លោក សាប់ សារុន កសិករចិញ្ចឹមបង្កងទឹកសាបនៅឃុំសំបួរ ស្រុកទ្រាំងខេត្តតាកែវ បានឱ្យដឹងថា នៅក្នុងរដូវបុណ្យភ្ជុំបិណ្ឌឆ្នំានេះ ចាប់ពីថ្ងៃបិណ្ឌទីមួយការលលក់បង្កងរបស់លោកចាប់ផ្តើមមានការកើន បើប្រៀបធៀបទៅនិងថ្ងៃធម្មតា។ ជាក់ស្តែងចាប់ពីបិណ្ឌទី៣តទៅថ្លៃខ្លះ លោកអាចលក់បង្កងរបស់ខ្លួនបានដល់២០គីឡូ។ ពិសេសជាងនេះទៅទៀតនៅថ្ងៃបិណ្ឌទី១៤និង១៥ អាចលក់បានរហូតដល់៦០គីឡូក្នុងមួយថ្ងៃ។

លោក សាប់ សារុន បញ្ជាក់ថា «នៅក្នុងរដូវបុណ្យភ្ជុំបិណ្ឌឆ្នំា២០២៣នេះ ប្រជាពលរដ្ឋរស់នៅក្នុងតំបន់មកទិញផ្ទាល់នៅនិងកន្លែងចិញ្ចឹមមានច្រើនប្រហាក់ប្រហែលទៅនិងអ្នកកំម្ម៉ង់ទិញតាមទូរស័ព្ទ។ សម្រាប់បង្កងលេខ២លក់ក្នុងតម្លៃ៨ម៉ឺនរៀល និងលេខ៣ថ្លៃ៧ម៉ឺនរៀលក្នុងមួយគីឡូក្រាម»។

បើតាមកសិករចិញ្ចឹមបង្កង ខាងលើនៅក្នុងមួយរដូវបុណ្យភ្ជុំបិណ្ឌឆ្នាំ២០២៣ លោកលក់បានប្រហែល៥០០គីឡូក្រាម ហើយន្ទឹមនិងការលក់បង្កងនៅក្នុងរដូវភ្ជុំបិណ្ឌកើនឡើង បច្ចុប្បន្ននៅមានបង្កងបែបធម្មជាតិនៅក្នុងស្រែបង្កងប្រហែល២ម៉ឺនក្បាលសម្រាប់ផ្គត់ផ្គង់តម្រូវការទីផ្សារ ខណៈដែលថ្មីៗលោកសាប់សារុនក៏បាននិងដាក់កូនចិញ្ចឹមសម្រាប់ផ្គត់ផ្គង់សាច់ និងចែកចាយកូនបង្កងទៅដល់ប្រជាកសិករនៅក្នុងតំបន់រហូតដល់២០ម៉ឺនកូននៅក្នុងទីតំាងរបស់ខ្លួន។

លោក ថាយ សុមុនី ប្រធាននាយកដ្ឋានវារីវប្បកម្មនៃរដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទមានប្រសាសន៍ថា ក្រសួងកសិកម្មរុក្ខាប្រមាញ់និងនេសាទ ក៏ដូចជាមន្ទីរកសិកម្ម រដ្ឋបាលជលផលខេត្តតាកែវ ចង់ឃើញដីសណ្តទន្លេមេគង្គកម្ពុជា ពិសេសក្នុងខេត្តតាកែវ កណ្តាល ព្រៃវែង មានការពង្រីការចិញ្ចឹមបានកាន់តែច្រើន ដើម្បីចូលរួមកាត់បន្ថយការនាំចូលពីប្រទេសជិតខាង ឬអាចឈានដល់ការនាំចេញទៅថ្ងៃអនាគត។

