អ្នកឧកញ៉ា លី ឃុនថៃ ប្រធានសមាគមស្បែកជើងកម្ពុជា កាលពីថ្ងៃទី២៣ ខែតុលា ឆ្នាំ២០២៦ បានដឹកនាំក្រុមការងារសមាគមស្បែកជើងកម្ពុជា (CFA) សហការជាមួយ អគ្គនាយកដ្ឋានអន្តោប្រវេសន៍នៃក្រសួងមហាផ្ទៃ និងក្រសួងការងារ និងបណ្តុះបណ្តាលវិជ្ជាជីវៈ រៀបចំកម្មវិធីសិក្ខាសាលាមួយ ក្រោមប្រធានបទ បែបបទ និងនីតិវិធីនៃការស្នើសុំ e-Visa សម្រាប់ជនបរទេស តាមប្រព័ន្ធអនឡាញ នៅអគារ Gateway ដោយមានអ្នកចូលរួម ២១២នាក់។
បន្ថែមលើនេះ ក៏មានប្រធានបទ បែបបទ និងនីតិវិធីនៃការស្នើសុំទិដ្ឋាការពេលមកដល់ (Arrival Visa), បែបបទ និងនីតិវិធីនៃការស្នើសុំការពន្យារទិដ្ឋាការស្នាក់នៅជនបរទេស និងការប្រើប្រាស់ប្រព័ន្ធ FPCS និងកាតព្វកិច្ចពាក់ព័ន្ធនឹងជនបរទេសដែលមកធ្វើការ និងស្នាក់នៅក្នុងព្រះរាជាណាចក្រកម្ពុជា។
សូមជម្រាបថា សមាគមស្បែកជើងកម្ពុជា (CFA) គឺជាឧស្សាហកម្មដ៏សំខាន់មួយនៅកម្ពុជា ដែលមានរោងចក្រចំនួន ១២០ និងកម្មករជាង ១៥ម៉ឺននាក់ ក្នុងនោះ ៨៥% ជាស្ត្រី។ សមាគមនេះបានដើរតួនាទីយ៉ាងសំខាន់ក្នុងការអភិវឌ្ឍសេដ្ឋកិច្ចជាតិ ដោយបង្កើតការងារ បង្កើនប្រាក់ឈ្នួល និងជួយប្រជាជនរាប់សែននាក់ឲ្យរួចផុតពីភាពក្រីក្រ។ សមាគមស្បែកជើងកម្ពុជា តែងតែចូលរួមសហការជាមួយស្ថាប័នរដ្ឋ និងដៃគូពាក់ព័ន្ធនានា ដើម្បីលើកកម្ពស់វិស័យនេះ។
