ថ្លែងបើកក្នុងទិវានោះ លោកស្រី ភន មុំ អនុប្រធានមន្ទីរកសិកម្មរុក្ខាប្រមាញ់និងនេសាទខេត្តស្វាយរៀង
បានវាយតម្លៃខ្ពស់ចំពោះការរៀបចំទិវាជំនួបអ្នកប្រើប្រាស់នៅក្នុងខេត្តស្វាយ ដើម្បីជំរុញការសុវត្ថិភាពចំណីអាហានៅកម្ពុជា។លោកស្រី បន្តថា “ទិវាជំនួបអ្នកប្រើប្រាស់” ដែលបានធ្វើឡើងក្រោមប្រធានបទ «ពង្រឹងការយល់ដឹងរបស់អ្នកប្រើប្រាស់អំពីកសិផលសុវត្ថិ ភាព ដែលផលិតតាមការអនុវត្តកសិអេកូឡូស៊ី» គឺស្រប់ទៅនិងបរិបទនៃការអភិវឌ្ឍសេដ្ឋកិច្ច និងសង្គមរបស់ប្រទេសកម្ពុជា។

លោកស្រី បានបញ្ជាក់បន្ថែមថា នៅក្នុងបរិបទកម្ពុជា កំពុងអភិវឌ្ឍន៍សេដ្ឋកិច្ច ការផលិតស្បៀងអាហារមានសុវត្ថិភាព និងគុណភាពខ្ពស់ គឺជាកត្តាចាំបាច់ និងសំខាន់ខ្លាំងណាស់សម្រាប់ការលើកកម្ពស់សុខុមាលភាពប្រជា ពលរដ្ឋ និងការអភិវឌ្ឍវិស័យកសិកម្មប្រកបដោយនិរន្តរភាព។

បន្ថែមពីនេះ លោកស្រី បានសង្កត់ធ្ងន់ដែរថា ដើម្បីជំរុញ និងពង្រឹងគុណភាណសុវត្ថិភាពស្បៀងអាហារ មន្ទីរកសិកម្ម ខេត្តស្វាយរៀង បាននិងកំពុងជំរុញការអនុវត្តកសិកម្មនិរន្តរភាព ការផលិត ដំណាំសុវត្ថិភាព ការអនុវត្តស្តង់ដារ GAP និងប្រព័ន្ធធានាគុណភាពដោយការចូលរួម (PGS) ដើម្បីធានាថា ផលិតផលកសិកម្មដែលផលិតនៅក្នុងខេត្តមានគុណភាពល្អ សុវត្ថិភាព និងអាចប្រកួតប្រជែងនៅលើទីផ្សារបាន។

ជាមួយគ្នានេះ លោកស្រី ក៏បានវាយតម្លៃខ្ពស់ចំពោះតួនាទីរបស់ មន្ទីរពាណិជ្ជកម្មខេត្តស្វាយរៀង និងអាជ្ញាធរមូលដ្ឋាន ដែលបានចូលរួមយ៉ាងសកម្មក្នុងការលើកកម្ពស់ និងពង្រីកទីផ្សារ សម្រាប់ផលិតផលកសិកម្មក្នុងខេត្ត។ លោកស្រីក៏បានបង្ហាញការជឿជាក់ដែរថា តាមរយៈការចូលរួមពីគ្រប់ភាគីពាក់ព័ន្ធ រួមមានស្ថាប័នរដ្ឋ អង្គការដៃគូ វិស័យឯកជន កសិករ និង អ្នកប្រើប្រាស់នៅក្នុងខេត្តស្វាយ ពិសេសពីសំណាក់ប្រជាពលរដ្ឋកម្ពុជា យើងនឹងអាចកសាងប្រព័ន្ធស្បៀងអាហារដែលមានសុវត្ថិភាព បរិស្ថានបៃតង និងសេដ្ឋកិច្ចជនបទ ដែលរឹងមាំសម្រាប់ប្រទេសកម្ពុជា។

សូមជម្រាបជូនដែរថា ទិវាជំនួបអ្នកប្រើប្រាស់ខាងខាងលើនេះដែរ គឺរៀបចំដោយបណ្ដាញ ALiSEA សហការជាមួយសមាជិករួមមាន៖ អង្គការ Gret និងអង្គការ DPA ក្រោម​ការគាំទ្រពីអង្គការ Uni4Coop ដោយមានការផ្តល់មូលនិធិពីទីភ្នាក់ងារកិច្ចសហប្រតិបត្តិការអភិវឌ្ឍន៍ប្រទេសបែលហ្សិក (DGD) និងសហផ្តល់មូលនិធិដោយ ទីភ្នាក់ងារស្វីសដើម្បីការអភិវឌ្ឍន៍ (SDC) ភ្នាក់ងារអភិវឌ្ឍន៍បារាំង (AFD) និងសហភាពអឺរ៉ុប(EU) ។

