ជំនួបពិភាក្សានេះ បានធ្វើឡើងនៅទីក្រុងស៊ីដនី, ប្រទេសអូស្ត្រាលី ដឹកនាំដោយ លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ជាមួយលោក Morgan Hart នាយកគ្រប់គ្រងក្រុមហ៊ុន Renaissance Minerals (Cambodia) Ltd ដែលជាថ្ងៃទីមួយនៃការបំពេញបេសកកម្មទាក់ទាញ និងជំរុញវិនិយោគនៅប្រទេសអូស្ត្រាលី (Investment Roadshow to Australia។

ជាមួយគ្នានេះ ក្នុងជំនួបនេះដែរ ក៏មានការចូលរួមពីលោកឯកអគ្គរាជទូតកម្ពុជាប្រចាំប្រទេសអូស្ត្រាលី និងនូវែលហ្សេឡង់, លោកអគ្គរដ្ឋទូតអូស្ត្រាលីប្រចាំប្រទេសកម្ពុជា, និងថ្នាក់ដឹកនាំក្រុមប្រឹក្សាអភិវឌ្ឍន៍កម្ពុជាផងដែរ។

នាឱកាសនោះ លោកនាយកគ្រប់គ្រងក្រុមហ៊ុន បានថ្លែងអំណរគុណដល់លោកឧបនាយករដ្ឋមន្ត្រី ដែលបានអនុញ្ញាតឱ្យលោកចូលជួបសម្ដែងការគួរសម ពិភាក្សាការងារ និងទទួលអនុសាសន៍អំពីការវិនិយោគរបស់ខ្លួននៅប្រទេសកម្ពុជា។

ជាការឆ្លើយតប លោកឧបនាយករដ្ឋមន្ត្រី ស៊ុន ចាន់ថុល ក៏បានជម្រាបជូនលោកនាយកគ្រប់គ្រងក្រុមហ៊ុនអំពីវឌ្ឍនភាពថ្មីៗរបស់កម្ពុជា និងលើកបង្ហាញដល់ដៃគូវិនិយោគិនអំពីសក្តានុពលផ្សេងទៀតរបស់ប្រទេសកម្ពុជា និងចក្ខុវិស័យរបស់រាជរដ្ឋាភិបាលកម្ពុជាក្នុងការធ្វើឱ្យប្រទេសកម្ពុជាក្លាយទៅជាប្រទេសដែលមានចំណូលខ្ពស់ត្រឹមឆ្នាំ២០៥០។

តាមរយៈជំនួបខាងលើនេះដែរ ក្រោយទទួលបានអនុសាសន៍ណែនាំពីក្រុមប្រឹក្សាអភិវឌ្ឍន៍កម្ពុជា លោកនាយកគ្រប់គ្រងក្រុមហ៊ុនក៏បានលើកឡើងអំពីលទ្ធភាពក្នុងការពង្រីកការវិនិយោគរបស់ខ្លួនបន្ថែមទៀតនៅក្នុងប្រទេសកម្ពុជាផងដែរ៕ អត្ថបទ៖ ហ្សាលីន

The post ក្រុមហ៊ុនអូស្រ្តាលី មកស្វែងយល់ពីសក្តានុពល និងឱកាសកាសវិនិយោគនៅកម្ពុជា appeared first on .

ក្នុងជំនួបពិភាក្សាការងាររវាងលោក Derek Yip ឯកអគ្គរដ្ឋទូតអូស្ត្រាលីប្រចាំកម្ពុជា និងប្រតិភូនៃនាយកដ្ឋានអប់រំ រដ្ឋាភិបាលអូស្ត្រាលីខាងលិច ជាមួយលោក ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា កាលពីថ្ងៃទី១៧ សីហា ឆ្នាំ២០២៥  ដើម្បីស្វែងយល់ពីប្រព័ន្ធអប់រំ និងកម្មវិធីសិក្សានៃអូស្ត្រាលីខាងលិច ចែករលែកបទពិសោធលើការងារអប់រំ និងវឌ្ឍនភាពកិច្ចសហប្រតិបត្តិការនានាក្នុងវិស័យអប់រំរវាងប្រទេសអូស្ត្រាលី និងកម្ពុជា សំដៅពិនិត្យលទ្ធភាពក្នុងការបន្តជំរុញកិច្ចសហប្រតិបត្តិការលើវិស័យអប់រំរវាងប្រទេសទាំងពីរឱ្យកាន់តែប្រសើរឡើង។

