លោក ហ៊ួត ណាលីន ម្ចាស់ចម្ការទុរេននៅស្រុកមេមត់ ខេត្តត្បូងឃ្មុំ បានប្រាប់ឧកញ៉ាញូស៍ថា ការប្រមូលផលទុរេនក្នុងចម្ការរបស់លោកនាឆ្នាំនេះហាក់មានការកើនឡើង ដោយឡែកតម្លៃហាក់មានការធ្លាក់ចុះបន្តិចបើធៀបនឹងឆ្នាំមុន ពោលឆ្នាំមុនផ្លែទុរេនអាចលក់បានទាបបំផុតតម្លៃ ១ ៨០០០រៀល ក្នុងមួយគីឡូក្រាម ប៉ុន្តែឆ្នាំនេះធ្លាក់ត្រឹម ១ ៦០០០រៀល ឬ ១ ៥០០០រៀលប៉ុណ្ណោះ ក្នុងមួយគីឡូក្រាមទៅតាមប្រភេទទុរេន។

លោកបន្តថា ទីផ្សារទុរេនឆ្នាំនេះហាក់មានការពិបាកបន្តិច ដោយសារមានការប្រកួតប្រជែងច្រើន ដូចជាការកើនឡើងនៃអ្នកដាំទុរេន ឬទុរេននាំចូលពីក្រៅប្រទេសជាដើម។

យ៉ាងណា លោកក៏មានការព្រួយបារម្ភមុនពេលទីផ្សារទុរេនកម្ពុជាគ្រោងនាំចេញទៅកាន់ប្រទេសចិននាថ្ងៃខាងមុខផងដែរ ដោយលោកគូសបញ្ជាក់ថា ដោយសារបច្ចុប្បន្នមានម្ចាស់ចម្ការមួយចំនួនប្រើប្រាស់គីមីលើដំណាំទុរេនរបស់ខ្លួន ដែលកត្តានេះជាបញ្ហាពេលនាំចេញទៅចិនឬក្រៅប្រទេសនានា។

ក្នុងន័យនេះ លោក ហ៊ួត ណាលីន អំពាវនាវឱ្យប្រជាពលរដ្ឋទាំងអស់ដែលមានដំណាំហូបផ្លៃមិនតែទុរេនចង់ឱ្យធ្វើជាលក្ខណៈធម្មជាតិឱ្យបានច្រើន ជាពិសេសនៅពេលដែលយើងនាំចេញទៅចិនឬក្រៅប្រទេសគេឱ្យធ្វើតាមលក្ខខណ្ឌរបស់គេ ដូច្នេះយើងត្រូវធ្វើតាមអ្វីដែលគេចង់បានទើបគេទទួលរបស់យើងបាន។

លោក ហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ បានគូសបញ្ជាក់ផងដែរថា ការនាំចេញទុរេនក្នុងខេត្តត្បូងឃ្មុំបច្ចុប្បន្នមិនទាន់មានជាផ្លូវការនៅឡើយនោះទេ ប៉ុន្តែមានក្រុមហ៊ុនមួយចំនួននកំពុងរៀបចំបន្ទប់ត្រជាក់ រៀបចំឃ្លាំង អាចឆ្នាំក្រោយមានទុរេននាំចេញទៅក្រៅប្រទេស ជាពិសេសប្រទេសចិន។

លោកបន្តថា បច្ចុប្បន្នតម្លៃទុរេននៅក្នុងខេត្តត្បូងឃ្មុំ ដែលកសិករលក់នៅតាមចម្ការផ្ទាល់គឺអាស្រ័យទៅលើតាមចម្ការនីមួយៗ ដោយលោកពិនិត្យឃើញតម្លៃមានការប្រែប្រួលពីមួយគីឡូ ១ ៤០០០រៀល ទៅ១ ៨០០០រៀល (នៅចម្ការ)។

