នាឱកាសនោះ សម្ដេចធិបតី ហ៊ុន ម៉ាណែត បានកោតសរសើរដល់គណៈបញ្ជាឯកភាពខេត្ត ដែលបានចូលរួមក្នុងការថែរក្សាសន្ដិសុខខេត្ត ខណៈខេត្តស្ទឹងត្រែង គឺជាខេត្តឆ្លងកាត់ធំទាក់ទងនឹងប្រទេសឡាវ និងប្រទេសមួយចំនួន ដែលទាក់ទងនឹងឧក្រិដ្ឋកម្មឆ្លងដែនមួយចំនួនដែលចាំបាច់ត្រូវការពង្រឹងការគ្រប់គ្រង។

ប៉ុន្តែយ៉ាងណា សម្ដេចធិបតី បានបញ្ជាក់ថា កន្លងទៅខេត្តស្ទឹងត្រែង មានការចាប់ ការបំផ្លាញនូវសកម្មភាពខុសច្បាប់ឆ្លងដែន ឆ្លងកាត់ រត់ពន្ធគ្រឿងញៀនដែន ដែលចូលពីប្រទេសផ្សេង មកកម្ពុជា ដើម្បីឆ្លងកាត់ដើម្បីឆ្លងដែន ដូច្នេះការទប់ទល់នេះគឺជាកិច្ចការសំខាន់។

ជាមួយគ្នានេះ សម្ដេចធិបតី ក៏បានបញ្ជាឱ្យអាជ្ញាធរគ្រប់សមត្ថកិច្ចរបស់ខេត្តស្ទឹងត្រែង បន្តពង្រឹងការទប់ស្កាត់បទល្មើសនានាពាក់ព័ន្ធនឹងឧក្រិដ្ឋកម្មឆ្លងដែន ដោយធ្វើយ៉ាងណាកុំឱ្យខេត្ត មានពាក់ព័ន្ធជាមួយអ្វីដែលគ្រោះថ្នាក់ ដែលជាសេដ្ឋកិច្ចខ្មៅ យកចូលក្នុងខេត្តឱ្យសោះ។

ឆ្លៀតកាសនោះ សម្ដេចធិបតី នាយករដ្ឋមន្រ្ដី ក៏បញ្ជាក់ដែរថា ខេត្តឆ្ងាយវាមានបញ្ហាសម្រាប់មុខរបរខ្លះ ប៉ុន្ដែវាក៏អំណោយផលសម្រាប់មុខរបរដែលមិនចង់ឱ្យគេឃើញ មុខរបរដែលអាចប៉ះពាល់ទៅដល់សន្ដិសុខសង្គម អីចឹងគឺត្រូវធ្វើម៉េចទប់ទល់ក្រុមបណ្ដាញឧក្រិដ្ឋកម្មមិនថានៅក្នុងខេត្ត ឬមួយក៏ឆ្លងខេត្ត ឬឆ្លងប្រទេស គឺត្រូវតែរួមគ្នាទប់ស្កាត់ឱ្យបាន និងទប់ស្កាត់ឱ្យបានម៉ឹងម៉ាត់ ព្រោះបើខេត្តមានមុខមាត់អាក្រក់ហើយ គឺលំបាកលាងសម្អាតណាស់ ដូច្នេះត្រូវរក្សាឱ្យបាននៅការទប់ស្កាត់បញ្ហានេះ៕អត្ថបទ៖ហ្សាលីន

The post សម្តេចធិបតី បញ្ជាឱ្យអាជ្ញាធរខេត្តស្ទឹងត្រែង ទប់ស្កាត់បទល្មើសឧក្រិដ្ឋកម្ម និងលំហូរសេដ្ឋកិច្ចខ្មៅ appeared first on .