យ៉ាងណាមិញ តាមរយៈទិវានេះ អ្នកជំនាញកសិកម្ម ក៏បានអំពាវនាវដល់បងប្អូនប្រជាពលរដ្ឋជាអ្នកប្រើប្រាស់ទាំងអស់ ឱ្យបន្តចូលរួមគាំទ្រ និងបរិភោគផលិតផលធម្មជាតិកាន់តែច្រើន ព្រោះការគាំទ្ររបស់អស់លោកស្រី គឺជាកម្លាំងចិត្ត និងគាំទ្រជីវភាពរស់ នៅរបស់បងប្អូនកសិករយើង៕អត្ថបទ៖ពិសី

The post អ្នកជំនាញ៖ ក្នុងបរិបទនៃការអភិវឌ្ឍសេដ្ឋកិច្ចកម្ពុជា ការជំរុញសុវត្ថិភាពស្បៀងអាហារ គឺជាកត្តាចាំបាច់បំផុត appeared first on .

ថ្លែងនៅក្នុងពិធីសំណេះសំណាលជាមួយប្រជាកសិករមកពីសហគមន៍កសិកម្មមួយចំនួននិងមន្រ្តីកសិកម្មមកពីឃុំចំនួន៦ក្នុងក្រុងបានលុង ខេត្តរតនគិរី នៅរសៀលថ្ងៃទី២០ ខែឧសភា ឆ្នាំ២០២៦ លោកបណ្ឌិត កៅ ថាច បានបញ្ជាក់ថាការធ្វើកសិកម្មរបស់កសិករយើងពិតជាជួបការលំបាកនិងនឿយខ្លាំងតែមិនអាចឈប់បានទេ ព្រោះឈាមជ័ររបស់ដូនតាខ្មែរយើងអ្នកធ្វើកសិកម្មតាំងពីសម័យអង្គរមកហើយបើអត់កសិកម្មក៏មិនកើតដែរ ដូច្នេះបើជ្រុលនឹងនឿយហត់ហើយគួរប្រឹងឡើងវិញ ដោយរកវិធីសាស្រ្តបែបថ្មី ចេះគិតពីថ្លៃដើមផលិតឲ្យបានច្បាស់លាស់ ការចំណាយ ក្នុង១ឯកតាបើមិនដូច្នោះទេ កសិករយើងនឹងបន្តជាប់អន្ទាក់បំណុលដដែល។

ពាក់ព័ន្ធនិងកង្វល់របស់ប្រជាកសិករដែលបានលើកឡើងលើវិស័យកសិកម្ម និងការដុះដំណាំ រួមមាន ចន្ទី កោស៊ូ ចិញ្ចឹមសត្វនិងដាំដុះបន្លែ ដែលគ្មានទីផ្សារនោះ លោកបណ្ឌិត បានពន្យល់ថា កសិករយើងបើមិនប្តូរទម្លាប់ធ្វើកសិកម្មដោយគិតពីការចំណេញខាតនោះទេ គឺច្បាស់ជាស្រែកថា«ធ្វើកសិកម្មខាតគ្រប់រដូវកាលហើយ » ខណៈដែលជីគីមីនិងថ្នាំកសិកម្មនៅលើពិភពលោកឡើងថ្លៃ ដូច្នេះជាឱកាសយើងត្រូវរកដំណោះស្រាយ គឺត្រូវងាកមកសិក្សាពីការផលិតជីធម្មជាតិក្នុងស្រុក ជាពិសេស យើងមានបណ្ណាល័យពិភពលោកមួយដែលអាចសិក្សាពីរបៀបផលិតជីធម្មជាតិវិញម្តងគឺ ប្រព័ន្ធ យូធូប ដើម្បីកាត់បន្ថយថ្លៃដើមផលិតរបស់កសិករយកទៅប្រើប្រាស់ ក្នុងវិស័យកសិកម្ម។

ត្រង់ចំណុចប្រឈមខាងលើនេះ សមាគមបណ្តាញកសិករតេជោគឺនឹងធ្វើ ទី(១)ជាខែលឬឆ័ត្រសម្រាប់កសិករជ្រកដោយចូលរួមការពារភាពត្រឹមត្រូវឬស្របច្បាប់របស់កសិករនឹងការពារពីការំលោភបំពាន គៃចំណេញលើកសិករ និង(២)សមាគមធ្វើជាស្ពានឱ្យបងប្អូនដើរឬក៏ភ្ជាប់ទៅនឹងឱកាសផ្សេងៗ ដូចជាឱកាសការទទួលបានបច្ចេកទេស និងព័ត៌មានទីផ្សារ ជាពិសេសជាស្ពានក្នុងតភ្ជាប់សម្លេងរបស់កសិករទៅស្ថាប័នមានសមត្ថកិច្ច ឬសហគមជាតិ និងអន្តរជាតិ ដែលមិនត្រូវទុកសម្លេងរបស់កសិករណាម្នាក់ចោលឡើយ៕

The post បណ្ឌិត កៅ ថាច លើកទឹកចិត្តឲ្យកសិករពិចារណាប្តូរទម្លាប់ធ្វើកសិកម្ម បើមិនដូច្នោះ នឹងគេចពុំរួចពីបំណុលកើននោះឡើយ appeared first on .

