ក្រុងអរិយក្សត្រ

ពិធីប្រកាសដាក់ឱ្យដំណើរការរដ្ឋបាលក្រុងអរិយក្សត្រ ធ្វើឡើងនៅបុរី របស់ឧកញ៉ា គង់ ប៊ុនហាវ នារសៀលនេះ

ឧកញ៉ាដែនដី — Wed, 03 May 2023 00:59:42 +0000

នារសៀលថ្ងៃទី០៣ ខែឧសភា ឆ្នាំ២០២៣នេះ លោក គង់ សោភ័ណ្ឌ អភិបាលនៃគណៈអភិបាលខេត្តកណ្តាល នឹងអញ្ជើញជាអធិបតីភាព ក្នុងពិធីប្រកាសបង្កើត និងដាក់ឱ្យដំណើរការនូវរដ្ឋបាលក្រុងអរិយក្សត្រ នៃខេត្តកណ្តាល និងពិធីប្រកាសចូលកាន់មុខតំណែងជាអភិបាល អភិបាលរងនៃគណៈអភិបាលក្រុងអរិយក្សត្រ ដែលកម្មវិធីនេះ នឹងធ្វើឡើងនៅក្នុងបុរី វីទ្បា ទួលសង្កែ អរិយក្សត្រ របស់ ឧកញ៉ា គង់ ប៊ុនហាវ។

ដើម្បីឱ្យដំណើរការកម្មវិធីខាងលើនេះទៅបានរលូន នៅព្រឹកថ្ងៃពុធនេះ ក្រុមការងារបាននិងកំពុងរៀបចំទីតាំងប្រារព្វកម្មវិធីស្ទើរតែរួចរាល់អស់ហើយ ខណៈដែលទីតាំងប្រារព្វកម្មវិធី នឹងធ្វើឡើងនៅជាប់នឹងសាលាក្រុងអរិយក្សត្រតែម្តង ដែលស្ថិតនៅបុរី វីទ្បាទួលសង្កែ គម្រោងអរិយក្សត្រ (The Sanctuary City) នៅភូមិបារាជ សង្កាត់ស្វាយជ្រំ ក្រុងអរិយក្សត្រ ខេត្តកណ្តាល។

សូមជម្រាបថា កាលពីថ្ងៃទី០៦ ខែមេសា ឆ្នាំ២០២៣ សម្តេចតេជោ នាយករដ្ឋមន្ត្រី បានចេញអនុក្រឹត្យតែងតាំងលោក ចាន់ តារា អតីតអភិបាលរងស្រុកខ្សាច់កណ្តាល ជាអភិបាលក្រុងអរិយក្សត្រ ខណៈដែលការបោះឆ្នោតលើកទី១ ក្នុងការជ្រើសរើសក្រុមប្រឹក្សាក្រុងអរិយក្សត្រ នៃខេត្តកណ្តាល ត្រូវបានធ្វើឡើង កាលពីថ្ងៃទី០៩ ខែមេសា ឆ្នាំ២០២៣។

ជាមួយគ្នានេះ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ កាលពីថ្ងៃទី៧ ខែមេសា ឆ្នាំ២០២៣ ក៏បានចេញប្រកាសផ្ទេរភារកិច្ច និងតែងតាំងអភិបាលរងនៃគណៈអភិបាលក្រុងអរិយក្សត្រ ចំនួន ៦រូប ដែលរួមមាន៖ លោក ផៃ ច័ន្ទសុភី, លោក ផុន គឹមឡុង, លោក ស៊ឺង សុផាន់ណា, លោក ជា ហ៊ោ, លោក ចាន់ គឿយ និងលោកស្រី ធី សុវណ្ណថា។

គួររំឭកថា កាលពីថ្ងៃសុក្រ ទី២៣ ខែធ្នូ ឆ្នាំ២០២២ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានចេញអនុក្រឹត្យ បង្កើតក្រុងអរិយក្សត្រ នៃខេត្តកណ្តាល ដោយកាត់ឃុំចំនួន ០៦ ពីស្រុកខ្សាច់កណ្តាល គឺឃុំបាក់ដាវ ឃុំកោះឧកញ៉ាតី ឃុំព្រែកអំពិល ឃុំព្រែកលួង ឃុំព្រែកតាកូវ និងឃុំស្វាយជ្រំ និងឃុំចំនួន ០៥ ពីស្រុកល្វាឯម គឺឃុំអរិយក្សត្រ ឃុំសារិកាកែវ ឃុំពាមឧកញ៉ាអុង ឃុំព្រែកក្មេង និងឃុំបារុង ដែលធ្វើឱ្យក្រុងអរិយក្សត្រ មានសង្កាត់សរុបចំនួន ១១៕

The post ពិធីប្រកាសដាក់ឱ្យដំណើរការរដ្ឋបាលក្រុងអរិយក្សត្រ ធ្វើឡើងនៅបុរី របស់ឧកញ៉ា គង់ ប៊ុនហាវ នារសៀលនេះ appeared first on .

