មហាសេដ្ឋីថៃ ចង់ចាយលុយជាង ២២៧លានដុល្លារ ទិញភាគហ៊ុនក្នុងក្រុមហ៊ុនទឹកដោះគោវៀតណាម Vinamilk

ក្រុមហ៊ុន F&N ដែលជាបុត្រសម្ព័ន្ធមួយរបស់ក្រុមហ៊ុន Thai Beverage ដែលគ្រប់គ្រងដោយមហាសេដ្ឋីថៃ គ្រោងចំណាយទឹកប្រាក់ ៦ទ្រីលានដុង ឬស្មើប្រមាណជាង ២២៧លានដុល្លារ ទិញយកភាគហ៊ុនចំនួន ៩៦ លានហ៊ុន នៅក្នុងក្រុមហ៊ុនវៀតណាម Vinamilk ពី Platinum Victory ដែលជាម្ចាស់ភាគហ៊ុនធំ។ នេះបើតាមការចុះផ្សាយពីសារព័ត៌មាន VN Express។

ជុំវិញព័ត៌មាននេះ ត្រូវបានប្រកាសដោយក្រុមហ៊ុន Jardine Cycle & Carriage Group ដែលជាក្រុមហ៊ុនមេរបស់ Platinum Victory នៅលើផ្សារហ៊ុនសិង្ហបុរី កាលពីដើមសប្តាហ៍នេះ។

គួរឲ្យដឹងថា ក្រុមហ៊ុន Platinum Victory និងក្រុមហ៊ុន F&N Dairy Investments បានចុះហត្ថលេខាលើកិច្ចព្រមព្រៀងមួយដើម្បីផ្ទេរភាគហ៊ុនជាង ៩៦ លានហ៊ុន ដែលស្មើនឹង ៤,៦% នៃភាគហ៊ុនសរុបរបស់ Vinamilk។ ប្រតិបត្តិការនេះ ត្រូវបានគេរាយការណ៍ថាមានតម្លៃប្រហែលជាង ៦ទ្រីលានដុង ស្មើជិត ២២៨លានដុល្លារអាមេរិក។

យ៉ាងណាមិញ ប្រសិនបើទទួលបានជោគជ័យ ក្រុមហ៊ុន Platinum Victory នឹងកាត់បន្ថយភាគហ៊ុនរបស់ខ្លួននៅក្នុងក្រុមហ៊ុន Vinamilk ពី ១០,៦២% មកនៅត្រឹម ៦,០២% ស្របពេលក្រុមហ៊ុន F&N នឹងបង្កើនភាគហ៊ុនរបស់ខ្លួនដល់ ២៤,៩៩% ក្នុងនាមជាម្ចាស់ភាគហ៊ុនបរទេសធំជាងគេ នៅក្នុងក្រុមហ៊ុន Vinamilk។

ជម្រាបជូនថា ក្រុមហ៊ុន F&N ស្ថិតនៅក្រោមបុត្រសម្ព័ន្ធមួយរបស់ក្រុមហ៊ុនមេ Thai Beverage ដែលកាន់កាប់ដោយមហាសេដ្ឋីថៃ Charoen Sirivadhanabhakdi៕​