ពាក់ព័ន្ធនឹងការរៀបចំខ្លួនដើម្បីនាំទុរេនទៅកាន់ទីផ្សារចិន លោក ហេង ពិសិដ្ឋ បានគូសបញ្ជាក់ថា មន្ទីរកសិកម្មខេត្តត្បូងឃ្មុំបានធ្វើការអញ្ជើញកសិករដាំទុរេននៅក្នុងខេត្តត្បូងឃ្មុំមកជួបជជែកគ្នា ផ្សព្វផ្សាយពីសេចក្តីជូនដំណឹងរបស់អគ្គនាយកដ្ឋានកសិកម្ម ដើម្បីពួកគាត់អាចពិចារណាបើសិនពួកគាត់មានបំណងចង់នាំទុរេនទៅកាន់ទីផ្សារចិន គឺគាត់ត្រូវបំពេញលក្ខខណ្ឌមួយចំនួន ជាពិសេសការចុះបញ្ជីចម្ការដើម្បីឱ្យខាងអគ្គនាយកដ្ឋានមានមូលដ្ឋានជូនព័ត៌មានទៅភាគីចិនអំពីបរិមាណទុរេនក្នុងខេត្តត្បូងឃ្មុំ។

ទន្ទឹមនឹងនោះ មន្ទីរក៏បានណែនាំអ្នកដាំទុរេនទាំងអស់ចូលរួមអនុវត្តន៍នូវចម្ការទុរេនមានសុវត្ថិភាពដោយគាត់ត្រូវចូលរួមអនុវត្តន៍នូវស្តង់ដារមួយគឺការអនុវត្តន៍កសិកម្មល្អ GAP ដើម្បីឱ្យទុរេនដែលផលិតបានមានស្តង់ដាររួមមួយ។ ហើយទន្ទឹមនឹងនោះមន្ទីរក៏បានណែនាំឱ្យអ្នកដាំទុរេនទាំងអស់ចេះសាមគ្គីគ្នាចងក្រងជាសហគមន៍កសិកម្មមួយ ដើម្បីរួមគ្នាគិតរួមគ្នាធ្វើ រួមគ្នារកទីផ្សារ ខណៈបើមិនចងក្រងជាសហគមន៍ទេ នោះព័ត៌មានដែលទទួលបានមិនជុំ ក៏បង្ករការលំបាកទៅដល់អ្នកវិនិយោគផងដែរ។

លោកបន្តទៀតថា អំឡុងខែកក្កដាខាងមុខ នេះ មន្ទីរកសិកម្មនឹងជួបជុំកសិករម្តងទៀតដើម្បីពិភាក្សាត្រៀមសម្រាប់ឆ្នាំក្រោយ ដោយធ្វើយ៉ាងណាកុំឱ្យលក់តែក្នុងស្រុក គឺយើងអាចនាំចេញទៅក្រៅប្រទេសបានជាពិសេសទៅកាន់ប្រទេសចិនតែម្តង។

យ៉ាងណាមិញ ប្រធានមន្ទីរកសិកម្មខេត្តត្បូងឃ្មុំរូបនេះបានមើលឃើញថា ប្រសិនបើអ្នកដាំទុរេនមិនបានចាប់ដៃគ្នាទេ ហើយមិនតម្រង់ទិសនាំចេញទៅកាន់ប្រទេសចិន កសិករអាចជួបបញ្ហាកកស្ទះទុរេននៅពេលណាមួយ ព្រោះបើប្រើប្រាស់តែក្នុងស្រុកគឺប្រើមិនអស់នោះឡើយ ហើយមិនទាន់ផងដែរ ដូច្នេះជាការដោះស្រាយបញ្ហានេះ គឺត្រូវតែប្រឹងប្រែងរកច្រកចេញទៅកាន់ប្រទេសចិនដែលយើងមាន MOUរួចហើយស្រេច៕

The post កសិករដាំទុរេននៅខេត្តត្បូងឃ្មុំកំពុងរៀបចំខ្លួន ត្រៀមនាំទុរេនទៅកាន់ទីផ្សារចិននៅឆ្នាំក្រោយ appeared first on .