នៅក្នុងពិធីនេះ បានឱ្យដឹងថា ខេត្តស្ទឹងមានទន្លេបួនហូរកាត់ ហើយទន្លេមេគង្គកាត់ ចំកណ្តាលខេត្ត ពីជើងទៅត្បូងចាប់ពីព្រំ​ប្រ​ទល់​ប្រទេសឡាវដល់ខេត្តក្រចេះ ជាប្រភពនៃធនធានមច្ឆជាតិ និងប្រព័ន្ធជីវៈចម្រុះ។ខេត្តស្ទឹងត្រែង មានផ្ទៃដី១២.០១៦គីឡូម៉ែត្រការ៉េ ផ្ទៃដីព្រៃឈើជាង ៦០ភាគរយ ចែកជា​៦ក្រុង​ស្រុក ៣៤ឃុំសង្កាត់ និង១៣៧ភូមិ មានប្រជាជនសរុប ១៩១.០៧១នាក់ ស្មើនឹង៤៦.០៨៣​គ្រួសារ ប្រជាជនមានអាយុ១៨ឆ្នាំឡើង ១១៨.៦៤២នាក់ មានអត្រាកំណើនប្រចាំឆ្នាំ៥ភាគរយ ដង់ស៊ីតេប្រជាជន១៦នាក់ ក្នុង១គីឡូម៉ែត្រការ៉េ។

ប្រជាជនក្នុងខេត្តស្ទឹងត្រែង មានមុខរបរកសិកម្ម ជាង៧៦ភាគរយ ពាណិជ្ជកម្ម៥ភាគរយ សិប្បកម្ម៤ភាគរយ ចិញ្ចឹមសត្វ៣ភាគរយ និងនេសាទ១ភាគរយ។ផលិតផលក្នុងស្រុកសរុបប្រចាំឆ្នាំ ប្រមាណជា ៣៦៩លានដុល្លារសហរដ្ឋអាមេរិក ក្នុងនោះ ផ.ស.ស. សម្រាប់ប្រជាជនម្នាក់ៗ ១.៧៩០ដុល្លារ អត្រាភាពក្រីក្រស្ថិតក្នុងរង្វង់១៨%។

ចំពោះការវិនិយោគវិញ ខេត្តស្ទឹងត្រែង បានលើកកម្ពស់ការទាក់ទាញគម្រោងវិនិយោគផ្នែក​ឯកជនក្នុង​ក្រប​ខ័ណ្ឌ​កម្មវិធីពិសេសជំរុញការវិនិយោគ ខេត្តភូមិភាគឦសាន បច្ចុប្បន្នក្រុមហ៊ុនទទួល​បាន​គោលការណ៍ ៩គម្រោង ក្នុងវិស័យកសិឧស្សាកម្ម ឧស្សាហកម្ម ទេសចរណ៍ កសិដ្ឋានចិញ្ចឹម​សត្វ មានទុនវិនិយោគជាង ២០លានដុល្លារ និងបានចុះអនុស្សរណៈនៃការយោគយល់គ្នាជា​មួយក្រុមហ៊ុនវៀតណាម ២គម្រោង មានទុនវិនិយោគជិត ៩០លានដុល្លារ។ ខេត្តនេះ ក៏បានចុះបញ្ជីគម្រោងវិនិយោគ មានទុនវិនិយោគជាង៤លានដុល្លារ ចំនួន ១គម្រោង និងត្រៀមចុះ​បញ្ជី​ចំនួន ៥គម្រោងវិនិយោគទៀតផងដែរ។

សូមជម្រាបដែរថា ខេត្តនេះ គឺមានផ្លូវជាតិឆ្លងកាត់៣ខ្សែ គឺផ្លូវជាតិលេខ៧ ផ្លូវជាតិលេខ៩ ផ្លូវជាតិលេខ៧៨ និងមានផ្លូវ តាមបណ្ដោយព្រំដែនប្រមាណ ១៣៧គីឡូម៉ែត្រ ស្ពានឆ្លងកាត់ទន្លេ មានស្ពានសេកុងប្រវែង ១.០៥៧ម៉ែត្រ ស្ពានមេគង្គប្រវែង ១.៧៣១ម៉ែត្រ ស្ពានទន្លេកុងសែនជ័យប្រវែង២៦០ម៉ែត្រ និង​ស្ពាន​កោះទន្សាយសែនជ័យ ប្រវែង២៤០ម៉ែត្រ៕អត្ថបទ៖ហ្សាលីន

The post ខេត្តស្ទឹងត្រែង ទាកទាញបានគម្រោងវិនិយោគ ៩គម្រោង ដោយផ្តោតវិនិយោគលើវិស័យសំខាន់ចំនួន ៤ appeared first on .

