នៅក្នុងកិច្ចប្រជុំនោះ លោក ឆាំណានវីត តេរ៉ាត់ បានលើកឡើងថា មកជួបអភិបាលខេត្តពោធិសាត់ លើកនេះដើម្បីរឹតចំណងសាមគ្គីភាព មានកិច្ចសហប្រតិបត្តិការល្អ ក្នុងនាមខេត្តជាប់ព្រំដែននឹងគ្នា។ លោកនថា លោកបានប្រើប្រាស់អំណាច និងតួនាទីផ្ទាល់ ក្នុងការបង្កើតផ្សារណាត់មួយ នៅច្រកព្រំដែនបានថាសែន ទល់មុខច្រកព្រំដែនថ្មដា ដើម្បីឲ្យប្រជាពលរដ្ឋនៅជាប់ព្រំដែន នៃប្រទេសទាំង២អាចដោះដូរ និងទិញទំនិញគ្នា។

ជាមួយគ្នានោះ ប្រសិនបើសភាពការណ៍ពុំមានអ្វីប្រែប្រួលទេនោះ លោក ឆាំណានវីត តេរ៉ាត់ បានបញ្ជាក់ថា «ផ្សារណាត់នេះ អាចនឹងចាប់ផ្តើមដំណើរការនៅថ្ងៃទី០១ ខែមេសា ឆ្នាំ២០២៣ឆាប់ៗខាងមុខ»។

បើតាមលោកអភិបាលខេត្តត្រាត ការព្យាយាមមួយទៀតក្នុងការជំរុញសេដ្ឋកិច្ចនៃប្រទេសទាំង គឺលោកបានគិតគូរពីការរៀបចំធ្វើផ្សារណាត់ចល័តមួយ ដើម្បីឲ្យប្រជាជននៃខេត្តត្រាត អាចយកទំនិញមកលក់ដូរនៅខេត្តពោធិ៍សាត់បាន ហើយប្រជាជននៃខេត្តពោធិ៍សាត់ ក៏អាចយកទំនិញមកលក់ដូរនៅខេត្តត្រាតបានដែរ។ ការណ៍នេះដែលអាចទៅរួចដរាបណាថ្នាក់ដឹកនាំ មន្ទីរជំនាញ នៃខេត្តទាំង២ បានជួយពិភាក្សា និងចុះMOUនឹងគ្នា។

លោកបានគូសបញ្ជាក់បន្ថែមទៀតថា ទាំងភាគីថៃ ក៏ដូចជាភាគីកម្ពុជា ចង់បានខ្លាំងណាស់ ក្នុងការពន្លឿន និងតម្លើងច្រកទ្វារព្រំដែនខាងលើ ឲ្យក្លាយជាច្រកទ្វារព្រំដែនអន្តរជាតិឲ្យបានឆាប់រហ័ស កត្តាសំខាន់នៅចំពោះមុខយើងនេះ យើងត្រូវដោះស្រាយបញ្ហាដែលសេសល់តាមព្រំដែនខ្លះ ហើយដំណើរការផ្សារណាត់ក៏ជាគ្រឹះដំបូងគេ ឈានដល់ការបើកច្រកទ្វារព្រំដែនអន្តរជាតិផងដែរ។

សូមបញ្ជាក់ថា កាលពីថ្ងៃទី០១ ខែកុម្ភៈ ឆ្នាំ២០២៣ អភិបាលខេត្តត្រាត លោក ឆាំណានវីត តេរ៉ាត់ បានចុះទៅត្រួតពិនិត្យទីតាំងធ្វើផ្សារណាត់ ព្រំដែនបានថាសែន ទល់មុខច្រកថ្មដា ខេត្តពោធិ៍សាត់ និងទីតាំងសាងសង់មជ្ឈមណ្ឌលរាជការច្រកព្រំដែនបានថាសែន ដែលត្រូវប្រើប្រាស់កញ្ចប់ថវិកា ប្រមាណ២០០លានបាត របស់ក្រសួងមហាផ្ទៃ ក្រោយពីរដ្ឋមន្ត្រីក្រសួងបរិស្ថានថៃ សម្រេចអនុញ្ញាតឲ្យប្រើប្រាស់តំបន់ព្រៃឈើ សម្រាប់ការសាងសង់ ដើម្បីប្រមូលទិន្នន័យរួម សម្រាប់យកទៅជួបពិភាក្សាការងារ ជាមួយអភិបាលខេត្តពោធិ៍សាត់ នៅថ្ងៃទី០៤ ខែកុម្ភៈ ឆ្នាំ២០២៣នេះ៕

The post ភាគីថៃ មកកម្ពុជាប្រាប់ដំណឹងពីការបើកផ្សារណាត់ ទល់មុខច្រកព្រំដែនថ្មដា ខេត្តពោធិ៍សាត់ appeared first on .

គម្រោងបើកច្រកទ្វារព្រំដែនរបស់រាជរដ្ឋាភិបាលកម្ពុជានៅពេលនេះ ដំណាលគ្នានឹងការសាងសង់ហេដ្ឋារចនាសម្ព័ន្ធនានា ដូចជា អគារអន្តោប្រវេសន៍ អគារគយ និងរដ្ឋាករសម្រាប់ត្រួតពិនិត្យរួម ចំណតសម្រាប់ផ្ទេរទំនិញឆ្លង កាត់ ‌‌ឃ្លាំងទីលានកុងទីន័រ និងអគាររដ្ឋបាល និងសំណង់អគារអន្តេវាសិកដ្ឋាន ដើម្បីបើកឱកាសឱ្យបានទូលំទូលាយដល់កិច្ចសហប្រតិបត្តិការអន្តរជាតិ ការវិនិយោគ ការធ្វើពាណិជ្ជកម្មឆ្លងកាត់ដែន ការបង្កើត ការងារធ្វើ និងការទាក់ទាញភ្ញៀវទេសចរសំដៅលើកកម្ពស់សេដ្ឋកិច្ចគ្រួសារ និងសង្គមជាតិនៃប្រជាជាតិទាំងពីរផងដែរ។