លោក Colin Glass ប្រធានក្រុមប្រឹក្សានៃ SpringBoard4Education បានឱ្យដឹងថា SpringBoard4Education គឺជាស្ថាប័នវិនិយោគអន្តរជាតិ ដែលផ្តោតសំខាន់លើការជំរុញ និងវិនិយោគលើវិស័យអប់រំនៅតាមប្រទេសនានាជុំវិញពិភពលោក ដែលមានសាខានៅអាស៊ី អារ៉ាប់ និងអាហ្វ្រិច។ ដោយមានការសហការ និងគាំទ្រពីរដ្ឋាភិបាលប្រទេសអូស្ត្រាលីភាគខាងលិច តាមរយៈនាយកដ្ឋានអប់រំ ស្ថាប័ន SpringBoard4Education បានភ្ជាប់ទំនាក់ទំនងវិស័យអប់រំរវាងប្រទេសកម្ពុជា និងអូស្ត្រាលី ក្នុងគោលដៅ អភិវឌ្ឍវិស័យអប់រំនិងផ្តល់ឱកាសឱ្យសិស្សានុសិស្សបានសិក្សាក្នុងកម្មវិធីសិក្សាអន្តរជាតិរបស់រដ្ឋអូស្ត្រាលី។ បច្ចុប្បន្ន មានសាលាអន្តរជាតិចំនួន ១៥ នៅកម្ពុជាកំពុងអនុវត្តកម្មវិធីសិក្សាចំណេះដឹងទូទៅប្រទេសអូស្ត្រាលីភាគខាងលិច ដែលក្នុងនោះមានសិស្សកម្ពុជាសរុបប្រមាណ ៤០០០នាក់។

លោកស្រី Melissa Kelly នាយកផ្នែកអប់រំអន្តរជាតិរបស់អាជ្ញាធរស្តង់ដា កម្មវិធីសិក្សាចំណេះដឹងទូទៅ នៃនាយកដ្ឋានអប់រំ រដ្ឋាភិបាលអូស្ត្រាលីខាងលិច ក៏បានបញ្ជាក់ថា កម្មវិធីសិក្សាចំណេះដឹងទូទៅប្រទេសអូស្ត្រាលីភាគខាងលិច គឺជាកម្មវិធីសិក្សាស្តង់ដាអន្តរជាតិ នៃនាយកដ្ឋានអប់រំ របស់រដ្ឋាភិបាលប្រទេសអូស្ត្រាលីភាគខាងលិច ស្របទៅតាមស្តង់ដាអប់រំរបស់ប្រទេសអូស្ត្រាលី និងត្រូវបានទទួលស្គាល់ទូទាំងពិភពលោក។ បន្ទាប់ពីបញ្ចប់ការសិក្សា សិស្សនឹងមានឱកាសប្រឡង និងទទួលបានសញ្ញាបត្រ ATAR (Australian Tertiary Admission Rank) ដែលត្រូវបានចេញដោយរដ្ឋាភិបាលប្រទេសអូស្ត្រាលី និងអាចប្រើប្រាស់ដើម្បីបន្តការសិក្សានៅគ្រប់សាកលវិទ្យាល័យក្នុងទូទាំងពិភពលោកផងដែរ។

លោកឧបនាយករដ្ឋមន្រ្តី ហង់ ជួន ណារ៉ុន បានថ្លែងអំណរគុណយ៉ាងជ្រាលជ្រៅដល់រដ្ឋាភិបាលអូស្ត្រាលី ដែលជានិច្ចកាលបានរួមចំណែកក្នុងការអភិវឌ្ឍវិស័យអប់រំនៅកម្ពុជា ជាពិសេសចំពោះការផ្តល់នូវអាហារូបករណ៍ដល់យុវជនកម្ពុជា ការសហការផ្លាស់ប្តូរបទពិសោធ Exchange Program និង Dual Degree ដែលបានផ្តល់ឱកាសជាច្រើន និងកាន់តែសម្បូរបែបដល់សិស្សនិស្សិតកម្ពុជាអាចបន្តពង្រឹងនិងពង្រីកចំណេះដឹង ជំនាញកាន់តែទូលំទូលាយ និងមានភាពជាពលរដ្ឋសាកលសម្រាប់ការប្រកួតប្រជែងលើទីផ្សារការងារជាតិ និងអន្តរជាតិ។

តាងនាមក្រសួងអប់រំ យុវជន និងកីឡា លោកឧបនាយករដ្ឋមន្ត្រី សូមវាយតម្លៃខ្ពស់ចំពោះកិច្ចខិតខំប្រឹងប្រែងរបស់ SpringBoard4Education ក្នុងផ្សារភ្ជាប់ទំនាក់ទំនងលើវិស័យអប់រំរវាងកម្ពុជា និងអូស្ត្រាលីខាងលិច តាមរយៈការនាំយកនូវកម្មវិធីសិក្សាស្តង់ដាអន្តរជាតិនៃអូស្ត្រាលីខាងលិចមកកាន់កម្ពុជា ដោយគូសបញ្ជាក់នូវការសហការគាំទ្ររាល់គំនិតផ្តួចផ្តើមនានាដែលមានគោលដៅលើកកម្ពស់វិស័យអប់រំនៅកម្ពុជាឱ្យកាន់តែរីកចម្រើន៕

The post ផ្សារភ្ជាប់ទំនាក់ទំនងលើវិស័យអប់រំ! អូស្ត្រាលីនឹងនាំយកកម្មវិធីសិក្សាស្តង់ដាអន្តរជាតិនៃអូស្ត្រាលីខាងលិចមកកាន់កម្ពុជា appeared first on .