ក្នុងបទសម្ភាសមួយកាលពីពេលថ្មីៗនេះ អ្នកតំណាងពាណិជ្ជកម្មសហរដ្ឋអាមេរិក លោក Jamieson Greer បានព្យាករថា ប្រទេសចិន នឹងចុះហត្ថលេខាលើកិច្ចព្រមព្រៀងដើម្បីទិញផលិតផលកសិកម្មរបស់អាមេរិកបន្ថែមទៀត ដែលមានតម្លៃរាប់សិបពាន់លានដុល្លារ បន្ទាប់ពីមានកិច្ចប្រជុំកំពូលរវាងលោក ត្រាំ និងលោក ស៊ី​ នៅទីក្រុងប៉េកាំង។

យ៉ាងណាមិញ លោក Greer ក៏បាននិយាយទៀតថា កិច្ចព្រមព្រៀងដែលមានតម្លៃរាប់សិបពាន់លានដុល្លារនេះ នឹងមិនរាប់បញ្ចូល​ការទិញ​សណ្តែកសៀងមានតម្លៃរហូតដល់ទៅ​ ២៥ពាន់លានដុល្លារ ដែលប្រទេសចិនបាន​ប្ដេជ្ញាក្នុងខែតុលា ឆ្នាំ២០២៥ នោះទេ។

មិនតែប៉ុណ្ណោះ មុននេះ នៅក្នុងបទសម្ភាសជាមួយ Fox News លោក ត្រាំ បានបញ្ជាក់ផងដែរថា ប្រទេសចិននឹងទិញផលិតផលកសិកម្មរបស់សហរដ្ឋអាមេរិកបន្ថែមទៀត។ កិច្ចព្រមព្រៀងដែលមានតម្លៃរាប់ពាន់លានដុល្លារ នឹងត្រូវឃើញកើតមានឡើង ជារៀងរាល់ឆ្នាំ ក្នងរយៈពេលបីឆ្នាំខាងមុខ ដោយសារដំណើរទស្សនកិច្ចនេះ។

ជម្រាបជូនថា សណ្តែកសៀងបច្ចុប្បន្ន គឺជាការនាំចេញធំបំផុតរបស់ទំនិញកសិកម្មសហរដ្ឋអាមេរិក ទៅកាន់ប្រទេសចិន។ សណ្តែកសៀងក៏បានដើរតួនាទីយ៉ាងសំខាន់ក្នុងការចរចាពាណិជ្ជកម្មក្នុងអំឡុងពេលអាណត្តិទាំងពីររបស់លោក ត្រាំ ផងដែរ។ ទន្ទឹមននឹងនេះ លោក Greer បាននិយាយថា ប្រទេសចិនកំពុងបំពេញការប្តេជ្ញាចិត្តរបស់ខ្លួនក្នុងការទិញសណ្តែកសៀងជាច្រើន ហើយទីក្រុងវ៉ាស៊ីនតោនរំពឹងថានឹងមានការទិញបន្ថែម នៅចុងឆ្នាំនេះ៕​

The post ចិន នឹងទិញទំនិញកសិកម្មរបស់អាមេរិកមានតម្លៃរាប់សិបពាន់លានដុល្លារ ក្រោយដំណើរទស្សននិច្ចលោក ត្រាំ appeared first on .

ថ្លែងក្នុងពិធីសំណេះសំណាល និងសួរសុខទុក្ខជាមួយប្រជាកសិករស្រុកខ្សាច់កណ្តាល ខេត្តកណ្តាល ស្ថិតនៅក្នុងវិទ្យាល័យ ហ៊ុនសែន រ៉ូតាខ្សាច់កណ្ដាល កាលពីថ្ងៃទី២៨ កញ្ញាកន្លងទៅ លោក កៅ ថាច បានថ្លែងថា កសិករជាមូលដ្ឋានគ្រឹះនៃការរស់នៅរបស់មនុស្ស ហើយក៏ជាឆ្នាំងបាយរបស់មនុស្សជាតិ ជាពិសេស ជាឆ្នាំងបាយរបស់ប្រជាជាតិខ្មែរចាប់ពីពេលក៏កើតទឹកដីខ្មែរមកម៉្លេះ។ ដូច្នេះ យើងពិតជាមានមោទនភាព ដែលបានចាប់យករបរកសិកម្មនេះ។

