហែលពាក់កណ្ដាល ដោយសារវិបត្តិអចលនទ្រព្យ

ឧកញ៉ាសំពៅ — Thu, 28 Jul 2022 04:00:09 +0000

នៅក្នុងឆ្នាំនេះ វិស័យអចលនទ្រព្យនៅប្រទេសចិនហាក់កំពុងដាំក្បាលចុះយ៉ាងខ្លាំង រហូតដល់ថ្នាក់អតិថិជនមួយចំនួនធំ ធ្វើកូដកម្មឈប់ចង់បង់លុយសម្រាប់គម្រោងដែលសាងសង់មិនរួចរាល់។

ទន្ទឹមនឹងនោះ មេធំក្រុមហ៊ុន Country Garden ដែលធ្លាប់ទទួលរហស្សនាមជាស្ត្រីមានបំផុតនៅអាស៊ី បានរបូតតំណែងមួយនេះ បន្ទាប់ពីប្រទេសចិនជួបវិបត្តិអចលនទ្រព្យធ្ងន់ធ្ងរ បណ្ដាលឲ្យទ្រព្យសម្បត្តិរបស់អ្នកស្រីបាត់បង់អស់ប្រហែលពាក់កណ្ដាល។ នេះបើតាមការចុះផ្សាយពី Bloomberg។

អ្នកស្រី Yang Huiyan ធ្លាប់មានទ្រព្យសម្បត្តិច្រើនជាង ២០ ពាន់លានដុល្លារកាលពីដើមឆ្នាំ ២០២២ ប៉ុន្តែ ៧ ខែក្រោយមក ទ្រព្យសម្បត្តិរបស់អ្នកស្រីបានថយមកសល់ត្រឹមប្រហែល ១៣ ពាន់លានដុល្លារ របូតអស់ជាងពាក់កណ្ដាលឯណោះ។

សូមជម្រាបដែរថា វិស័យអចលនទ្រព្យនៅប្រទេសចិនកំពុងធ្លាក់ក្នុងសភាពវឹកវរជាខ្លាំង រហូតដល់រដ្ឋាភិបាលស្នើសុំឲ្យធនាគារជាច្រើន ចេញមុខដោះស្រាយបញ្ហាមួយនេះ ដូចជាការផ្ដល់មូលនិធិ និងកម្ចីដែលមានការប្រាក់ទាបទៅកាន់ក្រុមអភិវឌ្ឍអចលនទ្រព្យជាដើម៕

The post ស្ត្រីមានបំផុតនៅអាស៊ី របូតទ្រព្យសម្បត្តិអស់ប្រហែលពាក់កណ្ដាល ដោយសារវិបត្តិអចលនទ្រព្យ appeared first on .

សេដ្ឋីនីមានបំផុតនៅចិន ចាយពេលត្រឹម ៤ ថ្ងៃ កើបលុយបានជាង ២ ពាន់លានដុល្លារ

ឧកញ៉ាសំពៅ — Wed, 11 Aug 2021 03:02:45 +0000

អ្នកស្រី Yang Huiyan បានក្លាយជាសេដ្ឋីនីមានបំផុតប្រចាំប្រទេសចិនក្នុងឆ្នាំ ២០២១ ដោយស្ថិតត្រឹមវ័យ ៣៩ ឆ្នាំ អ្នកស្រីមានទំហំទ្រព្យសម្បត្តិប្រមាណ ៣២,៩ ពាន់លានដុល្លារ។ នេះបើតាមប្រភពពី Forbes។

បើទោះបីជា ជាប់ឈ្មោះជាស្ត្រីមានបំផុតប្រចាំប្រទេស តែជីវិតឯកជនរបស់ Huiyan មិនត្រូវបានគេស្គាល់ច្រើននោះឡើយ ដោយគេគ្រាន់តែដឹងថា អ្នកស្រីគឺជាកូនស្រីអ្នកជំនួញក្ដោបក្ដាប់វិស័យអចលនទ្រព្យធំដាច់គេនៅប្រទេសចិនគឺលោក Yang Guoqing។

បើតាមការចុះផ្សាយពី South China Morning Post លោក Guoqing គឺជាស្ថាបនិកក្រុមហ៊ុន Country Garden Holdings ដែលជាក្រុមហ៊ុនអភិវឌ្ឍន៍អចលនទ្រព្យធំបំផុតនៅចិន។

ដោយឡែកសម្រាប់អ្នកស្រី Huiyan វិញ អាចនិយាយបានថា ធំដឹងក្ដីជាមួយគំនរទ្រព្យសម្បត្តិទៅហើយ ដោយកាលពីឆ្នាំ ២០០៧ ឪពុករបស់អ្នកស្រីបានផ្ទេរចំណែកភាគហ៊ុន ៧០% ទៅឲ្យអ្នកស្រី ដែលកាលនោះទើបមានវ័យ ២៥ ឆ្នាំប៉ុណ្ណោះ។

ប្រភពព័ត៌មានមួយទម្លាយថា សេដ្ឋីនីរូបនេះអាចរកបានដល់ទៅ ២ ពាន់លានដុល្លារឯណោះ ក្នុងរយៈពេល ៤ ថ្ងៃ ពោលគឺ នៅពេលភាគហ៊ុន Country Garden ចាប់ផ្ដើមដាក់លក់នៅរយៈពេល ៤ ថ្ងៃដំបូងនៃឆ្នាំថ្មីតែម្ដង។

បច្ចុប្បន្ន អ្នកស្រី Yang Huiyan គឺជាម្ចាស់ភាគហ៊ុនធំបំផុតប្រចាំក្រុមហ៊ុន Country Garden ដែលមាន ៥៧% នៃភាគហ៊ុនទាំងមូល។ ក្រៅពីនាមជាសេដ្ឋីនីមានបំផុតប្រចាំប្រទេសចិន Huiyan ក៏ជាស្ត្រីមានបំផុតទី ៧ នៅលើពិភពលោកផងដែរ៕

ប្រភព: nairametrics

The post សេដ្ឋីនីមានបំផុតនៅចិន ចាយពេលត្រឹម ៤ ថ្ងៃ កើបលុយបានជាង ២ ពាន់លានដុល្លារ appeared first on .