ក្រសួងពាណិជ្ជកម្ម បានឱ្យដឹងថា នៅក្នុងជំនួបពិភាក្សាខាងលើ ភាគីទាំងពីរបានពិភាក្សាការងារមួយចំនួនទៀត សំដៅជំរុញ និងរឹតចំណងទំនាក់ទំនងទ្វេភាគី ក៏ដូចជាបង្កើនទំហំពាណិជ្ជកម្មទ្វេភាគីកម្ពុជា-ឥណ្ឌាឱ្យកាន់តែរីកចម្រើនបន្ថែមទៀត។

ទន្ទឹមគ្នានេះ ភាគីទាំងពីរ ក៏បានលើកឡើងអំពីការកំណត់ទិសដៅអាទិភាព ក្នុងការពង្រឹងទំនាក់ទំនងទ្វេភាគីទៅវិញទៅមករវាងវិស័យឯកជននៃប្រទេសទាំងពីរ និងមានភាពប្រទាក់ក្រឡាគ្នាក្នុងវិស័យសក្តានុពល ព្រមទាំងកិច្ចសហការរវាងរដ្ឋាភិបាលនិងរដ្ឋាភិបាល វិស័យឯកជននិងវិស័យឯកជន ពាក់ព័ន្ធនឹងការធ្វើពាណិជ្ជកម្មនិងវិនិយោគលើវិស័យកសិកម្ម កសិ-ឧស្សាហកម្មនិងកែច្នៃ ឱសថ ឌីជីថល វិទ្យាសាស្ត្រ និងបច្ចេកវិទ្យាការបើកច្រកទីផ្សារទ្វេភាគី និងតំបន់ ជាពិសេសទីផ្សារអាស៊ាន ជាដើម។

តាមរយៈកិច្ចពិភាក្សាខាងលើនេះដែរ ក្រសួងពាណិជ្ជកម្មកម្ពុជា និងស្ថានទូតឥណ្ឌា ក៏បានជជែកពិភាក្សាលើយន្តការទ្វេភាគី និងតំបន់ដែលមានស្រាប់ ក្នុងការជំរុញយន្តការនេះឱ្យមានសកម្មភាពកាន់តែផុសផុល និងមានផ្លែផ្កាកាន់តែល្អប្រសើរឡើងថែមទៀតផងដែរ។

សូមរម្លឹកដែរថា នៅក្នុងជំនួបពិភាក្សាការងាររវាង សម្ដេចតេជោ ហ៊ុន សែន និងឯកអគ្គរដ្ឋទូតរបស់ឥណ្ឌា កាលថ្ងៃទី១៣ ខែមីនា ឆ្នាំ២០២៥ កន្លងទៅនេះ បានឱ្យដឹងថា ទំនាក់ទំនងលើវិស័យពាណិជ្ជកម្មកម្ពុជា និងឥណ្ឌា មានការកើនឡើង ប៉ុន្ដែកំណើននេះមិនទាន់ឆ្លើយតបចំពោះសក្ដានុពលសេដ្ឋកិច្ចរវាងប្រទេសទាំងពីរនោះទេ ពោលមានចំនួនត្រឹមជាង៣៤០លានដុល្លារប៉ុណ្ណោះ។ សម្ដេចតេជោចង់ឃើញទំនាក់ទំនងផ្នែកពាណិជ្ជកម្ម និងវិនិយោគមានកំណើនបន្ថែមទៀត ឱ្យស្របទៅនឹងសក្ដានុពលរបស់ប្រទេសទាំងពីរបច្ចុប្បន្ននេះ៕អត្ថបទ៖ហ្សាលីន

The post កម្ពុជា-ឥណ្ឌា ប្តេជ្ញារួមគ្នាបង្កើនទំហំពាណិជ្ជកម្ម ដើម្បីជំរុញ និងរឹតចំណងទំនាក់ទំនងទ្វេភាគី appeared first on .

តាមរយៈជំនួបរវាង លោក ហួត ហាក់ រដ្ឋមន្រ្តីក្រសួងទេសចរណ៍ ជាមួយ លោក Rajiv Raj Jagasia ស្ថាបនិកស្ថាប័នឥណ្ឌា Diplomacy for Good Foundation កាលពីថ្ងៃទី២០ ខែមករា ឆ្នាំ២០២៦ បានឱ្យដឹងថា សប្បុរសជនឥណ្ឌាមានបំណងស្នើសុំការគាំទ្រពីក្រសួងទេសចរណ៍លើគម្រោងសាងសង់រូបសំណាកព្រះវិស្ណុកម្ពុជា-ឥណ្ឌានៅកម្ពុជា តាមរយៈជំនួយគំាទ្រពីសប្បុរសជនឥណ្ឌា ដោយហេតុថាស្រលាញ់វប្បធម៌ប្រពៃណីរបស់កម្ពុជា និងប្រទេសកម្ពុជា។