គម្រោងស្វែងរុករករ៉ែលោហៈនេះ ត្រូវបានក្រសួងបរិស្ថានពិនិត្យ និងផ្ដល់យោបល់លើរបាយការណ៍វាយតម្លៃហេតុប៉ះពាល់បរិស្ថានដំបូង (IEIA) ដែលកិច្ចប្រជុំពិនិត្យ វាយតម្លៃនេះបានធ្វើឡើងកាលពីព្រឹកថ្ងៃទី២៨ ខែតុលា ឆ្នាំ២០២៥ ដឹកនាំដោយ លោក ទា ជុប រដ្ឋលេខាធិការក្រសួងបរិស្ថាន។

យោងតាមរយៈកិច្ចប្រជុំខាងលើបានឱ្យដឹងថា សម្រាប់គម្រោងស្វែងរុករករ៉ែលោហៈនេះ នឹងវិនិយោគលើផ្ទៃដីទំហំ ២០០គីឡូម៉ែត្រការ៉េ មានទីតាំងស្ថិតនៅក្នុងតំបន់ឧទ្យានជាតិវើនសៃ-សៀមប៉ាង ក្នុងឃុំសន្តិភាព និងឃុំសេកុង ស្រុកសៀមប៉ាង ខេត្តស្ទឹងត្រែង វិនិយោគដោយក្រុមហ៊ុន PHILOCEAN INTERNATIONAL (CAMBODIAN) CO., LTD.។ គម្រោងនេះ សិក្សាដោយក្រុមហ៊ុនទីប្រឹក្សា 3P ENVIRONMENTAL SOLUTIONS CO., LTD.។

គូសបញ្ជាក់ថា កិច្ចប្រជុំខាងលើនេះត្រូវបានរៀបចំឡើងក្នុងគោលបំណងដើម្បីពិនិត្យ និងផ្តល់មតិយោបល់បច្ចេកទេសលើរបាយការណ៍នេះ ដោយធានាឱ្យបានថាគម្រោងបានគិតគូរដល់កិច្ចគាំពារបរិស្ថាន ព្រមទាំងកំណត់វិធានការកាត់បន្ថយហេតុប៉ះពាល់បរិស្ថាន និងសេដ្ឋកិច្ចសង្គម រួមជាមួយនឹងការធានានូវការអភិវឌ្ឍប្រកបដោយចីរភាព។

គួរ​ឱ្យដឹងដែរថា រ៉ែលោហៈ ជាប្រភេទរ៉ែមានផ្លេកលោហៈចម្លងកម្តៅ និងអគ្គិសនីបានល្អអាចផែបាន និងហូតជាបាន ។ ធនធានរ៉ែលោហៈ ជាប្រភេទរ៉ែដែលចាត់ចូលជាធនធានរ៉ែកម្រនៅកម្ពុជា ដែលធនធានរ៉ែលោហៈ មានដូចជា ដែកស្ពាន់ធ័រ រ៉ែមាស រ៉ែបុកស៊ីត រ៉ែដែក ជាដើម៕

The post ក្រុមហ៊ុនមួយនឹងបោះទីតាំងវិនិយោគលើគម្រោងស្វែងរុករករ៉ែលោហៈ នៅស្រុកសៀមប៉ាង ខេត្តស្ទឹងត្រែង appeared first on .

