អ្នកលក់ជាការីទេសចរណ៍កម្ពុជាធំៗ ជាង៧៥ក្រុមហ៊ុន ដែលមានចាប់ពីក្រុមហ៊ុនអាកាសចរណ៍ជាតិ Air Cambodia និងសណ្ឋាគារម៉ាកអន្តរជាតិល្បីៗ មានការរំពឹងទុកលើលទ្ធផលចុះកិច្ចសន្យាទិញកញ្ចប់ទស្សនកិច្ចចាប់ពី ៧៥%ឡើងទៅ។ អ្នករៀបចំកម្មវិធី ក៏បានរៀបចំជូនអ្នកទិញនូវដំណើរទស្សនកិច្ចស្វែងយល់ពីសក្តានុពលទេសចរណ៍ទៅជាច្រើនគោលដៅទេសចរណ៍របស់កម្ពុជាដូចជារាជធានីភ្នំពេញ ខេត្តព្រះសីហនុ ខេត្តសៀមរាប។ល។

លោក ហួត ហាក់ រដ្ឋមន្រ្តីក្រសួងទេសចរណ៍ បានថ្លែងអំពីសក្តានុពលទេសចរណ៍ដ៏សម្បូរបែប និងកាលានុវត្តភាពវិនិយោគរបស់រាជធានីភ្នំពេញដែលជាបេះដូងនៃព្រះរាជាណាចក្រកម្ពុជា ជាមួយចំនួនប្រជាជនជាង២លាននាក់ ការអភិវឌ្ឍលើគ្រប់វិស័យ ជាពិសេសគឺវត្តមានដ៏ច្រើនរបស់ក្រុមហ៊ុនផ្តល់សេវាកម្មទេសចរណ៍ជិត ១៦០០ក្រុមហ៊ុន ដែលបានចូលរួមទទួលភ្ញៀវទេសចរជាតិ និងអន្តរជាតិដែលមកទស្សនារាជធានីភ្នំពេញជាង១១លាននាក់ ដែលក្នុងនោះភ្ញៀវទេសចរអន្តរជាតិមានជាង១,១លាននាក់ គិតត្រឹម១១ខែ ឆ្នាំ២០២៥ នេះ។

លោកបានវាយតម្លៃខ្ពស់ ព្រមទាំងថ្លែងអំណរគុណចំពោះការអញ្ជើញមករបស់ធុរជនចិនដែលពិតជាបានពិនិត្យមើលជាក់ស្តែងអំពីសក្តានុពលទេសចរណ៍ និងកាលានុវត្តវិនិយោគកម្ពុជានាពេលនេះ ជាពិសេសប្រទេសកម្ពុជា គឺជាគោលដៅទេសចរណ៍អន្តរជាតិប្រកបដោយសុខសុវត្ថិភាព មិត្តភាព បដិសណ្ឋារកិច្ចកក់ក្តៅ និងមានភាពទាក់ទាញ។

តាមរយៈស្ថិតិទេសចរណ៍រយៈពេល១១ខែក្នុងឆ្នាំ២០២៥ នេះ កម្ពុជា ទទួលបានភ្ញៀវទេសចរអន្តរជាតិសរុបជិត ៥,២ (ប្រាំលានពីរសែន) នាក់ ដែលក្នុងនោះ ភ្ញៀវទេសចរមកពីមិត្តចិន មានចំនួនច្រើនជាង ១,១ (មួយលានមួយសែន) នាក់ កើនឡើងជិត៤៤% ធៀបនឹងរយៈពេលដូចគ្នាក្នុងឆ្នាំ២០២៤។

លោកបានគូសបញ្ជាក់ថា ក្នុងន័យនេះកម្ពុជា ត្រូវតែត្រៀមលក្ខណសម្បត្តិឱ្យគ្រប់គ្រាន់ និងរួចរាល់ក្នុងការទទួលស្វាគមន៍ការត្រលប់មកវិញនូវភ្ញៀវទេសចរ និងវិនិយោគិនចិន តាមរយៈការសម្រួលបរិយាកាសទទួលបដិសណ្ឋារកិច្ចដល់ភ្ញៀវទេសចរ និងវិនិយោគិនរបស់មិត្តចិននៅកម្ពុជា ជាពិសេសលើការផ្តល់ការលើកលែងទិដ្ឋាការដល់ប្រជាជនចិនដែលធ្វើដំណើរមកកាន់ប្រទេសកម្ពុជា ដោយអាចស្នាក់នៅកម្ពុជាបានចំនួន១៤ថ្ងៃ ក្នុងដំណាក់កាលសាកល្បងដំបូង ដែលមានរយៈពេល ៤ខែ គិតចាប់ពីថ្ងៃទី១៥ ខែមិថុនា ដល់ថ្ងៃទី១៥ ខែតុលា ឆ្នាំ២០២៦ ក្នុងរដូវកាលបៃតងខាងមុខ។ តាមន័យនេះ ក្នុងរយៈពេល៤ខែខាងលើ ប្រជាជនចិនទាំងអស់ដែលកាន់លិខិតឆ្លងដែនសញ្ជាតិចិន ធ្វើដំណើរផ្ទាល់ពីប្រទេសចិន ឬ ពីប្រទេសដទៃផ្សេងទៀត អាចធ្វើដំណើរមកកម្ពុជា ដោយពុំមានការស្នើសុំទិដ្ឋាការជាមុន និងពុំមានបង់កម្រៃអ្វីឡើយ គឺតម្រូវឱ្យបំពេញត្រឹមតែ E-arrival card ប៉ុណ្ណោះ៕