លោក ហួត ហាក់ បានវាយតម្លៃខ្ពស់ និងថ្លែងអំណរគុណដល់ស្ថាប័ន Diplomacy for Good Foundation និងសប្បុរសជនឥណ្ឌាទាំងអស់ដែលបានលើកនូវគំនិតផ្តួចផ្តើមដ៏ល្អនេះ និងការទាក់ទាញកំណើនភ្ញៀវទេសចរឥណ្ឌាមកទស្សនានៅកម្ពុជា តាមរយៈសកម្មភាពការទូតទេសចរណ៍ និងវប្បធម៌ ដែលប្រទេសកម្ពុជា និងឥណ្ឌាមានចំណងការទូតជាង៧៤ឆ្នាំមកហើយ ព្រមទាំងជាបងប្អូនរួមវប្បធម៌ និងអរិយធម៌ជាងពាន់ឆ្នាំមកហើយ។

លោកក៏ស្នើលោក Rajiv Raj Jagasia និងស្ថាប័ន Diplomacy for Good Foundation បន្តជួយផ្សព្វផ្សាយពីសភាពការណ៍ពិត កត្តាសុខសន្តិភាព សន្តិសុខល្អប្រសើរ ការអភិវឌ្ឍលើគ្រប់វិស័យ វត្តមានភ្ញៀវទេសចរឥណ្ឌាដែលកំពុងកើនឡើងមកកម្ពុជានាពេលនេះដល់ប្រជាជនឥណ្ឌា ដើម្បីមកទស្សនាកម្ពុជាឱ្យកើនឡើងបន្ថែមទៀត។

សូមបញ្ជាក់ដែរថា តាមរយៈជំនួបខាងលើ លោក Rajiv Raj Jagasia ក៏បាននាំយកអំណោយសប្បុរសធម៌ ជាអង្ករ ចំនួន ២តោន តាមរយៈក្រសួងទេសចរណ៍ ដើម្បីបន្តផ្តល់ជូនដល់វីរកងទ័ពដ៏អង់អាចក្លាហាន និងបងប្អូនប្រជាពលរដ្ឋភៀសសឹក ដែលជាទឹកចិត្តដ៏ធំធេងបានបង្ហាញនូវការគោរពស្រឡាញ់ ផ្តល់កម្លាំងចិត្តដល់វីរភាពកងទ័ពការពារជាតិរបស់យើង និងជាគាំទ្រវីរកងទ័ពជួរមុខកម្ពុជាដ៏អង់អាចក្លាហាន ក្នុងន័យបង្ហាញពីខឿនការពារជាតិដ៏រឹងមាំផងដែរ៕

The post សប្បុរសជនឥណ្ឌា ស្នើសុំកម្ពុជាសាងសង់រូបសំណាកព្រះវិស្ណុកម្ពុជា-ឥណ្ឌា នៅកម្ពុជា appeared first on .

លោក ហួត ហាក់ រដ្ឋមន្រ្តីក្រសួងទេសចរណ៍ នាថ្ងៃទី១២ ខែវិច្ឆិកានេះ បានបញ្ជាក់ថា «ការដឹកនាំតម្រង់ទិសដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា, និងកិច្ចខិតខំប្រឹងប្រែងរបស់ក្រសួងទេសចរណ៍ សហការជាមួយក្រសួង ស្ថាប័នពាក់ព័ន្ធ,គួបផ្សំជាមួយចំណងការទូតជិតស្និទ្ធជាមួយប្រទេសឥណ្ឌា ក្រុមហ៊ុនអាកាសចរណ៍ឥណ្ឌា នឹងភ្ជាប់ជើងហោះហើរត្រង់ពី Kolkata សាធារណរដ្ឋឥណ្ឌា មកកាន់ខេត្តសៀមរាប ព្រះរាជាណាចក្រកម្ពុជា ចាប់ពីថ្ងៃទី១៣ ខែវិច្ឆិកា ឆ្នាំ២០២៥ ខាងមុខនេះ»។

គួរឱ្យដឹងថា ជាលើកដំបូងគេដែលក្រុមហ៊ុនអាកាសចរណ៍ឥណ្ឌា IndiGo  តភ្ជាប់ជើងហើរត្រង់ជាមួយកម្ពុជា។ តាមផែនការក្រុមហ៊ុននេះគ្រោងហោះហើរ៣ជើងក្នុងមួយសប្តាហ៍ ដោយប្រើយន្តហោះ Airbus A320 បន្ទាប់ពីក្រុមហ៊ុនអាកាសចរណ៍ធំមួយនេះបានពន្យារពេលម្ដងហើយម្ដងទៀត៕

The post ក្រុមហ៊ុនអាកាសចរណ៍ឥណ្ឌា នឹងភ្ជាប់ជើងហោះហើរត្រង់ពី Kolkata មកកាន់ខេត្តសៀមរាប ចាប់ពីស្អែកតទៅ appeared first on .

