ក្រុងក្រចេះ

លោក ស៊ុន ចាន់ថុល អះអាងថា ខ្សែផ្លូវនេះជាផ្នែកមួយនៃផ្លូវអាស៊ានហាយវ៉េយ តភ្ជាប់ពីទីក្រុងគុនមីងប្រទេសចិន ឆ្ពោះទៅកំពង់ផែក្រុងព្រះសីហនុ

ឧកញ៉ាកោះក្របី — Mon, 07 Feb 2022 04:16:05 +0000

ទេសរដ្ឋមន្ត្រី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានលើកឡើងអំពីសក្តានុពលនៃកំណាត់ផ្លូវជាតិលេខ៧ ដែលតភ្ជាប់ពីរាជធានីភ្នំពេញ ឆ្លងកាត់ខេត្តសំខាន់ៗ ដែលបម្រើឱ្យចរាចរណ៍សម្រាប់សកម្មភាពផ្លាស់ប្តូរសេដ្ឋកិច្ច ពាណិជ្ជកម្ម និងទេសចរណ៍នៅក្នុងប្រទេស។

ថ្លែងក្នុងពិធីសម្ពោធបើកឱ្យប្រើប្រាស់ជាផ្លូវការកំណាត់ផ្លូវជាតិលេខ៧ មានប្រវែងសរុប ៩៣,៥៦គីឡូម៉ែត្រ ពីរង្វង់មូលខ្លាស្ទុះ ស្ថិតក្នុងក្រុងក្រចេះ ទៅស្រុកសំបូរ ខេត្តក្រចេះ នាព្រឹកថ្ងៃចន្ទ ទី០៧ កុម្ភៈ លោក ស៊ុន ចាន់ថល បានគូសបញ្ជាក់ថា ពីសក្តានុពលនៃកំណាត់ផ្លូវជាតិលេខ ៧ ដែលមានខេត្តកំពង់ចាម ត្បូងឃ្មុំ ក្រចេះ ស្ទឹងត្រែង និងឆ្ពោះទៅតំបន់ប៉ូលសេដ្ឋកិច្ចទី៤ របស់កម្ពុជា ស្ថិតនៅភូមិភាគឦសាននៃប្រទេស ក្នុងន័យបម្រើឱ្យចរាចរណ៍សម្រាប់សកម្មភាពផ្លាស់ប្តូរសេដ្ឋកិច្ច ពាណិជ្ជកម្ម និងទេសចរណ៍នៅក្នុងប្រទេស។

ជាងនេះទៀត ខ្សែផ្លូវនេះ គឺជាផ្នែកមួយនៃផ្លូវអាស៊ានហាយវ៉េយលេខ១១ (AH11) ឬរបៀងកណ្តាលរបស់មហាអនុតំបន់មេគង្គ ដែលតភ្ជាប់ពីទីក្រុងគុនមីងនៅភាគខាងត្បូងនៃប្រទេសចិន ឆ្លងកាត់ទីក្រុងវៀងច័ន្ទនៃប្រទេសឡាវ កាត់រាជធានីភ្នំពេញ និងឆ្ពោះទៅកំពង់ផែក្រុងព្រះសីហនុ។

បើតាមលោកទេសរដ្ឋមន្រ្តី កំណាត់ផ្លូវនេះក៏ជាផ្លូវជាតិដ៏សំខាន់ប្រទាក់ក្រឡាជាមួយនឹងផ្លូវជាតិមួយចំនួនទៀត សម្រាប់ជួយជំរុញការអភិវឌ្ឍតំបន់ ត្រីកោណអភិវឌ្ឍន៍កម្ពុជា-ឡាវ-វៀតណាម (CLV DTA) ដើម្បីប្រែក្លាយតំបន់ដាច់ស្រយាលរបស់ប្រទេសទាំង៣ ជាពិសេស ខេត្តត្បូងឃ្មុំ ក្រចេះ ស្ទឹងត្រែង រតនគិរី និងមណ្ឌលគិរីរបស់កម្ពុជាទៅជាតំបន់ដែលមានការអភិវឌ្ឍផងដែរ។

យ៉ាងណា សម្រាប់លោក ស៊ុន ចាន់ថុល សមិទ្ធផលថ្មីនេះគឺជាចំណងដៃដ៏ថ្លៃថ្លាមិនអាចកាត់ថ្លៃបាន ដែលកើតចេញពីចំណងមិត្តភាពដែកថែប និងកិច្ចសហប្រតិបត្តិការរវាង រាជរដ្ឋាភិបាលកម្ពុជា និងរដ្ឋាភិបាលចិន ជូនដល់បងប្អូនប្រជាពលរដ្ឋខេត្តក្រចេះ ព្រមទាំងប្រជាពលរដ្ឋនៅទូទាំងប្រទេសផងដែរ ដើម្បីប្រើប្រាស់ជាប្រយោជន៍ទូទៅ និងយូរអង្វែង៕

The post លោក ស៊ុន ចាន់ថុល អះអាងថា ខ្សែផ្លូវនេះជាផ្នែកមួយនៃផ្លូវអាស៊ានហាយវ៉េយ តភ្ជាប់ពីទីក្រុងគុនមីងប្រទេសចិន ឆ្ពោះទៅកំពង់ផែក្រុងព្រះសីហនុ appeared first on .