លោកបញ្ជាក់ថា «ថ្មីៗនេះយើងបានអញ្ចើញអ្នកជំនាញការក៏ដូចជាសាស្ត្រាចិនចុះមកមើលទីតំាងចិញ្ចឹមបង្កងរបស់យើង និងបានភ្លក្សម្ហូបធ្វើពីបង្កងទឹកសាបហើយ គាត់ទទួលស្គាល់រសជាតិ និងមានការចាប់អារម្មណ៍ ហើយទីតំាងសមស្របអាចជំរុញការចិញ្ចឹមបង្កងទឹកសាប ។ជាទិសដៅរដ្ឋាបាលជលផលក៏បានស្នើសុំទៅក្រសួងកសិកម្មរុក្ខាប្រមាញ់និងនេសាទនៅការពង្រីកការចិញ្ចឹមបង្កងនៅតាមខេត្តគោលដៅ មានខេត្តតាកែវ កណ្តាលនិងខេត្តព្រៃវែង»៕ អត្ថបទ៖ សារេត

The post បង្កងចិញ្ចឹមបែបធម្មជាតិកំពុងក្លាយជាមុខម្ហូបពេញនិយមមួយសម្រាប់គ្រួសារនិងមិត្តភក្រ្ត័ក្នុងរដូវបុណ្យទាន appeared first on .

លោក ញ៉េប ឈឿន រស់នៅភូមិឃុំខាងលើ បានឱ្យដឹងថា មូលហេតុដែលជម្រុញទឹកចិត្តឱ្យក្រុមគ្រួសារខ្ញុំបង្កើនបរិមាណការចិញ្ចឹមបង្កងចំនួន៣ម៉ឺនកូនបន្ថែម នៅវគ្គទី២នេះ ដោយសារតែខ្ញុំសង្កេតឃើញការចិញ្ចឹមបង្កងមានការលូតលាស់បានល្អ។

បើតាមកសិករ ញ៉េប ឈឿន ទន្ទឹមនិងការចិញ្ចឹមបង្កងវគ្គទី២ចាប់ផ្តើមនៅចុងសប្តាហ៍ទី១ នៃខែកញ្ញានេះ លោកក៏មានការព្រួយបារម្ភខ្លះៗផងដែរ  ដោយសារមិនសូវឃើញបង្កងច្រើនចូលមករកស៊ីចំណីដែលដាក់នៅក្នុងកញ្ច្រែង តែទោះជាយ៉ាងនេះក្តី លោកនៅតែមានសង្ឃឹមខ្ពស់ដដែលផ្អែកទៅលើការមើលថែរាល់ថ្ងៃមិនទាន់ឃើញបង្កងខូចឬងាប់នៅក្នុងស្រែនៅឡើយ។

លោកបញ្ជាក់ថា«សម្រាប់ទីតំាងចិញ្ចឹមបង្កងថ្មីលើផ្ទៃដីជិតកន្លះហិកតានេះ យើងមានការរំពឹងខ្ពស់ថាការចិញ្ចឹមបង្កងលក្ខណៈគ្រួសាររបស់យើង ព្រោះទីតំាងថ្មីនេះយើងបានរៀបចំបានស្អាតជាងទីតំាងទី១ ហើយបើសិនការចិញ្ចឹមបង្កងវគ្គទី២នេះបង្ហាញសញ្ញាឬការលូតលាស់បានល្អ ដោយមិនមានការខូចខាត យើងគ្រោងពង្រីកការចិញ្ចឹមបង្កងថែមទៀត»។

ពាក់ព័ន្ធនិងមុខរបរចិញ្ចឹមបង្កងនៅក្នុងស្រែ ស្រះនេះ បើតាម ប្រធាននាយកដ្ឋានវារីវប្បកម្មនៃរដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទថា មុខរបរមួយនេះអាចជួយបង្កើនប្រាក់ចំណូលដល់កសិករបានល្អ។លើសពីនេះ អាចចូលរួមសម្រេចនូវគោលបំណងរបស់រាជរដ្ឋាភិបាលដែលថានៅត្រឹមឆ្នំា២០៣០ ឱ្យប្រទេសយើងក្លាយជាប្រទេសមានប្រាក់ចំណូលកម្រិតមធ្យម ដែលអាចឱ្យគ្រួសារកសិករម្នាក់មានប្រាក់ចំណូលបានដល់៥ពាន់ ដុល្លារអាមេរិក។

