កោះពស់

ក្រុមប្រឹក្សាអភិវឌ្ឍន៍កម្ពុជា បើកកិច្ចប្រជុំកែសម្រួលប្លង់គោលអភិវឌ្ឍន៍កោះពស់ ខេត្តព្រះសីហនុ

ឧកញ៉ាកោះក្របី — Thu, 05 Jan 2023 01:32:12 +0000

ក្រុមប្រឹក្សាអភិវឌ្ឍន៍កម្ពុជា ហៅកាត់ថា CDC នៅថ្ងៃពុធ ទី៣មករាម្សិលមិញ បើកកិច្ចប្រជុំជាមួយរដ្ឋបាលខេត្តព្រះសីហនុ ដើម្បីពិនិត្យមើលអំពីការកែសម្រួលប្លង់គោលអភិវឌ្ឍន៍កោះពស់ ដែលជាកោះមួយនៅកៀកដីគោកនៃក្រុងព្រះសីហនុ។ នេះបើតាមលោក ឡុង ឌីម៉ង់ អភិបាលរងខេត្តព្រះសីហនុ លើទំព័រហ្វេសប៊ុក។

គម្រោងអភិវឌ្ឍន៍កោះមរកត ឫកោះពស់ ដែលលាតសន្ធឹងលើផ្ទៃដី ១.១៦០.០៣៥ ម៉ែត្រការ៉េ ឫស្មើប្រមាណ ១១៦.០០៣៥ ហិកតា គឺជាគំនិតផ្តួចផ្តើមនៃការអភិវឌ្ឍន៍ដ៏សំខាន់មួយ ក្នុងការប្រែក្លាយកោះពស់ទៅជាគោលដៅទេសចរណ៍ដ៏សម្បូរបែបស្តង់ដារអន្តរជាតិ។

តំបន់អភិវឌ្ឍន៍កោះពស់មានចម្ងាយ ១៨គីឡូម៉ែត្រ ពីប្រលានយន្តហោះអន្តរជាតិក្រុងព្រះសីហនុ។ ក្នុងគម្រោងអភិវឌ្ឍន៍នៅលើកោះនេះ មានដូចជា កសាងតំបន់អភិវឌ្ឍន៍អចលនទ្រព្យសម្រាប់លំនៅឋាន អគារពាណិជ្ជកម្ម និងកន្លែងកម្សាន្តលើផ្ទៃដី ១២០ហិកតារ ដែលគម្រោងនេះបានចាប់ផ្ដើមតាំងពីឆ្នាំ២០០៦ ដោយគេប៉ាន់ប្រមាណថា នឹងត្រូវចំណាយពេលក្នុងការអភិវឌ្ឍ ១០ឆ្នាំ។

គួររម្លឹកថា គម្រោងអភិវឌ្ឍន៍ កោះពស់ បានទទួលអាជ្ញាប័ណ្ណអភិវឌ្ឍន៍ពីរាជរដ្ឋាភិបាល កម្ពុជា កាលពី ខែកញ្ញា ឆ្នាំ២០០៦ និងបានចាប់ផ្តើមសាងសង់ស្ពាននៅ ឆ្នាំ២០០៨។

ដើម្បីអភិវឌ្ឍន៍តំបន់កោះពស់ទាំងមូលឲ្យក្លាយជារមណីយដ្ឋានលំដាប់ពិភពលោក ក្រុមហ៊ុន កោះពស់ បានចំណាយថវិកា ៣០០លានអឺរ៉ូ ឬប្រហែលជាង ៤០០លានដុល្លារ។ ការវិនិយោគកោះពស់ឲ្យក្លាយទៅជាទីកម្សាន្តមួយថ្នាក់ពិភពលោកនេះ គេរំពឹងទុកថានឹងបង្កើតឱកាសការងារដល់ប្រជាពលរដ្ឋប្រមាណពី ២ម៉ឺន ទៅ ២ម៉ឺន៥ពាន់នាក់ ដែលដែលជាការវិនិយោពីមហាសេដ្ឋីជនជាតិរុស្ស៊ី គឺលោក អាទ្បិចសិនឌឺ ត្រូហ្វីម៉ូវ។

