កាលពីថ្ងៃទី២៣ ខែកញ្ញា ឆ្នាំ២០២៦ លោក សំហេង បូរ៉ា រដ្ឋលេខាធិការក្រសួងពាណិជ្ជកម្ម និងជាប្រធានក្រុមការងារជំរុញការនាំចេញ បានដឹកនាំគណៈប្រតិភូ បន្តដំណើរទស្សនកិច្ចសិក្សា និងជួបពិភាក្សាការងារជាមួយតំណាងក្រុមហ៊ុនក្នុងស្រុក និងក្រុមហ៊ុនអន្តរជាតិ។

នៅក្នុងជំនួបដំបូងជាមួយក្រុមហ៊ុន SODEFORCE នាទីក្រុងយ៉ាមូស៊ូក្រូ គណៈប្រតិភូបានស្វែងយល់ពីការបង្កើនតម្លៃបន្ថែមដល់ផ្លែស្វាយចន្ទី ការអភិវឌ្ឍផលិតផលថ្មី និងការអភិវឌ្ឍទីផ្សារក្នុងស្រុក។ តំណាងក្រុមហ៊ុនបានបង្ហាញយ៉ាងលម្អិតអំពីដំណើរការកែច្នៃផ្លែស្វាយចន្ទី និងការកែច្នៃអនុផលស្វាយចន្ទីដូចជា ទឹកផ្លែស្វាយចន្ទី ស្រា ទឹកខ្មេះ អាល់កុល ម្សៅច្នៃពីគ្រាប់ស្វាយចន្ទី ចំណីត្រី និងផលិតផលអាហារផ្សេងៗទៀត ដែលធ្វើឡើងស្របតាមគោលការណ៍គ្មានសំណល់។

បន្ទាប់មក គណៈប្រតិភូបានបន្តដំណើរទៅទីក្រុងអាប៊ីតចាន ដើម្បីជួបពិភាក្សាការងារជាមួយក្រុមហ៊ុន Olam Food Ingredients ហៅកាត់ថា OFI ក្នុងគោលបំណងស្វែងយល់បន្ថែមពីការលើកទឹកចិត្ត និងការបង្កើតបរិយាកាសអំណោយផលសម្រាប់វិស័យឯកជន។ ជំនួបជាមួយក្រុមហ៊ុនទីពីរក៏បានផ្តោតសំខាន់លើការគ្រប់គ្រងគុណភាព និងការរៀបចំផលិតផលស្វាយចន្ទីសម្រាប់ការនាំចេញទៅទីផ្សារអន្តរជាតិផងដែរ។

លទ្ធផលនៃទស្សនកិច្ចសិក្សានេះ គឺជាធាតុចូលដ៏មានតម្លៃសម្រាប់កម្ពុជាក្នុងការយកមកអនុវត្ត និងអភិវឌ្ឍខ្សែច្រវាក់ផលិតកម្មស្វាយចន្ទី ចាប់តាំងពីការដាំដុះ ការកែច្នៃបង្កើតតម្លៃបន្ថែម រហូតដល់ការស្វែងរកឱកាសពង្រីកទីផ្សារនាំចេញទៅក្រៅប្រទេសឱ្យកាន់តែទូលំទូលាយ។

The post កម្ពុជា ជួបក្រុមហ៊ុនធំៗចំនួន២ នៅកូតឌីវ័រ ដើម្បីសិក្សាពីបច្ចេកវិទ្យាកែច្នៃស្វាយចន្ទី «គ្មានសំណល់» និងយុទ្ធសាស្ត្រវាយលុកទីផ្សារអន្តរជាតិ appeared first on .

នាឱកាសនោះ សម្តេចធិបតី ហ៊ុន ម៉ាណែត បានគូសបញ្ជាក់ថា ប្រទេសទាំងពីរមានភាពប្រហាក់ប្រហែលគ្នាមួយចំនួន ជាពិសេសនៅក្នុងមូលដ្ឋានសេដ្ឋកិច្ច។ បន្ថែមលើនេះ សម្ដេចធិបតីក៏បានអញ្ជើញ នាយករដ្ឋមន្ត្រីកូតឌីវ័របំពេញទស្សនកិច្ចនៅកម្ពុជា ក្នុងពេលវេលាសមស្របណាមួយ និងពិនិត្យលទ្ធភាព ចូលរួមកិច្ចប្រជុំកំពូលហ្វ្រង់កូហ្វូនីលើកទី២០ នៅឆ្នាំ២០២៦ ខាងមុខនេះ នៅខេត្តសៀមរាប ដែលកម្ពុជានឹងធ្វើជាម្ចាស់ផ្ទះផងដែរ។

ជាការឆ្លើយតប លោកនាយករដ្ឋមន្ត្រីនៃសាធារណរដ្ឋកូតឌីវ័រ សង្ឃឹមថា នឹងមានឱកាសបំពេញទស្សនកិច្ចផ្លូវការនៅកម្ពុជា និងចូលរួមកិច្ចប្រជុំកំពូលហ្វ្រង់កូហ្វូនីលើកទី២០ នៅឆ្នាំ២០២៦ ដែលនឹងជាកាលានុវត្តភាពនៃការបន្តកិច្ចពិភាក្សាទ្វេភាគី សំដៅពង្រឹង និងពង្រីកទំនាក់ទំនង និងកិច្ចសហប្រតិបត្តិការរវាងប្រទេសទាំងពីរឱ្យកាន់តែល្អប្រសើរថែមទៀត។

សូមជម្រាបដែរថា តាមរយៈជំនួបនោះ នាយករដ្ឋមន្ត្រីទាំងពីរ បានបន្តពិភាក្សា និងផ្លាស់ប្ដូរយោបល់គ្នានៅលើកិច្ចសហប្រតិបត្តិការសក្ដានុពលមួយចំនួន, ជាពិសេសលើវិស័យឧស្សាហកម្ម និងកសិកម្ម។ លោកនាយករដ្ឋមន្ត្រីកូតឌីវ័រ បានសន្យាថា នឹងចាត់រដ្ឋមន្ត្រីឧស្សាហកម្ម ទៅធ្វើទស្សនកិច្ចការងារនៅកម្ពុជា ដើម្បីពិនិត្យ និងសិក្សាលទ្ធភាពពង្រីកការផ្សារភ្ជាប់កិច្ចសហប្រតិបត្តិការក្នុងការអភិវឌ្ឍមូលដ្ឋានផលិតកម្មជាមួយប្រទេសកម្ពុជា។ បន្ថែមពីនេះ នាយករដ្ឋមន្ត្រីទាំងពីរ ក៏បានឯកភាពក្នុងការបន្តពិនិត្យលទ្ធភាពពង្រឹង និងពង្រីកកិច្ចសហប្រតិបត្តិការក្នុងវិស័យផ្សេងៗ ឱ្យកាន់តែខ្លាំងក្លាបន្ថែមទៀត ដើម្បីជា ឧត្តមប្រយោជន៍សម្រាប់ប្រទេសទាំងពីរផងដែរ៕អត្ថបទ៖ហ្សាលីន

The post កូតឌីវ័រ នឹងសិក្សាលទ្ធភាពពង្រីកការអភិវឌ្ឍមូលដ្ឋានផលិតកម្មជាមួយប្រទេសកម្ពុជា appeared first on .