សូមជម្រាបថា ច្រកទ្វារព្រំដែននេះមានទីតាំងស្ថិតនៅក្នុងឃុំថ្មដា ស្រុកវាលវែង ខេត្តពោធិ៍សាត់ជាប់ព្រំដែនជាមួយខេត្តត្រាត ប្រទេសថៃ។

ការបើកច្រកព្រំដែនថ្មដានេះ ត្រូវបានគេមើលឃើញថា នឹងជួយសម្រួលសម្រាប់ការដឹកជញ្ជូនទំនិញរបស់កម្ពុជា ដែលផលិតក្នុងខេត្តពោធិ៍សាត់ បាត់ដំបង ឬបន្ទាយមានជ័យជាដើម ឡើងទៅកាន់កំពង់ផែ ព្រោះនៅក្នុងខេត្តត្រាតមានកំពង់ផែទឹកជ្រៅ ហើយស្ថិតនៅមិនឆ្ងាយប៉ុន្មានពីព្រំដែនថ្មដានោះឡើយ។

ក្រុមហ៊ុនទ្រីភាពគ្រុប បានសហការជាមួយក្រុមហ៊ុនចិនបោះទុនរាប់រយលានដុល្លារអាមេរិក អភិវឌ្ឍន៍តំបន់ព្រំដែនដ៏ស្ងប់ស្ងាត់មួយនេះ។ បច្ចុប្បន្នក្រុមហ៊ុនបានសាងសង់សណ្ឋាគារប្រណិតមួយរួចហើយ ហើយកំពុងសាងសង់សណ្ឋាគារដ៏ធំមួយបន្ថែមទៀត ព្រមជាមួយការសាងសង់សំណង់លំនៅឋានផងដែរ។ តាមគម្រោងក្រុមហ៊ុននឹងបង្កើតជាទីលានវាយកូនហ្គោល ធ្វើជាកន្លែងកម្សាន្តបែបធម្មជាតិ និងបែបកសិទេសចរណ៍ផងដែរ។

អ្នកឧកញ៉ា ទ្រី ភាព អគ្គនាយកក្រុមហ៊ុនទ្រីភាពគ្រុប បានមើលឃើញថា ការបង្កើតច្រកព្រំដែនថ្មដាឱ្យក្លាយទៅជាច្រកទ្វារអន្តរជាតិ នឹងរួមចំណែកធ្វើឱ្យតំបន់ព្រំដែនថ្មដាកាន់តែមានសភាពអ៊ូអរ ដោយមិនត្រឹមតែជាកន្លែងដោះដូរទំនិញនោះទេ តែអាចទាក់ទាញភ្ញៀវទេសចរពីខាងប្រទេសថៃឱ្យចូលលេងកម្សាន្តនៅតំបន់ថ្មដាផងដែរ។

បើតាមអ្នកឧកញ៉ា ទ្រី ភាព ខេត្តត្រាតជាខេត្តជាប់មាត់សមុទ្រហើយមានអ្នកទេសចរច្រើនទៅលេងខេត្តត្រាត ខណៈនៅតំបន់ថ្មដាជាតំបន់ទេសចរណ៍បែបធម្មជាតិ មានទាំងទឹកជ្រោះ និងសម្រស់ព្រៃភ្នំជាដើម អាចស្រូបទាញអ្នកទេសចរពីខាងខេត្តត្រាតឱ្យមកសម្រាកលំហែ និងលេងកម្សាន្តនៅតំបន់ថ្មដាកាន់តែច្រើន។

អ្នកឧកញ៉ាបញ្ជាក់យ៉ាងដូច្នេះថា៖ «ជារឿងប្រសើរណាស់ការបើកច្រកព្រំដែននេះទៅច្រកទ្វារអន្តរជាតិ។ ខ្ញុំមើលឃើញថា ការបើកច្រកនេះមិនត្រឹមតែបម្រើដល់ការដឹកជញ្ជូនចេញចូលរវាងប្រទេសទាំងពីរនោះទេ ក៏ប៉ុន្តែវានឹងទាក់ទាញអ្នកទេសចរទៅតំបន់ថ្មដាកាន់តែច្រើន ខណៈដែលយើងបានសាងសង់នូវសណ្ឋាគារ និងកន្លែងលេងកម្សាន្តត្រៀមទទួលអ្នកទេសចរទាំងនោះរួចហើយ»។

ទន្ទឹមនឹងនោះ អ្នកឧកញ៉ាបានបង្ហាញការជឿជាក់ថា ការបើកច្រកព្រំដែនថ្មដាទៅជាច្រកអន្តរជាតិ នឹងរួមចំណែកធ្វើឱ្យខេត្តពោធិ៍សាត់ក្លាយទៅជាខេត្តមានសក្តានុពលសេដ្ឋកិច្ចខ្ពស់ ហើយក៏ជួយឱ្យជីវភាពរបស់ប្រជាពលរដ្ឋនៅតំបន់ថ្មដាកាន់តែល្អប្រសើរ៕

The post កម្ពុជា ត្រៀមបើកច្រកព្រំដែនអន្តរជាតិថ្មដា ស្របពេលអ្នកឧកញ៉ា ទ្រី ភាព បន្តបោះទុនរាប់រយលានដុល្លារអភិវឌ្ឍន៍នៅតំបន់នោះ appeared first on .