ក្រុមហ៊ុន ថៃ ប៊ុនរ៉ុង

អគារភ្លោះកប់ពពកដំបូងគេនៅខេត្តកំពត របស់ឧកញ៉ាម្នាក់ កំពុងពន្លឿនការសាងសង់

ឧកញ៉ាដែនដី — Thu, 08 Dec 2022 04:41:19 +0000

អគារពាណិជ្ជកម្មភ្លោះកប់ពពកដំបូងគេនៅក្រុងកំពត ខេត្តកំពត របស់ក្រុមហ៊ុន ថៃ ប៊ុនរ៉ុង ដែលមានលោកឧកញ៉ា ខូវ សម្បត្តិ ជាអគ្គនាយកក្រុមហ៊ុន កំពុងតែពន្លឿនការសាងសង់ឡើងវិញ ដើម្បីបញ្ចប់តាមផែនការរបស់ក្រុមហ៊ុន បន្ទាប់ពីផ្អាកមួយរយៈ ដោយសារមានវិបត្តិកូវីដ-១៩។

លោកឧកញ៉ា ខូវ សម្បត្តិ (ឆ្វេងដៃ)

លោកសាស្រ្តាចារ្យ ទួស សាភឿន អ្នកគ្រប់គ្រងគម្រោងអគារភ្លោះកប់ពពកមួយនេះ បានថ្លែងឱ្យដឹងកាលពីសប្តាហ៍មុនថា បន្ទាប់ពីផ្អាកមួយរយៈពេលខ្លី ពេលនេះក្រុមហ៊ុនបានចាប់ផ្តើមសាងសង់ឡើងវិញហើយ ខណៈដែលមកដល់ពេលនេះ ការសាងសង់បានឈានដល់ជាន់ទី៨។ លោកសាស្រ្តាចារ្យ បានបន្តថា អ្វីដែលធ្វើឱ្យយឺតយ៉ាវគឺ ការសាងសង់គ្រឹះអគារ ដែលបានចំណាយពេលដល់ទៅ១ឆ្នាំឯណោះ។

“គម្រោងនេះអាចនឹងបញ្ចប់គ្រោងតួអគារទាំងមូល នៅចុងឆ្នាំ២០២៣ និងអាចដាក់ឱ្យដំណើរការចុងឆ្នាំ២០២៤ ខាងមុខ ប្រសិនជាមិនមានការប្រែប្រួលទេនោះ។ មជ្ឈមណ្ឌលពាណិជ្ជកម្មនេះ មានសណ្ឋាគារ អាផាតម៉ិនទំនើប ភោជនីយដ្ឋាន ការិយាល័យ Sky Bar ផ្សារទំនើប ហាងស្ទីម សោណា កន្លែងហាត់ប្រាណជាដើម”។ លោកសាស្រ្តាចារ្យ ទួស សាភឿន បានបញ្ជាក់បន្ថែម។

គួរបញ្ជាក់ថា អគារភ្លោះខាងលើនេះមានឈ្មោះថា ថៃ ប៊ុនរ៉ុង កំពត បៀលឌីង មានតម្លៃជាង ៩៥លានដុល្លារ បានបើកការដ្ឋានសាងសង់ កាលពីថ្ងៃទី២៧ ខែតុលា ឆ្នាំ២០១៩ ដែលមានទីតាំងស្ថិតនៅគល់ស្ពានចាស់ ក្នុងភូមិ១ឧសភា សង្កាត់ កំពង់កណ្តាល ក្រុងកំពត។ អគារទី១ មានកំពស់៤៣ជាន់ និងអគារទី២ មានកំពស់រហូតដល់ ៤៧ជាន់ ដោយក្រុមហ៊ុនសម្រេចបន្ថែម២ជាន់ទៀត ខណៈដែលគម្រោងដំបូងត្រឹម៤៥ជាន់។