លោក ថាយ សុមុនី សង្កត់ធ្ងន់ថា «ដោយមើលឃើញមុខរបរចិញ្ចឹមត្រី បង្កង ផ្តល់ផលប្រយោជន៍ដល់ប្រជាកសិករ យើងត្រូវបង្កើនផលិតភាពដីស្រែមួយហិកតាឱ្យបានចំណូលខ្ពស់ជាជាងធ្វើស្រូវតែមួយមុខ។បើយើងធ្វើបាន ជួយកាត់បន្ថយការប្រើប្រាស់ថ្នាំពុលកសិកម្មឬជីគីមីផ្សេងៗ ដែលបានប្រើប្រាស់ពីមុននោះជួយឱ្យប្រព័ន្ធអេកូស៊ីស្ទឹមវាលស្រែយើងមានភាពល្អប្រសើរឡើង តាមរយៈការឈប់ប្រើប្រាស់ថ្នំាពុលកសិកម្ម»៕

អត្ថបទ៖សារេត

The post កសិករនៅខាងភូមិព្រៃភ្លងម្នាក់ ចាប់ផ្តើមបង្កើនបរិមាណចិញ្ចឹមបង្កងតាមបែបធម្មជាតិ appeared first on .

នៅក្នុងដំណើរទស្សនៈកិច្ចសិក្សាពិសោធន៍ទៅលើប្រព័ន្ធចិញ្ចឹមត្រីក្នុងស្រែរបស់ក្រុមការងារអ្នកវិទ្យាសាស្ត្រនៃមជ្ឈមណ្ឌលត្រីពិភពលោក, វិទ្យាស្ថានស្រាវជ្រាវកសិកម្មនិងអភិវឌ្ឍន៍បារំាង ធ្វើឡើងនៅទីតំាងកសិដ្ឋានរបស់កសិក សាប់ សារុន កាលពីថ្ងៃទី៥ ខែកញ្ញានេះ លោក ថាយ សុមុនី ប្រធាននាយកដ្ឋានវារីវប្បកម្មនៃរដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា យើងបានមើលការចិញ្ចឹមត្រី បង្កងក្នុងស្រែ និងក្នុងស្រះរួមជាមួយនិងការដំាដូងនៅជុំវិញស្រែឬស្រះ ដើម្បីបង្កើនប្រាក់ចំណូលដល់កសិករ ហើយយើងអាចសម្រេចនូវគោលបំណងរបស់រាជរដ្ឋាភិបាល ដែលថានៅត្រឹមឆ្នំា២០៣០ឱ្យប្រទេសយើងក្លាយជាប្រទេសមានប្រាក់ចំណូលកម្រិតមធ្យម ដែលអាចឱ្យគ្រួសារកសិករម្នាក់មានប្រាក់ចំណូលបានដល់៥ពាន់ដុល្លារអាមេរិក ។

លោកបន្តថា «ឃើញបែបនេះ យើងបង្កើនផលិតភាពដីស្រែក្នុងមួយហិកតា ឱ្យបានចំណូលខ្ពស់ជាជាងធ្វើស្រូវតែមួយមុខ។បើយើងធ្វើបាន ជួយកាត់បន្ថយការប្រើប្រាស់ថ្នាំពុលកសិកម្មឬជីគីមីផ្សេងៗ ដែលបានប្រើប្រាស់ពីមុននោះជួយឱ្យប្រព័ន្ធអេកូស៊ីស្ទឹមវាលស្រែយើងមានភាពល្អប្រសើរឡើង តាមរយៈការឈប់ប្រើប្រាស់ថ្នំាពុលកសិកម្ម»។

