ក្រុមហ៊ុនអាកាសចរណ៍ជាតិកម្ពុជា បានឱ្យដឹងថា ចាប់ពីថ្ងៃទី១៥ ខែមករា ឆ្នាំ២០២៦  ក្រុមហ៊ុនអាកាសចរណ៍ជាតិកម្ពុជា មានមោទនភាពក្នុងការប្រកាសជាផ្លូវការជាមួយអត្តសញ្ញាណថ្មី (CIS)។ នេះគឺជាការផ្លាស់ប្តូររូបរាងថ្មីលើកដំបូងបង្អស់របស់ក្រុមហ៊ុន ចាប់តាំងពីឆ្នាំ ២០០៩ មក ។

ស្លាកសញ្ញាថ្មី សត្វត្រយ៉ង ត្រូវបានបំផុសគំនិតយ៉ាងជ្រាលជ្រៅពី សត្វត្រយ៉ង ដែលជាបក្សីជាតិរបស់ព្រះរាជាណាចក្រកម្ពុជា ។  ស្លាកសញ្ញាថ្មីនេះមានចំពុះបក្សីងើបឡើងលើក្នុងមុំ ៤៥ ដឺក្រេ ដែលបង្ហាញពីការរីកចម្រើនទៅមុខឥតឈប់ឈរ ។ វាមានការរួមបញ្ចូលគ្នារវាង រោមសត្វ ១៨ ជាមួយនឹងរូបរាង ស្លាបកង្ហារម៉ាស៊ីនយន្តហោះ ដែលជានិមិត្តរូបនៃថាមពលខ្លាំងក្លា និងការហោះហើរបានចម្ងាយឆ្ងាយ ។

ស្លាបរបស់សត្វត្រយ៉ង ត្រូវបានរចនាចេញជាម៉ាស៊ីន អាកាសយាន ដោយមានមុខរណារបឺត ខ្យល់ចំនួន១៨ ដែលតំណាងឱ្យបច្ចេកវិទ្យា រក្សាលំនឹង និងការរីកចម្រើន ។ ចំណែកអត្តសញ្ញាណពណ៌ ក៏ត្រូវបានជ្រើសរើសមានបីពណ៌ ជាមូលដ្ឋាន គឺមានពណ៌ខៀវ ក្រហម និងស ដែលតំណាងឱ្យទង់ជាតិ នៃព្រះរាជាណាចក្រកម្ពុជា ផងដែរ។

គួរឱ្យដឹងថា ទន្ទឹមនឹងការផ្លាស់ប្តូរអត្តសញ្ញាណនេះ ក្រុមហ៊ុនអាកាសចរណ៍ជាតិកម្ពុជា ក៏កំពុងពង្រីកបន្ថែមនូវចំនួនយន្តហោះផងដែរ។

សូមជម្រាបជូនថា ក្នុងវប្បធម៌ខ្មែរ សត្វត្រយ៉ង គឺជាសត្វតំណាងនៃ ការការពារ ភាពរឹងមាំ និងសិរីសួស្តី។សត្វត្រយ៉ងយក្សត្រូវបានរាជរដ្ឋាភិបាលកម្ពុជា សម្រេចជ្រើសរើសធ្វើជាបក្សីតំណាងជាប្រទេសកម្ពុជា នៅក្នុងឆ្នាំ២០០៥៕

The post ក្រុមហ៊ុនអាកាសចរណ៍​ជាតិ​កម្ពុជា ​ប្តូរ​ស្លាក​សញ្ញា​ថ្មី​ យក​ “សត្វ​ត្រយ៉ង​“​ ជាសត្វបក្សីតំណាងជាតិកម្ពុជា appeared first on .

លោកជំរុញបែបនេះ នៅក្នុងពេលដឹកនាំគណៈប្រតិភូកម្ពុជា បំពេញទស្សនកិច្ចការងារទៅកាន់ក្រុមហ៊ុនវិនិយោគអាកាសយានដ្ឋានខេត្តហ៊ឺណាន និងទីស្នាក់ការក្រុមហ៊ុនអាកាសចរណ៍ជាតិកម្ពុជា(Air Cambodia) ប្រចាំក្រុងចឹងចូវ កាលព្រឹកទី១៧ ខែមីនា ឆ្នាំ២០២៥។

លោកស៊ុន ចាន់ថុល បានឱ្យដឹងថា ដំណើរទស្សនកិច្ចនេះ គឺធ្វើឡើងក្នុងគោលបំណងសិក្សាស្វែងយល់អំពីការប្រព្រឹត្តទៅនៃសហគ្រាស និងជំរុញការវិនិយោគបន្ថែមទៀតនៅលើទឹកដីនៃព្រះរាជាណាចក្រកម្ពុជា។ តាមរយៈជំនួបនេះ លោកថា គណៈប្រតិភូកម្ពុជាក៏បានបង្ហាញអំពីបរិយាកាសវិនិយោគ ការគាំទ្រវិស័យឯកជនពីសំណាក់រាជរដ្ឋាភិបាល និងសក្តានុពលទេសចរណ៍របស់កម្ពុជា ទៅកាន់ភាគីចិនផងដែរ។

