កូនក្តាមសេះជាង៨សែនក្បាល បានលែងចូលសមុទ្រ នៅខេត្តកំពត ដើម្បីរួមចំណែកលើកកម្ពស់ជីវភាពរស់នៅរបស់បងប្អូនសហគមន៍នេសាទ

Kem sinath — Tue, 16 Jun 2026 09:49:00 +0000

កាលពីថ្ងៃទី១៥ ខែមិថុនា ឆ្នាំ២០២៦ លោក ឃុន សាវឿន រដ្ឋលេខាធិការ ដឹកនាំក្នុងពិធី «លែងកូនក្តាមសេះចំនួនជាង ៨សែនក្បាល» ចូលទៅក្នុងតំបន់សមុទ្រ នៃសហគមន៍នេសាទចំនួន៥ នៅខេត្តកំពតមានដូចជា៖ សហគមន៍នេសាទព្រែកត្នោត ត្រពាំងរពៅ ទទឹងថ្ងៃ ចង្ហោន និងសហគមន៍នេសាទកែបថ្មី។

ពិធីលែងកូនក្តាមនោះ ក៏មានការចូលរួមពីលោកស្រី ងិន សូនាថ អនុរដ្ឋលេខាធិការ លោកស្រី Rebekah Bell ប្រធានអង្គការស្បៀង និងកសិកម្មនៃសហប្រជាជាតិប្រចាំកម្ពុជា (FAO) លោក យន់ ដារិទ្ធ ប្រធាននាយកដ្ឋានអភិវឌ្ឍន៍វារីវប្បកម្ម តំណាងមន្ទីរកសិកម្ម រុក្ខាប្រមាញ់ និងនេសាទខេត្តកំពត ខណ្ឌជលផលខេត្ត អាជ្ញាធរមូលដ្ឋាននិងបងប្អូនសហគមន៍នេសាទ។

នាឱកាសនោះ លោក ឃុន សាវឿន បានគូសបញ្ជាក់ថា កូនក្តាមសេះចំនួនជាង៨សែនក្បាល ដែលបានលែងចូលក្នុងសមុទ្រនេះ គឺមជ្ឈមណ្ឌលស្រាវជ្រាវ និងអភិវឌ្ឍន៍ វារីវប្បកម្មសមុទ្រ (MARDec) បានថែបំប៉នបន្ទាប់ពីភ្ញាស់ពីពងក្តាមធម្មជាតិ។ ការលែងកូនក្តាមសេះ ដើម្បីបង្កើនធនធានជលផលនៅក្នុងធម្មជាតិ សំដៅរួមចំណែកលើកកម្ពស់ជីវភាពរស់នៅ បងប្អូនសហគមន៍នេសាទ ដែលរស់នៅអាស្រ័យផលពីការនេសាទនៅតាមតំបន់ឆ្នេរសមុទ្រ ឱ្យកាន់តែមាននិរន្តរភាពសេដ្ឋកិច្ចក្នុងគ្រួសារ។

លោកក៏បានអំពាវនាវ ដល់ប្រជានេសាទចូលរួមជាមួយអាជ្ញាធរមានសមត្ថកិច្ច ជួយការពារ និងថែរក្សាធនធានជលផល តាមរយៈការប្រើប្រាស់ឧបករណ៍នេសាទតាមច្បាប់កំណត់ ទប់ស្កាត់ការនេសាទខុសច្បាប់ និងជួយការពារជម្រករបស់វារីសត្វ។ ក្នុងករណីនេសាទបានក្តាមពងក្រៅស្នូក សូមលែងចូលក្តាមនោះទៅក្នុងសមុទ្រវិញ ឬប្រគល់ជូនអាជ្ញាធរ សហគមន៍នេសាទដែលនៅជិតបំផុត។