ថ្លែងប្រាប់អ្នកសារព័ត៌មាន លោក ឃឹម ហ្វីណង់ បានឱ្យដឹងថា ឥណ្ឌាចង់ពិនិត្យមើលលទ្ធភាពពាក់ព័ន្ធនឹងការនាំចេញអង្ករ កម្ពុជាកំពុងសិក្សាពីលទ្ធភាពនៃការនាំចេញស្វាយចន្ទីនិងការនាំចេញអង្ករ គ្រឿងទេសមួយចំនួនទៀតដូចជាម្សៅល្មៀតជាដើម។

លោកបន្តថា នេះជាឱកាសប៉ុន្តែក្នុងចំណោមឱកាសដែលយើងពិនិត្យមើលទាំងអស់ ឱកាសធំជាងគេពាក់ព័ន្ធស្វាយចន្ទី ដោយសារឥណ្ឌាជាប្រទេសផលិតស្វាយចន្ទីច្រើនជាងគេមួយនៅលើពិភពលោក ហើយឥណ្ឌាក៏ជាអ្នកនាំចូលស្វាយចន្ទីធំជាងគេនៅលើពិភពលោកផងដែរ។ បច្ចុប្បន្ននេះឥណ្ឌានាំចូលស្វាយចន្ទីជាច្រើនពីប្រទេសអាហ្វ្រិក ដូច្នេះលទ្ធភាពធំណាស់សម្រាប់ប្រទេសកម្ពុជាដែលយើងមានស្វាយចន្ទីប្រហែលជា១លានតោនក្នុងមួយឆ្នាំ។

លោកបន្ថែមថា កន្លងមកទីផ្សាររបស់យើងមានច្រើន ហើយយើងមិនទាន់មានច្រើនពីប្រទេសឥណ្ឌាទេ ដោយសារឥណ្ឌានាំចូលច្រើន។ លោកថា បើការងារនេះអាចធ្វើទៅបានវានឹងផ្តល់ជាប្រយោជន៍សម្រាប់កសិកររបស់យើងជាពិសេសអ្នកមានចំការស្វាយចន្ទី។

លោក ឃឹម ហ្វីណង់ បានគូសបញ្ជាក់ថា អ្វីដែលយើងធ្វើមិនទាន់បានល្អនៅឡើយគឺយើងមិនទាន់បានកែច្នៃមុនធ្វើការនាំចេញ ដែលធ្វើឱ្យសេដ្ឋកិច្ចជាតិមិនអាចទទួលបានតម្លៃបន្ថែមច្រើន។ តែទោះបីជាយ៉ាងណា រាជរដ្ឋាភិបាលជាពិសេសសម្តេចធិបតីបានជំរុញការកែច្នៃស្វាយចន្ទីតាមរយៈការគម្រោងដាក់ឱ្យមាននូវកសិឧស្សាហកម្មស្វាយចន្ទី ដោយយកខេត្តកំពង់ធំប្រែឱ្យក្លាយជាសួនឧស្សាហកម្មស្វាយចន្ទីដំធំចំណុចកណ្តាលរបស់កម្ពុជា ដែលអាចឱ្យកម្ពុជាឈានទៅប្រែក្លាយជាប្រទេសអធិរាជស្វាយចន្ទីនាពេលខាងមុខ៕

The post ឥណ្ឌាចង់នាំចេញគ្រាប់ស្វាយចន្ទីពីប្រទេសកម្ពុជាទៅកាន់ប្រទេសខ្លួន ស្របពេលដែលឥណ្ឌាមានតម្រូវការនាំចូលគ្រាប់ស្វាយចន្ទីក្នុងបរិមាណធំ appeared first on .

ការស្នើរបស់សម្ដេចតេជោ ហ៊ុន សែន ក្នុងឱកាសសម្តេចអនុញ្ញាតឱ្យលោក Pabitra Margherita អនុរដ្ឋមន្រ្តីការបរទេសនៃសាធារណរដ្ឋឥណ្ឌា ចូលជួបសម្តែងការគួរសម នាថ្ងៃទី៧ ខែកក្កដា ឆ្នាំ២០២៥ នៅវិមានព្រឹទ្ធសភា។

ក្នុងជំនួបនោះ លោកអនុរដ្ឋមន្រ្តី បានលើកឡើងថា ទំនាក់ទំនងរវាងកម្ពុជា និងឥណ្ឌា មានអាយុកាលរាប់សតវត្ស មានកេរដំណែលដូចគ្នា វប្បធម៌ផ្សាភ្ជាប់គ្នា និងឈរជាមួយគ្នា។ នៅក្នុងន័យនេះ លោកអនុរដ្ឋមន្រ្តី មានក្តីសង្ឃឹមខ្ពស់ ដែលទំនាក់ទំនងរវាងកម្ពុជា និងឥណ្ឌា នឹងកើនដល់កម្រិតមួយថ្មីទៀត ជាពិសេស តាមរយៈគម្រោងទស្សនកិច្ចរបស់នាយករដ្ឋមន្រ្តីម៉ូឌី នៅកម្ពុជា នាពេលខាងមុខ។  

