គ្រឹះស្ថានអង្គរ បានប្រកាសចាប់ផ្ដើមបើកលក់សំបុត្រជិះទូកទស្សនាតំបន់បឹងទន្លេសាប នៅកំពង់ផែទេសចរណ៍ចុងឃ្នៀស ចាប់ពីថ្ងៃទី ១៥ ខែកុម្ភៈ ឆ្នាំ២០២២ ក្នុងតម្លៃ ៧ ដុល្លារចំពោះភ្ញៀវទេសចរណ៍ម្នាក់។
តំបន់ទេសចរណ៍នៅបឹងទន្លេសាបមាន ៤ កន្លែង ដែលភ្ញៀវទេសចរភាគច្រើនចូលចិត្តទៅកម្សាន្តរួមមានតំបន់មេជ្រៃ កំពង់ភ្លុក កំពង់ឃ្លាំង និងតំបន់ចុងឃ្នៀស។ ប៉ុន្តែភ្ញៀវទេសចរភាគច្រើននិយមទៅកម្សាន្តនៅតំបន់ចុងឃ្នៀស ព្រោះសម្បូរដោយទេសភាពស្រស់ស្អាតជាពិសេសពេលថ្ងៃលិច។
ពេលដែលភ្ញៀវទេសចរទៅទស្សនាតំបន់ចុងឃ្នៀសនេះ ពួកគាត់អាចមើលឃើញដើមរាំងធំៗដុះខ្ពស់ផុតពីទឹកនៅអមសង្ខាងផ្លូវ,មើលភូមិ និង ផ្ទះបណ្តែតទឹក,មើលអាងចិញ្ចឹមត្រីអាងចិញ្ចឹមក្រពើ ,មើលផ្ទៃទឹកបឹងទន្លេសាបដ៏ធំល្វឹងល្វើយជាដើម ។
រាជរដ្ឋាភិបាលនៅដំណាច់ខែកក្កដា ឆ្នាំ២០២១ បានសម្រេចដកហូតការគ្រប់គ្រងផែទេសចរណ៍ ស៊ូ ជីង ដែលអភិវឌ្ឍតំបន់ទេសចរណ៍ចុងឃ្នៀសបឹងទន្លេសាប។ រហូតដល់បច្ចុប្បន្ននេះ រដ្ឋបាលខេត្តសៀមរាប និងគ្រឹះស្ថានអង្គរ បានបើកឱ្យដំណើរការលក់សំបុត្រ ដែលមានកាណូតដឹកភ្ញៀវទេសចរប្រមាណជាង ៣០០ទូក។
ការបើកតំបន់ទេសចរណ៍ចុងឃ្នៀសឡើងវិញ ដែលធ្លាប់ជាទីពេញនិយមបំផុតសម្រាប់ភ្ញៀវទេសចរបរទេស អភិបាលខេត្តសៀមរាប លោក ទៀ សីហា ក៏បានណែនាំដល់ក្រុមការងារចម្រុះ ត្រូវកែប្រែកំពង់ផែមួយនេះឱ្យក្លាយទៅជាតំបន់ទេសចរណ៍វប្បធម៌ ដែលមានភាពទាក់ទាញបំផុត។ អាជ្ញាធរបានរៀបចំកែលម្អសោភ័ណភាព និងហេដ្ឋារចនាសម្ព័ន្ធផ្លូវមួយចំនួននៅតំបន់នេះ ដោយមានការរៀបចំល្អស្អាត ជាពិសេសសុវត្ថិភាពសម្រាប់ភ្ញៀវទេសចរក្នុងការជិះទូកកម្សាន្ត៕