តាមការបញ្ជាក់ពីសហគមន៍ចម្ការស្តេចទុរេន កាលពីថ្ងៃទី១៥ ខែឧសភា បានឱ្យដឹងថា ក្នុងឱកាសមហាកិត្តិយសនៃដំណើរទស្សនកិច្ចរបស់ ឯកឧត្ដម វ៉ាង វិនពិន សហគមន៍បានសម្រិតសម្រាំងទុរេនខ្មែរ ៣ប្រភេទ ជូនឯកឧត្តម និងក្រុមការងារ បានស្គាល់ និងសាកល្បងរសជាតិ៖ ១.ទុរេនឪខាក់ កំពត, ២.ទុរេនម៉នថង (ពូជល្បីថៃដាំដុះនៅកម្ពុជា) និង ៣.ទុរេនម៉ូសានឃីង (ពូជល្បីម៉ាឡេសស៊ី ដាំដុះនៅកម្ពុជា)។

ក្នុងឱកាសនោះដែរ ឯកឧត្តមឯកអគ្គរដ្ឋទូតចិន មានចំណាប់អារម្មណ៍ និងឱ្យតម្លៃខ្ពស់ចំពោះទុរេនឪខាក់ (កំពត) ក្រោយបានស្វែងយល់ពីលក្ខណះ៥យ៉ាង៖ ពូជ (Seed), ដី (Soil) ទឹក (Water) បរិយាកាស (Climate) និងរបៀបនៃការដាំដុះ (Farming method) របស់ប្រជាកសិករខ្មែរ ដែលផ្តោតលើគុណភាព និងសុវត្ថិភាព។ យ៉ាងណាមិញ ទុរេនម៉នថង ជាពិសេសទុរេនម៉ូសានឃីង ដែលដាំដុះនៅកម្ពុជាក៏មានរសជាតិឆ្ងាញ់មិនធម្មតាផងដែរ។

ជាចុងក្រោយ លោកឯកអគ្គរដ្ឋទូត សន្យាថានឹងជួយផ្សព្វផ្សាយទុរេនខ្មែរ ទៅកាន់ទីផ្សារប្រទេសចិន ទាក់ទាញការវិនិយោគការដាំដុះ កែឆ្នៃផលិតផលកសិកម្មខ្មែរ ជាពិសេសដំណាំទុរេន និងជំរុញការនាំចេញទៅកាន់ទីផ្សារប្រទេសចិន។ លើសពីនេះ ឯកឧត្ដមក៏បានលើកទឹកចិត្តឱ្យយើងជាសហគ្រិន និងប្រជាជនខ្មែរជឿជាក់លើរដ្ឋាភិបាលកម្ពុជាចិន ក្នុងការកសាងសង្គម និងសេដ្ឋកិច្ចដ៏ល្អនាពេលខាងមុខ សម្រាប់ប្រជាជននៃប្រទេសទាំងពីរ ប្រកបដោយនិរន្តភាព ក៏ដូចជាឆ្លងកាត់ការលំបាកជាមួយគ្នា នៅចំពោះអស្ថេរភាពនៃសំពាធពាណិជ្ជកម្មអន្តជាតិ។

សូមជម្រាបថា ទុរេនខ្មែរ ត្រូវបានគេយល់ថាជាទុរេនដាំដុះបែបធម្មជាតិ និងមានរស់ជាតិឈ្ងុយឆ្ងាញ់ ខណៈដែលធុរេនប្រទេសជិតខាង មានតម្លៃធូរថ្លៃជាង ប៉ុន្តែពុំសូវមានគុណភាពនោះទេ។ ជាក់ស្តែង កាលពីថ្ងៃទី១៣ ខែឧសភា ឆ្នាំ២០២៥ អគ្គនាយកដ្ឋានគយនិង រដ្ឋាករកម្ពុជា បានចេញសេចក្តីណែនាំដល់មន្រ្តីនៅតាមព្រំដែន ឱ្យចូលរួមទប់ស្កាត់ការនាំចូលផ្លែទុរេនស្រស់ពីប្រទេសជិតខាង ដែលប្រើប្រាស់សារធាតុគីមី ឬខូចគុណភាព នាំឱ្យប៉ះពាល់ដល់សុខភាពប្រជាជន៕

The post ឯកអគ្គរដ្ឋទូតចិន ចាប់អារម្មណ៍ខ្លាំងលើពូជទុរេនខ្មែរ និងសន្យាជួយផ្សព្វផ្សាយទុរេនខ្មែរ ទៅកាន់ទីផ្សារប្រទេសចិន appeared first on .