លោក ដេរិក យីប ឯកអគ្គរដ្ឋទូតអូស្ត្រាលីប្រចាំនៅកម្ពុជា បានមានប្រសាសន៍ថា “អូស្ត្រាលី មានមោទនភាពក្នុងការធ្វើជាដៃគូជាមួយ កម្ពុជានិងអាជីវកម្មរបស់កម្ពុជាដើម្បីជំរុញពាណិជ្ជកម្មឱ្យកាន់តែមានភាពប្រកួតប្រជែង និងឈានទៅកាន់ការទទួលបាននូវទីផ្សារថ្មីៗ។ កិច្ចខិតខំប្រឹងប្រែងនេះ នឹងជួយគាំទ្រទៅដល់គោលដៅរបស់ប្រទេសកម្ពុជានូវការចាក ចេញពីក្រុមប្រទេសដែលមានការអភិវឌ្ឍតិចតួចប្រកបដោយជោគជ័យ។

លើសពីនេះនឹងជួយបង្កើននូវពាណិជ្ជកម្មទ្វេភាគីរវាងប្រទេសយើងទាំងពីរ។ យើងប្តេជ្ញាចិត្តពង្រឹងភាពជាដៃគូសេដ្ឋកិច្ចរបស់យើងជាមួយកម្ពុជា និងគាំទ្រការធ្វើសមាហរណកម្មរបស់កម្ពុជាទៅក្នុងខ្សែសង្វាក់តម្លៃក្នុងតំបន់ និងលើសកលលោក”។

លោក សំហេង បូរ៉ា រដ្ឋលេខាធិការក្រសួងពាណិជ្ជកម្ម បានមានប្រសាសន៍ថា “កិច្ចខិតខំប្រឹងប្រែងសហការ ដើម្បីជំរុញការនាំចេញផលិតផលផលិតកម្ពុជា គឺមានសារៈសំខាន់ណាស់ក្នុងការជំរុញវិស័យកែច្នៃកសិផលរបស់យើង ជាពិសេសនៅក្នុងបរិយាកាសពាណិជ្ជកម្មសកលដែលមិនមានភាពប្រាកដប្រជានាពេលបច្ចុប្បន្ន។ ការគាំទ្ររបស់រដ្ឋាភិបាលអូស្ត្រាលី ជួយឱ្យយើងអាចសម្រេចបាននូវការនាំចេញផ្លែឈើក្រៀមរបស់កម្ពុជា ទៅកាន់ប្រទេសអូស្ត្រាលី។ តាមរយៈការប្តេជ្ញាចិត្តពីសំណាក់រាជរដ្ឋាភិបាលកម្ពុជា វិស័យឯកជននិងភាគីពាក់ព័ន្ធសំខាន់ៗផ្សេងទៀត។ ខ្ញុំជឿជាក់ថា ភាពធន់នៃសេដ្ឋកិច្ចរបស់យើង នឹងបន្តទៅមុខយូរអង្វែង និងកាន់តែរឹងមាំ”។

លោក ឈិន សុផល ប្រធានក្រុមប្រឹក្សាភិបាលនៃក្រុមហ៊ុន RTT បានសម្តែងនូវអំណរគុណទៅដល់ អូស្ត្រាលី និងក្រសួងពាណិជ្ជកម្មលើការគាំទ្រកន្លងមក ដែលជួយឱ្យអាជីវកម្មសម្រេចបាននូវសមិទ្ធផលនេះ។ ការនាំចេញនេះបង្ហាញពីការកើនឡើងនៃសមត្ថភាពរបស់សហគ្រាសក្នុងស្រុក ក្នុងការឆ្លើយតបទៅនឹងតម្រូវការសកលលោក។

លោកបន្តថា “ពួកយើងជឿថា ការនាំចេញនាពេលនេះគ្រាន់តែជាចំណុចចាប់ផ្តើមប៉ុណ្ណោះ ហើយផលិតផលកម្ពុជាជាច្រើនផ្សេងទៀត នឹងអាចមានវត្តមានលើទីផ្សារអូស្ត្រាលី និងប្រទេសដទៃទៀតនៅពេលខាងមុខ”។

គូសបញ្ជាក់ផងដែរថា នៅឆ្នាំ២០២៤ពាណិជ្ជកម្មទ្វេភាគីរវាងកម្ពុជា និងអូស្ត្រាលី ឈានទៅដល់ទំហំទឹកប្រាក់ប្រមាណជា១,១ពាន់លានដុល្លារ ដែលក្នុងនោះជាង ៧០ ភាគរយ នៃទឹកប្រាក់ពាណិជ្ជកម្មសរុប គឺជាការនាំចេញរបស់កម្ពុជា ទៅកាន់អូស្ត្រាលី៕

The post កម្ពុជានាំចេញផលិតផលលើកដំបូងជាង១២តោន ទៅប្រទេសអូស្ត្រាលី appeared first on .

