រាជធានីភ្នំពេញ បានបើកការដ្ឋានសាងសង់ស្ថានីយប្រព្រឹត្តកម្មកាកសំណល់ភក់បង្គន់ លើផ្ទៃដី៣ហិចតា ស្ថិតនៅភូមិភ្លើងឆេះរទេះខាងលិច សង្កាត់ភ្លើងឆេះរទេះ ខណ្ឌកំបូល ។ ពិធីបើកការដ្ឋានបានធ្វើឡើង ក្រោមអធិបតីភាព លោក ឃួង ស្រេង អភិបាលរាជធានីភ្នំពេញ និងលោក ព្យែរ បៃយ៉េ ( Mr.PIERRE BAILLET ) លេខាធិការអចិន្ត្រៃយ៍ នៃសមាគមអភិបាលក្រុងប្រើប្រាស់ភាសាបារាំង (AIMF) កាលពីថ្ងៃទី២៤ ខែឧសភា ឆ្នាំ២០២២។
ថ្លែងនៅក្នុងពិធីបើកការដ្ឋានសាងសង់នេះ លោក ឃួង ស្រេង អភិបាលរាជធានីភ្នំពេញ បានបញ្ជាក់ថា ការសាងសង់ស្ថានីយប្រព្រឹត្តកម្មកាកសំណល់ភក់បង្គន់ ពិតជាមានភាពចាំបាច់សម្រាប់រាជធានីភ្នំពេញ ដើម្បីលើកកម្ពស់អនាម័យសាធារណៈ ឆ្លើយតបទៅនឹងអត្រាកំណើន ប្រជាពលរដ្ឋ កំណើនសេដ្ឋកិច្ច នគរូបនីយកម្ម ការពង្រីកទីក្រុង ។ ជាពិសេសដើម្បីកាត់បន្ថយជាតិពុលធ្វើអោយប៉ះពាល់ដល់បរិស្ថានជុំវិញ និងជីវភាពរស់នៅប្រចាំថ្ងៃក៏ដូចសុខុមាលភាពរបស់ប្រជាពលរដ្ឋក្នុងរាជធានីភ្នំពេញផងដែរ
ជាមួយគ្នានេះ លោក ព្យែរ ប៊ែយ៉េ លេខាធិការអចិន្ត្រៃយ៍នៃសមាគមអន្តរជាតិអភិបាលក្រុងប្រើប្រាស់ភាសាបារាំង ក៏លើកឡើងដែរបាន ការរៀបចំអាងប្រព្រឹត្តកម្មសំណល់ភក់បង្គន់នេះ ជាគោលនយោបាយមួយធ្វើអោយប្រសើរឡើង នៃការរស់នៅរបស់ប្រជាពលរដ្ឋនៅភ្នំពេញ ប្រកបដោយសុខមាលភាព ដោះស្រាយបំរែបម្រួលអាកាសធាតុ ។ សំណល់ភក់បង្គន់នេះនឹងប្រែក្លាយទៅជាជីសំរាប់ធ្វើកសិកម្ម ហើយផ្តល់ការងារជូនក្រុមហ៊ុនតូចៗផងដែរ។
យោងតាមការសិក្សា នៅឆ្នាំ២០០១ សំណល់ភក់បង្គន់របស់ប្រជាពលរដ្ឋនៅរាជធានីភ្នំពេញ មានចំនួនត្រឹមតែ ២ម៉ឺនម៉ែត្រគូបក្នុងមួយឆ្នាំ និងមានការកើនឡើងជាលំដាប់ ហើយតាមការប៉ាន់ស្មាននៅឆ្នាំ២០៣៥ សំណល់ភក់បង្គន់របស់ប្រជាពលរដ្ឋនៅ រាជធានីភ្នំពេញ នឹងកើនឡើងដល់ជាង ៣០ម៉ែត្រគូបក្នុងមួយឆ្នាំ ពោលគឺកើនឡើងជិត១៣ដង។ ជាការឆ្លើយតបជាមួយកំណើននេះ ទាមទារឱ្យរដ្ឋបាលរាជធានីភ្នំពេញត្រូវយកចិត្តទុកដាក់គ្រប់គ្រង ជាពិសេសរៀបចំអាងប្រព្រឹត្តកម្មសំណល់ ឱ្យបានត្រឹមត្រូវស្របតាមស្តង់ដាបច្ចេកទេស។
គួរបញ្ជាក់ថា ស្ថានីយប្រព្រឹត្តកម្មកាកសំណល់ភក់បង្គន់ គឺសាងសង់នៅក្នុងសង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ ដោយគ្រោងនឹងបញ្ចប់ការសាងសង់ ខែមីនា ឆ្នាំ២០២៣។ ស្ថានីយប្រព្រឹត្តកម្មកាកសំណល់ភក់បង្គន់ មានបច្ចេកវិទ្យាធ្វើប្រព្រឹត្តកម្ម ដោយមានសមត្ថភាពធ្វើប្រព្រឹត្តកម្មភក់បង្គន់ ៧០ម៉ែត្រគូបក្នុងមួយថ្ងៃ មានថ្នាលផ្ទៃរាបស្មើហាលអោយស្ងួតយកជាតិទឹកចេញពីភក់ល្បាប់ ។ ដោយឡែក ទិន្នផលប្រព្រឹត្តកម្មខ្ពស់ ប្រព្រឹត្តកម្មប្រើបាតុភូតធម្មជាតិ សមាហរណកម្មទេសភាពល្អ ផលិតបានជីសរីរាង្គដោយមិនត្រូវការថាមពល គ្មានក្លិន ការចំណាយប្រតិបត្តិការ និងការថែទាំមានតម្លៃទាប ៕