ជាមួយគ្នានេះដែរ សេចក្តីព្រាងប្លង់គោលប្រើប្រាស់ដីក្រុងព្រះសីហនុ ចក្ខុវិស័យ ឆ្នាំ២០៣៨ ដែលប្រកាសព័ត៌មាននាពេលកន្លងទៅរបស់ក្រសួងរៀបចំដែនដីនគរូបនីយកម្ម និងសំណង់ បានបញ្ជាក់ថា ប្លង់គោលប្រើប្រាស់ដីក្រុងព្រះសីហនុ មានចក្ខុវិស័យរៀបចំនិងអភិវឌ្ឍ «ក្រុងព្រះសីហនុជាទីក្រុងស្នូល នៃប៉ូលអភិវឌ្ឍន៍ជាតិប្រកបដោយចីរភាពនៅតំបន់ឆ្នេរសមុទ្រកម្ពុជាក្នុងការជំរុញកំណើនសេដ្ឋកិច្ច អភិវឌ្ឍន៍ធុរកិច្ច ពាណិជ្ជកម្ម និងទេសចរណ៍ប្រកបដោយភាពរស់រវើក ឆ្លាត និងបរិយាប័ន្ន» ។

បន្ថែមទៀតនោះ ប្លង់គោលប្រើប្រាស់ដីក្រុងព្រះសីហនុ ចក្ខុវិស័យឆ្នាំ ២០៣៨ នឹងរួមចំណែកលើកកម្ពស់សូចនាករនៃការអភិវឌ្ឍតាមវិស័យ ក៏ដូចជាសេដ្ឋកិច្ចជាតិ៕

The post ក្រុមប្រឹក្សាអភិវឌ្ឍន៍កម្ពុជា បើកកិច្ចប្រជុំកែសម្រួលប្លង់គោលអភិវឌ្ឍន៍កោះពស់ ខេត្តព្រះសីហនុ appeared first on .

តើខេត្តព្រះសីហនុ មានកោះសរុបប៉ុន្មាន? តើមានក្រុមហ៊ុនប៉ុន្មាន កំពុងវិយោគលើកោះទាំងនោះ?

ឧកញ៉ាតូច — Mon, 08 Aug 2022 12:10:00 +0000

ខេត្តព្រះសីហនុ មានកោះសរុបប្រមាណចំនួន ៣២កោះ ដែលក្នុងនោះមានកោះចំនួន ១៩ ត្រូវបានវិនិយោគដោយក្រុមហ៊ុនឯកជនចំនួន ២៣។ នេះបើតាមកិច្ចប្រជុំស្តីពីធ្វើបច្ចុប្បន្នភាពព័ត៌មាន និងសន្តិសុខលម្ហសមុទ្រ កាលពីថ្ងៃទី០៣ ខែសីហា ឆ្នាំ២០២២។

ថ្លែងក្នុងកិច្ចប្រជុំជាមួយក្រុមការងារអគ្គលេខាធិការដ្ឋាន នៃគណៈកម្មាធិការជាតិសន្តិសុខលម្ហសមុទ្រ ស្តីពីធ្វើបច្ចុប្បន្នភាពពត៌មាន និងសន្តិសុខលម្ហសមុទ្រ លោក គង់ វិតាណៈ អភិបាលរងខេត្តព្រះសីហនុ បានឱ្យដឹងថាខេត្តព្រះសីហនុ មានកោះចំនួន៣២ ក្នុងនោះ៖
-ក្រុងព្រះសីហនុ មានកោះចំនួន ៥ មានក្រុមហ៊ុនចំនួន៤ វិនិយោគលើកោះ៤
-ក្រុងកោះរ៉ុង មានកោះ១៩ មានក្រុមហ៊ុនចំនួន៧ វិនិយោគលើកោះចំនួន៩
-ស្រុកព្រៃនប់ មានកោះចំនួន៧ មានក្រុមហ៊ុនចំនួន១២ វិនិយោគលើកោះចំនួន៦
-ស្រុកស្ទឹងហាវ មានកោះចំនួន១។