ជាមួយគ្នានោះ លោកអនុរដ្ឋមន្រ្តី ក៏បានជម្រាបជូនអំពីកិច្ចសហប្រតិបត្តិការទ្វេភាគីកម្ពុជា-ឥណ្ឌា លើវិស័យនានា ចាប់តាំងពីវិស័យការពារជាតិ ការអភិវឌ្ឍនិងបណ្តុះបណ្តាលធនធានមនុស្ស, ការដោះមីន ហើយនិងការអភិរក្សនិងការជួសជុលឡើងវិញនូវប្រាសាទនានា។

ជាការឆ្លើយតប សម្តេចតេជោបានបញ្ជាក់ថា ឥណ្ឌាជាប្រទេសប្រជាធិបតេយ្យទី១ ដែលបានទទួលស្គាល់កម្ពុជាមុនគេ នៅឆ្នាំ១៩៨១ ហើយឥណ្ឌាក៏បានផ្តល់ជំនួយឧបត្ថម្ភនានា រួមទាំងស្បៀងអាហារ នៅពេលកម្ពុជាជួបប្រទះការខ្វះខាតនៅដំណាក់កាលនោះ និងការឧបត្ថម្ភគាំទ្រជាបន្តបន្ទាប់ រួមទាំងការជួយអភិវឌ្ឍធនធានមនុស្ស តាមរយៈការផ្តល់វគ្គបណ្តុះបណ្តាលនានា និងការបញ្ជូនអ្នកបច្ចេកទេសមកជួយជួសជុលប្រាសាទ។

ក្រៅពីកិច្ចសហប្រតិបត្តិការលើវិស័យទាំងនេះ សម្តេចបានលើកបន្ថែមថា ទំនាក់ទំនងរវាងកម្ពុជា និងឥណ្ឌា មានសក្តានុពលជាច្រើនទៀត។ ជាក់ស្តែង ទោះបីទំហំពាណិជ្ជកម្មរវាងប្រទេសទាំងពីរមានការកើនឡើង តែពុំទាន់សមស្របទៅនឹងសក្តានុពលដែលប្រទេសទាំងពីរមាននោះឡើយ ដោយឥណ្ឌាមានប្រជាជនច្រើន និងទីផ្សារធំ ចំណែកកម្ពុជាក៏មានកម្លាំងទិញធំដែរ។ នៅក្នុងបរិបទនេះ សម្តេចបានលើកឡើងជាអនុសាសន៍ឱ្យប្រទេសទាំងពីរ ត្រូវយកចិត្តទុកដាក់ផ្តោតទៅលើកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគ ដើម្បីបម្រើជាជន្ទល់ដល់ទំនាក់ទំនងយោបាយ។

ឆ្លៀតក្នុងឱកាសនោះ សម្តេចតេជោបានស្នើឱ្យអ្នកវិនិយោគឥណ្ឌា ពិចារណាបោះទុនវិនិយោគលើការកែច្នៃវត្ថុធាតុដើមផលិតផលកសិកម្មរបស់កម្ពុជា ដូចជាដំឡូងមី និងជាពិសេសគ្រាប់ស្វាយចន្ទី ដែលឥណ្ឌា កំពុងដើរតួនាទីជាប្រទេសចែកចាយនៅលើទីផ្សារពិភពលោក ប៉ុន្តែពុំមានការផ្គត់ផ្គង់គ្រប់គ្រាន់។ សម្តេចបានបន្តលើកឡើងថា លក្ខខណ្ឌនេះនឹងធ្វើឱ្យសេដ្ឋកិច្ចរវាងកម្ពុជា និងឥណ្ឌា មានលក្ខណៈបំពេញបន្ថែមឱ្យគ្នាទៅវិញទៅមក។

ជុំវិញការស្នើរបស់សម្តេចទៅអ្នកវិនិយោគឥណ្ឌាលើផលិតផលកសិកម្ម ពិសេសគ្រាប់ស្វាយចន្ទី បើគិតត្រឹមឆ្នាំ២០២៤ កម្ពុជាមានផ្ទៃដីដាំដុះដំណាំស្វាយចន្ទីសរុប ៥៨០ ១១៧ ហិកតា និងអាចមានសក្ដានុពលផលិតកម្មប្រមាណ ៨១៦ ៤៥៩ តោនក្នុងមួយឆ្នាំ។តាមតួលេខនេះ កម្ពុជាឈរក្នុងចំណោមប្រទេសចំនួន៣ ដែលផលិតស្វាយចន្ទីច្រើនជាងគេនៅលើពិភពលោក។

ថ្មីៗនេះរាជរដ្ឋាភិបាល ក៏បានបញ្ជាក់ថា នឹងប្រែក្លាយខេត្តកំពង់ធំជា សួនឧស្សាហកម្មស្វាយចន្ទីដំធំចំណុចកណ្តាលរបស់កម្ពុជា ដែលអាចឱ្យកម្ពុជាឈានទៅប្រែក្លាយជាប្រទេសអធិរាជស្វាយចន្ទីនាពេលខាងមុខផងដែរ៕

The post សម្តេចតេជោ ស្នើអ្នកវិនិយោគឥណ្ឌាបោះទុនវិនិយោគលើការកែច្នៃវត្ថុធាតុដើមផលិតផលកសិកម្មកម្ពុជា ពិសេសគ្រាប់ស្វាយចន្ទី appeared first on .