បើតាមមន្ត្រីជំនាញខាងវារីវប្បកម្មរូបនេះ ថា នៅក្នុងដំណើរទស្សនៈកិច្ចសិក្សាពិសោធន៍ទៅលើប្រព័ន្ធចិញ្ចឹមត្រីក្នុងស្រែនេះ រដ្ឋាបាលជលផលបានផ្តល់អនុសាសន៍ឱ្យក្រុមស្រាវជ្រាវមើលព្រៃទំាងមូល ពិសេសធ្វើយ៉ាងម៉េចឱ្យការពិសោធន៍នេះបានលទ្ធផល អាចអនុវត្តជាក់ស្តែងបាន ដោយប្រជាជននៅតាមមូលដ្ឋានជនបទ។

លោកលើកឡើងថា «ពីមុនមកខាងវិទ្យាស្ថានស្រាវជ្រាវកសិកម្ម និងអភិវឌ្ឍន៍បារំាងនេះ ធ្លាប់ធ្វើការស្រាវជ្រាវនៅខាងខេត្តសៀមរាប និងខេត្តកំពង់ធំ ប៉ុន្តែមានទ្រុងទ្រាយតូច។វិទ្យាស្ថានស្រាវជ្រាវអភិវិឌ្ឍន៍បារំាងនេះ បានធ្វើការពិសោធន៍៣ឆ្នំាមុន លើការចិញ្ចឹមបង្កងក្នុងស្រែជាមួយកសិករ សាប់ សារុន ដោយឃើញថាទទួលបានលទ្ធផលល្អ ទើបគាត់ពង្រីកការចិញ្ចឹមបន្តទៀត តាមរយៈការគំាំទ្រពីនាយកដ្ឋានអភិវឌ្ឍន៍វារីវប្បកម្មយើង ជាមួយខណ្ឌរដ្ឋបាលជលផល ដែលតែងតែចុះជាប់ជាមួយប្រជាកសិករក្នុងខេត្តតាកែវ»៕

អត្ថបទ៖សារេត

The post ការចិញ្ចឹមត្រី-បង្កងក្នុងស្រែ ជួយបង្កើនប្រាក់ចំណូលដល់កសិករ និងកាត់បន្ថយការប្រើប្រាស់ជី និងថ្នាំពុលកសិកម្មតាមវាលស្រែ appeared first on .

បើតាមលោក មិនឆុន អាយុជាង៥០ឆ្នំារស់នៅភូមិឃុំខាងលើបានឱ្យដឹងថា មុនចាប់ផ្តើមចិញ្ចឹមបង្កងនេះ ក្រុមគ្រួសារលោកប្រកបរបរធ្វើស្រែនៅលើផ្ទៃដីជាង២ហិកតា ហើយបានប្រាក់ចំណូលយកមកផ្គត់ផ្គង់គ្រួសារមិនបានគ្រប់គ្រាន់ ទើបសម្រេចចិត្តចំណាយប្រាក់ជីកស្រះសម្រាប់ចិញ្ចឹមបង្កងរហូតដល់សព្វថ្ងៃនេះ។

លោក មិន ឆុន បញ្ជាក់ថានៅឆ្នំាទី១និងឆ្នំាទី២ ខ្ញុំចិញ្ចឹមបង្កងបែបធម្មជាតិជាង២ម៉ឺនកូន,ឆ្នំាទី៣ចំនួន១ម៉ឺន៥ពាន់កូន​​ហើយនៅឆ្នំាទី៤នេះយើងដាក់ប្រមាណ២ម៉ឺនកូន​បើគិតប្រាក់អស់ប្រហែល១០លានរៀល។

