ក្រដាសប្រាក់

ធនាគារកណ្ដាលអាហ្សង់ទីន ពិចារណាបោះពុម្ពលុយថ្មីមានមុខតារាឆ្នើម Leo Messi

ឧកញ៉ាសំពៅ — Thu, 22 Dec 2022 05:51:00 +0000

កាលពីពេលថ្មីៗនេះ ធនាគារកណ្ដាលនៃប្រទេសអាហ្សង់ទីនបានបើកកិច្ចប្រជុំបន្ទាន់មួយ ក្នុងគោលបំណងបោះពុម្ពក្រដាសប្រាក់ថ្មី ដែលនឹងដាក់រូប Leo Messi និងក្រុមជម្រើសជាតិអាហ្សង់ទីន ដែលបានឈ្នះពានរង្វាន់បាល់ទាត់ពិភពលោក FIFA World Cup 2022 នៅប្រទេសកាតា។

យោងតាមការចុះផ្សាយពី The Sun បានឲ្យដឹងថា ក្រដាសប្រាក់ដែលកំពុងត្រូវពិចារណាបោះពុម្ពថ្មីនោះ គឺជាក្រដាសប្រាក់តម្លៃ ១ ០០០ ប៉េសូ ឬប្រហែល ៦ ដុល្លារអាមេរិក។

ដោយឡែក El Financiero វិញ ក៏បានរាយការណ៍ដែរថា មន្ត្រីនៅស្ថាប័នហិរញ្ញវត្ថុនៃប្រទេសអាហ្សង់ទីន អាចនឹងសម្រេចក្ដីបំណងខាងលើនេះ ដើម្បីបន្សល់ទុកជាស្នាដៃដែលបង្ហាញពីជ័យជំនះរបស់ពួកគេនៅព្រឹត្តិការណ៍ World Cup។

បន្ថែមពីនោះ ក៏មានលឺល្ហៀងៗថា អាហ្សង់ទីនក៏នឹងចារអក្សរ La Scaloneta នៅពីក្រោយក្រដាសប្រាក់ថ្មីនោះផងដែរ ខណៈវាគឺជារហស្សនាមរបស់វីរបុរសបាល់ទាត់អាហ្សង់ទីនម្នាក់ទៀតគឺ Lionel Scaloni៕

The post ធនាគារកណ្ដាលអាហ្សង់ទីន ពិចារណាបោះពុម្ពលុយថ្មីមានមុខតារាឆ្នើម Leo Messi appeared first on .

ក្រដាសប្រាក់មានរូបព្រះមហាក្សត្រ King Charles នឹងដាក់ឲ្យចរាចរនាពាក់កណ្ដាលឆ្នាំ ២០២៤

ឧកញ៉ាសំពៅ — Tue, 20 Dec 2022 07:31:32 +0000

ក្រដាសប្រាក់តំបូងដែលមានរូបព្រះមហាក្សត្រអង់គ្លេស King Charles III នឹងមានវត្តមាននាពាក់កណ្ដាលឆ្នាំ ២០២៤។ នេះបើតាមការឲ្យដឹងពីធនាគារអង់គ្លេស Bank of England បាននិយាយកាលពីថ្ងៃអង្គារ។

“ក្រដាសប្រាក់ដែលមានរូបព្រះមហាក្សត្រ នឹងលេចវត្តមានលើក្រដាសប្រាក់ ៤ ប្រភេទគឺ ៥ផោន ១០ ផោន ២០ ផោន និង ៥០ផោន ដោយមិនមានការផ្លាស់ប្តូរផ្សេងទៀតចំពោះការរចនាដែលមានស្រាប់”។

ដោយឡែក សម្រាប់កាក់ដែលមានរូបទ្រង់វិញ គឺនឹងដាក់ឲ្យចរាចរនៅក្នុងខែនេះតែម្ដង។ នេះបើតាមការប្រកាសពី Royal Mint។

សូមជម្រាបដែរថា បន្ទាប់ពីទ្រង់ឡើងគ្រងរាជ្យបន្ទាប់ពីព្រះមាតា Queen Elizabeth II ដែលបានសោយទិវង្គតនាខែកញ្ញា ក្រដាសប្រាក់ដែលចរាចររាប់ពាន់លានផោន នឹងត្រូវប្រមូលចូលធនាគារវិញ ដើម្បីផ្លាស់ប្ដូររូបថតនៅលើក្រដាសប្រាក់ទាំងអស់៕

The post ក្រដាសប្រាក់មានរូបព្រះមហាក្សត្រ King Charles នឹងដាក់ឲ្យចរាចរនាពាក់កណ្ដាលឆ្នាំ ២០២៤ appeared first on .