ស្ថានទូតអូស្រ្តាលីប្រចាំកម្ពុជា បានឱ្យដឹងថា ដើម្បីសម្រេចគោលដៅនេះ ត្រូវមានការរៀបចំផែនការយ៉ាងប្រុងប្រយ័ត្ន ដើម្បីធានាថាបណ្តាញអគ្គសនីជាតិនៅតែមានស្ថេរភាព មានទំនុកចិត្ត និងមានតម្លៃសមរម្យ។ អូស្ត្រាលីគឺជាប្រទេសនាំមុខគេផ្នែកថាមពលកកើតឡើងវិញ ដែលមានសមត្ថភាពផលិតថាមពលសូឡាតាមមនុស្សម្នាក់បានយ៉ាងខ្ពស់ ពោលគឺស្ថិតនៅក្នុងចំណោមប្រទេសដែលផលិតថាមពលសូឡាខ្ពស់បំផុតក្នុងពិភពលោក។ 

តាមរយៈកម្មវិធី CAPRED អូស្ត្រាលីកំពុងគាំទ្រដល់ការបណ្តុះបណ្តាលបច្ចេកទេសអំពីការវាយតម្លៃសក្ដានុពលសម្រាប់គម្រោងថាមពលសូឡាខ្នាតធំ និងការរួមបញ្ចូល និងការគ្រប់គ្រងប្រព័ន្ធសូឡានៅលើដំបូល ដល់មន្ត្រីថ្នាក់ជាតិ និងថ្នាក់ខេត្តមកពីក្រសួងរ៉ែ និងថាមពល អគ្គិសនីកម្ពុជា (EDC) និងអាជ្ញាធរអគ្គិសនីកម្ពុជា។

ជាមួយគ្នានេះ តាមរយៈការលើកកម្ពស់សមត្ថភាពក្នុងការរៀបចំផែនការ និងគ្រប់គ្រងគម្រោងថាមពលកកើតឡើងវិញ អូស្ត្រាលីកំពុងជួយកម្ពុជាបន្តអភិវឌ្ឍវិស័យថាមពលប្រកបដោយចីរភាព ដែលនាំមកនូវអត្ថប្រយោជន៍ដល់គ្រួសារ អាជីវកម្ម និងសេដ្ឋកិច្ចជាតិ៕

The post អូស្ត្រាលីបង្កើនការគាំទ្រថាមពលស្អាតនៅកម្ពុជា appeared first on .

នេះបើយោងតាមជំនួបដែលធ្វើឡើងកាលកាលរសៀលថ្ងៃអង្គារ ទី១៨ ខែកុម្ភៈ ឆ្នាំ២០២៥ នៅទីក្រុងស៊ីដនី ប្រទេសអូស្រ្តាលី ដែលដឹកនាំដោយលោកស្រី ចម និម្មល រដ្ឋមន្រ្តីក្រសួងពាណិជ្ជកម្ម លោកស្រី Alison Webster នាយកប្រតិបត្តិផ្នែកពាណិជ្ជកម្ម និងយុទ្ធសាស្រ្ត។

លោកស្រី ចម និម្មល រដ្ឋមន្រ្តីក្រសួងពាណិជ្ជកម្ម បានឱ្យដឹងថា ការពិភាក្សានេះ គឺធ្វើឡើងខណៈប្រតិភូរបស់ក្រសួងពាណិជ្ជកម្ម បានអញ្ជើញទៅបំពេញទស្សនកិច្ចនៅព្រលានយន្តហោះអន្តរជាតិ Western Sydney ដែលគ្រោងនឹងដាក់ឱ្យដំណើរការនៅឆ្នាំ២០២៦ ខាងមុខនេះ។ ព្រលានយន្តហោះថ្មីនេះ នឹងបង្កើនការតភ្ជាប់ដែលអាចបម្រើដល់អ្នកធ្វើដំណើរប្រមាណ១០លាននាក់ក្នុងមួយឆ្នាំ។

ឆ្លៀតក្នុងឱកាសនេះផងដែរ លោកស្រីរដ្ឋមន្រ្តីក្រសួងពាណិជ្ជកម្ម ក៏បានជួបពិភាក្សាការងារជាមួយលោកស្រី Alison Webster នាយកប្រតិបត្តិផ្នែកពាណិជ្ជកម្ម និងយុទ្ធសាស្រ្ត ដើម្បីសិក្សាស្វែងយល់បន្ថែមពីដំណើរការនៃការគ្រប់គ្រងព្រលានយន្តហោះដោយប្រើប្រាស់បច្ចេកវិទ្យា ការដឹកជញ្ជូនទំនិញតាមផ្លូវអាកាស ការផ្សព្វផ្សាយផលិតផលកម្ពុជា ព្រមទាំងការហោះហើរត្រង់កម្ពុជា-ស៊ីដនី ដើម្បីជំរុញដល់វិស័យធុរកិច្ចប្រទេសទាំងពីរឱ្យកាន់តែរីកចម្រើនបន្ថែមទៀតផងដែរ។