នាឱកាសនោះ លោក Vanlalvawna Bawitlung ថា ការអភិវឌ្ឍន៍ជនបទនៅក្នុងប្រទេសទាំងពីរមានសភាពប្រហាក់ប្រហែលគ្នាដោយបច្ចុប្បន្នប្រជាជនឥណ្ឌាប្រមាណ ៥០% គឺរស់នៅតំបន់ជនបទ។ មួយវិញទៀតរដ្ឋាភិបាលឥណ្ឌាក៏បានកំណត់ចក្ខុវិស័យរបស់ខ្លួនប្រែក្លាយប្រទេសឥណ្ឌាជាប្រទេសអភិវឌ្ឍន៍ក្នុងឆ្នាំ ២០៤៧ ផងដែរ។

ជាមួយគ្នានេះ លោកបានសង្កត់ធ្ងន់ថា ឥណ្ឌា និងបន្តគាំទ្រ ក៏ដូចជាពង្រឹងកិច្ចសហប្រតិបត្តិការបន្ថែមទៀតជាមួយក្រសួងអភិវឌ្ឍន៍ជនបទតាមរយៈការផ្តល់ជាជំនួយផ្សេងៗបន្ថែមទៀត និងការផ្តល់ជាវគ្គបណ្តុះបណ្តាលពិសេស លើជំនាញអភិវឌ្ឍន៍ជនបទជូនដល់មន្ត្រីក្រសួងអភិវឌ្ឍន៍ជនបទជាដើម។

ជាការឆ្លើយតប លោករដ្ឋមន្ត្រី ឆាយ ឫទ្ធិសែន បានលើកឡើងថា ប្រទេសឥណ្ឌាជាប្រទេសមួយដែលមានក្រសួងអភិវឌ្ឍន៍ជនបទដាច់ដោយឡែក ដូចប្រទេសកម្ពុជាដែរ ដូចនេះលោកក៏ស្នើទូតឥណ្ឌាពង្រឹងកិច្ចសហប្រតិបត្តិការរវាងក្រសួងអភិវឌ្ឍន៍នៃប្រទេសទាំងពីរ ក្នុងការចែករំលែកនៅបទពិសោធន៍រវាងគ្នាក្នុងការរៀបចំ និងអភិវឌ្ឍន៍នៅតំបន់ជនបទផងដែរ។

បន្ថែមពីនេះ លោក ក៏បានថ្លែងអំណរគុណឯកអគ្គរដ្ឋទូត ដែលប្តេជ្ញាពង្រឹងកិច្ចសហប្រតិបត្តិការជាមួយក្រសួងអភិវឌ្ឍន៍ឱ្យកាន់តែមានភាពរឹងមាំបន្តទៅទៀត។

បើតាមក្រសួងអភិវឌ្ឍន៍ជនបទ បានឱ្យដឹងថា ប្រទេសឥណ្ឌា បានផ្តល់ជាជំនួយតាមរយៈក្រសួងអភិវឌ្ឍន៍ជនបទមានដូចជាគម្រោងអភិវឌ្ឍន៍សហគមន៍ចម្រុះតាមរយៈទឹកស្អាត អនាម័យ និងការបណ្តុះបណ្តាលវិជ្ជាជីវៈ, គម្រោងលុបបំបាត់សារធាតុអាសេនិច ពីទឹកបរិភោគនៅជុំវិញបឹងទន្លេសាប, គម្រោងការការពារបរិស្ថានតាមរយៈ ការលុបបំបាត់សារធាតុបំពុល ក៏ដូចជាការផ្តល់ជាវគ្គបណ្តុះបណ្តាលនានាជូនដល់មន្ត្រីរបស់ក្រសួងអភិវឌ្ឍន៍ផងដែរ៕អត្ថបទ៖ ហ្សាលីន

The post ឥណ្ឌា នឹងបន្តគាំទ្រកម្ពុជា តាមរយៈជំនួយ និងបណ្តុះបណ្តាលជំនាញអភិវឌ្ឍន៍ជនបទជូនដល់មន្ត្រី appeared first on .