ក្រដាសប្រាក់ជិត ៥ លានសន្លឹកដែលមានរូបម្ចាស់ក្សត្រី Elizabeth II នឹងត្រូវផ្លាស់ប្ដូររូបភាព

ឧកញ៉ាសំពៅ — Mon, 12 Sep 2022 08:53:00 +0000

ក្រដាសប្រាក់រាប់លានសន្លឹក ដែលកំពុងចរាចរនៅចក្រភពអង់គ្លេស គឺសុទ្ធតែមានរូបម្ចាស់ក្សត្រី Elizabeth II ប៉ុន្តែក្រោយការចូលទិវង្គតរបស់ទ្រង់ ក្រដាសប្រាក់ទាំងនោះអាចនឹងត្រូវផ្លាស់ប្ដូររូបភាពថ្មី។

យោងតាមការចុះផ្សាយពី CNN បានឲ្យដឹងថា ក្រដាសប្រាក់ច្រើនជាង ៤,៧ លានសន្លឹកដែលមានរូបម្ចាស់ក្សត្រី Elizabeth II កំពុងមានចរាចរនៅអង់គ្លេស ដែលគិតជាទឹកប្រាក់គឺប្រហែល ៨២ ពាន់លានផោន ឬប្រមាណ ៩៥ ពាន់លានដុល្លារ។

ក្រៅពីក្រដាសប្រាក់ ក៏នៅមានដូចជាកាក់ដែលមានរូបទ្រង់ទៀតផង ហើយបើតាមទិន្នន័យផ្ដល់ឲ្យដោយធនាគារកណ្ដាលបានបញ្ជាក់ថា មានកាក់ប្រមាណ ២៩ ពាន់លានកាក់ដែលមានរូបរបស់ម្ចាស់ក្សត្រី Elizabeth II។

សារព័ត៌មានខាងលើបានអះអាងថា ក្រដាសប្រាក់ថ្មីនឹងត្រូវណែនាំក្រោយចប់ពិធីកាន់ទុក្ខម្ចាស់ក្សត្រី ស្របពេលធនាគារកណ្ដាលបង្ហើបថា ក្រដាសប្រាក់ចាស់នឹងអនុញ្ញាតឲ្យប្រើប្រាស់ត្រឹមរយៈពេលកំណត់មួយ។

សូមជម្រាបដែរថា មិនមែនមានតែក្រដាសប្រាក់នៅអង់គ្លេសឡើយដែលមានរូបម្ចាស់ក្សត្រី Elizabeth II ពោលនៅប្រទេសផ្សេងៗដែលធ្លាប់ស្ថិតនៅក្រោមអាណានិគមអង់គ្លេសក៏បានប្រើប្រាស់លុយដែលមានរូបទ្រង់ដូចគ្នា តួយ៉ាងដូចជា កាណាដា និងអូស្ត្រាលីជាដើម៕

The post ក្រដាសប្រាក់ជិត ៥ លានសន្លឹកដែលមានរូបម្ចាស់ក្សត្រី Elizabeth II នឹងត្រូវផ្លាស់ប្ដូររូបភាព appeared first on .