ក្នុងចំណោមកោះទាំង៣២ នៃខេត្តព្រះសីហនុ មានកោះចំនួន១៩ ត្រូវបានទទួលគោលការណ៍វិនិយោគ អភិវឌ្ឍពីរាជរដ្ឋាភិបាលដែលមាន ២៣ក្រុមហ៊ុន។

លោកអភិបាលរងខេត្តរូបនេះ ក៏បានបន្តថា ក្នុងនាមរដ្ឋបាលខេត្តស្វាគមន៍គណៈប្រតិភូដែលបានមកធ្វើបច្ចុប្បន្នភាពព័ត៌មានសន្តិសុខលម្ហសមុទ្រនៅខេត្តព្រះសីហនុ ក៏ដូចជានៅតាមបណ្តាកោះមួយចំនួនទៀតក្នុងខេត្តជាប់សមុទ្រ។

គួរបញ្ជាក់ដែរថា ដើម្បីធ្វើបច្ចុប្បន្នភាពព័ត៌មាន និងសន្តិសុខលម្ហសមុទ្រ ក្រុមការងារត្រូវការទិន្នន័យថ្នីៗបន្ថែម ដើម្បីធ្វើការផ្ទៀងផ្ទាត់ ពិសេសការវិនិយោគនៅលើកោះ និងផលប៉ះពាល់ទៅលើវិស័យការពារជាតិ ពិសេសទាមទាឱ្យក្រុមការងារប្រមូលទិន្នន័យ ដើម្បីធ្វើបច្ចុប្បន្នភាពឱ្យកាន់តែស៊ីជំរៅ និងមានប្រសិទ្ធភាពក្នុងការគ្រប់គ្រងដែនសមុទ្រកម្ពុជា៕ អត្ថបទ៖ រង្សី

The post តើខេត្តព្រះសីហនុ មានកោះសរុបប៉ុន្មាន? តើមានក្រុមហ៊ុនប៉ុន្មាន កំពុងវិយោគលើកោះទាំងនោះ? appeared first on .

រូបភាពពិតៗខាងក្នុងបរិវេណផ្ទះ តម្លៃរាប់លានដុល្លារលើកោះពស់ ធំទូលាយណាស់ សុទ្ធតែមានអាងហែលទឹក អាចមើលឃើញសមុទ្រ

ជំទាវឧកញ៉ាស្រីទីន — Fri, 10 Sep 2021 03:23:59 +0000

កោះពស់ ជាកោះឯកជនដែលមានការអភិវឌ្ឍលំនៅដ្ឋានប្រណីតលក្ខណៈអភិជន។ មានចម្ងាយត្រឹមតែ៤ឬ៥នាទីប៉ុណ្ណោះពីទីប្រជុំជនក្រុងព្រះសីហនុ ហើយការធ្វើដំណើរមានភាពងាយស្រួលមានស្ពានឆ្លងពីដីគោកភ្ជាប់មកកាន់កោះតែម្តង ។

ថ្មីៗនេះ បែកធ្លាយរូបភាពជាច្រើនសន្លឹកពីក្រុមកម្មករ បង្ហាញពីបរិវេណខាងក្នុងវិឡាប្រណីតដែលកំពុងអភិវឌ្ឍ។ បើតាមរូបភាព ផ្ទះវីឡានីមួយៗមានកម្ពស់ពីរជាន់ មានការរៀបចំសួនច្បារ មានទាំងអាងហែលទឹកដែលមើលឃើញសមុទ្រល្វឹងល្វើយ។

ផ្ទះវីឡានីមួយៗដែលមានតម្លៃខ្ទង់លានដុល្លារនេះ ត្រូវបានគេរចនាយ៉ាងផ្ចិតផ្ចង់សម្រាប់ការរស់នៅបែបស៊ីវីល័យ ហើយទំហំផ្ទះមានភាពធំទូលាយ ងាយស្រួលក្នុងការរស់នៅជាលក្ខណៈឯកជន។