ស្របគ្នានេះ លោក ក៏បានលើកទឹកចិត្តភាគីមិត្តក្នុងការពិនិត្យលទ្ធភាពពង្រីកគោលដៅហោះហើររបស់ក្រុមហ៊ុនអាកាសចរណ៍ជាតិកម្ពុជាដើម្បីលើកកម្ពស់ការតភ្ជាប់រវាងប្រជាជន និងប្រជាជន (People to People – P2P) ជាពិសេសការតភ្ជាប់រវាងធុរជន និងធុរជន (Business to Business – B2B) និងដើម្បីសម្រេចគោលដៅការទាក់ទាញភ្ញៀវទេសចរពីខេត្តហ៊ឺណាន មកទស្សនាកម្ពុជាឱ្យបាន១លាននាក់ ក្នុងឆ្នាំ២០២៥នេះ។

ទាក់ទិនរឿងនេះដែរ លោក Yi Riwu អគ្គនាយកក្រុមហ៊ុនវិនិយោគអាកាសយានដ្ឋានខេត្តហ៊ឺណាន បាន ស្វាគមន៍គណៈប្រតិភូកម្ពុជាដែលមកទស្សនកិច្ចនៅខេត្តហ៊ឺណាន ខណៈលោកក៏បានធ្វើការពិព័ណ៌នាអំពីសាវតាររបស់ក្រុមហ៊ុន ក៏ដូចជាវឌ្ឍនភាពថ្មីៗនៃប្រតិបត្តិការរបស់ខ្លួនផងដែរ។ ជាមួយគ្នានេះ លោកក៏បានឱ្យដឹងថា កាលពីពេលថ្មីៗនេះ ក្រុមហ៊ុនក៏បានធ្វើការបោះជំហានវិនិយោគនៅកម្ពុជាតាមរយៈការបណ្តាក់ទុនវិនិយោគក្រោមរូបភាពជាភាគហ៊ុនិកជាមួយក្រុមហ៊ុនអាកាសចរណ៍ជាតិកម្ពុជា (Air Cambodia)ផងដែរ។

សូមជម្រាបដែរថា ក្រុមហ៊ុនវិនិយោគអាកាសយានដ្ឋានខេត្តហ៊ឺណាន គឺជាសហគ្រាសរដ្ឋដែលមានឯកទេសលើមុខសញ្ញាវិនិយោគពាក់ព័ន្ធនឹងការអភិវឌ្ឍនគរូបនីយកម្ម, ការវិនិយោគលើនគរូបនីយកម្ម, បច្ចេកវិទ្យា, ប្រតិបត្តិការ, សួនបច្ចេកវិទ្យា, និងឧស្សាហកម្មផ្នែកបច្ចេកវិទ្យាជាដើម៕ អត្ថបទ៖ ហ្សាលីន

The post មន្រ្តីជាន់ខ្ពស់ ស្នើចិនពិនិត្យលទ្ធភាពពង្រីកគោលដៅហោះហើររបស់ក្រុមហ៊ុនអាកាសចរណ៍ជាតិកម្ពុជា appeared first on .

យោងតាមអនុក្រឹត្យ ដែលចុះហត្ថលេខាដោយសម្ដេចមហាបវរធីបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នៅថ្ងៃទី២០ ខែមករា ឆ្នាំ២០២ បានសម្រេច៖ មាត្រា១ ត្រូវបានប្តូរឈ្មោះក្រុមហ៊ុនអាកាសចរណ៍ជាតិ កម្ពុជា អង្គរ អ៊ែរ ទៅជា ក្រុមហ៊ុនអាកាសចរណ៍ជាតិកម្ពុជា ដែលសរសេរជាអក្សរកាត់ថា អ.ជ.ក. និងមានឈ្មោះ ជាភាសាអង់គ្លេសថា Air Cambodia។

សម្តេចធិបតី បានបញ្ជាក់នៅក្នុងអនុក្រឹត្យខាងលើទៀតថា លិខិតបទដ្ឋានគតិយុត្តទាំងឡាយដែលពាក់ព័ន្ធនឹងការប្រើឈ្មោះក្រុមហ៊ុនអាកាសចរណ៍ជាតិ កម្ពុជា អង្គរ អ៊ែរ ត្រូវមានអានុភាពគតិយុត្តអនុវត្តបន្តរហូតដល់មានលិខិតបទដ្ឋានគតិយុត្តថ្មីមកជំនួស ស្របតាម បទប្បញ្ញត្តិនៃអនុក្រឹត្យនេះ។

ទន្ទឹមគ្នានេះ សម្តេចធិបតី ក៏ណែនាំដល់រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ រដ្ឋមន្ត្រីទទួលបន្ទុក រដ្ឋលេខាធិការដ្ឋានអាកាសចរណ៍ស៊ីវិល រដ្ឋមន្ត្រីគ្រប់ក្រសួងនិងប្រធានគ្រប់ស្ថាប័នដែលពាក់ព័ន្ធ ត្រូវទទួលបន្ទុក អនុវត្តអនុក្រឹត្យនេះ តាមភារកិច្ចរៀងៗខ្លួនចាប់ពីថ្ងៃចុះហត្ថលេខាតទៅ៕ អត្ថបទ៖ ហ្សាលីន

The post រដ្ឋ សម្រេចប្តូរឈ្មោះក្រុមហ៊ុនអាកាសចរណ៍ជាតិកម្ពុជាអង្គរអ៊ែរ ជាក្រុមហ៊ុនអាកាសចរណ៍ជាតិកម្ពុជា appeared first on .