ទំហំពាណិជ្ជកម្មទ្វេភាគី កម្ពុជា-ជប៉ុន

កម្ពុជា-ជប៉ុន នៅតែបន្តរក្សាបានទំហំពាណិជ្ជកម្មជាង២ពាន់លានដុល្លារ នៅឆ្នាំ២០២២

ជំទាវឧកញ៉ាស្រីទីន — Sat, 25 Feb 2023 03:11:30 +0000

កម្ពុជា-ជប៉ុន នៅតែអាចបន្តរក្សាបានទំហំពាណិជ្ជកម្មប្រមាណជាង២ពាន់លានដុល្លារ កាលពីឆ្នាំ ២០២២ ខណៈភាគីទាំងពីរ នៅតែប្តេជ្ញាថា នឹងខិតពង្រីកកិច្ចសហប្រតិបត្តិការឱ្យកាន់តែលូតលាស់ និងជម្រៅថែមទៀត ដើម្បីជំរុញកំណើនសេដ្ឋកិច្ចប្រទេសទាំងពីរ។នេះបើតាមការឱ្យដឹង តាមរយៈពិធីបោះឆ្នោតជ្រើសរើសបេក្ខជន ការិយាល័យតំណាងសភាពាណិជ្ជកម្មកម្ពុជាប្រចាំសេនដៃ ប្រទេសជប៉ុនចំនួន១៤រូប (ខ្មែរ៧ រូប និងជប៉ុន៧រូប)សម្រាប់ អាណត្តិទី១ លើកទី១ កាលថ្ងៃទី ២៤ កុម្ភះ ឆ្នាំ ២០២៣។

ពិធីបោះឆ្នោតជ្រើសរើសបេក្ខជន ការិយាល័យតំណាងសភាពាណិជ្ជកម្មកម្ពុជាប្រចាំសេនដៃ បានបធ្វើឡើងក្រោមវត្តមាន លោក ទុយ រី ឯកអគ្គរាជទូតកម្ពុជាប្រចាំប្រទេសជប៉ុន អមដោយលោក ហង់ សុជីវិន ទីប្រឹក្សាពាណិជ្ជកម្ម លោកជំទាវ លោកឧកញ៉ា លោក លោកស្រី ជាប្រធានក្រុមហ៊ុនជប៉ុន ក្រុមហ៊ុនកម្ពុជា នឹងភាគីពាក់ព័ន្ធសំខាន់ៗ ប្រមាណ ៧០ នាក់។

នាឱកាសនោះ លោក ទុយ រី ឯកអគ្គរាជទូតកម្ពុជាប្រចាំប្រទេសជប៉ុន បានឱ្យដឹងថា ទំហំនៃការលូតលាស់ និងជម្រៅនៃកិច្ចសហប្រតិបត្តិការ បានតម្លើងពីភាពជាដៃគូយុទ្ធសាស្ត្រនៅឆ្នាំ២០១៣ ទៅជាភាពជាដៃគូយុទ្ធសាស្ត្រ គ្រប់ជ្រុងជ្រោយ នៅឆ្នាំនេះ ២០២៣ ដែលជាខួបលើកទី៧០នៃទំនាក់ទំនងការទូតរវាងប្រទេសទាំងពីរ។

ជាមួយគ្នានេះ ចំពោះផ្នែកសេដ្ឋកិច្ចកម្ពុជា-ជប៉ុនវិញ លោកបានឱ្យដឹងដែរ ពាណិជ្ជកម្មទ្វេភាគី បានកើនឡើងពី ៩០៥ លានដុល្លារ នៅឆ្នាំ២០១៤ ទៅ ២,០១០លានដុល្លារអាមេរិក នៅឆ្នាំ២០១៩ និងទោះជារងផលប៉ះពាល់ដោយកូវីដ ១៩ កម្ពុជាជប៉ុនបន្តរក្សាបានទំហំពាណិជ្ជកម្មប្រមាណ ២,៤៥៤ លានដុល្លារឆ្នាំ ២០២២ ដែលក្នុងនោះការនាំចូលពីកម្ពុជាមានទឹកប្រាក់ ១,៩៣៩ លានដុល្លារ និងការនាំចេញទៅកម្ពុជាមានទឹកប្រាក់ ៥១៥ លានដុល្លារ។