លោកក៏បានពន្យល់ដល់កសិករថា រឿងកសិកម្ម តម្លៃស្រូវ ដែលបញ្ហានេះមិនមែនជួបតែកម្ពុជាយើងនោះទេ  តាមការអង្កេតតម្លៃអង្ករនៅទីផ្សារអន្តរជាតិបានទាញតម្លៃស្រូវយើងធ្លាក់ចុះ ហើយម្យ៉ាងទៀត  ដោយសារការស្តុកអង្ករពិភពលោកឆ្នាំមុន(២០២៤) នៅសល់ច្រើន ហើយបន្តប្រើប្រាស់ និងលក់ក្នុងឆ្នាំនេះ(២០២៥) ជាពិសេស ប្រទេសធំៗរួមមាន ឥណ្ឌា ឥណ្ឌូនេស៊ី ហ្វីលីពីន ដែលការណ៍នេះ ធ្វើឱ្យតម្រូវការអង្ករមានការថយចុះ សង្ឃឹមថា តម្លៃអង្ករនឹងល្អវិញនៅចុងឆ្នាំនេះ។

ទន្ទឹមនឹងនោះ លោកក៏បានផ្តល់អនុសាសន៍ថា ការធ្វើកសិកម្ម និងដាំដុះដំណាំគ្រប់ប្រភេទក៏ដោយ គឺត្រូវរកឱ្យឃើញតម្លៃផលិតដើមក្នុង១ឯកតា ឧទាហរណ៍ ផលិតស្រូវ១គីឡូក្រាម ចំណាយប្រាក់អស់ប៉ុន្មានរៀល ឬចិញ្ចឹមមាន់១ក្បាលរហូតដល់ថ្ងៃចាប់លក់ ចំណាយអស់ប៉ុន្មានរៀល ទើបយើងរកផលចំណេញឃើញ, និយាយបែបនេះ គឺដើម្បីប្រែក្លាយបងប្អូនទៅជាកសិករសហគ្រិន។  ម្យ៉ាងទៀត ការចងក្រងជាបណ្តាញ ឬជាក្រុមអ្នកផលិតក្នុងស្រុកខ្សាច់កណ្តាញឱ្យបានច្រើនជារឿងសំខាន់ សម្រាប់ផ្គត់ផ្គង់ឱ្យបានជាប់ជាប្រចាំលើទីផ្សារប្រកបដោយគុណភាព តម្លៃសមរម្យ កាត់បន្ថយថ្លៃដើមផលិត និងមានភាពប្រកួតប្រជែងខ្ពស់៕

The post លោក កៅ ថាច៖ រឿងកសិកម្ម តម្លៃស្រូវ ដែលមានបញ្ហា មិនមែនជួបតែកម្ពុជានោះទេ  តម្លៃអង្ករលើទីផ្សារអន្តរជាតិបានទាញតម្លៃស្រូវកម្ពុជាធ្លាក់ចុះ appeared first on .

ក្រសួងកសិកម្មរបស់ប្រទេសប្រេស៊ីល បាននិយាយថា រដ្ឋបាលទូទៅនៃគយរបស់ប្រទេសចិន បានជូនដំណឹងដល់ប្រេស៊ីលថា ទំនិញស្ពៅ របស់ខ្លួន ត្រូវបានទទួលស្គាល់ជាផ្លូវការ និងមានសិទិ្ធគ្រប់គ្រាន់ សម្រាប់ការនាំចេញ បន្ទាប់ពីមានដំណើរទស្សនកិច្ចរបស់គណៈប្រតិភូចិន ទៅកាន់ទីតាំងផលិតស្ពៅ ប្រេស៊ីល កាលពីដើមខែសីហាកន្លងទៅ។

ទន្ទឹមនឹងនេះ ​យោងតាមទីភ្នាក់ងារកសិកម្មជាតិ Conad បានបង្ហាញឲ្យដឹងថា ផលិតកម្មស្ពៅ របស់ប្រទេសប្រេស៊ីល បានកើនឡើងទ្វេដង ក្នុងរយៈពេលប៉ុន្មានឆ្នាំចុងក្រោយនេះ ដល់ ៤,៤ លានតោន ក្នុងឆ្នាំដាំដុះ ២០២៣-២០២៤។ តែទោះជាយ៉ាងណាក៏ដោយ ការនាំចេញមានចំនួនតិចតួចជាង ១% នៃទីផ្សារអន្តរជាតិ។ អ្នកផលិតដំណាំនេះ បង្ហាញក្តីសង្ឃឹមខ្ពស់ថា ចំណាប់អារម្មណ៍របស់ប្រទេសចិន នឹងបើកឱកាសសម្រាប់កំណើន នាពេលខាងមុខ។