ការបើកការដ្ឋានសាងសង់អគារថៃ ប៊ុនរ៉ុង កំពត បៀលឌីង នេះ គឺជាការបើកទំព័រប្រវត្តិសាស្រ្តសំណង់អគារលំដាប់អន្តរជាតិជាលើកដំបូង និងខ្ពស់ជាងគេនៅខេត្តកំពត ដោយអាចបំពេញតម្រូវកានិងបង្កើនទំនុកចិត្តដល់ វិនិយោគិន ភ្ញៀវជាតិ អន្តរជាតិ ដែលជាហេតុធ្វើឱ្យខេត្តនេះអាចពង្រឹងនិងងព្រីកឥទ្ធិពលរបស់ខ្លួនបានមួយកម្រិតទៀតផងដែរ ខណៈដែលខេត្តនេះមានសក្ដានុពលមិនចាញ់ខេត្តដទៃទៀតឡើយ។

ខេត្តកំពត ត្រូវបានគេដឹងថា ជាខេត្តមួយមានសក្ដានុពលខ្លាំង ជាពិសេសគឺមានតំបន់ទេសចរណ៍ជិត២០កន្លែង ដែលបានទាក់ទាញភ្ញៀវទេសចរណ៍ជាតិ និងអន្តរជាតិរាប់លាននាក់ក្នុងមួយឆ្នាំៗ។ បច្ចុប្បន្នរដ្ឋាភិបាលក៏កំពុងតែស្ថាបនាកន្លែងទេសចរណ៍បន្ថែមទៀត ហើយជាពិសេសនៅតាមតំបន់ឆ្នេរផងដែរ៕

The post អគារភ្លោះកប់ពពកដំបូងគេនៅខេត្តកំពត របស់ឧកញ៉ាម្នាក់ កំពុងពន្លឿនការសាងសង់ appeared first on .

ដឹងអត់ថា សណ្ឋាគារ Great Duke នៅជិតផ្សារដើមគរ ជារបស់ឧកញ៉ារូបណា?

ឧកញ៉ាដែនដី — Wed, 02 Nov 2022 06:22:02 +0000

សណ្ឋាគារ Great Duke ជាសណ្ឋាគារលំដាប់ផ្កាយ៥ មានទីតាំងនៅមហាវិថីម៉ៅសេទុង សង្កាត់ទំនប់ទឹក ខណ្ឌចំការមន រាជធានីភ្នំពេញ។ សណ្ឋាគារ ដែលនៅជិតផ្សារដើមគរមួយនេះ បច្ចុប្បន្នជាកម្មសិទ្ធិរបស់ក្រុមហ៊ុន ថៃ ប៊ុនរ៉ុង ដែលមានឧកញ៉ា ខូវ សម្បត្តិ ជាអគ្គនាយកក្រុមហ៊ុន។

ឧកញ៉ា ខូវ សម្បត្តិ ជាអគ្គនាយកក្រុមហ៊ុន ថៃ ប៊ុនរ៉ុង (ឆ្វេងដៃ)

កាលអំឡុងពេលផ្ទុះជំងឺកូវីដ-១៩ ខ្លាំងនៅចុងឆ្នាំ២០១៩ លោកឧកញ៉ា ខូវ សម្បត្តិ បានផ្តល់ទីតាំងសណ្ឋាគារនេះ ដើម្បីប្រើប្រាស់ជាទីកន្លែងពិនិត្យ ថែទាំ និងព្យាបាលអ្នកជម្ងឺកូវីដ-១៩ ផងដែរ។ យ៉ាងណាមិញ នៅថ្ងៃទី២០ ខែមីនា ឆ្នាំ២០២០ លោក ឃួង ស្រេង អភិបាលរាជធានីភ្នំពេញ ក៏បានចេញលិខិតថ្លែងអំណុរគុណជូនចំពោះលោកឧកញ៉ា ខូវ សម្បត្តិ ដែលបានផ្តល់ទីតាំងសណ្ឋាគារ Great Duke នេះ ជូនក្រសួងសុខាភិបាល និងរដ្ឋបាលរាជធានីភ្នំពេញ ដើម្បីប្រើប្រាស់ជួយអ្នកឆ្លងកូវីដ-១៩។

សណ្ឋាគារ Great Duke ពីមុនឈ្មោះថាសណ្ឋាគារអាំងទែកុងទីណង់តាល់ (InterContinental Hotel) ជាសណ្ឋាគារលំដាប់ឈានមុខគេមួយនៅកម្ពុជា ដែលបើកដំណើរការតាំងពីឆ្នាំ១៩៩៦។ យ៉ាងណាក្តី នៅដើមឆ្នាំ២០១៨ សណ្ឋាគារមួយនេះ បានជួបវិបត្តិហិរញ្ញវត្ថុ ហើយម្ចាស់សណ្ឋាគារចាស់ ក៏បានលក់ទៅឱ្យក្រុមហ៊ុន ថៃ ប៊ុនរ៉ុង និងបានប្តូរឈ្មោះទៅជា «សណ្ឋាគារ Great Duke» តាំងពីពេលនោះមក។