លោកស្រី ធី សុវណ្ណថា ទទួលការតែងតាំងជា «អភិបាលរង» ក្រុងអរិយក្សត្រ

ឧកញ៉ាដែនដី — Fri, 28 Apr 2023 03:20:03 +0000

អតីតសកម្មជនគណបក្សប្រឆាំង លោកស្រី ធី សុវណ្ណថា ត្រូវបានរាជរដ្ឋាភិបាលសម្រេចតែងតាំងប្រគល់តំណែងជាអភិបាលរង នៃគណៈអភិបាលក្រុងអរិយក្សត្រ ដែលជាក្រុងបង្កើតថ្មីនៅក្នុងខេត្តកណ្តាល។

ក្នុងសេចក្តីប្រកាសផ្ទេរភារកិច្ច និងតែងតាំងមន្ត្រីរាជការ ចុះហត្ថលេខាដោយសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ កាលពីថ្ងៃទី១៧ ខែមេសា ឆ្នាំ២០២៣ ក្រៅតែពីតែងតាំងលោកស្រី ធី សុវណ្ណថា ក៏សម្រេចផ្ទេរ និងតែងតាំងសមាសភាពអភិបាលរងក្រុង ៥នាក់ផ្សេងទៀតរួមមាន លោក ផៃ ច័ន្ទសុភី ផ្ទេរពីអភិបាលរងស្រុកល្វាឯម, លោក ផុន គឹមឡុង, លោក ស៉ឹង សុផាន់ណា, លោក ជា ហ៊ោ និង លោក ចាន់ គឿយ។

ក្រុងអរិយក្សត្រ ទើបត្រូវបានរាជរដ្ឋាភិបាល សម្រេចបង្កើតជាក្រុងថ្មីមួយរបស់ខេត្តកណ្តាល តាមរយៈអនុក្រឹត្យចុះថ្ងៃទី២៣ ខែធ្នូ ឆ្នាំ២០២២។ ក្រុងនេះមានសង្កាត់សរុបចំនួន១១ ដោយកាត់ពីស្រុកខ្សាច់កណ្តាលចំនួន៦ឃុំ និងពីស្រុកល្វាឯមចំនួន៥ឃុំ។

សង្កាត់ទាំង១១ នៃក្រុងអរិយក្សត្ររួមមាន៖ សង្កាត់បាក់ដាវ សង្កាត់កោះឧកញ៉ាតី សង្កាត់ព្រែកអំពិល សង្កាត់ព្រែកលួង សង្កាត់ព្រែកតាកូវ សង្កាត់ស្វាយជ្រុំ សង្កាត់អរិយក្សត្រ សង្កាត់សារិកាកែវ សង្កាត់ពាមឧកញ៉ាអុង សង្កាត់ព្រែកក្មេង និងសង្កាត់បារុង។ សម្រាប់ទីតាំងរដ្ឋបាល សាលាក្រុងអរិយក្សត្រ ស្ថិតនៅបុរី វីទ្បាទួលសង្កែ គម្រោងអរិយក្សត្រ (The Sanctuary City) នៅភូមិបារាជ សង្កាត់ស្វាយជ្រំ ក្រុងអរិយក្សត្រ ខេត្តកណ្តាល៕

The post លោកស្រី ធី សុវណ្ណថា ទទួលការតែងតាំងជា «អភិបាលរង» ក្រុងអរិយក្សត្រ appeared first on .