នៅពេលដែលរដ្ឋាភិបាលទីក្រុងប៉េកាំង បើកទ្វាររបស់ខ្លួនចំពោះដំណាំស្ពៅ ឬ sorghum ប្រេស៊ីលនេះ ការនាំចូលពីអ្នកផ្គត់ផ្គង់ប្រពៃណីរបស់ខ្លួន គឺសហរដ្ឋអាមេរិកបានធ្លាក់ចុះយ៉ាងខ្លាំង ក្នុងរយៈពេលថ្មីៗនេះ។ យោងតាមទិន្នន័យពីការិយាល័យជំរឿនរបស់សហរដ្ឋអាមេរិក បានបង្ហាញថាការនាំចេញស្ពៅទៅកាន់ប្រទេសចិនក្នុងរយៈពេលប្រាំពីរខែដំបូងនៃឆ្នាំនេះ មានចំនួនប្រមាណ ៨២ ៣០០ តោន ពោលគឺធ្លាក់ចុះ ៩៧% ធៀបនឹងរយៈពេលដូចគ្នា កាលពីឆ្នាំមុន។

មិនត្រឹមតែស្ពៅប៉ុណ្ណោះទេ សណ្តែកសៀងប្រេស៊ីលក៏កំពុងក្លាយជាជម្រើសរបស់ចិនសម្រាប់ជំនួសទំនិញអាមេរិកផងដែរ។ សហរដ្ឋអាមេរិកផ្គត់ផ្គង់ផលិតផលកសិកម្មភាគច្រើនក្នុងអំឡុងខែកញ្ញាដល់ខែមករាជារៀងរាល់ឆ្នាំ មុនពេលការប្រមូលផលរបស់ប្រទេសប្រេស៊ីលកើតឡើង។

ជម្រាបជូនថា កាលពីឆ្នាំមុន ក្រុមហ៊ុនចិនបានបញ្ជាទិញសណ្តែកសៀងអាមេរិកចន្លោះពី ១២ លានទៅ ១៣ លានតោន សម្រាប់ការដឹកជញ្ជូនពីខែកញ្ញាដល់ខែវិច្ឆិកា។ ប៉ុន្តែ​នៅឆ្នាំនេះ​ ចិន​មិន​ទាន់​មាន​ការ​បញ្ជា​ទិញ​ពី​សហរដ្ឋ​អាមេរិក​នៅ​ឡើយ​ទេ ផ្ទុះទៅវិញទីក្រុងប៉េកាំង បានងាកទៅកក់សណ្តែកសៀងប្រហែល ៧,៤ លានតោន ដែលភាគច្រើនមកពីប្រទេសអាមេរិកខាងត្បូងសម្រាប់ខែតុលា ជំនួសវិញ៕​

The post ចិន ចាប់ផ្តើមងាកទៅនាំចូលផលិតផលកសិកម្មប្រេស៊ីលកាន់តែច្រើន ជំនួសទំនិញអាមេរិក appeared first on .

ក្រសួងកសិកម្ម បាននិយាយទៀតថា កិច្ចព្រមព្រៀងថ្មីដែលបានចុះហត្ថលេខាក្នុងអំឡុងពេលដំណើរទស្សនកិច្ចទៅកាន់សហរដ្ឋអាមេរិកដោយគណៈប្រតិភូក្រុមហ៊ុនវៀតណាមចំនួន ៥០ ដឹកនាំដោយរដ្ឋមន្ត្រីក្រសួងកសិកម្ម លោក Do Duc Duy រួមមាន MoU ចំនួន ៥ ដើម្បីទិញផលិតផលកសិកម្មដែលមានតម្លៃប្រមាណ ៨០០លានដុល្លារ ពីរដ្ឋ Iowa ក្នុងរយៈពេលបីឆ្នាំ។

ប្រភពដដែលនេះ បានបង្ហាញឲ្យដឹងទៀតថា MoU ដែលត្រូវបានចុះហត្ថលេខាដោយភាគីទាំងពីរនេះ ពាក់ព័ន្ធទៅនឹងការទិញចូលផលិតផលកសិកម្មជាច្រើនមុខ ដូចជាពោត ស្រូវសាលី សណ្តែក និងគ្រាប់ធញ្ញជាតិស្ងួត ជាដើម។

