នាយរករដ្ឋមន្រ្តីកម្ពុជា-វៀតណាម សម្ពោធដាក់ឱ្យប្រើប្រាស់ច្រកទ្វារអន្តរជាតិម៉ឺនជ័យ-តឹនណាមជាផ្លូវការ

Kem sinath — Mon, 08 Dec 2025 02:22:03 +0000

សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោក ផាម មិញជីញ នាយករដ្ឋមន្ត្រីវៀតណាម បានសម្ពោធដាក់ឱ្យដំណើរការនូវច្រកទ្វារអន្តរជាតិម៉ឺនជ័យ-តឹនណាមជាផ្លូវការហើយ នៅថ្ងៃទី៨ ខែធ្នូ ឆ្នាំ២០២៥នេះ។

ច្រកទ្វារព្រំដែនអន្តរជាតិម៉ឺនជ័យ ស្ថិតនៅភូមិត្បូងវត្ត ឃុំក្របៅ ស្រុកកំចាយមារ ខេត្តព្រៃវែង នៅទល់មុខនឹងច្រកទ្វារព្រំដែនអន្តរជាតិតឹនណាម ស្ថិតនៅភូមិតឹនណាម ឃុំតាំងចិន ស្រុកតាំងបៀង ខេត្តតៃនិញ ប្រទេសវៀតណាម។ច្រកទ្វារព្រំដែននេះ ដំបូងឡើយជាច្រករបៀង ដែលប្រជាពលរដ្ឋទាំងសងខាង (កម្ពុជា- វៀតណាម) តែងតែដោះដូរទំនិញ និងកសិផលទៅវិញទៅមក ក្រោយមកនៅកំលុងឆ្នាំ២០១០ រាជរដ្ឋាភិបាលកម្ពុជា បានបង្កើតទៅជាច្រកទ្វារព្រំដែនតំបន់ ហើយដំឡើងទៅជាច្រកទ្វារព្រំដែនអន្តរជាតិនៅថ្ងៃទី៣០ ខែមេសា ឆ្នាំ២០១៤។

ដោយឡែកនៅខាងច្រកទ្វារព្រំដែនតឹនណាម លើទឹកដីវៀតណាមវិញ ត្រូវបានរដ្ឋាភិបាលវៀតណាម យល់ព្រមជាគោលការណ៍ដំឡើងច្រកទ្វារនេះ ទៅជាច្រកទ្វារអន្តរជាតិ នៅថ្ងៃទី១៨ ខែតុលា ឆ្នាំ២០១៧។

សូមជម្រាបថា សំណង់ហេដ្ឋារចនាសម្ព័ន្ធច្រកទ្វារព្រំដែននេះ បានសាងសង់លើផ្ទៃដីសរុបចំនួន ៨៩.៥៧៧ម៉ែត្រការ៉េ ដោយបានដោះស្រាយផលប៉ះពាល់ជូនអ្នកពាក់ព័ន្ធបានរួចរាល់នៅឆ្នាំ២០២០ រួមមានអគារបំពេញបែបបទចេញ-ចូលចំនួន២ខ្នង អគាររដ្ឋបាលកម្ពស់២ជាន់ ចំនួន ១ខ្នង អគារស្នាក់នៅកម្ពស់ ១ជាន់ ចំនួន ២ខ្នង អាហារដ្ឋានចំនួន ២ខ្នង និងអាងចម្រោះទឹកស្អាតចំនួន ១ខ្នង របងបេតុង ប្រវែងសរុប ៥៩៨ម៉ែត្រ ប្រព័ន្ធបង្ហូរទឹក ប្រវែងសរុប ១.២៤២ម៉ែត្រ បង្គោលអំពូលសូឡាទោល និងអំពូលសូឡាភ្លោះ ចំនួន ៧៦ដើម។

ច្រកទ្វារអន្តរជាតិម៉ឺនជ័យនេះ ចំណាយថវិកាសរុបចំនួន ២៦.៤២៤.៦៧៣.៥០០រៀល ក្នុងនោះថវិកាសាងសង់សំណង់ហេដ្ឋារចនាសម្ព័ន្ធ ចំនួន ២២.៨៧៨.៣៧០.៥០០រៀល និងថវិកាដោះស្រាយផលប៉ះពាល់ចំនួន ៣.៥៤៦.៣០៣.០០០រៀល។

ការដំឡើងកម្រិតច្រកទ្វារម៉ឺនជ័យ-តឹនណាម ទៅជាច្រកទ្វារអន្តរជាតិ ជួយជំរុញបន្ថែមនូវទំហំការដោះដូរពាណិជ្ជកម្មកម្រិតតំបន់ (ព្រៃវែង-តៃនិញ) ជាកម្រិតថ្នាក់ជាតិ (កម្ពុជា-វៀតណាម) និងកម្រិតអន្តរជាតិ ជាលំហូរពាណិជ្ជកម្មនៃទំនិញចេញ-ចូល មកពីប្រទេសផ្សេងៗទៀតផងដែរ។

របាយការណ៍បានបញ្ជាក់ថា គិតត្រឹមខែវិច្ឆិកា ឆ្នាំ២០២៥នេះ សរុបចំនួនមនុស្សឆ្លងកាត់ចេញមានចំនួន ៣,១៨៦នាក់ ស្រី ១,៣៧៦នាក់ និងសរុបចំនួនមនុស្សឆ្លងកាត់ចូលមានចំនួន ២,១៥១នាក់ ស្រី ៨៦៧នាក់ ចំណែកឯការដោះដូរពាណិជ្ជកម្មឆ្លងកាត់ច្រកទ្វារព្រំដែន ភាគីទាំងពីរបានបង្កលក្ខណៈងាយស្រួលដល់អាជីវករ ពាណិជ្ជករ ការដឹកជញ្ជូនដោះដូរកសិផល និងទំនិញផ្សេងៗរួមមាន៖ ដំឡូងមី អំពៅ ស្វាយ បន្លែ ផ្លែឈើ គ្រឿងចាប់ហួយ គ្រឿងសំណង់ -ល-៕អត្ថបទ៖ហ្សាលីន

The post នាយរករដ្ឋមន្រ្តីកម្ពុជា-វៀតណាម សម្ពោធដាក់ឱ្យប្រើប្រាស់ច្រកទ្វារអន្តរជាតិម៉ឺនជ័យ-តឹនណាមជាផ្លូវការ appeared first on .

ច្រកទ្វារអន្តរជាតិម៉ឺនជ័យ-តឹនណាម

នាយរករដ្ឋមន្រ្តីកម្ពុជា-វៀតណាម សម្ពោធដាក់ឱ្យប្រើប្រាស់ច្រកទ្វារ​អន្តរ​ជាតិម៉ឺនជ័យ-តឹនណាមជាផ្លូវការ

នាយរករដ្ឋមន្រ្តីកម្ពុជា-វៀតណាម សម្ពោធដាក់ឱ្យប្រើប្រាស់ច្រកទ្វារអន្តរជាតិម៉ឺនជ័យ-តឹនណាមជាផ្លូវការ