សូមជម្រាបជូនថា សណ្ឋាគារ Great Duke មាន ៣៤៦បន្ទប់ ដែលមានតម្លៃចាប់ពី ៣៥០ដុល្លារ ដល់ ៤០០០ដុល្លារក្នុងមួយយប់ ទៅតាមបន្ទប់ជាច្រើនជម្រើសសម្បូរបែប។ សណ្ឋាគារមួយនេះ មានទីតាំងស្ថិតនៅកណ្តាលរាជធានី ជាកត្តាអំណោយផលបំផុត ដោយមានចម្ងាយ ៣,៦គ.ម ពីវត្តភ្នំ, ២.៨គ.ម ពីវិមានឯករាជ្យ និងចម្ងាយត្រឹម ៦,៣គ.ម ពីព្រលានយន្តហោះភ្នំពេញអន្តរជាតិ៕

The post ដឹងអត់ថា សណ្ឋាគារ Great Duke នៅជិតផ្សារដើមគរ ជារបស់ឧកញ៉ារូបណា? appeared first on .

៥ឆ្នាំកន្លងទៅ អាគារភ្លោះកម្ពស់ ១៣៣ជាន់ តម្លៃ៣ពាន់លានដុល្លារទល់មុខណាហ្គាវើលដ៍ មិនទាន់ឃើញលេចចេញសមិទ្ធផលដំកុំភួននៅឡើយ

ឧកញ៉ាតូច — Sat, 05 Feb 2022 09:38:41 +0000

កាលពី ៥ឆ្នាំមុន ពោលគឺនៅថ្ងៃទី១៨ ខែមីនា ឆ្នាំ២០១៨ ប្រទេសកម្ពុជា បានស្វាគមន៍អាគារភ្លោះកម្ពស់ជិត ៦០០ម៉ែត្រ តម្លៃជាង ៣ពាន់លានដុល្លារអាមេរិករបស់ក្រុមហ៊ុន ថៃ ប៊ុនរ៉ុង បើកការដ្ឋានសាងសង់ដំណាក់កាលដំបូង។ ការបើកការដ្ឋានដំបូងនេះ គឺសម្រាប់ការដ្ឋានគម្រោងជញ្ជាំងបេតុងទប់ដី ដើម្បីធ្វើគ្រឹះបង្ការកុំឲ្យមានការបាក់ច្រាំង នៅពេលការចាប់ផ្តើមសាងសង់សំណង់ អគារភ្លោះទាំងមូល។

លោក ទួស សាភឿន ប្រធានក្រុមការងារស្ថាបត្យករ នៃក្រុមហ៊ុនសំណង់ ថៃ ប៊ុនរ៉ុង និងជាអគ្គលេខាធិការរងគណៈស្ថាបត្យកម្មកម្ពុជា បានបញ្ជាក់ថា គម្រោង «មជ្ឈមណ្ឌលពាណិជ្ជកម្ម ថៃ ប៊ុនរ៉ុង» សាងសង់នៅលើផ្ទៃដីទំហំ៤៩,៧៣២ម៉ែត្រក្រឡា ដែលមានកំពស់៥៦១.៧ម៉ែត្រ ស្មើនឹង១៣៣ជាន់ គឺគិតចំនួនផ្ទៃដែលប្រើប្រាស់បាន បើគិតបញ្ចូលទាំងកំពស់អង់តែន២៥ម៉ែត្រទៀត គឺមានកំពស់រហូតដល់៥៨៦.៧ម៉ែត្រឯណោះ។

