ឧកញ៉ា ចាន់ សុឃាំង ប្រធានសហព័ន្ធស្រូវអង្ករកម្ពុជា បានឱ្យដឹងថា ការនាំចេញទៅកាន់ទីផ្សារប្រទេសហ្វីលីពីន​ក្នុងបរិមាណច្រើន​ជាលើកទី១នេះ គឺត្រូវបានអនុវត្តន៍ឡើងដោយ ក្រុមហ៊ុន ខ្មែរហ៊្វូត គ្រុប ឯ.ក ដែលមានឧកញ៉ា គឹម សាវុធ ជាអគ្គនាយក ដោយកើតចេញពីកិច្ចខិតខំប្រឹងប្រែងរបស់រាជរដ្ឋាភិបាល ដែលតែងតែខិតខំស្វែងរកទីផ្សារជូនអង្ករកម្ពុជា ជាពិសេសនៅគ្រប់កិច្ចសវនការ និងការប្រជុំនានា ជាមួយប្រមុខរដ្ឋាភិបាលប្រទេសផ្សេងៗ សម្តេចតេជោ ហ៊ុន សែន តែងតែស្នើឱ្យសមភាគីប្រទេសទាំងនោះជួយទិញអង្ករកម្ពុជា ឱ្យបានច្រើន ជាក់ស្តែងនៅក្នុងជំនួបប្រមុខរដ្ឋ និងប្រមុខការទូតទាំងអស់ ដែលក្នុងនោះរួមទាំងប្រធានាធិបតីប្រទេសហ្វីលីពីន ដែលបានមកធ្វើការទស្សនៈកិច្ចនៅកម្ពុជាក្នុងកំឡុងពេលកិច្ចប្រជុំកំពូលអាស៊ាននៅកម្ពុជា។

លោកឧកញ៉ាបន្តថា ក្រសួងពាណិជ្ជកម្ម ដែលមានក្រុមហ៊ុនហ្គ្រីនត្រេដ ជាសេនាធិការ បានធ្វើកិច្ចសហប្រតិបត្តិការជាមួយសហព័ន្ធស្រូវអង្ករកម្ពុជា រៀបចំការធ្វើទស្សនៈកិច្ចសិក្សាទីផ្សារដោយផ្ទាល់នៅប្រទេសហ្វីលីពីនកាលពីខែកុម្ភៈ ឆ្នាំ២០២៣ កន្លងទៅដោយទទួលបានការសម្របសម្រួលពី ឧកញ៉ា វ៉ាន់ ស៊ូអៀង ទីប្រឹក្សាសហព័ន្ធស្រូវអង្ករបានទទួលគណៈប្រតិភូដែលជាអ្នកនាំចូលពីប្រទេសហ្វីលីពីន កាលពីខែមីនា ឆ្នាំ២០២៣ ចំនួន ៣ក្រុមផ្សេងៗគ្នា ដើម្បីធ្វើទស្សនៈកិច្ចទៅពិនិត្យរោងចក្រដោយផ្ទាល់ រហូតឈានទៅដល់កិច្ចព្រៀមព្រៀងទិញលក់តែម្តង ដោយមានក្រុមហ៊ុន Khmer Foods Group Co.Ltd ជាអ្នកសម្រេចឈានមុខគេ។

សូមជម្រាបជូនថា ឧកញ៉ា គីម សាវុធ ជាមេឈ្មួញអង្ករជើងខ្លាំងចាស់វស្សាក្រាស់ក្រែលដែរហើយក្នុងចំណោមមេឈ្មួញ​អង្ករធំៗទាំងអស់នៅកម្ពុជា។ ក្រុមហ៊ុន KHMER FOOD GROUP CO., LTD ត្រូវបានគេស្គាល់ថាជាក្រុមហ៊ុនដ៏ធំមួយនៅ​កម្ពុជាដែលធ្វើការនាំអង្ករទៅលក់នៅលើទីផ្សារអន្ដរជាតិ។ ក្រៅពីរកស៊ីខាងស្រូវអង្ករ លោកក៏មា​ន​មុខជំនួញជាច្រើនផ្សេងទៀតផងដែរ។