រដ្ឋាភិបាលវៀតណាម និងរដ្ឋបាលរបស់ប្រធានាធិបតី លោក ដូណាល់ ត្រាំ បាននឹងកំពុងធ្វើការចរចាលើកិច្ចព្រមព្រៀងពាណិជ្ជកម្មពិសេសមួយ ដោយវៀតណាម បានសន្យាថានឹងអនុញ្ញាតឲ្យមានការនាំចូលពីសហរដ្ឋអាមេរិកបន្ថែមទៀត ដើម្បីបង្រួមគម្លាតពាណិជ្ជកម្មរវាងប្រទេសទាំងពីរ។ សហរដ្ឋអាមេរិកបានចុះបញ្ជីឱនភាពពាណិជ្ជកម្មចំនួន ១២៣ពាន់លានដុល្លារ ជាមួយវៀតណាមកាលពីឆ្នាំមុន។

យោងតាមទីភ្នាក់ងារសារព័ត៌មានវៀតណាម បានរាយការណ៍ថា ប្រទេសវៀតណាមកាលពីឆ្នាំមុន បានទិញកសិផលរបស់សហរដ្ឋអាមេរិក មានតម្លៃ ៣,៤ពាន់លានដុល្លារ ហើយបាននាំចេញកសិផលរបស់ខ្លួនទៅកាន់សហរដ្ឋអាមេរិក មានតម្លៃ ១៣,៦៨ពាន់លានដុល្លារ។

ជម្រាបជូនផងដែរថា កន្លងមកវៀតណាមក៏បានសន្យាទិញផលិតផលរបស់អាមេរិកផ្សេងទៀត រួមទាំងយន្តហោះ Boeing និងឧស្ម័នធម្មជាតិរាវផងដែរ៕

The post វៀតណាម គ្រោងចាយលុយជាង ២ពាន់លានដុល្លារ នាំចូលផលិតផលកសិកម្មពីអាមេរិក appeared first on .

តាមព្រះរាជបវេណីរបស់ខ្មែរ ព្រាហ្មណ៍ព្រះរាជគ្រូ បានសូត្រពាក្យអធិដ្ឋានផ្សងគោឧសភរាជ ដែលទឹមច្រត់ព្រះនង្គ័លនោះ ឱ្យបរិភោគអាហារ ៧យ៉ាង ដែលភ្នាក់ងាររៀបដាក់តុ ប្រាក់ធំៗតាំងទុកនៅទីមុខព្រះពន្លា គឺគ្រាប់ស្រូវ១តុ គ្រាប់សណ្ដែត១តុ គ្រាប់ពោត១តុ គ្រាប់ល្ង១តុ ស្មៅស្រស់១តុ ទឹក១តុ ស្រា១តុ។ កាលព្រះគោ បរិភោគអ្វីមួយយ៉ាង ឬពីរយ៉ាង ព្រាហ្មណ៍ក៏ទាយផលប្រផ្នូលទៅខាងមុខតាមនោះដែរ។ ជាលទ្ធផល ក្នុងព្រះរាជពិធីនាព្រឹកនេះ គោឧសភរាជបរិភោគ ស្រូវ៩៥ភាគរយ ពោត ៩៥ភាគរយ និងសណ្តែក ៨០ភាគរយ ហើយតាមការបរិភោគនេះ បង្ហាញថា ឆ្នាំម្សាញ់នេះ ស្រូវ ពោត និងសណ្តែក នឹងទទួលបានផលល្អប្រសើរ។

សូមជម្រាបជូនថា ការផ្សងខាងលើនេះ ធ្វើឡើងក្នុងព្រះរាជពិធីបុណ្យច្រត់ព្រះនង្គ័ល ដែលបានប្រារព្ធធ្វើឡើងនាព្រឹកថ្ងៃទី១៥ ខែឧសភានេះ នៅក្រុងកំពង់ឆ្នាំង ខេត្តកំពង់ឆ្នាំង ជាមហោឡារិក ក្រោមព្រះរាជាធិបតីភាពដ៏ខ្ពង់ខ្ពស់បំផុតរបស់ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត៕

The post ស្រូវ ពោត និងសណ្តែក រំពឹងថានឹងទទួលបានផលល្អ នៅឆ្នាំម្សាញ់នេះ appeared first on .

ការនាំចេញផលិតផលកសិកម្មវៀតណាមទៅកាន់ប្រទេសចិន ត្រូវបានគេរំពឹងថានឹងមានការកើនឡើងយ៉ាងខ្លាំងព្រោះថា ប្រទេសចិននាពេលបច្ចុបន្ននេះកំពុងតែជួបប្រទះនឹងអាកាសធាតុចុះត្រជាក់នៅតំបន់មួយចំនួន កត្តានេះហើយបានបណ្តាលឲ្យផលិតផលដូចជាចេកជាដើមនោះប្រែប្រួលពណ៌ទៅជាជាំ ម្យ៉ាងវិញទៀតគួបផ្សំនឹងរដូវកាលប្រមូលផលផ្លែស្រកានាគរបស់ចិនបានកន្លងផុតទៅ ជាហេតុធ្វើឲ្យមានការខ្វះខាតផលិតផលកសិកម្មនៅរដូវកាលចូលឆ្នាំថ្មីខាងមុខ។