សូមជម្រាប់ដែរថា ពាក់ព័ន្ធនឹងការដឹកជញ្ជូនទំនិញតាមផ្លូវអាកាស គិតត្រឹមឆ្នាំ២០១៩  កន្លងទៅនេះ អាកាសយានដ្ឋានអន្តរជាតិភ្នំពេញ បានទទួលទំនិញចំនួន ៧៧,១៨១តោន ហើយទំហំនេះ បានបន្តកើនឡើងយ៉ាងឆាប់រហ័ស ក្នុងរយៈពេលមួយទសវត្សរ៍មកនេះ។នេះបើយោងតាមការបញ្ជាក់ពី លោក ស៊ីន ចាន់សិរីវុត្ថា អនុរដ្ឋលេខាធិការ និងអ្នកនាំពាក្យអាកាសចរណ៍ស៊ីវិល កាលពីពេលកន្លងទៅ៕ អត្ថបទ៖ ហ្សាលីន

The post កម្ពុជា-អូស្រ្តាលី បើកកិច្ចពិភាក្សាគ្នា ជំរុញការដឹកជញ្ជូនទំនិញតាមផ្លូវអាកាស appeared first on .

កិច្ចប្រជុំនេះ បានធ្វើឡើងកាលថ្ងៃ ទី១៨ ខែធ្នូ ឆ្នាំ២០២៤ ក្រោមអធិបតីដោយ លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា។កិច្ចប្រជុំនេះដែរ ក៏មានការចូលរួមពី លោកស្រី Bridget Collier ឯកអគ្គរដ្ឋទូតរងអូស្រា្តលីប្រចាំកម្ពុជា និងសហការី តំណាងកម្មវិធីភាពជាដៃគូកម្ពុជា អូស្ត្រាលី សម្រាប់ការអភិវឌ្ឍសេដ្ឋកិច្ចប្រកបដោយភាពធន់ (CAPRED) ព្រមទាំងថ្នាក់ដឹកនាំ និងមន្ត្រីជំនាញសរុបប្រមាណ ៤០រូប។

កិច្ចប្រជុំខាងលើនេះ ត្រូវបានរៀបចំឡើងក្នុងគោលបំណងដើម្បីពិភាក្សា និងសម្រេចជ្រើសរើសវិស័យអាទិភាពចម្បង សម្រាប់ការរៀបចំយុទ្ធសាស្រ្តជំរុញវិនិយោគ ក្រោមជំនួយបច្ចេកទេសរបស់អូស្រ្តាលី តាមរយៈកម្មវិធី CAPRED។ យុទ្ធសាស្ត្រជំរុញវិនិយោគ នឹងដាក់ចេញសកម្មភាពជាក់លាក់ដែលអាចអនុវត្តបាន ដោយផ្តោតជាចម្បងលើការកំណត់វិស័យអាទិភាព, ការគាំទ្រនិងកិច្ចសម្រួលដល់វិនិយោគិន, ព្រមទាំងការកំណត់គុណតម្លៃច្បាស់លាស់ក្នុងវិស័យអាទិភាពដែលបានកំណត់ ដើម្បីជំរុញទាក់ទាញវិនិយោគ និងទាញយកជាអតិបរមានូវកាលានុវត្តភាពពីនិន្នាការដែលបាននិងកំពុងលេចឡើងទាំងក្នុងតំបន់ និងសកល។

នាឱកាសនោះ លោក ស៊ុន ចាន់ថុល លោកក៏បានផ្ដល់នូវអនុសាសន៍ដល់កម្មវិធី CAPRED ឱ្យផ្តល់អាទិភាពស្វែងរកព័ត៌មានអំពីក្រុមហ៊ុនសក្ដានុពលដែលមានបំណងចង់ផ្លាស់ប្ដូរមូលដ្ឋានផលិតកម្មមកកាន់តំបន់អាស៊ាន ព្រមទាំងសិក្សាស៊ីជម្រៅលើយុទ្ធសាស្រ្តគាំទ្រដល់វិស័យកសិ-ឧស្សាហកម្មកម្ពុជា, និងសាកល្បងសិក្សាសមិទ្ធិលទ្ធភាពក្នុងការកំណត់យកវិស័យភស្ដុភារកម្ម ជាវិស័យអាទិភាពមួយបន្ថែមទៀតសម្រាប់យុទ្ធសាស្ត្រជំរុញវិនិយោគរយៈពេល៣ឆ្នាំផងដែរ។

ជាមួយគ្នានេះ លោកស្រីឯកអគ្គរដ្ឋទូតរងអូស្រ្តាលី  ក៏មានក្តីសង្ឃឹមថា យុទ្ធសាស្រ្តវិនិយោគរយៈពេល៣ឆ្នាំ នឹងក្លាយឯកសារផ្ទៃក្នុងយ៉ាងសំខាន់សម្រាប់ក្រុមប្រឹក្សាអភិវឌ្ឍន៍កម្ពុជា អាចតម្រង់ទិសការទាក់ទាញវិនិយោគដែលមានគុណភាព និងតម្លៃបន្ថែមខ្ពស់សម្រាប់កម្ពុជា៕ អត្ថបទ៖ ហ្សាលីន

The post កម្ពុជា-អូស្រ្តាលី បើកកិច្ចពិភាក្សារៀបចំយុទ្ធសាស្ត្រ ជំរុញការវិនិយោគលើវិស័យអាទិភាព appeared first on .

