យោងតាមម្ចាស់សណ្ឋាគារទែរូមួយកន្លែងក្នុងខេត្តរតនគីរីបានឱ្យដឹងថានៅថ្ងៃចូលឆ្នំាថ្មីខាងមុខនេះអ្នកស្រីបង្ហាញក្តីរំពឹងថានិងអាចទទួលបានភ្ញៀវជាតិក៏ដូចជាភ្ញៀវអន្តរជាតិដែលកំពុងស្នាក់នៅក្នុងប្រទេសកម្ពុជានិងមកលេងកម្សាន្តច្រើននៅក្នុងខេត្តនោះនិងធ្វើឱ្យអ្នកស្រីសប្បាយចិត្ត។

អ្នកស្រី ខៃ ចិន្តា ម្ចាស់សណ្ឋាគារទែរូ និងជាអនុប្រធានសមាគមសណ្ឋាគារកម្ពុជាមានប្រសាសន៍ថា «នៅឆ្នំានេះមានការប្លែកខ្លំាងត្រង់ថាភ្ញៀវ កក់បន្ទប់នៅសណ្ឋាគារយើងសម្រាប់នៅថ្ងៃចូលឆ្នំាខ្មែរគឺមានចំនួនតិចមែនទែន បើគិតជាភាគរយមានមិនដល់១០%ផងពិតជាចម្លែកមែនទែន។ កន្លងមកខ្ញុំបានសួរទៅអូតែលមួយចំនួនក៏មានការធ្លាក់ចុះចំនួនភ្ញៀវដូចទែរូដែរ ខុសកាលពីពេលៗមុនដល់ថ្ងៃទី១១មេសាឆ្នំា២០២៣ បានយ៉ោងហោចណាស់ក៏បាន៤០ឬ៥០%នៃចំនួនភ្ញៀវបានស្នាក់នៅ»។

បើតាមម្ចាស់សណ្ឋាគារ ទែរូ ការថមថយនៃចំនួនភ្ញៀវកក់បន្ទប់ស្នាក់នៅសម្រាប់ថ្ងៃចូលឆ្នំាថ្មីឆ្នំា២០២៣នេះ ពាក់ព័ន្ធនិងកត្តាច្រើនដូចជាផ្លូវធ្វើដំណើរឆ្ងាយត្រូវការចំណាយពេល៧ទៅ៨ម៉ោងទើបដល់ទីតំាង, ចំណាយប្រាក់លើការធ្វើដំណើររួមនិងហូបចុកអស់ច្រើន,ភ្ញៀវមានការរអ៊ូរទំាអំពីការផាកពិន័យលើការបើកបរលើសល្បឿនកំណត់(ប៉ះពាល់អារម្មណ៍)និងពុំមានពេលគ្រប់គ្រាន់សម្រាប់ការកម្សាន្តជាដើម។

អ្នកស្រីបន្តថា «ចំម្ងាយផ្លូវឆ្ងាយនេះវាបានកាត់បន្ថយចំនួនភ្ញៀវ បើទោះបីពួកគាត់ចង់ទៅកម្សាន្តយ៉ាងណាក៏ពួកគាត់មិនមានពេលវេលាគ្រប់គ្រាន់ ហើយត្រូវការចំណាយប្រាក់ច្រើនក្នុងការធ្វើដំណើរ។ជាងនេះនៅខេត្តយើងនេះអត់មានរៀបចំព្រឹត្តិការណ៍ធំៗដូចទៅនិងខេត្តផ្សេង»។

ប្រធានសមាគមទីភ្នាក់ងារទេសចរណ៍កម្ពុជា លោកជំទាវ ឆាយ ស៊ីវលីន មានប្រសាសន៍ថា ជុំវិញភ្ញៀវទេសចរចេញដើរកម្សាន្តនៅថ្ងៃចូលឆ្នំាថ្មីប្រពៃណីជាតិខ្មែរឆ្នំានេះ យើងទទួលស្គាល់ថាតំបន់ទេសចរណ៍នៅប៉ែកឦសាន្តទាក់ទាញភ្ញៀវគឺចាញ់ជាងតំបន់វប្បធម៌ក្នុងខេត្តសៀមរាប ដោយសារនៅឆ្នំានេះមានការជំរុញច្រើនហើយការរៀបចំឃើញថាមានភាពកាន់តែទាក់ទាញខ្លំាងឡើង ដែលជាហេតុធ្វើឱ្យនៅតំបន់កម្សាន្តប៉ែកឦសាន្តហាក់មានភាពស្ងាត់បន្តិច។

លោកជំទាវសង្កត់ធ្ងន់ថា «បើយើងក្រឡេកទៅមើលចំម្ងាយផ្លូវពិតជាវែងឆ្ងាយ ហើយអត់កន្លែងដែលត្រូវឈប់សម្រាកលេង អ៊ីចឹងចំណុចនេះវាក៏ជារបំាងមួយសម្រាប់ភ្ញៀវនៅក្នុងស្រុកក៏ដូចជាភ្ញៀវបរទេស»។