បុរី របស់ ឧកញ៉ា១រូប ត្រូវបានជ្រើសរើសធ្វើជាទីតាំង «សាលាក្រុងអរិយក្សត្រ»

ឧកញ៉ាដែនដី — Thu, 13 Apr 2023 02:22:13 +0000

រដ្ឋបាលក្រុងអរិយក្សត្រ បានសម្រេចយកទីតាំង បុរី វីទ្បា ទួលសង្កែ អរិយក្សត្រ របស់ ឧញ៉ា គង់ ប៊ុនហាវ ធ្វើជា «សាលាក្រុងអរិយក្សត្រ» បណ្តោះអាសន្ន ខណៈដែលក្រុងទើបបង្កើតថ្មីមួយនេះ ពុំទាន់មានអគាររដ្ឋបាលនៅឡើយ និងដើម្បីងាយស្រួលផ្តល់សេវាជូនប្រជាពលរដ្ឋ។

កាលពីព្រឹកថ្ងៃទី១២ ខែមេសា ឆ្នាំ២០២៣ ម្សិលមិញនេះ ក្រុមការងាររដ្ឋបាលក្រុងអរិយក្សត្រ បានរៀបចំបំពាក់ផ្លាកសាលាក្រុងអរិយក្សត្រ នៅបុរី វីទ្បាទួលសង្កែ គម្រោងអរិយក្សត្រ(The Sanctuary City) ស្ថិតនៅភូមិបារាជ សង្កាត់ស្វាយជ្រំ ក្រុងអរិយក្សត្រ ខេត្តកណ្តាល។ បុរី វីទ្បាទួលសង្កែ ជាទីតាំងមួយល្អ ដែលនៅកៀកជិតរាជធានីភ្នំពេញ ត្រឹមតែ ៣គីឡូម៉ែត្រប៉ុណ្ណោះ ពីទីក្រុងកោះពេជ្រ ហើយជាទីតាំងមួយ ប្រជាពលរដ្ឋនៅតំបន់អរិយក្សត្រតែងឆ្លងកាត់ញឹកញាប់ជាប្រចាំផងដែរ។ ដូច្នេះការជ្រើសរើសទីតាំងនេះ ធ្វើជា «សាលាក្រុងអរិយក្សត្រ» នឹងមានភាពងាយស្រួលទាំងអ្នកផ្តល់សេវា និងអ្នកទទួលសេវារដ្ឋបាលផ្សេងៗ។

ទទឹមនឹងនេះ កាលពីថ្ងៃទី០៦ ខែមេសា ឆ្នាំ២០២៣ សម្តេចតេជោ នាយករដ្ឋមន្ត្រី ក៏បានចេញអនុក្រឹត្យតែងតាំងលោក ចាន់ តារា អតីតអភិបាលរងស្រុកខ្សាច់កណ្តាល ជាអភិបាលក្រុងអរិយក្សត្រ ខណៈដែលការបោះឆ្នោតលើកទី១ ក្នុងការជ្រើសរើសក្រុមប្រឹក្សាក្រុងអរិយក្សត្រ នៃខេត្តកណ្តាល ត្រូវបានធ្វើឡើង កាលពីថ្ងៃទី០៩ ខែមេសា ឆ្នាំ២០២៣៕

ឧកញ៉ា គង់ ប៊ុនហាវ អគ្គនាយក ក្រុមហ៊ុន បុរី វីឡាទួលសង្កែ

សូមទស្សនាវីដេអូខាងក្រោម៖

The post បុរី របស់ ឧកញ៉ា១រូប ត្រូវបានជ្រើសរើសធ្វើជាទីតាំង «សាលាក្រុងអរិយក្សត្រ» appeared first on .

ឧកញ៉ា២រូប លើកឡើងពីតម្លៃអចលនទ្រព្យ តំបន់អរិយក្សត្រ ក្រោយការបង្កើតក្រុងថ្មី

ឧកញ៉ាដែនដី — Tue, 27 Dec 2022 04:14:47 +0000

ឧកញ៉ា២រូបដែលសុទ្ធតែអ្នកជំនាញអចលនទ្រព្យ បានបង្ហាញទស្សនៈស្រដៀងគ្នាចំពោះតម្លៃអចលទ្រព្យ នៅតំបន់អរិយក្សត្រ ថានឹងបន្តស្ទុះឡើងខ្លាំងទៅមុខទៀត បន្ទាប់ពីរាជរដ្ឋាភិបាល សម្រេចបង្កើតក្រុងអរិយក្សត្រ នៃខេត្តកណ្តាល កាលពីចុងសប្តាហ៍កន្លងទៅ។

ឧកញ៉ា ឃាង ពុទ្ធី ប្រធានក្រុមប្រឹក្សាភិបាលសមាគមអ្នកជំនាញអចលនទ្រព្យ

ឧកញ៉ា ឃាង ពុទ្ធី ប្រធានក្រុមប្រឹក្សាភិបាលសមាគមអ្នកជំនាញអចលនទ្រព្យ មានប្រសាសន៍ថា៖ “ដីធ្លីនៅតំបន់អរិយក្សត្រ ជាពេលដែលត្រូវឡើងថ្លៃ ពីព្រោះតំបន់ដែលនៅជិតរាជធានីភ្នំពេញ មានតែតំបន់ហ្នឹងមួយទេ (អរិយក្សត្រ) មានតម្លៃសមរម្យ ដោយកន្លងមកជួបបញ្ហាការលំបាកធ្វើដំណើរ។ បើគ្មានស្ពានទេត្រូវការពេលវេលាយូរក្នុងការឆ្លងសាឡង”។