សូមបញ្ជាក់ថា គម្រោងCamAdapt នេះត្រូវបានអនុវត្តដោយក្រសួងកសិកម្ម រុក្ខាប្រមាញ់ និងនេសាទ និងក្រសួងបរិស្ថាន ជាមួយនឹងការគាំទ្របច្ចេកទេសពី អង្គការFAO និងថវិកាពីមូលនិធិបរិស្ថានសកល (GEF) Global Environment Facility (GEF) CamAdapt ៕

The post កូនក្តាមសេះជាង៨សែនក្បាល បានលែងចូលសមុទ្រ នៅខេត្តកំពត ដើម្បីរួមចំណែកលើកកម្ពស់ជីវភាពរស់នៅរបស់បងប្អូនសហគមន៍នេសាទ appeared first on .

កូនក្តាមសេះជាងកន្លះលានក្បាល បានព្រលែងចូលដែនសមុទ្រខេត្តកែប

Kem sinath — Tue, 12 May 2026 03:08:28 +0000

អគ្គនាយករងនៃអគ្គនាយកដ្ឋានជលផល លោក ថាយ សុមុនី កាលពីថ្ងៃទី១១ ខែឧសភា បានដឹកនាំក្រុមការងារជំនាញ និងសហគមន៍នេសាទចំនួន៣ ចុះព្រលែងកូនក្តាមសេះចំនួនសរុប៥១ម៉ឺនក្បាល ចូលដែនសមុទ្រខេត្តកែប ក្រោមគម្រោង CamAdapt ដែលជាជំហានដ៏សំខាន់មួយក្នុងកិច្ចខិតខំប្រឹងប្រែងរបស់កម្ពុជាក្នុងការស្ដារប្រព័ន្ធអេកូឡូស៊ីសមុទ្រ និងពង្រឹងភាពធន់របស់សហគមន៍នៅតំបន់ឆ្នេរ។

លោក ថាយ សុមុនី បានឱ្យដឹងថា ការលែងកូនក្តាមសេះជាងកន្លះលានក្បាលចូលទៅក្នុងដែនសមុទ្រខេត្តកែប គឺជាជំហានដ៏សំខាន់មួយក្នុងកិច្ចខិតខំប្រឹងប្រែងរបស់កម្ពុជាក្នុងការស្ដារប្រព័ន្ធអេកូឡូស៊ីសមុទ្រ និងពង្រឹងភាពធន់របស់សហគមន៍នៅតំបន់ឆ្នេរ។ លោកបន្តថា ក្នុងរយៈពេលពី ៤ ទៅ ៥ ខែខាងមុខ ក្តាមអាចត្រូវបានប្រមូលផលដោយសហគមន៍នេសាទ។

ជាមួយគ្នានេះ លោក អ៊ុក ជាន តំណាងមកពីសហគមន៍នេសាទកំពង់ត្រឡាច ក៏បានឱ្យដឹងថា ការលែងក្តាមនេះនឹងជួយបង្កើនស្តុកផលនេសាទ និងធ្វើឱ្យប្រព័ន្ធអេកូឡូស៊ីនៅក្នុងសហគមន៍ឱ្យកាន់តែប្រសើរឡើង។ នៅពេលចំនួនក្តាមកើនឡើង វាក៏នឹងជួយបង្កើនចំណូលសម្រាប់សមាជិកសហគមន៍ផងដែរ។

គួរបញ្ជាក់ថា បច្ចុប្បន្ននេះ សហគមន៍ក៏កំពុងជំរុញការអនុវត្តនេសាទប្រកបដោយចីរភាព ការការពារជម្រកធម្មជាតិ និងវិធានការអភិរក្សរយៈពេលវែង ដើម្បីគាំទ្រដល់ការស្ដារឡើងវិញនៃជីវចម្រុះតំបន់ឆ្នេរសម្រាប់មនុស្សជំនាន់ក្រោយ៕

The post កូនក្តាមសេះជាងកន្លះលានក្បាល បានព្រលែងចូលដែនសមុទ្រខេត្តកែប appeared first on .