ក្នុងនោះសមាគមផ្លែឈើ និងបន្លែវៀតណាមបានលើកឡើងថា ដោយសារតែមានតម្រូវការពីប្រទេសចិន ការនាំចេញបន្លែ ក៏ដូចជាផ្លែឈើស្រស់របស់ខ្លួននៅឆ្នាំ២០២៤នេះ នឹងមានតម្រូវការកើនឡើង៨៩,២% ឬដល់ចំនួន ៤៥៩លានដុល្លារ។

គួររម្លឹកដែរថា កាលពីអំឡុងដំណើរទស្សនកិច្ចរបស់ប្រធានាធិបតីចិនលោក ស៊ី ជិនពីង ទៅកាន់ប្រទេសវៀតណាមកាលពីពេលថ្មីៗនេះ បាននាំមកនូវសមិទ្ធផលយ៉ាងច្រើនមកកាន់ទីក្រុងហូជីមិញ ដោយកាលនោះភាគីចិនបាននិយាយថា ពួកគេនឹងបើកទីផ្សារដល់ផលិតផលកសិកម្មវៀតណាមជាច្រើនប្រភេទរួមមាន ដូងស្រស់ ផលិតផលផ្លែឈើក្លាសេ ផ្លែក្រូចឆ្មារ ផ្លែបឺរ ផ្លែទាប និងផ្លែជម្ពូជាដើម បន្ថែមពីនោះ ភាគីទាំងពីរក៏បានចុះហត្ថលេខាលើពិធីសារសម្រាប់ការនាំចេញផ្លែឪឡឹកផងដែរ។

សូមជម្រាបថា ចិនមិនមែនជាច្រកទ្វារទីផ្សារដែលវៀតណាមអាចនាំចេញផ្លែឈើកសិកម្មតែមួយគត់នោះទេ សហរដ្ឋអាមេរិក សហភាពអឺរ៉ុប និងបណ្តាប្រទេសអាស៊ីមួយចំនួន ក៏គ្រោងនឹងបើកទ្វារទទួលផ្លែឈើវៀតណាមបន្ថែមទៀត។ លើសពីនោះសហរដ្ឋអាមេរិក និងអូស្ត្រាលី គ្រោងនឹងនាំចូលផ្លែផាស៊ិន ខណៈបណ្តាប្រទេសមួយចំនួនទៀតតួយ៉ាងជប៉ុន កូរ៉េខាងត្បូង អូស្ត្រាលី និងឥណ្ឌាក៏មានបំណងចង់ទិញក្រូចថ្លុង និងនាំចូលទុរេនវៀតណាមផងដែរ៕

The post ផ្លែឈើកសិកម្មវៀតណាមកំពុងត្រូវប៉ាន់នៅប្រទេសចិន ក្នុងពិធីបុណ្យចូលឆ្នាំ appeared first on .

នៅចំពោះមុខសម្តេចធិបតីនាយករដ្ឋមន្រ្តី លោកស្រី Mary Akinyi Olwal បានបង្ហាញអំពីចំណាប់អារម្មណ៍នៅក្នុងការពង្រីកនូវការវិនិយោគរបស់ក្រុមហ៊ុនដោយនាំយកនូវបច្ចេកវិទ្យាទំនើបឈានមុខគេដើម្បីអភិវឌ្ឍន៍វិស័យកសិកម្មនៅកម្ពុជា ចាប់តាំងពីដំណើរការនៃការដាំដុះ ការប្រមូលផល រហូតដល់ការផលិតកែច្នៃដើម្បីនាំចេញទៅក្រៅប្រទេស។ 

ថ្លែងក្នុងជំនួបនោះសម្តេចធិបតី បានគូសបញ្ជាក់ថា រាជរដ្ឋាភិបាលថ្មីនីតិកាលទី៧ នេះគឺនៅតែបន្តយកចិត្តទុកដាក់នៅក្នុងការផ្ដល់អាទិភាពទៅលើវិស័យកសិកម្មតាមរយៈការគាំទ្រផ្នែកហិរញ្ញវត្ថុ សំដៅលើកស្ទួយផលិតកម្ម រកទីផ្សារ និងរក្សាលំនឹងតម្លៃកសិផល និងការដាក់ពង្រាយមន្ដ្រីបច្ចេកទេសកសិកម្មនៅគ្រប់ឃុំ សង្កាត់ ដែលមានសកម្មភាពកសិកម្មនៅទូទាំងប្រទេស។