ក្រុមការងារសារព័ត៌មានឧកញ៉ាញូស៍ បានទៅដល់ទីតាំងគម្រោងសាងសង់មជ្ឈមណ្ឌលពាណិជ្ជកម្មអាគារភ្លោះ ថៃ ប៊ុងរ៉ុង លំដាប់ពិភពលោកមួយនេះ នឹងត្រូវសាងសង់ឡើងលើផ្ទៃដីនៃមណ្ឌលកំសាន្តឌ្រីមលែនដ៍ទល់មុខកាស៊ីណូណាហ្គាវើលដ៍ មិនទាន់ឃើញមានសមិទ្ធផលជាដំកុំភួនណាមួយកើតឡើងនៅឡើយនោះទេ ដោយឃើញតែសំណង់ជើងក្រោមមួយចំនួនលេចរូបរៀងឡើង និងមានគ្រឿងចក្រសម្ភារៈរបាត់រប៉ែយគរទុកចោល។

នៅពេលសួរថា តើគម្រោងនេះនឹងត្រូវសាងសង់នៅពេលណាឲ្យច្បាស់ប្រាកដនោះ សារព័ត៌មានឧកញ៉ាញូស៍នៅថ្ងៃសៅរ៍ ទី០៥ ខែកុម្ភៈ បានទាក់ទងសុំការបំភ្លឺពីអភិបាលរាជធានីភ្នំពេញលោក ឃួង ស្រេង និងក្រុមហ៊ុន ថៃ ប៊ុងរ៉ុង មិនអាចទាក់ទងបាននោះទេ។

យ៉ាងណា ឧកញ៉ាញូស៍ និងផ្តល់ដំណឹងលម្អិតនៅពេលដែលសុំបំភ្លឺពីភាគីក្រុមហ៊ុនសាងសង់ និងអាជ្ញាធរពាក់ព័ន្ធគម្រោងសាងសង់អាគារពាណិជ្ជកម្មលំដាប់ពិភពលោកមួយនេះបាន។

សូមជម្រាបថា អគារពាណិជ្ជកម្មភ្លោះកម្ពស់ជិត៦០០ម៉ែត្រ នឹងត្រូវសាងសង់នៅលើដីអតីតសួនកម្សាន្តឌ្រីមលែន។ គម្រោងនេះត្រូវបានប្រកាសឡើងកាលពីខែមីនា ឆ្នាំ២០១៦ ដែលជាការវិនិយោគរួមគ្នារវាងក្រុមហ៊ុន ថៃ ប៊ុនរ៉ុង និងក្រុមហ៊ុនចិន។

អគារនឹងមានកំពស់ ៥៦០ ម៉ែត្រ ប្រសិនបើគម្រោងត្រូវបានបញ្ចប់ វានឹងក្លាយជាអគារខ្ពស់ជាងគេនៅក្នុងតំបន់អាស៊ាន គឺខ្ពស់ជាងអគារភ្លោះ Petronas របស់ប្រទេសម៉ាឡេស៊ី (កម្ពស់ ៤៥២ ម៉ែត្រ មាន ៨៤ជាន់) អគារ Keangnam Hanoi Landmark របស់ប្រទេសវៀតណាម (កម្ពស់ ៣៤៥ម៉ែត្រ មាន ៧៧ ជាន់) អគារ Menara Telekom របស់ប្រទេសម៉ាឡេស៊ី (កម្ពស់ ៣១០ ម៉ែត្រមាន ៥៥ ជាន់) និងអគារ Baiyoke II របស់ប្រទេសថៃ ដែលមានកម្ពស់ ៣០៤ ម៉ែត្រ មាន៨៤ជាន់ ទៅទៀត។

នៅពេលអគារមជ្ឈមណ្ឌលពាណិជ្ជកម្មលំដាប់ពិភពលោកនេះ សាងសង់ចប់ នឹងក្លាយជានិម្មិតរូប នៃការអភិវឌ្ឍជាតិ មុខមាត់របស់ប្រទេសកម្ពុជាទាំងមូល និងជាពិសេសបានលើកតម្លៃកិត្យានុភាព សម្រាប់ប្រទេសកម្ពុជា នៅលើឆាកអន្តរជាតិ ដែលជាប្រទេសធ្លាប់មានអរិយធម៌ខ្ពង់ខ្ពស់៕

The post ៥ឆ្នាំកន្លងទៅ អាគារភ្លោះកម្ពស់ ១៣៣ជាន់ តម្លៃ៣ពាន់លានដុល្លារទល់មុខណាហ្គាវើលដ៍ មិនទាន់ឃើញលេចចេញសមិទ្ធផលដំកុំភួននៅឡើយ appeared first on .