លោកជំទាវលើកឡើងថានៅថ្ងៃឈប់សម្រាកពេលបុណ្យទានម្តងៗបើមានការរៀបចំដោយធ្វើយ៉ាងណាឱ្យមានការចាប់អារម្មណ៍គឺ អាចទាក់ទាញភ្ញៀវទេសចរបានច្រើន ព្រោះថាភ្ញៀវទេសចរក្នុងស្រុកនិងក្រៅស្រុកតែងតែសម្លឹងរកមើលតែអ្វីដែលប្លែក ល្អហើយសប្បាយ អ៊ីចឹងខេត្តណាដែលមានការៀបចំបានល្អនិងធ្វើឱ្យអ្នកទេសចរចង់ដឹងឬទៅកម្សាន្តច្រើនក្នុងកំឡុងពេលថ្ងៃឈប់សម្រាករបស់ពួកគាត់៕ សារេត

The post តំបន់ទេសចរណ៍នៅប៉ែកឦសាន្តធ្លាក់ចុះចំនួនភ្ញៀវទៅកម្សាន្តក្នុងរដូវកាលចូលឆ្នំាខ្មែរ appeared first on .

ថ្លែងនៅក្នុងសន្និសីទសារព័ត៌មានស្ដីអំពីសមិទ្ធផល៥ឆ្នាំកន្លង របស់រដ្ឋបាលខេត្តរតនគិរី នៅទីស្ដីការគណៈរដ្ឋមន្ត្រី នាព្រឹកថ្ងៃទី៤ ខែមេសានេះ លោក ញ៉ែម សំអឿន អភិបាលនៃគណៈអភិបាលខេត្តរតនគិរី បានលើកឡើងថា វិស័យទេសចរណ៍ជាវិស័យដ៏សំខាន់មួយក្នុងចំណោមវិស័យសំខាន់ៗបី ដែលជាឆ្អឹងខ្នងនៃសេដ្ឋកិច្ចខេត្ត។

លោកបានបន្តថា រយៈពេល៥ឆ្នាំមកនេះ ភ្ញៀវទេសចរដែលមកលេងរតនគិរី គឺ១ ០១៤ ០៦៥ នាក់។ ក្នុងនោះមានភ្ញៀវជាតិ ៩៥៧ ៥៦៤នាក់ និងភ្ញៀវអន្តរជាតិមាន ៥៦ ៥០១នាក់ ។

ជាមួយគ្នានេះ លោក ង៉ែត ពិទូ ប្រធានមន្ទីទេសចរណ៍ខេត្តរតនគិរី បានឱ្យដឹងដែរថា នៅក្នុងឆ្នាំ២០២២ ពោលគឺនៅក្រោយពីកម្ពុជា ងើបចេញពីវិបត្តិជំងឺឆ្លងរាលដាល កូវីដ-១៩ ខេត្តរតនគិរីទទួលបានភ្ញៀវទេសចរជាង២០ម៉ឺននាក់ ដែលក្នុងម្នាក់ចំណាយថវិកាជាមធ្យមប្រមាណ៣០ម៉ឺនរៀល។ ជារួមភ្ញៀវជាង២០ម៉ឺននាក់ បានចំណាយថវិកា ៦០០ពាន់លានរៀល សម្រាប់ជួយដល់សេដ្ឋកិច្ចខេត្តរតនគិរីដោយផ្ទាល់តែម្ដង។

គួរបញ្ជាក់ថា រតនគិរីជាខេត្តមួយដែលស្ថិតនៅភូមិភាគឦសាន្តនៃ ព្រះរាជាណាចក្រកម្ពុជា ដែលមានចម្ងាយពីរាជធានីភ្នំពេញ ៥៨៨គីឡូម៉ែត្រ មានព្រំប្រទល់ខាងលិច ជាប់នឹងខេត្តស្ទឹងត្រែង ខាងកើតជាប់នឹងខេត្តយ៉ាឡាយ និងខេត្តកន្ទូមនៃសាធារណរដ្ឋសង្គមនិយមវៀតណាម ខាងជើងជាប់នឹងខេត្តអត្តពឺ នៃសាធារណរដ្ឋប្រជាធិបតេយ្យប្រជាមានិតឡាវ និងខាងត្បូងជាប់នឹងខេត្តមណ្ឌលគិរី។

ខេត្តរតនគិរីមាន រមណីយដ្ឋានទេសចរណ៍ចំនួន ៣០កន្លែង ក្នុងនោះមាន រមណីយដ្ឋានធម្មជាតិ ២០កន្លែង រមណីយដ្ឋានវប្បធម៌ធម្មជាតិ ២កន្លែង និងរមណីកែច្នៃចំនួន៨កន្លែង៕

អត្ថបទ៖ រ៉េត សុកធា

The post ៥ឆ្នាំចុងក្រោយ ខេត្តរតនគិរី ទាក់ទាញភ្ញៀវទេសចរ​បានជាង១លាននាក់ appeared first on .