The post ក្រុមហ៊ុនទេសចរណ៍ចិនធំៗ ចាប់អាម្មរណ៍លើកាលានុវត្តភាពវិនិយោគទេសចរណ៍ដ៏ទាក់ទាញរបស់កម្ពុជា appeared first on .

នេះបើយោងតាមជំនួបរវាងលោកឧបនាយករដ្ឋមន្ត្រីប្រចាំការ វង្សី វិស្សុត ជាមួយសមាគមសហព័ន្ធអ្នកវិនិយោគកម្ពុជា និងក្រុមហ៊ុនផលិតគ្រឿងបរិក្ខារអគ្គិសនីរបស់ចិន ដឹកនាំ លោក Chen Jun ប្រធានក្រុមហ៊ុន Guangxi Mingdian Electric Co., Ltd. កាលពីពេលថ្មីៗនេះ។

នៅក្នុងជំនួបនេះ លោក Chen Jun ប្រធានក្រុមហ៊ុន បានបង្ហាញពីគោលបំណងចង់បង្កើតបណ្តុំរោងចក្រឧស្សាហកម្មផលិតគ្រឿងបង្គុំនិងសម្ភារៈបរិក្ខារអគ្គិសនី និងអេឡិចត្រូនិក ដូចជា៖ ត្រង់ស្វូរ សូឡា និងឧបករណ៍សម្រាប់ប្រព័ន្ធវារីអគ្គិសនីនៅក្នុងខេត្តកំពង់ធំ ដើម្បីបំពេញតម្រូវការ និងចន្លោះខ្វះខាតក្នុងវិស័យថាមពល អគ្គិសនីនៅក្នុងប្រទេសកម្ពុជា ក៏ដូចជាលទ្ធភាពក្នុងការនាំចេញផងដែរ។

ជាការឆ្លើយតប លោកឧបនាយករដ្ឋមន្ត្រីប្រចាំការ វង្សី វិស្សុត បានស្វាគមន៍ ក្រុមហ៊ុន Guangxi Mingdian Electric Co., Ltd. ដែលបានបើកអាជីវកម្មផ្គត់ផ្គង់គ្រឿងបរិក្ខារអគ្គិសនីនៅកម្ពុជា និងបានបង្ហាញអំពីបំណងក្នុងការវិនិយោគគម្រោងបង្កើតបណ្តុំរោងចក្រឧស្សាហកម្មផលិតគ្រឿងបង្គុំសម្ភារៈបរិក្ខារអគ្គិសនី និងអេឡិចត្រូនិក នៅក្នុងខេត្តកំពង់ធំ ដែលស្ថិតនៅចំចំណុចកណ្តាលនៃប្រទេសកម្ពុជា។

 លោក រំពឹងថា តាមរយៈការបង្កើតបណ្តុំរោងចក្រឧស្សាហកម្មនេះ នឹងជួយធ្វើពិពិធកម្មមូលដ្ឋានសេដ្ឋកិច្ចខេត្តកំពង់ធំ ពីការពឹងផ្អែកខ្លាំងលើវិស័យកសិកម្ម ងាកមករកវិស័យឧស្សាហកម្ម និងកសិ-ឧស្សាហកម្ម ដែលម្ខាងនឹងជួយជំរុញសេដ្ឋកិច្ចរបស់ខេត្តកំពង់ធំ ក៏ដូចជាទូទាំងប្រទេស និងម្ខាងទៀត ជួយបង្កើតការងារ និងប្រាក់ចំណូលបន្ថែមជូនប្រជាជន។

គួរបញ្ជាក់ថា ក្រុមហ៊ុន Guangxi Mingdian Electric Co., Ltd. មានមូលដ្ឋាននៅទីក្រុងណាននីង តំបន់ស្វយ័តខេត្តក្វាងស៊ី នៃសាធារណរដ្ឋប្រជាមានិតចិន និងជាសហគ្រាសផលិតឧបករណ៍ថាមពលដ៏ធំមួយ ដែលរួមបញ្ចូលទាំងការស្រាវជ្រាវ និងការអភិវឌ្ឍ (R&D) ការផលិត ការលក់ សេវាកម្ម និងការដំឡើង។ ក្រុមហ៊ុននេះផលិតជាចម្បងនូវឧបករណ៍អគ្គិសនី ត្រង់ស្វូរ ឧបករណ៍បំប្លែងថាមពល