ក្រដាសប្រាក់១៥០០០រៀល ទទួលបានពានរង្វាន់ធនបត្រថ្មីឆ្នើមប្រចាំតំបន់អាស៊ី និងប៉ាស៊ីហ្វិកប្រចាំឆ្នាំ២០១៩

ឧកញ៉ា ឆ្នាំងដី — Sun, 10 Apr 2022 12:00:44 +0000

ធនបត្រអនុស្សាវរីយ៍ប្រភេទ ១៥០០០រៀល ទទួលបានពានរង្វាន់ធនបត្រថ្មីឆ្នើមប្រចាំតំបន់អាស៊ី និងប៉ាស៊ីហ្វិកប្រចាំឆ្នាំ២០១៩ ពីស្ថាប័នអន្តរជាតិ Reconnaisance ក្នុងសន្និសីទការបោះពុម្ភធនបត្រប្រកបដោយសុវត្ថិភាពខ្ពស់នៅអាស៊ី (High Security Printing Asia) លើកទី១៨ នៅទីក្រុង Yokohama ប្រទេសជប៉ុន។

នេះបើតាមការបញ្ជាក់របស់ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជា តាមរយៈលិខិតចុះថ្ងៃទី៨ ខែមេសា ឆ្នាំ២០២២ រាយការណ៍ជូនសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។

ធនបត្រអនុស្សាវរីយ៍ប្រភេទ១៥០០០រៀលនេះ ត្រូវបានទទួលការអនុញ្ញាតពីរាជរដ្ឋាភិបាលឱ្យធនាគារជាតិនៃកម្ពុជាបោះពុម្ភ ដើម្បីចូលរួមអបអរសាទខួបអនុស្សាវរីយ៍គម្រប់១៥ឆ្នាំ នៃការគ្រងព្រះបរមរាជសម្បត្តិរបស់ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា។

តាមរយៈលិខិតដដែលឯកឧត្តម ជា ចាន់តូ បានបញ្ជាក់ថា ការសម្រេចផ្តល់ពានរង្វាន់ធនបត្រថ្មីឆ្នើមនេះ គឺដោយសារបច្ចេកទេសនៃការផលិតក្នុងស្រុករបស់ធនាគារជាតិនៃកម្ពុជា មានលក្ខណៈទំនើបកម្រិតខ្ពស់ និងសុវត្ថិភាព ដោយមានការរួមបញ្ចូលនូវសិល្បៈនៃការរចនា និងបច្ចេកវិទ្យា ដែលបានឆ្លុះបញ្ចាំងពីបេតិកភណ្ឌវប្បធម៌ក្នុងប្រទេស តាមរយៈការរចនារំលេចនូវនិមិត្តសញ្ញាលើធនបត្រចំពោះជាតិ ពិសេសមានបច្ចេកវិទ្យាខ្ពស់ក្នុងការកាពារការក្លែងបន្លំ។

ពានរង្វាន់ប្រភេទនេះ មិនត្រូវបានធ្វើជារៀងរាល់ឆ្នាំទេ គឺធ្វើឡើងនៅពេលដែលមានវត្តមានធនបត្រដែលមានលក្ខណៈសម្បត្តិស័ក្តិសម ប្រកបដោយគុណភាព និងបច្ចេកទេសតែប៉ុណ្ណោះ។

សូមជម្រាបជូនថា ស្ថាប័នអន្តរជាតិ Reconnaisance បង្កើតឡើងតាំងពីឆ្នាំ១៩៨៨ និងត្រូវបានទទួលស្គាល់ថាជាស្ថាប័នផ្សព្វផ្សាយព័ត៌មានរូបិយបណ្ណដ៏មានឥទ្ធិពលនៅក្នុងឧស្សាហកម្មធនបត្រសកល ហើយក៏ជាប្រភពនៃព័ត៌មានអន្តរជាតិឈានមុខអំពីបច្ចេកវិទ្យាថ្មីៗនៃការផលិតធនបត្រ សុវត្ថិភាពបែបអុបទិក និងឌីជីថល និងប្រព័ន្ធផ្ទៀងផ្ទាត់ភាពត្រឹមត្រូវនៃអត្តសញ្ញាណធនបត្រនីមួយៗផងដែរ៕

The post ក្រដាសប្រាក់១៥០០០រៀល ទទួលបានពានរង្វាន់ធនបត្រថ្មីឆ្នើមប្រចាំតំបន់អាស៊ី និងប៉ាស៊ីហ្វិកប្រចាំឆ្នាំ២០១៩ appeared first on .