បើតាមប្រធានមន្ទីរកសិកម្មខេត្តស្ទឹងត្រែង បានឱ្យដឹងថា បើគិតពីឆ្នាំ២០១៨ ដល់ ២០២២ ផលិតផលដែលផលិតបានក្នុងវិស័យកសិកម្ម មានចំណូលប្រមាណ ៧០០ ទៅ៨០០លានដុល្លារអាមេរិក បើគិតជាកំណើន GDP មានក្នុងរង្វង់ពី ៦៧ ទៅ ៦៩% សម្រាប់ចាក់បញ្ចូលទៅក្នុងសេដ្ឋកិច្ចខេត្តស្ទឹងត្រែងទាំងមូល។

លោក បានបន្តថា ចំណូលប្រមាណ ៧០០ ទៅ៨០០លានដុល្លារអាមេរិកនេះ បានមកពីផលិតផលកសិកម្មដែលផលិតបានរបស់ខេត្តរួមមាន ដំណាំកសិកម្មគ្រប់ប្រភេទដូចជា ស្រូវ ស្វាយចន្ទី កៅស៊ូ ដំឡូងមីជាដើម លើសពីនេះ ក៏មានវិស័យជលផល និងសត្វចិញ្ចឹមផងដែរ។

បើតាម លោក ទុំ នីរ៉ូ បានឱ្យដឹងបន្ថែមទៀតថា ក្នុងចំណោមវិស័យសក្តានុពលសំខាន់ៗរបស់ខេត្តស្ទឹងត្រែង វិស័យកសិកម្មជាវិស័យអទិភាពមួយដែលមានតួនាទីសំខាន់ ក្នុងការធានាសន្តិសុខស្បៀង ក៏ដូចជាការលើកកម្ពស់ជីវភាពរស់នៅរបស់ប្រជាកសិករ។ទិន្នផលដែលផលិតបានក្នុងខេត្ត មានចន្លោះពី៩០ ទៅ១០០ពាន់តោន ក្នុង១ឆ្នាំ គិតជាទឹកប្រាក់ប្រមាណជាង ១០០លានដុល្លារ សម្រាប់ចាក់បញ្ចូលក្នុងសេដ្ឋកិច្ចខេត្ត។លោក បានបន្តថា ចំនួននេះមានកំណើនជាមធ្យមក្នុងរង្វង់ ៦ទៅ៧% ក្នុង១ឆ្នាំ។

គួរឱ្យដឹងផងដែរថា ខេត្តស្ទឹងត្រែង មានផ្ទៃដីកសិកម្មសរុបប្រមាណ ១០ ០០០ ហិកតា ក្នុងនោះ ដំណាំស្រូវមានប្រមាណ ២៧ ៨០០ហិកតា ស្វាយចន្ទីមាន ៤៤ ៥២៧ហិកតា កៅស៊ូ ១៣ ៤៤១ ហិកតា ដំឡូងមី ២៥ ០៦៧ហិកតា ស្វាយ ៣ ៩៨០ ហិកតា និងដំណាំរួមផ្សំប្រមាណជាង ៤០០ ហិកតា។ចំណែកកំណើនផលិតផលក្នុងស្រុកសរុបក្នុងប្រជាជនម្នាក់ កើនឡើង ១.៤២៣ដុល្លារ ក្នុងឆ្នាំ២០១៨ដល់ ១.៥៨៥ដុល្លារ ក្នុងឆ្នាំ២០២៣ និងអត្រាភាពក្រីក្រថយចុះពី២៣% ឆ្នាំ២០១៨ មកត្រឹម២១% ក្នុងឆ្នាំ២០២៣៕

The post ចំណូលប្រមាណជាង៧០០ លានដុល្លារ ខេត្តស្ទឹងត្រែង រកបានពីផលិតផលកសិកម្ម appeared first on .

ទីស្តូបប្រវត្តិសាស្ត្រនេះមានអាយុកាលជិត៦០ឆ្នាំមកហើយ ពោលគឺតាំងពីសម័យព្រះបរមរតនកោដ្ឋ ព្រះបាទសម្ដេចព្រះនរោត្តម សីហនុ ព្រះវររាជបិតាជាតិខ្មែរ។ នេះបើតាមលោក លី មីនា អភិបាលស្រុកបុរីអូរស្វាយសែនជ័យ។