លើសពីនេះទៀត ឯកអគ្គរាជទូតកម្ពុជាប្រចាំប្រទេសជប៉ុនរូបនេះ បានបញ្ជាក់ទៀតថា ក្រៅពីដៃគូយុទ្ធសាស្ត្រគ្រប់ជ្រុងជ្រោយ រាជរដ្ឋាភិបាលកម្ពុជាមាន យុទ្ធសាស្ត្រការទូតសេដ្ឋកិច្ចកម្ពុជា ដែលភារកិច្ចសំខាន់គឺ (១) ការជំរុញការនាំចេញពីកម្ពុជា មកជប៉ុន (២)ទាក់ទាញការវិនិយោគទុនពីជប៉ុនទៅកម្ពុជា (៣)លើកកម្ពស់ការធ្វើទេសចរជប៉ុនទៅកម្ពុជា និង (៤) ផ្លាស់ប្តូរវប្បធម៌ និងកីឡាទៅវិញទៅមកថែមទៀត៕

The post កម្ពុជា-ជប៉ុន នៅតែបន្តរក្សាបានទំហំពាណិជ្ជកម្មជាង២ពាន់លានដុល្លារ នៅឆ្នាំ២០២២ appeared first on .

រដ្ឋាភិបាលជប៉ុនសម្រេចផ្តល់ហិរញ្ញប្បទានឥតសំណង ៣,៣១លានដុល្លារអាមេរិកដល់កម្ពុជាដើម្បីអភិវឌ្ឍន៍ធនធានមនុស្ស

ឧកញ៉ាកោះក្របី — Mon, 26 Jul 2021 03:16:54 +0000

រដ្ឋាភិបាលជប៉ុន បានសម្រេចផ្តល់ហិរញ្ញប្បទាន ឥតសំណងចំនួន ៣៦២ លានយ៉េន ដែលស្មើប្រមាណ ៣,៣១លានដុល្លារអាមេរិក ដើម្បីអនុវត្តគម្រោង «អាហារូបករណ៍អភិវឌ្ឍន៍ធនធានមនុស្ស» នៅកម្ពុជា។

សូមចុច Subscribe Telegram oknha_news ដើម្បីទទួលបានព័ត៌មានគ្រប់សកម្មភាពឧកញ៉ា សេដ្ឋកិច្ច ពាណិជ្ជកម្ម និងសហគ្រិនភាព!

ពិធីចុះហត្ថលេខាលើលិខិតប្ដូរសារ ស្ដីពី ការផ្ដល់ហិរញ្ញប្បទានឥតសំណងរបស់ជប៉ុន ដែលមានទឹកប្រាក់សរុបចំនួន៣៦២លានយ៉េន ធ្វើឡើងព្រឹកថ្ងៃទី២៦ ខែកក្កដានេះ ក្រោមវត្តមានលោកឧបនាយករដ្ឋមន្រ្តី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា និងលោក មិកាមិ ម៉ាសាហ៊ីរ៉ូ (MIKAMI Masahiro) ឯកអគ្គរាជទូតជប៉ុនប្រចាំកម្ពុជា។

បើតាមក្រសួងការបរទេស គម្រោងមានតម្លៃ៣,៣១លានដុល្លារអាមេរិកនេះគឺសម្រាប់អនុវត្តឆ្នាំ២០២១នេះ។

ក្រសួងការបរទេសបញ្ជាក់ថា ហិរញ្ញប្បទានឥតសំណង ដែលផ្ដល់ដោយរដ្ឋាភិបាលជប៉ុននេះ នឹងចូលរួមចំណែកយ៉ាងសំខាន់ ដល់ការលើកកម្ពស់ការអភិវឌ្ឍ ធនធានមនុស្សនៅកម្ពុជា ក៏ដូចជាជួយពង្រឹងបន្ថែមទៀត នូវកិច្ចសហប្រតិបត្តិការជិតស្និទ្ធ និងចំណងមិត្តភាពជាប្រពៃណី រវាងប្រទេសទាំងពីរ៕

The post រដ្ឋាភិបាលជប៉ុនសម្រេចផ្តល់ហិរញ្ញប្បទានឥតសំណង ៣,៣១លានដុល្លារអាមេរិកដល់កម្ពុជាដើម្បីអភិវឌ្ឍន៍ធនធានមនុស្ស appeared first on .