ទូហ្កាសបិទជិត និងអ៊ីសូឡង់ ព្រមទាំងឧបករណ៍ថាមពលផ្សេងៗទៀត ដោយមានមជ្ឈមណ្ឌលសាកល្បងផលិតផល មន្ទីរពិសោធន៍ដ៏ធំទូលាយ និងមជ្ឈមណ្ឌលប្រតិបត្តិការ និងថែទាំឌីជីថលនៅមូលដ្ឋានផលិតកម្មរបស់ខ្លួន និងទទួលបានប៉ាតង់ជាតិជាច្រើន៕ អត្ថបទ៖ហ្សាលីន

The post ក្រុមហ៊ុនចិន ចង់វិនិយោគបង្កើតបណ្តុំរោងចក្រឧស្សាហកម្មផលិតគ្រឿងបង្គុំអគ្គិសនីនៅខេត្តកំពង់ធំ appeared first on .

នេះបើយោតាមជំនួបពិភាក្សារវាង លោក លីម ឡោកពិសិដ្ឋ រដ្ឋលេខាធិការក្រសួងពាណិជ្ជកម្ម ជាមួយគណៈប្រតិភូសភាពាណិជ្ជកម្មប្រចាំទីក្រុងណាននីង ដែលដឹកនាំដោយ លោក SU Youchao អនុប្រធានសភាពាណិជ្ជកម្មប្រចាំទីក្រុងណាននីង និងតំណាងក្រុមហ៊ុន Guangxi Jinpei International Supply Chain Co., Ltd ព្រមទាំងអគ្គនាយកក្រុមហ៊ុនចំនួន១៤ ក្នុងវិស័យឧស្សាហកម្មកែច្នៃនិងវេចខ្ចប់ សំណង់ អប់រំ បច្ចេកវិទ្យា និងប្រព័ន្ធការពារសុវត្ថិភាព ​កាលពីចុងសប្តាហ៍។

ក្នុងឱកាសនោះ លោក លីម ឡោកពិសិដ្ឋ បានស្វាគមន៍ចំពោះគណៈប្រតិភូទាំងអស់ ដែលបានបង្ហាញនូវចំណាប់អារម្មណ៍ក្នុងការស្វែងយល់អំពីកាលានុវត្តភាពពាណិជ្ជកម្ម និងការវិនិយោគនៅកម្ពុជា ព្រមទាំងបានជម្រាបជូនអំពីទិដ្ឋភាពទូទៅនៃគោលនយោបាយពាណិជ្ជកម្មរបស់កម្ពុជា បរិយាកាសធុរកិច្ច យុទ្ធសាស្រ្តជំរុញការនាំចេញ និងការលើកទឹកចិត្តរបស់រាជរដ្ឋាភិបាលកម្ពុជាចំពោះការវិនិយោគ ជាពិសេសបានលើកទឹកចិត្តឱ្យមានកិច្ចសហប្រតិបត្តិការ និងភាពជាដៃគូសហការនាពេលអនាគត រវាងធុរកិច្ចកម្ពុជា និងសមាជិកនៃសភាពាណិជ្ជកម្មប្រចាំទីក្រុងណាននីង ផងដែរ។

ជាការឆ្លើយតប លោក SU Youchao បានសម្តែងការកោតសរសើរចំពោះការទទួលស្វាគមន៍យ៉ាងកក់ក្តៅ ពីភាគីកម្ពុជា និងបានបង្ហាញនូវការប្ដេជ្ញាចិត្តរបស់គណៈប្រតិភូទាំងអស់ ក្នុងការចូលរួមចំណែកការអភិវឌ្ឍន៍សេដ្ឋកិច្ចរបស់កម្ពុជា។ បន្ថែមពីនេះ លោក ក៏បានគូសបញ្ជាក់អំពីគោលបំណងនៃកិច្ចពិភាក្សា រួមទាំងកិច្ចសហប្រតិបត្តិការនៅក្នុងវិស័យកែច្នៃ និងការវេចខ្ចប់ ក៏ដូចជាគំនិតផ្តួចផ្តើមក្នុងការផ្តល់ជំនួយបច្ចេកទេស អាហារូបករណ៍ និងកម្មវិធីបណ្តុះបណ្តាលសម្រាប់មន្ត្រី និងនិស្សិតកម្ពុជា ផងដែរ។

សូមជម្រាបថា ត្រឹមរយៈពេល២ខែ ដើមឆ្នាំ២០២៥នេះ ក្រុមប្រឹក្សាអភិវឌ្ឍន៍កម្ពុជា (CDC) អនុម័តគម្រោងវិនិយោគចំនួន១១២ ក្នុងទុនវិនិយោគប្រមាណ ១ប៊ីលានដុល្លារ។ នេះបើតាមរបាយការណ៍ក្រុមប្រឹក្សាអភិវឌ្ឍន៍កម្ពុជា កាលថ្ងៃទី១១ ខែមីនា ឆ្នាំ២០២៥។