លោកលើកឡើងថា« ការចិញ្ចឹមនៅឆ្នំាទី៣កន្លងទៅនេះមិនសូវទទួលបានផលចំណូលច្រើនទេ ដោយសារយើងមិនបានស្តារស្រះឱ្យបានស្អាតល្អ ធ្វើឱ្យមានខូចខាតអស់មួយចំនួន និងម្យ៉ាងទៀតយើងមិនសូវមានប្រភពទឹកសម្រាប់ផ្តាស់ប្តូរឱ្យបង្កងរស់នៅកន្លែងដែលល្អ។ បើយើងមានប្រភពទឹកគ្រប់គ្រាន់មានដីច្រើនហិកតា មុខរបរមួយនេះយើងមានសង្ឃឹមជោគជ័យ ព្រោះមុខរបរនេះយើងមានទំនុកចិត្តនិងជឿជាក់លើខ្លួនឯងថាអាចធ្វើបាន»។

បើតាមលោក មិនឆុន នៅពេលបច្ចុប្បន្ននេះប្រជាពលរដ្ឋរស់នៅក្នុងតំបន់មិនទាន់មានអ្នកណាហ៊ានចាប់ផ្តើមចិញ្ចឹមបង្កងនៅឡើយនោះទេ ពួកគាត់កំពុងរងចំាមើលគ្រួសារលោកមិនឆុនទទួលបានជោគជ័យជាមុនសិនទើបមានអ្នកសាកល្បងចិញ្ចឹមបង្កងតាម ព្រោះមុខរបរមួយនេះត្រូវការចំណាយដើមទុនច្រើនជាការធ្វើកសិកម្ម។

ពាក់ព័ន្ធនិងការមុខរបរចិញ្ចឹមបង្កងបែបធម្មជាតិនេះអស់រយៈពេល៣ឆ្នំាមកនេះ លោកមិនឆុនគូសបញ្ជាក់ថាកាលឆ្នំាទី១ ក្រៅពីកាត់ចំណាយហើយលោកនៅសល់ប្រាក់ជិត១ម៉ឺនដុល្លារអាមេរិក ឆ្នំាទី២នៅសល់ប្រាក់ប្រហែល៧ពាន់ដុល្លារអាមេរិកនិងនៅឆ្នំាទី៣នៅសល់ប្រាក់ទុកគ្រាន់ទិញកូនបង្កងសម្រាប់ចិញ្ចឹមនៅឆ្នំាទី៤នេះប្រមាណ២ម៉ឺនកូន៕

អត្ថបទ៖សារេត

The post កសិករមិនឆុននៅភូមិជ្រៃងោក​​មានទំនុកចិត្តកាន់តែខ្ពស់លើមុខរបរចិញ្ចឹមបង្កង​ជាងការងារកសិកម្ម appeared first on .

នៅក្នុងកិច្ចពិភាក្សាជាមួយប្រជាកសិករចិញ្ចឹមត្រី នៅក្នុងឃុំសំបួរ ស្រុកទ្រាំង ខេត្តតាកែវ ថ្ងៃទី២៨ ខែមេសានេះលោក Jean Michel Mortillaro អ្នកជំនាញសត្វក្នុងទឹករបស់គម្រោង IT1បានប្រាប់ឧកញ៉ាញូស៍ ឱ្យដឹងថាកិច្ចពិភាក្សា ជាមួយកសិករចិញ្ចឹមត្រីថ្ងៃនេះ ក្នុងគោលបំណងសិក្សាពិសោធន៍ជាមួយកសិករទាក់ទងនិងការប្រែប្រួលអាកាសធាតុ សំខាន់គឺយើងផ្តោតទៅត្រីនិងបង្កង ដោយធ្វើយ៉ាងណាឱ្យការសិក្សាពិសោធន៍របស់យើងបានជោគជ័យ។