ក្នុងឱកាសនៃជំនួបនេះ ឯកអគ្គរដ្ឋទូតឥណ្ឌា បានបង្ហាញក្តីរីករាយ ដែលត្រូវបានតែងតាំងជា ឯកអគ្គរដ្ឋទូតឥណ្ឌាប្រចាំព្រះរាជាណាចក្រកម្ពុជា ខណៈលោកក៏បានវាយតម្លៃខ្ពស់ចំពោះទំនាក់ទំនងយូរអង្វែងរវាងឥណ្ឌា និងកម្ពុជា ព្រមទាំងបានធ្វើការកត់សម្គាល់អំពីវឌ្ឍនភាពថ្មីៗ នៃការរីកចម្រើនទាំងសេដ្ឋកិច្ច និងសង្គមរបស់កម្ពុជា ក្នុងរយៈពេលប៉ុន្មានឆ្នាំចុងក្រោយនេះ។

ទន្ទឹមគ្នានេះ លោកថា តាមរយៈទំនាក់ទំនងការទូតជាច្រើនទសវត្សរ៍ និងភាពរីកចម្រើននៃកិច្ចសហប្រតិបត្តិការក្នុងវិស័យនានា ឯកអគ្គរដ្ឋទូតបានគូសបញ្ជាក់ថា ទំនាក់ទំនងឥណ្ឌា-កម្ពុជា គួរត្រូវបានលើកកម្រិតកាន់ឱ្យតែខ្ពស់ថែមទៀត។

ជាការឆ្លើយតប លោកឧបនាយករដ្ឋមន្ត្រី ស៊ុន ចាន់ថុល បានស្វាគមន៍ការអញ្ជើញមកបំពេញបេសកកម្មការទូតនៅកម្ពុជា។លោកថា កម្ពុជា-ឥណ្ឌា នៅមានវិស័យសក្ដានុពលជាច្រើនទៀត ដែលជាឱកាសនៃការពង្រីកកិច្ចសហប្រតិបត្តិការ ដើម្បីជាផលប្រយោជន៍ដល់ប្រទេសទាំងពីរ ជាអាទិ៍រួមមាន៖ វិស័យព័ត៌មានវិទ្យា, បច្ចេកវិទ្យាឌីជីថល, អេឡិចត្រូនិក និងការកែច្នៃចំណីអាហារ។

ឆ្លៀតឱកាសនោះ លោក ក៏បានលើកឡើងអំពីការពិនិត្យលទ្ធភាពនិងឱកាស ក្នុងការរៀបចំបេសកកម្មទាក់ទាញ និងជំរុញវិនិយោគ (Investment Roadshow) ទៅកាន់ប្រទេសឥណ្ឌានាពេលអនាគត ដើម្បីជាការបន្ថែមគោលដៅគោះទ្វារទាក់ទាញវិនិយោគដោយផ្ទាល់មួយទៀតពីបរទេសផងដែរ។

សូមជម្រាបដែរថា តាមរយៈជំនួបនោះ ក្រុមប្រឹក្សាអភិវឌ្ឍន៍កម្ពុជា បានបង្ហាញនូវជំនឿជាក់ថា បេសកកម្មការទូតរបស់ឯកអគ្គរដ្ឋទូតឥណ្ឌាថ្មីនាពេលនេះ នឹងរួមចំណែកថែមមួយកម្រិតទៀតក្នុងការពង្រឹង និងពង្រីកទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ ពិសេសជួយដល់ការទាក់ទាញជំរុញវិនិយោគ និងការលើកកម្ពស់សេដ្ឋកិច្ចជាតិទ្វេភាគីកាន់តែប្រសើរមួយកម្រិតទៀត៕ អត្ថបទ៖ហ្សាលីន

The post កម្ពុជា កំពុងពិនិត្យលទ្ធភាពរៀបចំបេសកកម្មគោះទ្វារជំរុញ និងទាក់ទាញវិនិយោគិនឥណ្ឌា appeared first on .

នេះបើតាមរយៈជំនួបសម្តែងការគួរសម និងពិភាក្សាការងារ រវាងសម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា ជាមួយលោក បាវីតលុង វ៉ាន់ឡាល់វ៉ាវណា ឯកអគ្គរដ្ឋទូតឥណ្ឌា ប្រចាំកម្ពុជា នៅថ្ងៃទី១៣ ខែមីនា ឆ្នាំ២០២៥។

ក្នុងជំនួបនោះ លោកឯកអគ្គរដ្ឋទូតបានវាយតម្លៃខ្ពស់ចំពោះទំនាក់ទំនងយូរអង្វែង រវាងឥណ្ឌា និងកម្ពុជា ដោយលោកបញ្ជាក់ថា ប្រទេសទាំងពីរមានចំណងមិត្តភាព សាមគ្គីភាព និងជាប្រពៃណីជាយូរណាស់មកហើយ ខណៈកម្ពុជាគឺជាដៃគូដ៏សំខាន់មួយរបស់ឥណ្ឌា។

ជាការឆ្លើយតប សម្ដេចធិបតី មានប្រសាសន៍លើកឡើងថា កម្ពុជា-ឥណ្ឌា នៅមានវិស័យសក្ដានុពលជាច្រើនទៀត ដែលជាឱកាសនៃការពង្រីកកិច្ចសហប្រតិបត្តិការ ដើម្បីជាផលប្រយោជន៍ដល់ប្រទេសទាំងពីរ។