ប្រភពដដែល បានឱ្យដឹងថា ក្នុងរយៈពេល ២ខែ ដើមឆ្នាំ ២០២៥ CDC បានអនុម័តគម្រោងវិនិយោគចំនួន ១១២គម្រោង ក្នុងទុនវិនិយោគ ប្រមាណ ១ប៊ីលានដុល្លារអាម៉េរិក ដោយអាចបង្កើតការងារបានចំនួនជាង ៧ម៉ឺនកន្លែង។នៅក្នុងរយៈពេល២ខែ ឆ្នាំនេះ ចំនួនគម្រោងវិនិយោគមានការកើនឡើងរហូតដល់ទៅ៤៣គម្រោង បើប្រៀបធៀបនឹងរយៈពេលដូចគ្នាក្នុងឆ្នាំ២០២៤៕ អត្ថបទ៖​ហ្សាលីន

The post ក្រុមហ៊ុនចិនចំនួន១៤ មកស្វែងយល់អំពីកាលានុវត្តភាពពាណិជ្ជកម្ម និងការវិនិយោគនៅកម្ពុជា appeared first on .

ពិធីបញ្ចុះបឋមសិលាសាងសង់រោងចក្ររបស់ក្រុមហ៊ុនខាងលើ ធ្វើឡើងកាលពីថ្ងៃទី២ ខែមីនា ឆ្នាំ២០២៥ ក្រោមអធិបតីលោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា។

លោក ជា វុទ្ធី បានលើកឡើងអំពីភាពជោគជ័យរបស់តំបន់សេដ្ឋកិច្ចពិសេសមកដល់សព្វថ្ងៃនេះ គឺកើតចេញក្រោមគំនិតផ្តួចផ្តើមប្រកបដោយគតិបណ្ឌិតរបស់សម្តេចតេជោ ហ៊ុន សែន អតីតនាយករដ្ឋមន្ត្រី បច្ចុប្បន្នជាប្រធានព្រឹទ្ធសភា ដែលតែងតែយកចិត្តទុកដាក់ខ្ពស់ចំពោះតំបន់សេដ្ឋកិច្ចពិសេស ដោយប្រើនូវអភិក្រមចំនួន៣ រួមមានៈ កាត់បន្ថយពេលវេលា, កាត់បន្ថយចំណាយ និងកាត់បន្ថយឋានានុក្រមលើប្រតិបត្តិការវិនិយោគ និងនីតិវិធីផ្សេងៗ។

លោកបន្តថា ការកើនឡើងនៃចំនួនគម្រោងវិនិយោគជាបន្តបន្ទាប់ ក៏ដូចជាតំបន់សេដ្ឋកិច្ចពិសេសនាពេលនេះ បានសបញ្ជាក់អំពីការអភិវឌ្ឍន៍របស់តំបន់សេដ្ឋកិច្ចពិសេសបាននិងកំពុងទាក់ទាញវិនិយោគិនមកបណ្តាក់ទុនវិនិយោគជាហូរហែរ ព្រមទាំងបានបង្កើតការងារនិងលើកកម្ពស់ជីវភាពបងប្អូនប្រជាពលរដ្ឋ  ជាពិសេស បានជំរុញឱ្យមានកំណើនសេដ្ឋកិច្ចជាតិជាបន្តបន្ទាប់។

សូមបញ្ជាក់ថា ក្រុមហ៊ុន Nex Healthcare Co., Ltd. ដែលវិនិយោគនេះ ជាក្រុមហ៊ុនបុត្រសម្ព័ន្ធរបស់ក្រុមហ៊ុន Shadong Blue Sail Health Technology Co., Ltd. មកពីខេត្តសានដុង សាធារណរដ្ឋប្រជាមានិតចិន។ ផលិតផលស្រោមដៃការពារសុខភាពរបស់ក្រុមហ៊ុននេះ ជាប់ចំណាត់ថ្នាក់លេខ៣ នៅទូទាំងពិភពលោក, រីឯឧបករណ៍ពិនិត្យបេះដូងជាប់ចំណាត់ថ្នាក់លេខ ៤ ទូទាំងពិភពលោក និងជាប់លេខ ២ នៅក្នុងប្រទេសចិន៕

The post ក្រុមហ៊ុនមួយរបស់ចិន បោះទុនជាង២៧០លានដុល្លារ បង្កើតរោងចក្រផលិតស្រោមដៃ និងឧបករណ៍បរិក្ខារពេទ្យនៅកម្ពុជា appeared first on .