សូមបញ្ជាក់បន្ថែមថា ក្នុងរយៈពេល ៥ខែ ដើមឆ្នាំ២០២៣នេះ កម្ពុជាសម្រេចបានការនាំចេញអង្ករចំនួន ២៧៨,១៨៤តោន ស្មើនឹង ១៩១.៦៤ លានដុល្លារសហរដ្ឋអាម៉េរិក ទៅកាន់គោលដៅចំនួន៤៩ ក្នុងនោះមានទីផ្សារថ្មីចំនួន១ ត្រូវបានកើតឡើង គឺទីផ្សារប្រទេសហ្វីលីពីន ដែលបាននាំចេញជាលើកដំបូងក្នុបរិមាណច្រើនមិនធ្លាប់មានពីមុន គឺចំនួន ២ ៥៧៥ តោន៕

The post តើពាណិជ្ជកររូបណា ឈានមុខនាំចេញអង្ករលក់នៅលើទីផ្សារហ្វីលីពី​ន​ ? appeared first on .

ក្នុងពិធីប្រកាសបើកច្រកទីផ្សារនាំចេញអង្ករកម្ពុជាទៅកាន់សាធារណរដ្ឋហ្វីលីពីន ក្រោមការដឹកនាំដោយលោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម និងភាគីឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋហ្វីលីពីន នៅថ្ងៃទី២៦ ខែមិថុនា ឆ្នាំ២០២៣នេះ លោក ប៉ាន សូរស័ក្តិ បានថ្លែងថា បន្ទាប់ពីកម្ពុជា បាននាំចេញអង្ករទៅហ្វីលីពីន នៅក្នុងចុងខែឧសភាកន្លងទៅ ក្នុងបរិមាណចំនួន ២ ៥៧៥ តោន ទទួលបានជោគជ័យ នាពេលនេះកម្ពុជាគ្រោងនឹងនាំចេញបន្តទៅហ្វីលីពីន បរិមាណ ២ ៥០០តោនទៀត នៅបំណាច់ខែមិថុនាខាងមុខនេះ។

លោក បន្តថា កម្ពុជាសម្រេចបាននូវជំហ៊ានថ្មីមួយទៀត ក្នុងការបើកទីផ្សារ ជាពិសេសទីផ្សារប្រទេសហ្វីលីពីន ដែលជាទីផ្សារដ៏មានសក្តានុពល សម្រាប់វិស័យស្រូវ-អង្ករនេះ។

លើសពីនោះ លោក ក៏បានគូសបញ្ជាក់ថា នេះជានិមិត្តរូបដ៏ល្អមួយនៃកិច្ចចាប់ផ្តើមពាណិជ្ជកម្មអង្ករកម្ពុជា-ហ្វីលីពីន ដែលភាគីទាំងពីរ នឹងប្រឹងប្រែងធ្វើការឱ្យកាន់តែស៊ីជម្រៅបន្ថែមទៀត លើកិច្ចការផ្សព្វផ្សាយជម្រុញទីផ្សារ និងទាក់ទាញអតិថិជនហ្វីលីពីនអោយចូលចិត្តប្រើប្រាស់ និងទទួលទានអង្ករកម្ពុជាឱ្យកាន់តែច្រើនឡើង ។

គួរបញ្ចាក់ថា នេះជាការនាំចេញអង្ករកម្ពុជាជាលើកទី២ហើយទៅកាន់ហ្វីលីពីន ក្នុងឆ្នាំ២០២៣ ដោយលើកទី១ ការនាំចេញក្នុងបរិមាណចំនួន ២,៥៧៥តោន ក្នុងខែឧសភា ដែលនេះចាត់ទុកថាជាជោគជ័យមួយរបស់ប្រទេសកម្ពុជា ក្នុងការនាំចេញអង្ករចូលទីផ្សារថ្មី។ប្រទេសហ្វីលីពីនជាប្រទេសដែលនាំចូលអង្ករប្រមាណជាង៤លានតោន ជារៀងរាល់ឆ្នាំ៕

The post កម្ពុជា គ្រោងនាំចេញអង្ករប្រមាណជាង២ពាន់តោន បន្ថែមទៀត ទៅហ្វីលីពីន នាបំណាច់ខែមិថុនានេះ appeared first on .