លោក Jean Michel Mortillaro បញ្ជាក់ថា «តាមរយៈការសិក្សាពិសោធន៍នេះយើងនិងផ្តល់កូនត្រីឬបង្កងដល់ប្រជាកសិករនៅក្នុងកំឡុងពេលខែ៦ឬខែ៧ ហើយធ្វើបន្តរហូតដល់ខែ៤ឬខែ៥ ។យើងធ្វើគម្រោងពិសោធន៍នេះស្ថិតនៅក្នុងខេត្តចំនួន១០ ហើយនៅក្នុងខេត្តតាកែវ មានពីរកន្លែងមួយនៅកសិដ្ឋានចិញ្ចឹមត្រីនិងបង្កងរបស់កសិករ សាប់ សារុន និងមួយផ្សេងទៀតនៅកន្លែងផ្សេង»។

លោកសង្កត់ធ្ងន់ថា «ទាក់ទងនិងគម្រោង IT1សំខាន់គឺយើងចង់ធ្វើឱ្យជីវភាពរបស់ប្រជាកសិករដែលអ្នកចិញ្ចឹមត្រីនិងបង្កងមានភាពប្រសើរឡើង ហើយប្រភពស្បៀងអាហារគឺមានសុវត្ថិភាព ដោយយើងមិនគិតទៅលើការចិញ្ចឹមត្រីតែមួយមុខទេ គឺយើងគិតទៅដល់ការដំាដុះស្រូវនៅក្នុងស្រែជួយឱ្យកសិករទទួលបានបានផលពីរ ក្រៅពីត្រីឬបង្កងគឺមានស្រូវមួយមុខផ្សេងទៀត។ អ៊ីចឹងវានិងធ្វើឱ្យកម្រិតជីវភាពរបស់កសិករនឹងកើនឡើង»។

លោក ង៉ែត សំបូរ កសិករចិញ្ចឹមត្រីម្នាក់នៅភូមិព្រៃភ្លង ឃុំសំបួរ ស្រុកទ្រំាង ខេត្តតាកែវ ចាត់ទុកការចូលរួមជាមួយគម្រោងខាងលើវាមានសំខាន់ណាស់សម្រាប់ កសិករដែលជាអ្នកចិញ្ចឹមត្រីទំាងអស់គ្នា។ ពួកយើងបាននិយាយពីទុកកង្វល់ឬជាបញ្ហាផ្សេងៗអំពីការចិញ្ចឹមត្រីទៅដល់ខាងមន្ត្រីជំនាញរបស់អង្គការ ដែលគាត់មកប្រមូលធាតុចូលនិងធ្វើការសិក្សាដើម្បីរកដំណោះស្រាយជួយកសិករទំាងអស់គ្នា។

លោកបន្តថា« សម្រាប់ពួកយើងបើសិនជាការចិញ្ចឹមត្រីមិនទទួលបានជោគជ័យ វាជាការខាតបង់ធំមួយព្រោះមុខរបរចិញ្ចឹមត្រីនេះយើងចំណាយដើមទុនច្រើនជាងមុខរបរកសិកម្មផ្សេងៗ»។

បើយោងតាមមន្ត្រីជំនាញនៃគម្រោង IT1 តាមការសង្កេតកន្លងមកឃើញថាប្រជាកសិករប្រមូលផលត្រីមកកន្លែងធម្មជាតិនៅតាមតំបន់។ប៉ុន្តែឥលូវនេះគិតថាធ្វើយ៉ាងណាឱ្យកសិករងាកមកចិញ្ចឹមត្រីនៅក្នុងស្រែ ហើយឱ្យពួកគាត់មានការគ្រប់គ្រងច្បាស់លាស់នោះកសិករនឹងទទួលបានផលច្រើនជាងការរកត្រីពីកន្លែងធម្មជាតិ៕

អត្ថបទ៖សារេត

The post IT1ចង់ឃើញប្រជាកសិករ​មានជីវភាពល្អប្រសើរ​តាមរយៈការចិញ្ចឹមត្រីនិងបង្កងនៅក្នុងស្រែ appeared first on .