នេះបើតាមរយៈជំនួបរវាងលោក Li Song អភិបាលស្រុក Jinning នៃខេត្ត Yunnan បានជួបពិភាក្សាការងារជាមួយលោក សួន សុផល អគ្គលេខាធិការរងគណៈកម្មាធិការវិនិយោគកម្ពុជា នៅរសៀលថ្ងៃទី២៧ ខែវិច្ឆិកា ឆ្នាំ២០២៤ ដើម្បីស្វែងយល់ពីសក្តានុពលសេដ្ឋកិច្ច វិនិយោគ របស់កម្ពុជា។

យោងតាមក្រុមប្រឹក្សាអភិវឌ្ឍន៍កម្ពុជា កិច្ចពិភាក្សាបានផ្តោតលើគោលបំណងនៃការបណ្តាក់ទុនវិនិយោគរបស់ក្រុមហ៊ុនដាំដុះនិងផ្គង់ផ្គង់ផ្កានៅកម្ពុជា និងកិច្ចសហការជំរុញការវិនិយោគចិននៅប្រទេសកម្ពុជា។

គួរជម្រាបថា៖ ស្រុក Jinning ខេត្ត Yunnan គឺជាខេត្តដ៏ធំមួយនៅប្រទេសចិន ដែលផ្គត់ផ្គង់ដល់កសិកម្មដាំដុះផ្កា និងនាំចេញផ្កាទៅបណ្ដាប្រទេសផ្សេងៗ។

The post ក្រុមហ៊ុនមកពីចិន ចង់បណ្តាក់ទុនវិនិយោគលើការដាំដុះ និងផ្គង់ផ្គង់ផ្កានៅកម្ពុជា appeared first on .

ការធ្វើទស្សនកិច្ចរោងចក្រផលិតអគ្គិសនី Shaoneng គឺតបតាមការអញ្ជើញ ក្រុមហ៊ុន Guangdong Shaoneng Group Co.,Ltd នៅទីក្រុងសាវក្វាន នៃខេត្តក្វាងទុង ប្រទេសចិន ដែលមានរោងចក្រផលិតថាមពលអគ្គិសនីដ៏ធំមួយរបស់រដ្ឋ សម្រាប់ផ្គត់ផ្គង់ជូនរោងចក្រ សហគ្រាស និងផលិតកម្មនានានៅក្នុងខេត្តក្វាងទុង។

ក្នុងឱកាសនោះ ភាគីក្រុមហ៊ុនបានបង្ហាញពីឆន្ទ:ក្នុងការទៅបង្កើតរោងចក្រអគ្គិសនី Biomass នៅកម្ពុជា។

លើសពីនេះ ក្រុមហ៊ុនក៏មានបំណងទៅទស្សនកិច្ចការងារនៅកម្ពុជា និងជួបពិភាក្សាជាមួយក្រសួងពាណិជ្ជកម្ម និងក្រសួងរ៉ែនិងថាមពលកម្ពុជា ដើម្បីប្រមូលព័ត៌មាន និងទិន្នន័យពាក់ព័ន្ធការផលិតអគ្គិសនីដោយប្រើធាតុចូល Biomassផងដែរ។

សូមបញ្ជាក់ថា ក្រុមហ៊ុន Guangdong Shaoneng Group Co.,Ltd គឺជាក្រុមហ៊ុនដែលមានមូលដ្ឋាននៅប្រទេសចិន ដែលផ្តោតលើថាមពល ថាមពលកកើតឡើងវិញ ផលិតផលសរសៃរុក្ខជាតិ អេកូឡូស៊ី ជាដើម។ ក្រុមហ៊ុននេះ បានបង្កើតឡើងក្នុងឆ្នាំ ១៩៩៣ នៅទីក្រុង Shaoguan ខេត្ត Guangdong៕

The post រោងផលិតអគ្គិសនីមួយរបស់ចិន បង្ហាញឆន្ទៈបង្កើតរោងចក្រអគ្គិសនី Biomass នៅកម្ពុជា appeared first on .

ការបង្ហាញចំណាប់អារម្មណ៍របស់ក្រុមហ៊ុន បានធ្វើឡើងក្នុងជំនួបសម្ដែងការគួរសម និងពិភាក្សាការងារ រវាងសម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា ជាមួយលោកស្រី Xuemei Chen ប្រធាន និងជាស្ថាបនិកនៃក្រុមហ៊ុន Zhengzhou Chen’s Sun  ក្នុងឱកាសអញ្ជើញចូលរួមកិច្ចប្រជុំកំពូលមហាអនុតំបន់មេគង្គ (GMS) លើកទី៨ នៅថ្ងៃទី៦-៧ ខែវិច្ឆិកា ឆ្នាំ២០២៤ នៅទីក្រុងគុនមិញ ខេត្តយូណាន ប្រទេសចិន  នាថ្ងៃទី៦ ខែវិច្ឆិកា ឆ្នាំ២០២៤។

ក្នុងឱកាសនេះជំនួប លោកស្រីប្រធានក្រុមហ៊ុនបានគោរពជម្រាបជូនសម្ដេចធិបតីថា លោកស្រីធ្លាប់មកទស្សនាប្រទេសកម្ពុជា ក្នុងឆ្នាំ២០១៨ និងពិនិត្យឃើញថា កម្ពុជាមានសក្ដានុពលខ្លាំងខាងវិស័យកសិកម្ម ជាពិសេសគឺឧស្សាហកម្មផ្លែឈើ (ដំណាំទុរេន)។