ទន្ទឹមនឹងនោះ ភាគីទាំងពីរបានពិភាក្សាអំពីសក្តានុពលសម្រាប់ការពង្រីកកិច្ចសហប្រតិបត្តិការលើវិស័យជាច្រើន មានជាអាទិ៍៖ សេដ្ឋកិច្ច, ពាណិជ្ចកម្ម, ការវិនិយោគ, ការពារជាតិ និងសន្ដិសុខ, ទេសចរណ៍ និងវប្បធម៌, លទ្ធភាពនៃការបង្កើនជើងហោះហើរត្រង់ឥណ្ឌា-កម្ពុជា, ព្រមទាំងការជំរុញការតភ្ជាប់រវាងប្រជាជននិងប្រជាជន ក៏ដូចជា រវាងធុរជននិងធុរជន ផងដែរ។

សូមជម្រាបជូនថា ពាក់ព័ន្ធវិស័យទេសចរណ៍ កម្ពុជាបាន​និង​កំពុង​ខិត​ខំជំរុញ​ការ​វិនិយោគ​លើ​គ្រប់​វិស័យ ក្នុង​នោះ​វិស័យ​ហេដ្ឋារចនា​សម្ព័ន​តាម​ផ្លូវ​អាកាស​ ទេសចរណ៍ក៏​កំពុង​បោះ​ជំហាន​ទៅ​មុខ​លឿនផងដែរ ដោយជើងហោះហើរអន្តរជាតិត្រូវបានពង្រឹងនិងពង្រីក ដោយទទួលបានលទ្ធផលយ៉ាងល្អប្រសើរ លើការតភ្ជាប់ជើងហោះហើរជាប្រវត្តិសាស្ត្រ រវាងរាជធានីភ្នំពេញនិងរដ្ឋធានីញូវដែលីប្រទេសឥណ្ឌា និងក៏ជាការចាប់ផ្តើមហោះហើរឡើងវិញ របស់ក្រុមហ៊ុនអាកាសចរណ៍អេមីរ៉ាតនិងកាតា ដែលផ្សារភ្ជាប់ជើងហោះហើរ រវាងរាជធានីភ្នំពេញ និងទីក្រុងឌូបៃ និងទីក្រុងដូហាផងដែរ៕

The post កម្ពុជា-ឥណ្ឌា ពង្រីកកិច្ចសហប្រតិបត្តិការលើការបង្កើនជើងហោះហើរត្រង់បន្ថែមរវាងប្រទេសទាំងពីរ appeared first on .

នេះបើយោងតាមប្រសាសន៍របស់លោក វ៉ាន់ឡុលវ៉ាណា បាវីតលុង (VANLALVAWNA BAWITLUNG) ឯកអគ្គរដ្ឋទូតថ្មី នៃសាធារណរដ្ឋឥណ្ឌាប្រចាំនៅកម្ពុជា ថ្លែងក្នុងជំនួបជាមួយលោកស្រី ឃួន សុដារី ប្រធានរដ្ឋសភា កាលថ្ងៃទី២៦ ខែកុម្ភៈ ឆ្នាំ២០២៥។

នាឱកាសនោះ ឯកអគ្គរដ្ឋទូតឥណ្ឌាថ្មីប្រចាំនៅកម្ពុជា បានសន្យាថា នៅក្នុងអាណត្តិការទូតរបស់លោក នឹងខិតខំបំពេញបេសកកម្មការទូតឱ្យសកម្ម ក្នុងការពង្រឹងពង្រីកចំណងមិត្តភាព កិច្ចសហប្រតិបត្តិការរវាងប្រទេសទាំងពីរកម្ពុជា-ឥណ្ឌាឱ្យកាន់តែរឹងមាំឡើង។

ទន្ទឹមគ្នានេះ ឯកអគ្គរដ្ឋទូតរូបនេះ ក៏បញ្ជាក់ពីការបេ្តជ្ញាចិត្តនៅក្នុងការជំរុញវិស័យវិយោគ ទេសចរណ៍ ពាណិជ្ជកម្ម និងបន្តផ្តល់អាហារូបករណ៍ដល់និស្សិតកម្ពុជា បានទៅសិក្សានៅប្រទេសឥណ្ឌាជាបន្តទៀត។ ចំពោះវិស័យពាណិជ្ជកម្មនិងទេសចរណ៍វិញ លោកក៏បានបញ្ជាក់ថា ឆាប់ៗនេះ នឹងមានជើងហោះហើរត្រង់ដោយយន្តហោះរបស់ឥណ្ឌា ពីប្រទេសឥណ្ឌាមកកាន់ខេត្តសៀមរាបតែម្តង។

ជាការឆ្លើយតប លោកស្រី ឃួន សុដារី ប្រធានរដ្ឋសភា បានស្វាគមន៍ចំពោះវត្តមានការបើកជើងហោះត្រង់មកកាន់ខេត្តសៀមរាប ខណៈលោកស្រីជឿជាក់ថា ការលើកកម្ពស់កិច្ចសហប្រតិបត្តិការនេះ នឹងជួយជំរុញដល់ការអភិវឌ្ឍន៍លើគ្រប់វិស័យរវាងប្រទេសទំាងពីរ។ លោកស្រីបន្តថា ឥណ្ឌាជាប្រទេសធំ មានប្រជាពលរដ្ឋច្រើន មានការរីកចម្រើនខាងបច្ចេកវិទ្យា សុខាភិបាល ដែលសុទ្ធសឹងជាវិស័យមានសក្តានុពលនៅក្នុងការចូលរួមចំណែកលើកកម្ពស់ជីវភាពប្រជាពលរដ្ឋកម្ពុជា និងការផ្តល់ផលប្រយោជន៍ដល់ប្រទេសទំាងសងខាង។