កោះពស់ត្រូវបានរដ្ឋាភិបាលផ្តល់សិទ្ធិឲ្យក្រុមហ៊ុនឯកជនអភិវឌ្ឍទៅជារីសតលំហែកាយ លក្ខណៈអភិជន។ ក្នុងគម្រោងមានការសាងសង់ផ្ទះវីឡាបែបប្រណិតសរុប ៣៦ខ្នង សុទ្ធសឹងតែនៅជាប់មាត់សមុទ្រ និងបែងចែកចេញជា៥ប្រភេទ រួមមានវីឡាអរឃីត (Orchid) វីឡាឡូធឹស (Lotus) វីឡាផ្លាំមឺរៀ (Plumeria) វីឡាមែកណូលៀ (Magnolia) និងវីឡាចាស្មីន (Jasmine)។ ក្នុងគម្រោងទាំំងមូល ក៏មានការសាងសង់ស្ពានឆ្លងពីដីគោកទៅកាន់កោះផងដែរ៕

The post រូបភាពពិតៗខាងក្នុងបរិវេណផ្ទះ តម្លៃរាប់លានដុល្លារលើកោះពស់ ធំទូលាយណាស់ សុទ្ធតែមានអាងហែលទឹក អាចមើលឃើញសមុទ្រ appeared first on .

មើលកាន់តែកៀកផ្ទះវីឡាលំដាប់អភិជននៅលើកោះពស់ មួយល្វែងរាប់លានដុល្លារ គ្រប់ផ្ទះសុទ្ធតែបែរទៅរកសមុទ្រ

ឧកញ៉ាសម្រែ — Tue, 07 Sep 2021 03:34:52 +0000

កោះពស់ត្រូវបានរដ្ឋាភិបាលផ្តល់សិទ្ធិឲ្យក្រុមហ៊ុនឯកជនអភិវឌ្ឍទៅជារីសតលំហែកាយ លក្ខណៈអភិជន ប្រកបទៅដោយឯកជនភាពនៅលើកោះ។

គម្រោងមានការសាងសង់ផ្ទះវីឡាបែបប្រណិតសរុប ៣៦ខ្នង សុទ្ធសឹងតែនៅជាប់មាត់សមុទ្រ និងបែងចែកចេញជា៥ប្រភេទ រួមមានវីឡាអរឃីត (Orchid) វីឡាឡូធឹស (Lotus) វីឡាផ្លាំមឺរៀ (Plumeria) វីឡាមែកណូលៀ (Magnolia) និងវីឡាចាស្មីន (Jasmine)។

ទំហំផ្ទះនីមួយៗសុទ្ធតែធំៗ ពោលគឺរហូតដល់ ៥៦៥ម៉ែត្រការ៉េ ដោយមានការរចនាយ៉ាងល្អឥតខ្ចោះ ស័ក្កសមខ្ទង់ចំណាយរាប់លានដុល្លារ។ បើទោះបីអភិវឌ្ឍនៅលើកោះ តែការធ្វើដំណើរទៅមកមិនពិបាកមកប្រជុំជនក្រុងព្រះសីហនុមិនពិបាកនោះទេ តាមរយៈស្ពានដែលក្រុមហ៊ុនបានសាងសង់រួចរាល់តភ្ជាប់ពីកោះមកដីគោក។

គម្រោងវីឡាលំហែកាយបែបអភិជននេះត្រូវបានអភិវឌ្ឍន៍ឡើងដោយក្រុមហ៊ុន កោះពស់ (ខេមបូឌា) អ៊ីនវេសមិនគ្រុប អិលធីឌី (KPIG)។ បើតាមប្រភពមួយទម្លាយតម្លៃផ្ទះអភិជននៅលើកោះពស់ មួយល្វែងចាប់ពីខ្ទង់លានដុល្លារទៅ៕

The post មើលកាន់តែកៀកផ្ទះវីឡាលំដាប់អភិជននៅលើកោះពស់ មួយល្វែងរាប់លានដុល្លារ គ្រប់ផ្ទះសុទ្ធតែបែរទៅរកសមុទ្រ appeared first on .