ក្នុងន័យនេះ លោកស្រីប្រធានក្រុមហ៊ុនមានចាប់អារម្មណ៍វិនិយោគលើវិស័យកសិកម្មនៅកម្ពុជា ពិសេសដំណាំទុរេន និងរោងចក្រកែច្នៃ ដើម្បីនាំចេញមកកាន់ទីផ្សារប្រទេសចិន និងប្រទេសផ្សេងទៀត ដែលនេះនឹងចូលរួមចំណែកបង្កើតការងារ បង្កើនប្រាក់ចំណូល និងលើកកម្ពស់ជីវភាពប្រជាជន នៅកម្ពុជា។

ជាការឆ្លើយតប សម្ដេចធិបតី បានស្វាគមន៍ចំណាប់អារម្មណ៍របស់ក្រុមហ៊ុនលើការវិនិយោគខាងវិស័យកសិកម្ម ជាពិសេសដំណាំទុរេន នៅកម្ពុជា និងបានគូសបញ្ជាក់ថា ប្រទេសកម្ពុជាមានសក្ដានុពលលើផលិតផលកសិកម្មច្រើនប្រភេទ ដែលវិនិយោគិនអាចនាំចេញទៅកាន់ទីផ្សារក្រៅប្រទេស ប្រកបដោយភាពប្រកួតប្រជែង។

សម្ដេចធិបតី ក៏បានលើកទឹកចិត្តក្រុមហ៊ុនឱ្យបន្តពិភាក្សាលម្អិត និងសហការជាមួយក្រសួង-ស្ថាប័ន នៃរាជរដ្ឋាភិបាលកម្ពុជា និងដៃគូក្នុងស្រុក សំដៅប្រែក្លាយផែនការវិនិយោគរបស់ក្រុមហ៊ុន ឱ្យចេញលទ្ធផលជាក់ស្ដែង ក្នុងពេលដ៏ខ្លីខាងមុខ។

សូមបញ្ជាក់ថា ក្រុមហ៊ុន Zhengzhou Chen’s ត្រូវបានបង្កើតឡើងក្នុងឆ្នាំ ១៩៩២ មានទីស្នាក់ការនៅទីក្រុង Zhengzhou ប្រទេសចិន។ ផ្តោតលើកការស្រាវជ្រាវ និងអភិវឌ្ឍន៍ពូជផ្លែឈើ ការដាំដុះទ្រង់ទ្រាយធំ ការកែច្នៃក្រោយការប្រមូលផល ការចែកចាយ ការដឹកជញ្ជូនខ្សែសង្វាក់ត្រជាក់ ចែកចាយគ្រប់បណ្តាញ, ការលក់ដុំ និងទីផ្សារលក់រាយ, ផលិតគ្រាប់ផ្លែឈើស្ងួត និងអាហារសម្រន់៕

The post ក្រុមហ៊ុនមួយរបស់ចិន ចាប់អារម្មណ៍បោះទុនវិនិយោគលើដំណាំទុរេននៅកម្ពុជា appeared first on .

នេះបើតាមរយៈជំនួបពិភាក្សាការងាររវាងលោក ជា វុទ្ធី ជាមួយនិងគណៈប្រតិភូ ក្រុមហ៊ុនវិនិយោគមកពីខេតុ្ត Yunnan ប្រទេសចិន ដឹកនាំដោយលោក លោក Liu Jie អនុប្រធាមន្ទីរពាណិជ្ជកម្មនៃ ខេត្ត Yunnan កាលពីថ្ងៃទី ២៥ ខែកញ្ញា ឆ្នាំ២០២៤។

ក្នុង​ឱកាសនៃជំនួបនោះ លោក ជា វុទ្ធី បានធ្វើការកត់សម្គាល់ពីកំណើនខ្ពស់នៃការវិនិយោគរបស់ចិននៅកម្ពុជាក្នុងរយៈពេលប៉ុន្មានទសវត្សរ៍ចុងក្រោយនេះ។ លោកក៏បានវាយតម្លៃខ្ពស់ចំពោះដំណើរទស្សនកិច្ចរបស់ គណៈប្រតិភូនាពេលនេះដែលជាផ្នែកមួយនៃកិច្ចសហប្រតិបត្តិការមេគង្គ-ឡាងឆាង ដើម្បីជំរុញការវិនិយោគ និងពាណិជ្ជកម្មរវាងប្រទេសទាំងពីរ កម្ពុជា-ចិន។

ម្យ៉ាងវិញទៀត ក៏ជាការផ្តើមចេញពីក្របខណ្ឌនៃកិច្ចសហប្រតិបត្តិការនៃភាពជាដៃគូយុទ្ធសាស្ត្រគ្រប់ជ្រុងជ្រោយ និងកិច្ចសហប្រតិបត្តិការ ត្បូងពេជ្រ រដ្ឋាភិបាលនៃប្រទេសទាំងពីរ កម្ពុជា-ចិន ក៏បានសម្រេចបង្កើតនូវ “ច្រករបៀងឧស្សាហកម្ម និង បច្ចេកវិទ្យា” និង “ច្រករបៀងមច្ឆា និងអង្គរ” ដើម្បីជំរុញបន្ថែមការអភិវឌ្ឍសង្គម-សេដ្ឋកិច្ចផងដែរ។