លោកឧកញ៉ា បានគូសបញ្ជាក់ថា នៅពេលមានស្ពានប្រជាជនមានភាពងាយស្រួលក្នុងការធ្វើដំណើរ អ្នកវិនិយោគទុនជាតិ អន្តរជាតិ ក៏អាចវិនិយោគអចលនទ្រព្យនៅតំបន់នោះ ព្រោះចរាចរនឹងកើនឡើងខ្ពស់ ហើយការអភិវឌ្ឍនឹងរីកចម្រើនលឿន ដោយសារមានស្ពានភ្ជាប់ជាមួយរាជធានី។

ចំណែកឯឧកញ៉ា សំ សុខនឿន ប្រធានសមាគមអចលនទ្រព្យសកល បានថ្លែងថា ការបង្កើតក្រុងថ្មីនេះ គឺជាសញ្ញាណមួយដ៏ល្អដែលបង្ហាញថា តំបន់នោះជាតំបន់មានសក្តានុពល មានអត្រាប្រជាជន និងសេដ្ឋកិច្ចកើនឡើង ព្រមទាំងបង្ហាញថា រាជរដ្ឋាភិបាលនៅតែបន្តអភិវឌ្ឍន៍ហេដ្ឋារចនាសម្ព័ន្ធ នៅតាមតំបន់នានាជាបន្តបន្ទាប់ឱ្យកាន់តែរីកចម្រើន។

ឯឧកញ៉ា សំ សុខនឿន ប្រធានសមាគមអចលនទ្រព្យសកល

លោកឧកញ៉ា បានបន្ថែមថា កត្តានេះ ជាសញ្ញាណល្អមួយ សម្រាប់តម្លៃអចលនទ្រព្យ ដែលនឹងធ្វើឱ្យតម្លៃដីនឹងកើនឡើង។ លោកបន្ថែមថា អរិយក្សត្រ កន្លងមកគឺតំបន់ពេជ្យមិនទាន់ច្នៃ បើទោះបីជាតំបន់នេះ ស្ថិតនៅក្បែររាជធានីភ្នំពេញក្តី ប៉ុន្តែក្រោយពេលរាជរដ្ឋាភិបាល ចេញអនុក្រឹត្យបង្កើតក្រុងជាផ្លូវការបែបនេះ មានន័យថា រាជរដ្ឋាភិបាល កំពុងតែត្រៀមខ្លួន ជំរុញឱ្យតំបន់អរិយក្សត្រ កាន់តែរីកចម្រើនថែមទៀត ទាំងហេដ្ឋារចនាសម្ព័ន្ធ និងកំណើនប្រជាជន។

គួរបញ្ជាក់ថា កាលពីថ្ងៃសុក្រ ទី២៣ ខែធ្នូ ឆ្នាំ២០២២ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានចេញអនុក្រឹត្យ បង្កើតក្រុងអរិយក្សត្រ នៃខេត្តកណ្តាល ដោយកាត់ឃុំចំនួន ០៦ ពីស្រុកខ្សាច់កណ្តាល គឺឃុំបាក់ដាវ ឃុំកោះឧកញ៉ាតី ឃុំព្រែកអំពិល ឃុំព្រែកលួង ឃុំព្រែកតាកូវ និងឃុំស្វាយជ្រុះ និងឃុំចំនួន ០៥ ពីស្រុកល្វាឯម គឺឃុំអរិយក្សត្រ ឃុំសារិកាកែវ ឃុំពាមឧកញ៉ាអុង ឃុំព្រែកក្មេង និងឃុំបារុង។ នេះមានន័យថា ក្រុងអរិយក្សត្រ មានសង្កាត់សរុបចំនួន ១១ ខណៈដែលទីតាំងរដ្ឋបាល ក្រុងអរិយក្សត្រ គឺស្ថិតនៅក្នុងសង្កាត់អរិយក្សត្រ៕

The post ឧកញ៉ា២រូប លើកឡើងពីតម្លៃអចលនទ្រព្យ តំបន់អរិយក្សត្រ ក្រោយការបង្កើតក្រុងថ្មី appeared first on .