ស្ថានទូតអូស្រ្តាលីប្រចាំកម្ពុជា បានឱ្យបញ្ជាក់ថា «យើងមានមោទនភាពក្នុងការបន្តធ្វើការជាមួយកម្ពុជា ដើម្បីសម្រេចបាននូវលទ្ធភាពទទួលបានទឹកស្អាតជាសកលនៅឆ្នាំ ២០៣០។

តាមរយៈកម្មវិធី CAPRED របស់យើង យើងកំពុងគាំទ្រសន្និសីទ និងពិព័រណ៍ទឹកស្អាតកម្ពុជា លើកទី៥ ក្រោមភាពជាដៃគូជាមួយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ សមាគមអ្នកផ្គត់ផ្គង់ទឹកស្អាតកម្ពុជា និងសមាគមទឹកស្អាតអូស្ត្រាលី។»

ប្រធានបទឆ្នាំនេះ “ទឹកដើម្បីនិរន្តរភាពអនាគត” បានប្រមូលផ្តុំអ្នកចូលរួមជាង ៣០០ នាក់មកពីខាងរាជរដ្ឋាភិបាល វិស័យឯកជន និងដៃគូអភិវឌ្ឍន៍ នឹងបានពិភាក្សាការងារគ្នាអំពីបញ្ហាប្រឈម ក៏ដូចជាឱកាសក្នុងការពង្រីកលទ្ធភាពទទួលបានទឹកស្អាតប្រើប្រាស់ ជាពិសេសនៅតំបន់ជនបទ។

អូស្ត្រាលីបានអះអាងថា ខ្លួននៅតែប្តេជ្ញាជួយកម្ពុជាឱ្យសម្រេចបាននូវអនាគតមួយ ដែលទឹកស្អាតអាចប្រើប្រាស់បានសម្រាប់មនុស្សគ្រប់គ្នា។

The post អូស្ត្រាលីនៅតែបន្តគាំទ្រអនាគតទឹកស្អាតកម្ពុជា appeared first on .

ជំនួបពិភាក្សាការងារនេះ បានធ្វើឡើងរវាងលោក សុខ លូ អភិបាលខេត្តបាត់ដំបង និងឯកអគ្គរដ្ឋទូតអូស្រ្តាលីប្រចាំកម្ពុជា លោក ដេរិក យីប។នេះបើយោងតាមហ្វេសប៊ុកផ្លូវការរបស់ស្ថានទូត ដែលផ្សាយចេញនៅថ្ងៃទី១៧ ខែតុលា ឆ្នាំ២០២៤។

ស្ថានទូតអូស្រ្តាលី បានឱ្យដឹងថា នៅក្នុងជំនួបពិភាក្សានោះ ភាគីទាំងពីរបានពិភាក្សាការងារគ្នាលើប្រធានបទជាច្រើន រួមមាន នគរូបនីយកម្ម និងទីក្រុងវៃឆ្លាត ការវិនិយោគលើវិស័យកសិកម្ម ការកែច្នៃស្រូវ-អង្ករ វិស័យអប់រំ អាហារូបករណ៍ ការស្តារលទ្ធភាពពលកម្មកាយសម្បទា វិស័យទេសចរណ៍ កិច្ចសហប្រតិបត្តិការថ្នាក់ក្រោមជាតិ និងកេរ្តិ៍ដំណែលរបស់អធិរាជសម្លេងមាស ស៊ីន ស៊ីសាមុត។

ក្រៅពីពិភាក្សាលើចំនុចខាងលើ តាមរយៈជំនួបនេះដែរ អូស្ត្រាលី បានចាត់ទុកថា នេះគឺជាជំនួបស្វាគមន៍ដ៏កក់ក្តៅ និងប្រកបដោយផ្លែផ្កា ដែលបានគូសបញ្ជាក់ពីទំនាក់ទំនងដ៏រឹងមាំរវាងប្រទេសអូស្ត្រាលី និងកម្ពុជា។