ជាមួយគ្នានេះ លោកក៏បានលើកឡើងពីស្ថានភាពវិនិយោគ ច្បាប់ និងបទបញ្ញត្តិពាក់ព័ន្ធ នឹងការវិនិយោគរបស់កម្ពុជា ដែលមានភាពបើកចំហ តម្លាភាព និងភាពអាច់ប៉ាន់ប្រមាណទុកជាមុនបាន រួម ជាមួយនឹងកញ្ចប់លើកទឹកឆ្លាតវៃ។

ឆ្លៀតនៅក្នុង​ឱកាសនេះ លោក ជា វុទ្ធី ក៏បានជំរុញលើកទឹកចិត្តឱ្យក្រុមហ៊ុនគិតគូរពីការវិនិយោគកែច្នៃកសិផលកម្ពុជាសម្រាប់ផ្គត់ផ្គង់ដល់ទីផ្សារក្នុងស្រុក និងសម្រាប់នាំចេញ តាមរយៈការប្រើប្រាស់បច្ចេកវិទ្យាទំនើប និងមានតម្លៃបន្ថែមខ្ពស់។

ជាការឆ្លើយតប លោក Liu Jie បានបង្ហាញជំនឿជឿជាក់ថា បន្ទាប់ពីបានស្តាប់ប្រសាសន៍របស់លោកអគ្គលេខាធិការ គណៈប្រតិភូនឹងមានមូលដ្ឋានគ្រប់គ្រាន់សម្រាប់ធ្វើការសម្រេចចិត្តវិនិយោគនៅកម្ពុជា ទៅតាមវិស័យរៀងៗខ្លួន។

លោកបានបន្ថែមទៀតថា ទស្សនកិច្ចមកកម្ពុជាលើកនេះ ក៏មានបំណងចូលរួមផ្សព្វផ្សាយ និងទាក់ទាញវិនិយោគិនចិនមកកម្ពុជា ពិសេស ការវិនិយោគមកពីខេត្ត Yunnan ។

សូមបញ្ជាក់ថា គណៈប្រតិភូក្រុមហ៊ុនមកពីខេត្ត Yunnan ទាំងនោះ មានសកម្មភាពវិនិយោគក្នុងវិស័យ ថាមពល, បច្ចេកវិទ្យាឌីជីថល, ពាណិជ្ជកម្មអេឡិចត្រូនិក, កសិកម្ម និងកសិ ឧស្សាហកម្ម, ផលិតកម្មម្ហូបអាហារ និងការផ្តល់សេវាប្រឹក្សាពាក់ព័ន្ធនឹងការវិនិយោគ៕

The post លោក ជា វុទ្ធី ជំរុញឱ្យក្រុមហ៊ុនចិន វិនិយោគកែច្នៃកសិផលកម្ពុជា សម្រាប់ផ្គត់ផ្គង់ទីផ្សារក្នុងស្រុក និងនាំចេញ តាមរយៈការប្រើប្រាស់បច្ចេកវិទ្យាទំនើប appeared first on .

ក្នុងដំណើរទស្សនកិច្ចស្វែងរកវិនិយោគ នៅប្រទេសចិន នាពេលថ្មីៗនេះ លោក ស៊ុន ចាន់ថុល ឧបនាយករដ្ឋមន្ត្រីនិងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានស្នើឱ្យក្រុមហ៊ុន Xiamen Xiangyu Group ( XMXYG) ដែលជាក្រុមហ៊ុនមានបទពិសោធន៍ខាងកំពង់ផែ និងភស្តុភារកម្ម និងជាក្រុមហ៊ុនកំពុងវិនិយោគក្នុងតំបន់ពាណិជ្ជកម្មសេរីគំរូ ក្នុងទីក្រុងសៀមិនប្រទេសចិន មកបណ្ដាក់ទុនវិនិយោគវិស័យកំពង់ផែ និងភស្តុភារកម្មនៅកម្ពុជា ។

លោកក៏បានបង្ហាញកាលានុវត្តភាពវិនិយោគរបស់កម្ពុជា និងគម្រោងហេដ្ឋារចនាសម្ព័ន្ធស្ពានថ្នល់ កំពង់ផែនិងគម្រោងព្រែកជីកហ្វូណនតេជោជាដើមទៅកាន់ក្រុមហ៊ុន XMXYG របស់ចិន ដើម្បីទាក់ទាញក្រុមហ៊ុននេះ មកបណ្ដាក់ទុនវិនិយោគនៅកម្ពុជា ។

នៅក្នុងដំណើរទស្សនកិច្ចរបស់លោក ស៊ុន ចាន់ថុល ក្នុងការទៅទាក់ទាញវិនិយោគិនចិនមកបណ្ដាក់ទុនវិនិយោគ នៅកម្ពុជានាពេលនេះ ក៏បានជួបជាមួយក្រុមហ៊ុនមួយចំនួនទៀតរបស់ចិន ដូចជាក្រុមហ៊ុន Wanli Stone ដែលជាក្រុមហ៊ុនមួយ ក្នុងចំណោមក្រុមហ៊ុនផ្សេងទៀត កំពុងបណ្ដាក់ទុននៅកម្ពុជា ។

