សម្តេចធិបតី ហ៊ុន ម៉ាណែត កាលយប់ថ្ងៃទី២៨ ខែឧសភា ឆ្នាំ២០២៦ បានបង្ហោះសារនៅលើទំព័រហ្វេសប៊ុកថា ៖កម្មវិធី «ដាស់ស្មារតីជាតិ» គឺជាការបង្ហាញនូវការចងចាំបទពិសោធ និងព្រឹត្តិការណ៍ដែលប្រទេសកម្ពុជាបានឆ្លងកាត់តាំងពីអតីតកាល ជាពិសេសក្នុងឆ្នាំ២០២៥ ដែលមានទាំងភាពឈឺចាប់ ការលំបាក និងភាពអយុត្តិធម៌ ដើម្បីប្រែក្លាយអតីតកាលទាំងនោះទៅជាកម្លាំងនៃសាមគ្គីភាព និងឯកភាពជាតិមហាគ្រួសារខ្មែរ​ សម្រាប់ពង្រឹងខ្លួន និងការពារសុខសន្តិភាពជាតិឱ្យបានរឹងមាំជានិច្ច។

សម្តេចធិបតី បានបញ្ជាក់បន្តថា៖«ដាស់ស្មារតីជាតិ» ក្រើនរំឭកយើងទាំងអស់គ្នាឱ្យ​ចងចាំជានិច្ច​ថា​ ហានិភ័យចំពោះសុខសន្តិភាព និងស្ថិរភាពជាតិ អាចកើតមានឡើងគ្រប់ពេលវេលា ប្រសិនបើយើងខ្វះការប្រុងប្រយ័ត្ន និងការត្រៀមខ្លួន។ ដូច្នេះ អ្វីដែលកម្ពុជាបានឆ្លងកាត់ទាំងអស់​នេះ​ គឺជាមេរៀនដ៏មានតម្លៃ ដែលជំរុញឱ្យយើងទាំងអស់គ្នា បន្តរួបរួម និងពង្រឹងខ្លួនឱ្យកាន់តែរឹងមាំ ដូចនេះ​ “ខ្មែរត្រូវចាំ​ ខ្មែរត្រូវតាំងចិត្ត​ ខ្មែរត្រូវធ្វើឱ្យបាន”។

តាមរយៈសំណេរខាងលើ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានសង្កត់ធ្ងន់ទៀតថា រាជរដ្ឋាភិបាល​កម្ពុជា​ ក្រោមការដឹកនាំរបស់សម្តេចធិបតីនាយករដ្ឋមន្ត្រី​ បានប្រកាស​ និងប្តេជ្ញាចិត្តឥតងាករេ​ក្នុងការការពារបូរណភាពទឹកដី​ អធិបតេយ្យភាព​ ទោះក្នុងតម្លៃណាក៏ដោយ​ ដោយឈរលើគោលការណ៍ច្បាប់ជាគោល​ ក្នុងនោះច្បាប់អន្តរជាតិ​ សន្ធិសញ្ញា​ អនុសញ្ញា​ និងកិច្ចព្រមព្រៀងដែលចូលជាធរមាន​ នៅមានសុពលភាព​ ជាពិសេស បើទោះបីជានៅមានសង្ឃឹមត្រឹម​ ១%ក៏ដោយ​ ក៏កម្ពុជានៅបន្តជ្រើសរើសប្រើប្រាស់គ្រប់យន្តការដែលមានស្រាប់​ ដើម្បីធានាសន្តិភាព​ ស្ថិរភាព​ និងការពារអាយុជីវិតវីរកងទ័ព​ ប្រជាជន​ បញ្ចៀសការបង្ហូរឈាមជាថ្មី៕ អត្ថបទ៖ហ្សាលីន

The post សម្តេចធិបតី៖កម្មវិធី«ដាស់ស្មារតីជាតិ» ជំរុញឱ្យយើងទាំងអស់គ្នា បន្តរួបរួម និងពង្រឹងខ្លួនឱ្យកាន់តែរឹងមាំ appeared first on .