សូមរម្លឹកដែរថា ក្នុងរយៈពេល ៨ខែ នៃឆ្នាំ២០២៤ កម្ពុជាបាននាំចេញអង្ករបានចំនួន ៤១២ ០២៣ តោន​ តាម   រយៈក្រុមហ៊ុននាំចេញអង្ករចំនួន ៥៣ ក្រុមហ៊ុន ទៅកាន់គោលដៅចំនួន ៦៥ ដែលក្នុងនោះទៅកាន់បណ្តាប្រទេសនៅក្នុងតំបន់អឺរ៉ុបចំនួន ​២៦ ​បានបរិមាណអង្ករចំនួន ២០៨ ២០៧ តោន គិតជាទឹកប្រាក់ចំនួន ១៦១.៧០ លានដុល្លារសហរដ្ឋអាមេរិក  ទៅកាន់ប្រទេសចិន ​រួមទាំងហុងកុង និងម៉ាកាវ ចំនួន ៧៧ ៧៩២ តោន គិតជាទឹកប្រាក់ចំនួន ៤៨.៨៧ លានដុល្លារសហរដ្ឋអាមេរិក ទៅកាន់ប្រទេសក្នុងអាស៊ាន រួមទាំងទីម័រខាងកើត ចំនួន ៧ប្រទេសបានបរិមាណ ចំនួន ៨៣ ០៩៥ តោន​ គិតជាទឹកប្រាក់ចំនួន ៥៦.៨៩ លានដុល្លារសហរដ្ឋអាមេរិក និងទៅកាន់គោលដៅ  ២៨ប្រទេសផ្សេងទៀតមាន អាហ្វ្រិក មជ្ឈឹមបូព៌ា អាមេរិក កាណាដា អូស្ត្រាលី ញ៉ូហ្សេឡេន ។ល។ បានចំនួន   ៤២ ៩២៩ តោន គិតជាទឹកប្រាក់ចំនួន  ៣៧.៦៩ លានដុល្លារសហរដ្ឋអាមេរិក។នេះបើយោងតាមរបាយការណ៍របាយការណ៍របស់សហព័ន្ធស្រូវអង្ករកម្ពុជា កាលពីពេលថ្មីៗនេះ៕ អត្ថបទ៖ ហ្សាលីន

The post កម្ពុជា-អូស្រ្តាលី បើកកិច្ចពិភាក្សាគ្នា ជំរុញការវិនិយោគលើវិស័យកសិកម្ម និងការកែច្នៃស្រូវ-អង្ករ appeared first on .

យោងតាមសេចក្តីប្រកាសព័ត៌មាន របស់ក្រសួងការបរទេស បានឱ្យដឹងថា កិច្ចប្រជុំខាងលើនេះ ធ្វើឡើងក្រោមវត្តមានលោក ប្រាក់ ងួនហុង រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ កម្ពុជា និងលោកស្រី មីឆេល ចាន់ អនុរដ្ឋលេខាធិការក្រសួងការបរទេស និងពាណិជ្ជកម្មអូស្ត្រាលី កាលថ្ងៃទី៤ ខែមេសា ឆ្នាំ២០២៤ កន្លងទៅនេះ។

សេចក្តីប្រកាសដដែល បានបញ្ជាក់ថា ក្នុងកិច្ចពិគ្រោះយោបល់ថ្នាក់ឧត្តមមន្ត្រី លើកទី៤ខាងលើ ភាគីកម្ពុជា បានកោតសរសើររដ្ឋាភិបាលអូស្ត្រាលី សម្រាប់ភាពជាដៃគូអភិវឌ្ឍន៍ដ៏សំខាន់ និងសកម្ម ដែលបានចូលរួមចំណែកយ៉ាងសំខាន់ដល់ការអភិវឌ្ឍសង្គម-សេដ្ឋកិច្ចកម្ពុជា។

ជាក់ស្តែង ក្នុងរយៈពេលបីទសវត្សរ៍កន្លងមកនេះ រដ្ឋាភិបាលអូស្ត្រាលី បានផ្ដល់ជំនួយអភិវឌ្ឍន៍ ផ្លូវការដល់កម្ពុជា ដែលមានទឹកប្រាក់ជាង ១ ប៊ីលានដុល្លារអាមេរិក គាំទ្រដល់វិស័យអាទិភាពដូចជា អប់រំ ពាណិជ្ជកម្ម កសិកម្ម សុខាភិបាល ហេដ្ឋារចនាសម្ព័ន្ធ យេនឌ័រ អភិបាលកិច្ច ការប្រែប្រួល អាកាសធាតុ និងការបោសសម្អាតមីន។

គួរបញ្ជាក់ថា តាមរយៈសេចក្តីប្រកាសនោះ ភាគីអូស្ត្រាលី ក៏បានគូសបញ្ជាក់ពីបំណង ចង់ឱ្យមានភាពជា ដៃគូទំនើប និងចាស់ទុំ ដើម្បីឆ្លើយតបនឹងបញ្ហាប្រឈមនាពេលបច្ចុប្បន្ន និងគូសបញ្ជាក់ពីការរៀបចំ សេចក្តីព្រាងផែនការភាពជាដៃគូអភិវឌ្ឍន៍សម្រាប់កម្ពុជា ឆ្នាំ២០២៤-២០២៨ ដែលផែនការនេះ ស្របតាម គោលនយោបាយអភិវឌ្ឍន៍អន្តរជាតិថ្មីរបស់អូស្ត្រាលី និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជា៕

The post ៣០ឆ្នាំមកនេះ៖ អូស្ត្រាលី បានផ្តល់ជំនួយជាង១ ប៊ីលានដុល្លារ ជួយអភិវឌ្ឍន៍វិស័យអាទិភាពនៅកម្ពុជា appeared first on .

