លោក ខុត សារិន ជាអាជីវករម្នាក់ក្នុងចំណោមអាជីវករជាច្រើនដែលរកស៊ីលើការទិញលក់បន្លែ ផ្លែឈើនៅស្រុកល្វាឯមរយៈពេល១០ឆ្នាំមកហើយ។ បច្ចុប្បន្ននេះ លោកបាននិងកំពុងប្រមូលទិញផ្លែល្ហុងពីកសិករដើម្បីយកទៅលក់បន្ត ដោយក្នុងមួយថ្ងៃលោកប្រមូលទិញប្រមាណ៥ទៅ៦តោន។

ក្នុងការប្រមូលទិញនេះ លោក ខុត សារិន បានបញ្ជាក់ថា បច្ចុប្បន្នលោកប្រមូលទិញល្ហុងពីកសិករក្នុងតម្លៃ ៤០០រៀលក្នុងមួយគីឡូក្រាម ហើយលក់ចេញវិញក្នុងតម្លៃ ៦០០ទៅ៧០០រៀលក្នុងមួយគីឡូក្រាម។ លោកថា «តម្លៃនេះ គឺមិនសូវបានថ្លៃប៉ុន្មានទេ ខណៈពេលមុនៗលោកអាចលក់បានក្នុងមួយគីឡូចាប់ពី៨០០ទៅ៩០០រៀលឯណោះ » ។ ចំពោះការលក់ធ្លាក់ថ្លៃនេះ លោកសង្កេតឃើញថា កើតឡើងក្រោយការបោះឆ្នោតរួចរាល់ រីឯចំពោះមូលហេតុ ដែលទីផ្សារធ្លាក់ថ្លៃ លោកមិនបានដឹងនោះទេ។

អាជីវកររូបនេះបន្តថា ការប្រមូលទិញល្ហុង ចន្លោះពី៥ទៅ៦តោននេះ លោកអាចរកប្រាក់ចំណេញតែ២០ម៉ឺនរៀលប៉ុណ្ណោះ ក្រោយពីទូរទាត់ថ្លៃចំណាយផ្សេងៗ ដូចជា ថ្លៃកម្មករ ថ្លៃសាំងជាដើម។

ពាក់ព័ន្ធនឹងការលក់ធ្លាក់ថ្លៃនេះ អាជីវករដែលរកស៊ីលើវិស័យទិញលក់ បន្លែ  ផ្លែឈើនៅស្រុកល្វាឯមរូបនេះ បានសំណូមពរដល់រាជរដ្ឋាភិបាល «សូមជួយដំឡើងថ្លៃបន្លែ ផ្លែឈើដែលកសិករផលិតបានផង ព្រមទាំងផ្ដល់តម្លៃកសិករខ្មែរផង»៕

អត្ថបទ៖ សុកធា

The post ឈ្មួញកណ្ដាលរកស៊ីលើវិស័យកសិកម្ម សំណូមពររាជរដ្ឋាភិបាល ដំឡើងថ្លៃ បន្លែផ្លែឈើក្រោយកសិករផលិតបាន appeared first on .