ទន្ទឹមនឹងនេះ សម្ដេចធិបតីបានសម្ដែងនូវការស្វាគមន៍ចំពោះបំណងរបស់ក្រុមហ៊ុននៅក្នុងការពង្រីកនិងការនាំយកបច្ចេកវិទ្យាថ្មីៗដើម្បីជួយដល់ផ្នែកផលិតកម្ម កសិកម្មនៅកម្ពុជា ការកសាងធនធានមនុស្ស និងការស្ដុកទុកផលិតផលកសិកម្មក្នុងបរិមាណច្រើន និងរយៈពេលយូរ។  សម្ដេចធិបតីបានលើកទឹកចិត្តដល់ក្រុមហ៊ុន បន្តកិច្ចសហការជាមួយក្រសួងស្ថាប័នពាក់ព័ន្ធ ជាពិសេសក្រសួង កសិកម្មរុក្ខាប្រមាញ់ និងនេសាទ ដើម្បីជួយសហការគាំទ្រ និងលើកកម្ពស់ដល់ផ្នែកស្រាវជ្រាវ និងការអភិវឌ្ឍន៍៕

The post ក្រុមហ៊ុន Bühler Group សន្យានាំបច្ចេកវិទ្យាទំនើបចុងក្រោយមកអភិវឌ្ឍន៍វិស័យកម្មនៅកម្ពុជា appeared first on .

ប្រទេសមួយនេះបានប្តេជ្ញាក្នុងការរក្សាតំបន់ដីបង្កបង្កើនផលរបស់ខ្លួន ខណៈពេលដែលខ្លួនកំពុងស្វែងរកសក្តានុពល ដើម្បីពង្រីកទំហំដី និងបង្កើនទិន្នផល ក៏ដូចជាគុណភាពគ្រាប់ធញ្ញជាតិបន្ថែមទៀត ក្នុងគោលបំណងធ្វើឲ្យមានស្ថិរភាពនៃគ្រាប់ធញ្ញជាតិម្ហូបអាហារ ពោត សណ្តែកសៀង និងបង្កើនទិន្នផលក្នុងមួយឯកតាដូចដែលបានប្រកាសដោយក្រសួងកសិកម្ម និងកិច្ចការជនបទចិន។

យ៉ាងណា ដើម្បីទទួលបានទិន្នផលតាមការគ្រោងទុកបែបនេះ ប្រទេសចិននឹងបង្កើនកិច្ចខិតប្រឹងប្រែង បង្កបង្កើនផលក្នុងមួយឯកតាសម្រាប់ដំណាំសំខាន់ៗ ដោយកំណត់យកស្រុកចំនួន៣០២ មកធ្វើការអនុវត្ត ក្នុងនោះមាន ១០០ស្រុកនឹងត្រូវដាំដំណាំពោត ១០០ស្រុកផ្សេងទៀតតម្រូវដាំដំណាំស្រូវសាលី ហើយចំណែកឯស្រុកចំនួន ១០២ទៀតសម្រាប់ដំំណាំ Rapeseed ។

ជាមួយគ្នានោះ ប្រទេសចិននឹងលើកកម្ពស់បន្ថែមទៀត នូវការដាំដុះដែលមានដង់ស៊ីតេខ្ពស់ ដែលជាវិធីសាស្ត្រដ៏មានប្រសិទ្ធភាពក្នុងការលើកកម្ពស់ទិន្នផលដំណាំ។ មួយវិញទៀត ដើម្បីបង្កើនគុណភាពនៃការសាបព្រួស រដ្ឋាភិបាលនឹងជួយសម្រួលដល់ការអនុវត្តឧបករណ៍ដាំគ្រាប់ពូជ ដែលមានប្រសិទ្ធភាពខ្ពស់ ដោយបង្កើនការឧបត្ថម្ភធនសម្រាប់ការទិញ និងប្រើប្រាស់គ្រឿងយន្តកសិកម្ម ក៏ដូចជាលើកកម្ពស់ភតិសន្យាហិរញ្ញវត្ថុ។

មិនត្រឹមតែប៉ុណ្ណោះ ក្រសួងនឹងជំរុញនូវការប្រើប្រាស់ប្រព័ន្ធធារាសាស្ត្រ និងជីរួមបញ្ចូលគ្នា ដើម្បីគាំទ្រដល់ការដាំដុះដែលមានដង់ស៊ីតេខ្ពស់ ក៏ដូចជាការគ្រប់គ្រងទឹក និងជីឲ្យបានច្បាស់លាស់ត្រឹមត្រូវផងដែរ៕

The post ចិនដាក់គោលដៅប្រមូលផលគ្រាប់ធញ្ញជាតិឲ្យបានជាង ៦៥០ពាន់លានគីឡូក្រាមនៅឆ្នាំក្រោយ appeared first on .