លោក លី មីនា បន្តថា ដោយសារស្ដូបអនុស្សាវរីយ៍នេះជាទីតាំងប្រវត្តិសាស្ត្រ ទើបមានភ្ញៀវទេសចរជាតិ-អន្តរជាតិតែងចាប់អារម្មណ៍មកកម្សាន្ត ថតរូប សិក្សាពីប្រវត្តិនៃការកសាង ឯអ្នកខ្លះក៏មកបន់ស្រន់ ព្រោះមានរានព្រះភូមិនៅជិតដើមពោធិ៍ដ៏ធំមួយដើមនៅក្បែរនោះដែរ ពិសេសគឺពេលភ្ញៀវទេសចរឆ្លងកាត់ទៅលេងកម្សាន្តនៅតាមកោះនានា តាមរយៈសហគមន៍អេកូទេសចរណ៍បុរីអូរស្វាយ។

លោកអភិបាលស្រុករូបនេះ បានបន្ថែមទៀតថា ស្ដូបអនុស្សាវរីយ៍បុរីអូរស្វាយនេះត្រូវបានសាងសង់ឡើងនៅឆ្នាំ១៩៦៣ដល់ឆ្នាំ១៩៦៧ ក្រោមស្នាព្រះហស្ដព្រះបរមរតនកោដ្ឋ ក្នុងព្រះរាជបំណងការពារបូរណភាពទឹកដីនាភាគខាងជើងជាប់នឹងប្រទេសឡាវ ក្នុងនោះមានមុខ៤បែរមុខទៅកាន់ទិសធំៗទាំង៤ រំលេចនូវព្រះឆាយាលក្ខណ៍ក្នុងវេលាដែលព្រះអង្គឡើងគ្រងព្រះបរមសិរីរាជសម្បត្តិលើកទី១ ព្រះរាជសកម្មភាពនៃការបំពេញព្រះរាជបូជនីយកិច្ចកសាងហេដ្ឋារចនាសម្ពន្ធនៅបុរីអូរស្វាយនេះស្រាប់ ព្រះរាជសកម្មភាពកីឡាជាដើម។

លោកអភិបាលស្រុកទើបបង្កើតថ្មីមួយនេះបានបន្តទៀតថា ក្នុងពេលនោះ ព្រះបរមរតនកោដ្ឋមានគោលនយោបាយបែងចែកដីធ្លីជូនប្រជាជនដែលស្ម័គ្រចិត្តមករស់នៅលើតំបន់នោះ និងបានបង្កើតជាតំបន់និគមជន ឬទីប្រជុំជនធំមួយហៅថា «បុរីអូរស្វាយ» នេះឯង ក្នុងនោះព្រះអង្គបានរៀបចំកសាងប្រព័ន្ធហេដ្ឋរចនាសម្ពន្ធ ពិសេសគឺបានបង្កើតជា «សួនច្បារ» និងស្ដូបអនុស្សាវរីយ៍នេះផងដែរ។

ប្រជាជន និងភ្ញៀវទេសចរពិតជាមានការចាប់អារម្មណ៍ច្រើនចំពោះស្ដូបអនុស្សាវរីយ៍បុរីអូរស្វាយនេះ។ លោកអភិបាលស្រុកបញ្ជាក់បន្ថែម។

សូមជម្រាបថា ស្រុកបុរីអូរស្វាយសែន ជាស្រុកទើបបង្កើតថ្មីនៅឆ្នាំ២០២២ ដោយបំបែកចេញពីស្រុកថាឡាបរិវ៉ាត់ (ធារាបវ៌្វត) នៃខេត្តស្ទឹងត្រែង ដែលមានព្រំប្រទល់ជាប់ជាមួយប្រទេសឡាវ (ខេត្តចម្ប៉ាស័ក) ប្រមាណជិត១០០គីឡូម៉ែត្រ ចាប់ពីបង្គោលព្រំដែនលេខ១០៩ដល់លេខ១៣៧ ពោលគឺចាប់ពីស្រុកឆែប ខេត្តព្រះវិហារ រហូតដល់ស្រុកសៀមប៉ាង ខេត្តរតនគិរី៕

The post អភិបាលស្រុកទើបបង្កើតថ្មី បង្ហើបកន្លែងភ្ញៀវទេសចរដែលទៅដល់ស្ទឹងត្រែងមិនសូវរំលង appeared first on .