នៅក្នុងជំនួបជាមួយលោក ស៊ុន ចាន់ថុល ក្រុមហ៊ុនមួយនេះ បានបង្ហាញពីផែនការរបស់ខ្លួន ក្នុងការពង្រីកការវិនិយោគបន្ថែមនៅក្នុងប្រទេសកម្ពុជា ជាពិសេសលើការបង្កើតតំបន់សេដ្ឋកិច្ចពិសេសមួយ នៅក្នុងប្រទេសកម្ពុជា ដោយពេលនេះតំណាងក្រុមហ៊ុនបានបញ្ជាក់ថាខ្លួនកំពុងសិក្សានិងពិនិត្យរកទីតាំងដើម្បីបង្កើតតំបន់សេដ្ឋកិច្ចពិសេស ។

នៅក្នុងពិធីបើកពិព័រណ៍អន្តរជាតិចិន លើកទី២៤ សម្រាប់ការវិនិយោគនិងពាណិជ្ជកម្ម នៅថ្ងៃទី៨ កញ្ញា ២០២៤ លោក ស៊ុន ចាន់ថុល បានមានប្រសាសន៍ថា កិច្ចការវិនិយោគ និងពាណិជ្ជកម្ម ជាក្បាលម៉ាស៊ីនជំរុញឱ្យមានការបង្កើតបច្ចេកវិទ្យា ការងារ និងសសរស្តម្ភនៃស្ថិរភាពសេដ្ឋកិច្ចរបស់កម្ពុជា ។ តាមរយៈការវិនិយោគ កម្ពុជាអាចកសាង ហេដ្ឋារចនាសម្ព័ន្ធតភ្ជាប់ពាសពេញផ្ទៃប្រទេស ទ្រទ្រង់លើភាពរីកចម្រើននៃធុរកិច្ចឧស្សាហកម្មដើម្បីកំណើនសេដ្ឋកិច្ចជាតិ ក៏ដូចជាការនាំមកនូវបច្ចេកវិទ្យាថ្មីៗ ដែលនឹងជួយសម្រួលដល់ការរស់នៅផងដែរ ។

លោកបានបន្ថែមថា តាមរយៈពាណិជ្ជកម្ម កម្ពុជាអាចចូលរួមផ្លាស់ប្តូរកម្លាំងពលកម្ម ដែលអាចបង្កើតការផ្លាស់ប្តូរជំនាញ ព្រមទាំងបង្កើតចំណងនៃការជឿទុកចិត្ត និងការគោរពគ្នាទៅវិញទៅមករវាងប្រជាជាតិ នានានៅលើសាកលកលោក ៕

The post កម្ពុជាស្នើឱ្យក្រុមហ៊ុនចិនបណ្ដាក់ទុនវិនិយោគលើវិស័យកំពង់ផែនិងភស្តុភារនៅកម្ពុជា appeared first on .

ការបង្ហាញពីបំណងរបស់ក្រុមហ៊ុនក្នុងឱកាសលោក  ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា អនុញ្ញាតប្រតិភូក្រុមហ៊ុន Wanli Stone ដឹកនាំដោយលោក Zou Peng  ចូលជួបពិភាក្សាការងារ កាលពីថ្ងៃទី៨ ខែកញ្ញា ឆ្នាំ២០២៤ នៅប្រទេសចិន។

លោក ស៊ុន ចាន់ថុល បានឱ្យដឹងថា តាមរយៈជំនួបនោះ ក្រុមហ៊ុនបានបង្ហាញអំពីផែនការរបស់ខ្លួនក្នុងការពង្រីកការវិនិយោគបន្ថែមទៀតក្នុងប្រទេសកម្ពុជា ពិសេសនឹងពិនិត្យលទ្ធភាពវិនិយោគ លើការបង្កើតតំបន់សេដ្ឋកិច្ចពិសេសផងដែរ។

សូមជម្រាបជូនថា ក្រុមហ៊ុន Wanli Stone ជាក្រុមហ៊ុនមួយក្នុងចំណោមក្រុមហ៊ុនផ្សេងទៀតជាច្រើនដែលកំពុងបណ្ដាក់ទុនវិនិយោគនៅកម្ពុជា។បច្ចុប្បន្នក្រុមហ៊ុន Wanli Stone គឺជាក្រុមហ៊ុនមួយដែលកំពុងវិនិយោគនៅក្នុងខេត្តកំពង់ស្ពឺ នៃព្រះរាជាណាចក្រកម្ពុជា លើមុខសញ្ញាអាជីវកម្មថ្មម៉ាប ឬថ្មក្រានីត៕

The post ក្រុមហ៊ុនវិនិយោគលើអាជីវកម្មថ្មម៉ាបរបស់ចិនមួយ ចង់ពង្រីកការវិនិយោគបន្ថែមទៀតនៅកម្ពុជា appeared first on .