ការបង្ហាញចំណាប់អារម្មណ៍របស់ក្រុមហ៊ុន បានធ្វើឡើងក្នុងជំនួបសម្ដែងការគួរសម និងពិភាក្សាការងារ រវាងសម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា ជាមួយលោកស្រី Xuemei Chen ប្រធាន និងជាស្ថាបនិកនៃក្រុមហ៊ុន Zhengzhou Chen’s Sun  ក្នុងឱកាសអញ្ជើញចូលរួមកិច្ចប្រជុំកំពូលមហាអនុតំបន់មេគង្គ (GMS) លើកទី៨ នៅថ្ងៃទី៦-៧ ខែវិច្ឆិកា ឆ្នាំ២០២៤ នៅទីក្រុងគុនមិញ ខេត្តយូណាន ប្រទេសចិន  នាថ្ងៃទី៦ ខែវិច្ឆិកា ឆ្នាំ២០២៤។

ក្នុងឱកាសនេះជំនួប លោកស្រីប្រធានក្រុមហ៊ុនបានគោរពជម្រាបជូនសម្ដេចធិបតីថា លោកស្រីធ្លាប់មកទស្សនាប្រទេសកម្ពុជា ក្នុងឆ្នាំ២០១៨ និងពិនិត្យឃើញថា កម្ពុជាមានសក្ដានុពលខ្លាំងខាងវិស័យកសិកម្ម ជាពិសេសគឺឧស្សាហកម្មផ្លែឈើ (ដំណាំទុរេន)។

ក្នុងន័យនេះ លោកស្រីប្រធានក្រុមហ៊ុនមានចាប់អារម្មណ៍វិនិយោគលើវិស័យកសិកម្មនៅកម្ពុជា ពិសេសដំណាំទុរេន និងរោងចក្រកែច្នៃ ដើម្បីនាំចេញមកកាន់ទីផ្សារប្រទេសចិន និងប្រទេសផ្សេងទៀត ដែលនេះនឹងចូលរួមចំណែកបង្កើតការងារ បង្កើនប្រាក់ចំណូល និងលើកកម្ពស់ជីវភាពប្រជាជន នៅកម្ពុជា។

ជាការឆ្លើយតប សម្ដេចធិបតី បានស្វាគមន៍ចំណាប់អារម្មណ៍របស់ក្រុមហ៊ុនលើការវិនិយោគខាងវិស័យកសិកម្ម ជាពិសេសដំណាំទុរេន នៅកម្ពុជា និងបានគូសបញ្ជាក់ថា ប្រទេសកម្ពុជាមានសក្ដានុពលលើផលិតផលកសិកម្មច្រើនប្រភេទ ដែលវិនិយោគិនអាចនាំចេញទៅកាន់ទីផ្សារក្រៅប្រទេស ប្រកបដោយភាពប្រកួតប្រជែង។

សម្ដេចធិបតី ក៏បានលើកទឹកចិត្តក្រុមហ៊ុនឱ្យបន្តពិភាក្សាលម្អិត និងសហការជាមួយក្រសួង-ស្ថាប័ន នៃរាជរដ្ឋាភិបាលកម្ពុជា និងដៃគូក្នុងស្រុក សំដៅប្រែក្លាយផែនការវិនិយោគរបស់ក្រុមហ៊ុន ឱ្យចេញលទ្ធផលជាក់ស្ដែង ក្នុងពេលដ៏ខ្លីខាងមុខ។

សូមបញ្ជាក់ថា ក្រុមហ៊ុន Zhengzhou Chen’s ត្រូវបានបង្កើតឡើងក្នុងឆ្នាំ ១៩៩២ មានទីស្នាក់ការនៅទីក្រុង Zhengzhou ប្រទេសចិន។ ផ្តោតលើកការស្រាវជ្រាវ និងអភិវឌ្ឍន៍ពូជផ្លែឈើ ការដាំដុះទ្រង់ទ្រាយធំ ការកែច្នៃក្រោយការប្រមូលផល ការចែកចាយ ការដឹកជញ្ជូនខ្សែសង្វាក់ត្រជាក់ ចែកចាយគ្រប់បណ្តាញ, ការលក់ដុំ និងទីផ្សារលក់រាយ, ផលិតគ្រាប់ផ្លែឈើស្ងួត និងអាហារសម្រន់៕

The post ក្រុមហ៊ុនមួយរបស់ចិន ចាប់អារម្មណ៍បោះទុនវិនិយោគលើដំណាំទុរេននៅកម្ពុជា appeared first on .