គម្រោងស្តារឡើងវិញកំណាត់ផ្លូវជាតិលេខ៧ ពីរង្វង់មូលខ្លាស្ទុះ ក្រុងក្រចេះ តម្លៃ៤០លានដុល្លារគ្រោងសម្ពោធថ្ងៃស្អែកក្រោមវត្តមានសម្តេច ហ៊ុន សែន

ឧកញ៉ាកោះក្របី — Sun, 06 Feb 2022 10:39:26 +0000

ជំនួយឥតសំណងរបស់ចិន កំណាត់ផ្លូវជាតិលេខ៧ ជិត៩៤គីឡូម៉ែត្រ នឹងត្រូវដាក់សម្ពោធជាផ្លូវការនៅថ្ងៃចន្ទ ទី០៧ ខែកុម្ភស្អែកនេះ។ តាមគម្រោង ពិធីនេះនឹងប្រព្រឹត្តទៅក្រោមវត្តមាន សម្តេច ហ៊ុន សែន នាយករដ្ឋមន្ត្រីនៃកម្ពុជា។

គម្រោងស្តារឡើងវិញ កំណាត់ផ្លូវជាតិលេខ៧ ពីរង្វង់មូលខ្លាស្ទុះ ស្ថិតក្នុងភូមិកាប៉ូ សង្កាត់អូរឬស្សី ក្រុងក្រចេះ រហូតដល់ចំណុចគីឡូម៉ែត្រលេខ៤២៤ អូរកណ្តៀរ ស្ថិតក្នុងភូមិអូរព្រះ ឃុំអូរគ្រៀង ស្រុកសំបូរ ចន្លោះ (គ.ម ៣៣១+២៥០ ដល់គ.ម ៤២៤+៩៤០) មានប្រវែងជិត ៩៤គីឡូម៉ែត្រ ដោយក្រាលបេតុងកៅស៊ូ AC កំរាស់ ០.១០ម៉ែត្រនេះ គឺជាជំនួយឥតសំណងពីប្រទេសចិន ដោយប្របើប្រាស់ថវិកាសាងសង់ប្រមាណជិត ៤០លានដុល្លារ។

កំណាត់ផ្លូវជាតិលេខ៧ ជាប្រភេទផ្លូវបេតុងកៅស៊ូ AC អនុវត្តដោយក្រុមហ៊ុនសំណង់សៀងហៃ (SCG) មានប្រវែងជិត ៩៤គីឡូម៉ែត្រ។

សូមជម្រាបជូនថា គម្រោងផ្លូវជាតិលេខ៧ គឺជាគម្រោងគ្រប់គ្រងទ្រព្យសម្បត្តិផ្លូវទី២ (Road Asset Management) មានប្រវែងសរុប ១៦៤ គីឡូម៉ែត្រ ដោយលើកកម្ពស់គុណភាពផ្លូវពី DBST ទៅជា AC ហើយគម្រោងនេះត្រូវបានបែងចែកជាបីការដ្ឋានធំៗ ប្រើប្រាស់រយៈពេលសាងសង់ចំនួន ១៨ខែ និងរយៈពេលថែទាំចំនួន៣៦ ខែ សាងសង់ដោយក្រុមហ៊ុនចិន ត្រួតពិនិត្យលក្ខណៈបច្ចេកទេសដោយក្រុមហ៊ុនកូរ៉េ និងចំណាយថវិកាសរុបប្រមាណ ៣៦ ៤៥៦ ០៦៤,៧៥ដុល្លារអាមេរិក។

ជាមួយគ្នានោះផងដែរ ប្រទេសកម្ពុជាក៏មានគម្រោងសាងសង់ស្ពានឆ្លងទន្លេមេគង្គមួយទៀតនៅខេត្តក្រចេះដែលគម្រោងនេះក៏ត្រូវបានសិក្សាចប់សព្វគ្រប់និងគ្រោងដាក់ដេញថ្លៃនៅពេលខាងមុខផងដែរដើម្បីជួយសម្រួលដល់ការធ្វើដំណើរនិងដឹកជញ្ជូនផលិតផលឆ្លងកាត់ទៅកាន់ខេត្តកំពង់ធំឱ្យបានឆាប់រហ័ស ចំណេញពេលវេលា និងកាត់បន្ថយការកកស្ទះចរាចរណ៍និងគ្រោះថ្នាក់ចរាចរណ៍៕

The post គម្រោងស្តារឡើងវិញកំណាត់ផ្លូវជាតិលេខ៧ ពីរង្វង់មូលខ្លាស្ទុះ ក្រុងក្រចេះ តម្លៃ៤០លានដុល្លារគ្រោងសម្ពោធថ្ងៃស្អែកក្រោមវត្តមានសម្តេច ហ៊ុន សែន appeared first on .