បើតាមរបាយការណ៍របស់ក្រសួងទេចរណ៍ បានបង្ហាញថា នៅក្នុងឆ្នាំ២០២៤ កន្លងទៅ កម្ពុជាទទួលបានទេសចរអន្តរជាតិបានជាង ៦,៧ លាននាក់ កើនឡើង ២២,៩% ធៀបនឹងឆ្នាំ២០២៣ និងទេសចរជាតិប្រមាណ ២២,៥លាននាក់ កើនឡើងជាង២០% រួមជាមួយចំណូលទេសចរណ៍បានចាក់បញ្ចូលក្នុងចរន្តសេដ្ឋកិច្ចកម្ពុជាប្រមាណ ៣,៦ពាន់លានដុល្លាអាម៉េរិក៕ អត្ថបទ៖ហ្សាលីន

The post ឆាប់ៗនេះ ឥណ្ឌា នឹងប្រើប្រាស់យន្តហោះរបស់ខ្លួន ហោះត្រង់មកកាន់ខេត្តសៀមរាបដោយផ្ទាល់ appeared first on .

នេះបើយោងតាមប្រសាសន៍របស់លោកស្រី Devyani Khobragade ឯកអគ្គរដ្ឋទូតចប់អាណត្តិនៃសាធារណរដ្ឋឥណ្ឌា ថ្លែងក្នុងជំនួបពិភាក្សាការងារជាមួយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នារសៀលថ្ងៃទី២៣ ខែធ្នូ ឆ្នាំ២០២៤ ។

ក្នុងឱកាសនៃជំនួប លោកស្រី បានថ្លែងអំណរគុណជូនចំពោះរាជរដ្ឋាភិបាលកម្ពុជា ដែលបានផ្ដល់ការគាំទ្រ និងកិច្ចសហការដ៏ល្អចំពោះលោកស្រី និងស្ថានទូតឥណ្ឌានៅកម្ពុជា ដែលបានធ្វើឱ្យបេសកកម្មការទូតរបស់លោកស្រីទទួលបានជោគជ័យ និងរួមចំណែកធ្វើឱ្យទំនាក់ទំនងប្រទេសទាំងពីរកាន់តែរីកចម្រើន និងរឹងមាំថែមទៀត។ តាមរយៈភាពរីកចម្រើននៃទំនាក់ទំនងល្អប្រសើរនេះ លោកស្រីបានបង្ហាញសុទិដ្ឋិនិយមថា ទំនាក់ទំនងឥណ្ឌា-កម្ពុជា នឹងឈានឡើងដល់កម្រិតកាន់តែខ្ពស់ទៀត។

ជាការឆ្លើយតប សម្ដេចធិបតី បានវាយតម្លៃខ្ពស់ចំពោះកិច្ចខិតខំប្រឹងប្រែង និងការចូលរួមចំណែកយ៉ាងសំខាន់របស់លោកស្រីក្នុងការពង្រឹង និងពង្រីកទំនាក់ទំនង និងកិច្ចសហប្រតិបត្តិការប្រទេសទាំងពីរ ប្រកបដោយផ្លែផ្កា។

សូមបញ្ជាក់ដែរថា តាមរយៈជំនួបពិភាក្សានេះ កម្ពុជា-ឥណ្ឌា ក៏បានវាយតម្លៃខ្ពស់ចំពោះវឌ្ឍនភាពនៃទំនាក់ទំនង និងកិច្ចសហប្រតិបត្តិការរវាងប្រទេសទាំងពីរលើវិស័យសក្ដានុពលជាច្រើន មានជាអាទិ៍ ការផ្លាស់ប្តូរដំណើរទស្សនកិច្ចថ្នាក់នាំគ្រប់កម្រិត វិស័យពាណិជ្ជកម្ម សេដ្ឋកិច្ច សន្ដិសុខនិងការពារជាតិ ឌីជីថល ការអភិវឌ្ឍធនធានមនុស្ស វប្បធម៌និងសាសនា ទេសចរណ៍ និងការភ្ជាប់ជើងហោះហើរត្រង់កម្ពុជា-ឥណ្ឌា ព្រមទាំងទំនាក់ទំនងប្រជាជននិងប្រជាជនរវាងប្រទេសទាំងពីរជាដើម៕ អត្ថបទ៖ ហ្សាលីន

The post ទូតឥណ្ឌាមានសុទិដ្ឋិនិយមថា ទំនាក់ទំនងឥណ្ឌា-កម្ពុជា នឹងឈានឡើងដល់កម្រិតកាន់តែខ្ពស់ទៀត appeared first on .