ដើមឆ្នាំ២០២០ ទំហំពាណិជ្ជកម្មទ្វេភាគីកម្ពុជា-ជប៉ុន សម្រេចបាន ប្រមាណ ៨៤១ លានដុល្លារ

ឧកញ៉ាកោះក្របី — Thu, 04 Feb 2021 06:59:05 +0000

ទំហំពាណិជ្ជកម្មទ្វេភាគី កម្ពុជា-ជប៉ុន សម្រេចបានប្រមាណ ២,០១០ លានដុល្លារអាមេរិក ក្នុងនោះកម្ពុជានាំចេញទៅជប៉ុនក្នុងចំនួនទឹកប្រាក់ប្រមាណ ១,១៣១ លានដុល្លារ និងនាំចូល មកវិញក្នុងចំនួនទឹកប្រាក់ប្រមាណ ជាង ៨៧៩ លានដុល្លារ។ គិតត្រឹម ៦ ខែដើមឆ្នាំ២០២០ ទំហំពាណិជ្ជកម្មទ្វេភាគីកម្ពុជា-ជប៉ុន សម្រេចបាន ប្រមាណ ៨៤១ លានដុល្លារ។ ការថ្លែងបញ្ជាក់របស់រដ្ឋមន្រ្តីក្រសួងពាណិជ្ជកម្ម ឯកឧត្តម ប៉ាន សូរស័ក្តិ ក្នុងពិធីបើកសម្ពោធការដាក់តាំងបង្ហាញទំនិញថ្មី ទំនិញជប៉ុន ក្រោមប្រធានបទ “ទំនិញល្អ ទំនិញជប៉ុន ២០២១ (Good Goods Japan 2021)” ក្នុងអគារប្រណិត Vattanac Capital Tower រាជធានីភ្នំពេញ ថ្ងៃទី៣ ខែកុម្ភៈម្សិលមិញនេះ។

លោកបន្តថា ទំនិញដែលកម្ពុជានាំចេញទៅជប៉ុនមានដូចជា ផលិតផលសម្លៀកបំពាក់កាត់ដេរ ស្បែកជើង គ្រឿងសង្ហារឹម គ្រឿងសំអាង ក្រដាស សម្ភារៈការិយាល័យ ស្បែកនិងផលិតផលធ្វើអំពីស្បែក និងដែក ។ល។ ទំនិញដែលនាំចូលពីជប៉ុនរួមមាន៖ គ្រឿងម៉ាស៊ីន រថយន្ត សាច់ គ្រឿងអេឡិចត្រូនិច សង្ហារឹម ក្រដាស កប្បាស ក្រណាត់គ្រប់ប្រភេទ ផលិតផលផ្លាស្ទីក សម្ភារៈកីឡា និងគ្រឿងបន្ទាប់បន្សំ ជាដើម។

សូមជម្រាបថា ចាប់តាំងពីឆ្នាំ១៩៩៤ ដល់ឆ្នាំ២០១៨ គម្រោងវិនិយោគរបស់ជប៉ុន នៅកម្ពុជា មានចំនួន១៣៧ គម្រោង ដែលមានទុនវិនិយោគសរុបចំនួន ២,៤៨៦ លានដុល្លារ។ ក្នុងឆ្នាំ២០១៩ វិនិយោគ មាន ៦ គម្រោង ដែលមានទឹកប្រាក់ចំនួន ២៩៩ លានដុល្លារ ក្នុងនេះ គម្រោងសាងសង់ផ្សារ AEON Mall 3 មាន ទុនវិនិយោគ រហូតដល់ ២៨៩.៦លានដុល្លារ ហើយក្នុងឆ្នាំ២០២០ មាន ១ គម្រោង ដែលមានទឹកប្រាក់ចំនួន ៧.១៧លានដុល្លារ ភាគច្រើន គឺវិនិយោគក្នុងតំបន់សេដ្ឋកិច្ចពិសេសភ្នំពេញ បាវិត នាងកុក ប៉ោយប៉ែត និងក្នុង តំបន់សេដ្ឋកិច្ចពិសេសខេត្តព្រះសីហនុ៕

The post ដើមឆ្នាំ២០២០ ទំហំពាណិជ្ជកម្មទ្វេភាគីកម្ពុជា-ជប៉ុន សម្រេចបាន ប្រមាណ ៨៤១ លានដុល្លារ appeared first on .