ក្នុងជំនួបពិភាក្សាការងារនាព្រឹកថ្ងៃចន្ទ ខែមករានេះ នៅវិមានសន្តិភាពលោក ចាស្ទីន ខេវិន វ៉ាយអេត (Justin Kevin Whyatt) ឯកអគ្គរដ្ឋទូតអូស្ត្រាលីប្រចាំកម្ពុជា បានបញ្ជាក់នូវការបេ្តជ្ញាចិត្តរបស់រដ្ឋាភិបាលអូស្ត្រាលី ក្នុងការបន្តពង្រឹងកិច្ចសហប្រតិបត្តិការរវាងកម្ពុជា-អូស្ត្រាលី ឱ្យកាន់តែរីកចម្រើនខ្លាំងក្លា លើគ្រប់វិស័យ បន្ថែមទៀត ជាពិសេសលើវិស័យសេដ្ឋកិច្ច វិនិយោគ ពាណិជ្ជកម្ម សុខាភិបាល អប់រំ កសិកម្ម បរិស្ថាន ការប្រែប្រួលអាកាសធាតុ និងការកសាងសមត្ថភាពក្នុងវិស័យការពារជាតិ។

ក្នុងជំនួបនោះ សម្តេចធិបតី បានវាយតម្លៃខ្ពស់ចំពោះការគាំទ្រ និងជំនួយរបស់អូស្ត្រាលីក្នុងការអភិវឌ្ឍសង្គម-សេដ្ឋកិច្ចកម្ពុជា ចាប់តាំងពីដំណើរការនៃការស្វែងរកនូវសុខសន្តិភាពរហូតដល់ពេលបច្ចុប្បន្ននេះ។

ទន្ទឹមនឹងនេះ សម្ដេចធិបតី ក៏បានបញ្ជាក់ប្រាប់ឯកអគ្គរដ្ឋទូតអំពីគោលនយោបាយយុទ្ធសាស្ត្របញ្ចកោណ-ដំណាក់កាលទី១ របស់រាជរដ្ឋាភិបាលកម្ពុជា ជាពិសេសភាពទាក់ទាញនៃច្បាប់ស្តីពីវិនិយោគកម្ពុជា និងគោលនយោបាយលើកទឹកចិត្តសម្រាប់វិនិយោគិន និងធុរជន ដែលធានាបាននូវភាពអាចព្យាករណ៍បាន និងភាពប្រាកដនិយមចំពោះបរិយាកាសវិនិយោគប្រកបដោយភាពអនុគ្រោះនៅកម្ពុជា។

លើសពីនេះ សម្តេចធិបតីនាយករដ្ឋមន្រ្តី និងឯកអគ្គរដ្ឋទូតអូស្រ្តាលី ក៏បានពិភាក្សាលើការងារមួយចំនួនពាក់ព័ន្ធទៅនឹងបញ្ហាក្នុងតំបន់ និងអន្តរជាតិ ដើម្បីជាផលប្រយោជន៍រួមរវាងកម្ពុជា-អូស្រ្តាលី ដែលទាំងកម្ពុជា និងអូស្រា្តលីអាចនឹងបង្កើន និងពង្រឹងនូវតួនាទីរបស់ខ្លួននៅក្នុងវេទិកាតំបន់ និងសកល ផងដែរ។

ទំហំពាណិជ្ជកម្មកម្ពុជា- អូស្រ្តាលីកើនឡើងពីចំនួន ២០៥លានដុល្លារអាមេរិក ក្នុងឆ្នាំ២០១៩ រហូតដល់ ៥២៣លានដុល្លារអាមេរិក ក្នុងឆ្នាំ២០២២។ ដោយឡែកក្នុងរយៈពេល៧ខែ ក្នុងឆ្នាំ២០២៣កន្លងទៅ ទំហំពាណិជ្ជកម្មរវាងប្រទេសទាំងពីរសម្រេចបានជាង២៩៥លានដុល្លារ ថយចុះជាង៧ភាគរយ បើធៀបនឹងរយៈពេលដូចគ្នាក្នុងឆ្នាំ២០២២។

ជាមួយគ្នានេះ សភាពាណិជ្ជកម្មកម្ពុជា និងសភាពាណិជ្ជកម្មរដ្ឋវិចតូរៀ ក៏គ្រោងនឹងរៀបចំវេទិកាធុរកិច្ចកម្ពុជា-អូស្រ្តាលី នៅក្នុងខែមីនា ឆ្នាំ២០២៤ខាងមុខនេះ ពោលគឺស្របពេល នៃការរៀបចំកិច្ចប្រជុំកំពូល អាស៊ាន-អូស្រ្តាលី នៅទីក្រុងមែលប៊ន ដើម្បីជំរុញកិច្ចសហប្រតិបត្តិការបន្ថែមទៀតរវាងកម្ពុជា និងអូស្រ្តាលី។ នេះបើតាមមន្រ្តីជាន់ខ្ពស់សភាពាណិជ្ជកម្មកម្ពុជា៕

The post ទូតអូស្ត្រាលី ប្តេជ្ញាលើកកម្ពស់វិស័យសេដ្ឋកិច្ច វិនិយោគ ពាណិជ្ជកម្មឱ្យកាន់តែរីកចម្រើនខ្លាំងក្លាជាមួយកម្ពុជា appeared first on .