កាលពីពេលថ្មីៗនេះ ក្រុមហ៊ុន General Motors និងដៃគូសហការ LG Energy Solution បានប្រកាសពីគម្រោងវិនិយោគដែលមានតម្លៃច្រើនជាង ៦,៥ ពាន់លានដុល្លារនៅសប្ដាហ៍ក្រោយនៅរដ្ឋ Michigan។ នេះបើតាមការបង្ហើបឲ្យដឹងត្រួសៗពីឯកសារពាក់ព័ន្ធ។
កាលពីថ្ងៃសុក្រកន្លងទៅ Michigan Strategic Fund បានទម្លាយថា នៅថ្ងៃអង្គារខាងមុខ នឹងមានការប្រជុំរវាងថ្នាក់ដឹកនាំ GM និងដៃគូសហការនានា ក្នុងគម្រោងការវិនិយោគតម្លៃ ៦,៥ ពាន់លានដុល្លារ ក៏ដូចជាផ្ដល់ឱកាសការងារជាង ៤ ម៉ឺនកន្លែងនៅទីក្រុង Lansing និង Orion Township។
សូមបញ្ជាក់ដែរថា កាលពីខែធ្នូកន្លងទៅ សារព័ត៌មាន Reuters បានឲ្យដឹងថា GM បានបង្ហើបពីគម្រោងសាងសង់រោងចក្រផលិតអាគុយតម្លៃ ២,៥ ពាន់លានដុល្លារជាមួយដៃគូសហការ LG Energy Solution ដែលមានទីតាំងនៅក្បែរទីក្រុង Lansing។
ប្រភពដដែលបន្ថែមថា GM ក៏បានពិចារណាពីការចំណាយថវិកាខ្ទង់ ២ ពាន់លានដុល្លារផ្សេងទៀតទៅលើគម្រោងវិនិយោគនៅទីក្រុង Orion Township ដើម្បីសាងសង់រោងចក្រផលិតរថយន្តអគ្គិសនីជំនាន់ថ្មី៕
ប្រភព: Kelo
